Fu san ede Yehovah Kotoigi kenki wan tu fu den sani di den ben e bribi?

Ala den sani di wi e bribi kmoto fu Bijbel, dati meki te sani kenki na ini a fasi fa wi ben e ferstan son Bijbeltekst, dan wi de klarklari fu kenki a fasi fa wi ben e denki fosi.a

Den kenki disi e kruderi nanga sani skrifi na ini Odo 4:18: „A pasi fu den ret’ati sma de leki a leti di e bigin skèin na musdei. Safsafri a e kon moro krin, teleki a e skèin leki a leti fu a son na mindridei.” Neleki fa safsafri wi e bigin si sani moro krin te a son e opo, na so a de tu taki safsafri Gado e yepi wi fu ferstan en Wortu moro bun, na a yoisti ten (1 Petrus 1:10-12). Soleki fa Bijbel ben taki na fesi, dan Yehovah o tyari moro sani kon na krin „teleki a ten fu a kaba.”​—Danièl 12:4.

Den sani di kenki fu di wi e ferstan son Bijbeltekst tra fasi, no musu meki wi ferwondru noso meki wi naki futu. Den anbegiman fu Gado na ini a ten di psa no ben e ferstan ala sani na a yoisti fasi èn den ben musu kenki a fasi fa den ben e si sani fosi tu.

• Moses ben gi ensrefi leki wan ferlusuman fu a pipel Israel 40 yari fosi a ten fu Gado ben doro.​—Tori 7:​23-​25, 30, 35.

• Den apostel no ben man ferstan den profeititori di ben e taki fu a dede èn na opobaka fu a Mesias.​—Yesaya 53:​8-​12; Mateyus 16:21-​23.

• Sowan fu den Kresten fu a fosi yarihondro no ben abi a yoisti denki te a ben abi fu du nanga „a dei fu Yehovah.”​—2 Tesalonikasma 2:1, 2.

Bakaten Gado yepi den fu ferstan sani moro bun èn wi e begi taki Yehovah o tan du a srefi sani gi wi tu.​—Yakobus 1:5.