Yehovah Kotoigi e broko osofamiri noso den e meki den kon moro tranga?

Leki Kotoigi fu Yehovah, wi e du muiti fu abi wan koloku osofamiri, ma sosrefi fu yepi tra sma fu abi wan koloku osofamiri tu. Wi e lespeki Gado leki a sma di seti na osofamiri libi (Genesis 2:​21-​24; Efeisesma 3:​14, 15). Bijbel abi gronprakseri di e yepi sma na heri grontapu fu abi wan koloku trowlibi.

San Yehovah Kotoigi e du fu meki osofamiri kon moro tranga

Wi e du ala san wi man fu fiti den rai fu Bijbel, fu di den e yepi wi fu tron moro bun masra, wefi èn moro bun papa nanga mama (Odo 31:10-​31; Efeisesma 5:⁠22–​6:4; 1 Timoteyus 5:8). Srefi te sma na ini son osofamiri no de fu a srefi bribi, toku den koni rai fu Bijbel e yepi den fu abi wan koloku libi (1 Petrus 3:​1, 2). Poti prakseri na san wan tu sma di no de Kotoigi ondrofeni baka di a patna fu den tron wan Yehovah Kotoigi:

• „Den fosi siksi yari di wi ben libi makandra ben lai nanga trobi nanga stress. Baka di Ivete tron wan Yehovah Kotoigi, a ben kon abi moro lobi nanga pasensi. Den kenki di a tyari kon na ini en libi kibri a trowlibi fu wi.”​—Clauir, fu Brasyonkondre.

• „Mi no ben lobi en srefisrefi, di mi masra Chansa bigin studeri Bijbel nanga Yehovah Kotoigi. Mi ben prakseri taki den e broko osofamiri. Ma mi kon si taki na Bijbel yepi wi fu abi wan bun trowlibi.”​—Agness, fu Sambia.

Na ini a diniwroko fu wi, wi e sori sma fa den leri fu Bijbel kan yepi den fu

• Teki koni bosroiti te den e suku wan trowpatna

• Lusu den problema di kan kon ini a fosi yari fu den trowlibi

• Sabi fa den musu libi nanga den famiri fu den patna

• Gebroiki den moni bun

• No haritaki nanga makandra

• Leri fu gi pardon

• Kweki den pikin bun

Trobi e kon ini a trowlibi fu wan sma te a go na wan tra kerki?

Fu taki en leti, son leisi a e tyari trobi. Fu eksempre, wan raportu fu 1998 fu Sofres, wan organisâsi di e ondrosuku sani, e taki dati 1 fu ibri 20 trowlibi pe wan fu den patna de wan Kotoigi, ben abi seryusu problema di a patna dati tron wan Kotoigi.

Yesus ben taki na fesi dati den wan di o gi yesi na den leri fu en, kan kisi problema nanga den famiri son leisi (Mateyus 10:32-​36). Will Durant, wan historia skrifiman, taki dati na ini a Gran Kownukondre Rome „sma ben taki dati a Kresten bribi ben e broko osofamiri”a èn na a srefi sani dati sma e taki fu son Yehovah Kotoigi na ini a ten disi. Ma a de so trutru taki na a Kotoigi na a sma di e tyari pratifasi kon na ini osofamiri?

Di sma taki dati Yehovah Kotoigi e broko osofamiri, dan a Krutubangi fu Europa di e feti gi den reti fu libisma, taki dati problema de na ini den osofamiri disi fu di a patna di no de wan Kotoigi no „wani lespeki a reti di a trawan abi fu teki sortu bribi a wani”. A Krutubangi taki tu: „A sani disi e pasa na ini ala osofamiri pe sma no abi a srefi bribi, èn na so a de tu nanga Yehovah Kotoigi.”b Ma awinsi sma no lobi den Yehovah Kotoigi fu den bribi ede, toku den Kotoigi e meki muiti fu fiti a Bijbel rai disi: „Te wan sma du unu wan ogri, un no musu du a sma dati ogri baka. . . . Du ala san yu man fu libi bun nanga ala sma.”​​—Romesma 12:17, 18.

Fu san ede Yehovah Kotoigi e bribi taki den musu trow soso nanga sma di abi a srefi bribi leki den?

Den Kotoigi e hori densrefi na a leri fu Bijbel di e taki dati wan sma musu trow „soso nanga wan sma di de wan bakaman fu Masra”, dati wani taki, trow nanga wan sma di de ini a srefi bribi leki den (1 Korentesma 7:​39). A no Bijbel wawan e taki disi. Fu eksempre, wan artikel fu a Journal of Marriage and Family fu 2010 e taki dati „trowpaar di abi a srefi bribi èn di de fu a srefi kerki” furu leisi abi wan koloku trowlibi.c

Ma toku den Kotoigi no e gi sma di de fu a bribi fu den deki-ati fu prati nanga a patna fu den di no de wan Kotoigi. Bijbel e taki: „Efu wan brada abi wan wefi di no de na bribi èn efu a wefi wani tan nanga en, dan a brada no musu gowe libi en. Efu wan uma abi wan masra di no de na bribi èn efu a masra wani tan nanga en, dan na uma no musu gowe libi en masra” (1 Korentesma 7:​12, 13). Yehovah Kotoigi e hori densrefi na a komando disi.