San na Gado Kownukondre?
A piki fu Bijbel
Gado Kownukondre na wan trutru tirimakti di Yehovah Gado seti. Bijbel e kari „a Kownukondre fu Gado” sosrefi „a Kownukondre fu hemel”. Dati de so fu di a tirimakti disi de na ini hemel (Markus 1:14, 15; Mateyus 4:17). A abi son sani fu libisma tirimakti, ma a bun omeni tron moro den.
Tiriman. Gado poti Yesus Krestes fu de Kownu fu a Kownukondre èn a gi en moro makti leki iniwan tra libisma tiriman (Mateyus 28:18). Yesus e gebroiki en makti soso fu du bun sani. Wi sabi dati fu di a sori kaba taki a de wan tiriman di abi sari-ati nanga sma èn di sma kan frutrow (Mateyus 4:23; Markus 1:40, 41; 6:31-34; Lukas 7:11-17). Nanga yepi fu Gado, Yesus teki sma fu ala kondre fu „tiri grontapu leki kownu” nanga en na ini hemel.—Openbaring 5:9, 10.
O langa a o tiri. Libisma tirimakti e opo èn e fadon, ma Gado Kownukondre „noiti no o kisi pori”.—Danièl 2:44.
Den borgu. Ala sma di e du san Gado wani kan tron wan borgu fu Gado Kownukondre, awinsi fu sortu lo noso kondre den de.—Tori fu den apostel 10:34, 35.
Den wet. Den wet fu Gado Kownukondre no e taki nomo san sma no mag du, ma den e yepi den borgu fu tron moro bun sma. Luku wan eksempre na ini Bijbel: „’Yu musu lobi Yehovah yu Gado nanga yu heri ati, nanga yu heri libi, èn nanga yu heri frustan.’ Disi na a fosi èn a moro bigi komando. A di fu tu komando de leki a wan disi èn dati na: ’Yu musu lobi tra sma leki fa yu lobi yusrefi’” (Mateyus 22:37-39). Te den borgu fu a Kownukondre lobi Gado èn den lobi tra sma, dan den o wani du bun gi trawan.
Leri. Gado Kownukondre e poti wet gi den borgu fu en, ma a e leri sma tu fa den musu hori densrefi na den wet disi.—Yesaya 48:17, 18.
San a o du. Gado Kownukondre no e meki den tiriman kon gudu dan a e pina den borgu na a srefi ten. Ma a Kownukondre o du san Gado wani èn san a pramisi. A o meki den sma di lobi Gado libi fu têgo na wan paradijs na grontapu.—Yesaya 35:1, 5, 6; Mateyus 6:10; Openbaring 21:1-4.