YONGUSMA E AKSI
Fu san ede mi musu begi?
Wan ondrosuku sori taki 80 procent fu den yonguwan na ini Amerkankondre e begi. Ma na afu fu den nomo e begi ala dei. Son wan fu den e aksi densrefi: ’Begi na wan sani di e meki mi firi bun nomo noso a kan du moro gi mi?’
San na begi?
Begi na te yu e taki nanga a sma di meki ala sani. Prakseri san a sani disi wani taki! Yehovah hei moro libisma na ala sortu fasi, ma toch „a no de fara fu nowan fu wi” (Tori 17:27). Luku wan moi sani di Bijbel e pramisi wi: „Kon krosibei na Gado èn a o kon krosibei na unu.”—Yakobus 4:8.
Ma fa yu kan kon krosibei na Gado?
Wan fasi fa yu kan du dati na te yu e begi—na so yu e taki nanga Gado.
Wan tra sani na fu studeri Bijbel—na so Gado e „taki” nanga yu.
Te yu nanga Gado e taki nanga makandra fu di yu e begi èn studeri Bijbel, dan disi o yepi yu fu tron wan bun mati fu en.
„Wan fu den moro bigi grani di wan libisma kan abi na fu taki nanga Yehovah, a Moro Heiwan.”—Jeremy.
„Te mi e taki nanga Yehovah fu den moro dipi firi fu mi, dan mi e firi taki mi e kon moro krosibei na en.”—Miranda.
Gado e arki?
Awinsi yu e bribi na ini Gado èn yu e begi en, toch a kan muilek fu bribi taki a e arki yu trutru. Ma Bijbel e taki dati Yehovah „na a sma di e arki begi” (Psalm 65:2). A e gi yu a kari srefi fu ’trowe ala yu hebi na en tapu.’ Fu san ede? ’Bika a e broko en ede nanga yu.’—1 Petrus 5:7.
Prakseri a sani disi: Yu lobi meki ten fu taki nanga den moro bun mati fu yu? We, yu kan du a srefi nanga Gado tu. Meki ten fu taki nanga en, èn kari en na en nen te yu e du disi (Psalm 86:5-7; 88:9). Iya, Bijbel e gi yu a deki-ati fu „begi doronomo.”—1 Tesalonikasma 5:17.
„Begi na te mi e taki nanga mi Hemel Papa. Na so mi e taigi en ala san de tapu mi ati.”—Moises.
„Mi e taki nanga Yehovah fu den moro dipi sani neleki fa mi e taki nanga mi mama noso a moro bun mati fu mi.”—Karen.
Fu san mi kan begi?
Bijbel e taki: „Begi Gado ala ten, begi en fayafaya èn taki en tangi tu. Na so a o kon sabi san unu wani aksi en.”—Filipisma 4:6.
Disi wani taki dati yu mag taki fu den problema fu yu te yu e begi? Iya! Eigenlijk Bijbel e taki: „Trowe yu hebi na tapu Yehovah, dan en srefi o horibaka gi yu.”—Psalm 55:22.
Ma hori na prakseri taki wi no wani taki fu den problema fu wi nomo te wi e begi. Chantelle e taki: „A no ben o bun gi a matifasi fu mi nanga Yehovah efu mi e aksi en nomo fu yepi mi. Mi feni taki mi musu taki en tangi fosi, èn mi abi furu reide fu de nanga tangi.”
Prakseri a sani disi: Fu sortu sani yu wani sori taki yu de nanga tangi? Gi sortu dri sani yu wani taki Yehovah tangi tide?
„Srefi den moro pikin sani kan meki wi taki Gado tangi. Fu eksempre te wi si wan moi bromki.”—Anita.
„Denki dipi fu wan sani di Yehovah meki noso wan Bijbeltekst di yu lobi èn taki Yehovah tangi fu dati.”—Brian.