Suma na a anti-krestes?

A piki fu Bijbel

Na anti-krestes a no gewoon wán sma noso wán grupu sma. Bijbel e taki dati „furu feanti fu Krestes [noso, anti-krestes, futuwortu] de” (1 Yohanes 2:18). Na ini Grikitongo, a wortu „anti-krestes” wani taki „de teige (noso na presi fu) Krestes”. A abi fu du nanga iniwan sma di e du den sani disi:

• A no e bribi taki Yesus na a Krestes (Mesias), noso a no e bribi taki en na a Manpikin fu Gado.​—1 Yohanes 2:​22.

• A de teige a Krestes, a Salfuwan fu Gado.​—Psalm 2:​1, 2; Lukas 11:23.

• A e du leki en na a Krestes.​—Mateyus 24:24.

• A e frufolgu den bakaman fu Krestes èn te wan sma e du wan sani nanga den bakaman fu Yesus, dan Yesus e si en leki a e du en nanga en.​—Tori fu den apostel 9:5.

• A e taki dati en na wan Kresten, ma a e du wan lo ogri èn a e bedrigi sma.​—Mateyus 7:22, 23; 2 Korentesma 11:13.

Bijbel e kari iniwan sma di e du den sani disi anti-krestes. Ma leki grupu a e kari den anti-krestes tu (2 Yohanes 7). A fosi leisi di sma bigin sori krin taki den na anti-krestes, ben de na ini a ten fu den apostel. Bijbel ben taki na fesi dati disi ben o pasa.​—1 Yohanes 4:3.

Fa wi kan sabi suma na a anti-krestes?

• Den e panya falsi leri di abi fu du nanga Yesus (Mateyus 24:​9, 11). Fu eksempre, te sma e leri taki Gado, a Manpikin nanga a santa yeye na wán, noso taki Yesus na a Almakti Gado, dan yu kan taki dati den de teige den leri fu Yesus, fu di Yesus ben taki: „A Tata bigi moro mi.”​—Yohanes 14:28.

• Anti-krestes no wani bribi den sani di Yesus leri fu Gado Kownukondre èn san a Kownukondre disi e du. Fu eksempre, son kerki fesiman e taki dati Krestes e wroko makandra nanga libisma regering. Ma a leri disi no e kruderi nanga san Yesus leri. Yesus ben taki: „Mi kownukondre no de fu a grontapu disi.”​—Yohanes 18:36.

• Den e kari Yesus Masra, ma den no e du san a e taki. Fu eksempre, den no e preiki a bun nyunsu fu a Kownukondre.​—Mateyus 28:19, 20; Lukas 6:​46; Tori fu den apostel 10:42.