Yesus e rèi kon na ini Yerusalem leki wan kownu, aladi a e sidon na tapu wan buriki

Den profeititori di e taki fu a Mesias e sori taki Yesus ben de a Mesias trutru?

A piki fu Bijbel

Iya. Di Yesus ben de na grontapu, a meki furu profeititori kon tru di e taki fu „a Mesias a Fesiman”, a sma di ben o tron a „Frulusuman fu grontapu” (Danièl 9:25; 1 Yohanes 4:14). Srefi baka di Yesus dede, a meki profeititori di e taki fu a Mesias kon tru.—Psalm 110:1; Tori fu den apostel 2:34-36.

San a wortu „Mesias” wani taki?

A Hebrew wortu Masyiak (Mesias) nanga a Griki wortu Kristos (Krestes) wani taki „Salfuwan”. Dati meki „Yesus Krestes” wani taki „Yesus a Salfuwan” noso „Yesus a Mesias”.

Te wan sma ben kisi wan hei posisi na ini Bijbel ten, dan den ben kanti oli tapu en ede fu sori taki a salfu (Lefitikus 8:12; 1 Samuel 16:13). Na Gado ben meki Yesus tron a Mesias. Dati ben de wan bun hei posisi (Tori fu den apostel 2:36). Ma Gado no salfu Yesus nanga oli, ma nanga a santa yeye fu en.—Mateyus 3:16.

Moro leki wán sma ben man meki den profeititori fu a Mesias kon tru?

Nôno. Te yu e ondrosuku Bijbel profeititori finifini, dan yu e si taki alamala e sori go na wán sma nomo. Dati na a Mesias, noso Krestes. Ma Bijbel ben warskow wi taki „falsi profeiti o opo kon èn den o du bigi sani nanga wondru, so taki efu a ben o man, den ben o kori srefi den sma di Gado kari”.—Mateyus 24:24.

A kan taki a Mesias ben o kon na wan tra ten?

Nôno. Bijbel ben taki na fesi dati a Mesias ben o de wan bakapikin fu Kownu David fu Israel (Psalm 89:3, 4). Ma den buku fu den Dyu di e sori suma na den bakapikin fu David, kon lasi. Kande den pori di den Romesma broko kon ini a foto Yerusalem na ini a yari 70.a Sensi a ten dati, nowan sma man buweisi efu en na wan bakapikin fu a famiri fu Kownu David. Ma den buku disi ben de ete na ini a ten fu Yesus, toku nowan fu den feanti fu en ben man kon nanga buweisi taki Yesus no ben de wan bakapikin fu David.—Mateyus 22:41-46.

Omeni profeititori fu a Mesias de na ini Bijbel?

Wi no man taki soifri omeni profeititori fu a Mesias de. Fu eksempre, a fasi fa sma e teri den profeititori kan difrenti, srefi gi profeititori pe yu man si krin taki den e taki fu a Mesias. Den tekst fu Yesaya 53:2-7 e taki fu difrenti sani di abi fu du nanga a Mesias. Son sma e si a heri pisi disi leki wán profeititori, ma tra sma e si ibri pisi fu den tekst disi leki wan tra profeititori.

Wan tu profeititori fu a Mesias di Yesus meki kon tru

Profeititori	Yu kan feni en na	Fa a kon tru
Bakapikin fu Abraham	Genesis 22:17, 18	Mateyus 1:1
Bakapikin fu Isak, a manpikin fu Abraham	Genesis 17:19	Mateyus 1:2
A gebore na ini a lo Yuda fu Israel	Genesis 49:10	Mateyus 1:1, 3
A gebore na ini a famiri fu Kownu David	Yesaya 9:7	Mateyus 1:1
En mama ben de wan uma di no ben sribi nanga wan man ete	Yesaya 7:14	Mateyus 1:18, 22, 23
A gebore na ini Betlehem	Mika 5:2	Mateyus 2:1, 5, 6
Den e kari en Imanuwelb tu	Yesaya 7:14	Mateyus 1:21-23
Di a gebore a ben pôti	Yesaya 53:2	Lukas 2:7
Baka di a gebore, sma kiri den yongu pikin	Yeremia 31:15	Mateyus 2:16-18
Gado kari en komoto na Egepte	Hosea 11:1	Mateyus 2:13-15
Sma kari en wan Nasaretsmac	Yesaya 11:1	Mateyus 2:23
Wan boskopuman ben sreka a pasi gi en	Maleaki 3:1	Mateyus 11:7-10
A salfu leki a Mesias na ini a yari 29.d	Danièl 9:25	Mateyus 3:13-17
Gado ben kari en En Manpikin	Psalm 2:7	Tori fu den apostel 13:33, 34
A ben de fayafaya gi na oso fu Gado	Psalm 69:9	Yohanes 2:13-17
A ben meki a bun nyunsu bekènti	Yesaya 61:1	Lukas 4:16-21
A preikiwroko fu en na Galilea ben de leki wan bigi leti	Yesaya 9:1, 2	Mateyus 4:13-16
A ben du wondru neleki Moses	Deuteronomium 18:15	Tori fu den apostel 2:22
Neleki Moses, a ben e du san Gado taki	Deuteronomium 18:18, 19	Yohanes 12:49
A dresi furu sikisma	Yesaya 53:4	Mateyus 8:16, 17
A no ben e poti prakseri na ensrefi	Yesaya 42:2	Mateyus 12:17, 19
A ben e sori sari-ati gi sma di ben e pina	Yesaya 42:3	Mateyus 12:9-20; Markus 6:34
A ben sori sma taki Gado lobi retidu	Yesaya 42:1, 4	Mateyus 12:17-20
A ben de wan kefalek bun Raiman	Yesaya 9:6, 7	Yohanes 6:68
A ben meki a nen fu Yehovah bekènti	Psalm 22:22	Yohanes 17:6
A ben lobi gi agersitori	Psalm 78:2	Mateyus 13:34, 35
A ben de wan Fesiman	Danièl 9:25	Mateyus 23:10
Furu sma no ben e bribi en	Yesaya 53:1	Yohanes 12:37, 38
A ben de wan ston di ben meki taki sma stotu den futu	Yesaya 8:14, 15	Mateyus 21:42-44
Libisma no ben wani en	Psalm 118:22, 23	Tori fu den apostel 4:10, 11
Aladi a no ben du noti, toku sma ben teige en	Psalm 69:4	Yohanes 15:24, 25
A kon na ini Yerusalem leki wan kownu, aladi a ben e sidon na tapu wan buriki	Sakaria 9:9	Mateyus 21:4-9
Pikin-nengre ben e prèise en	Psalm 8:2	Mateyus 21:15, 16
A kon na ini a nen fu Yehovah	Psalm 118:26	Yohanes 12:12, 13
En bun mati gi en abra na den feanti fu en	Psalm 41:9	Yohanes 13:18
En mati seri en gi 30 solfru sensie	Sakaria 11:12, 13	Mateyus 26:14-16; 27:3-10
En mati gowe libi en	Sakaria 13:7	Mateyus 26:31, 56
Falsi kotoigi kon fruteri lei fu en	Psalm 35:11	Mateyus 26:59-61
A tan pî di sma taki dati a du ogri	Yesaya 53:7	Mateyus 27:12-14
Sma ben spiti na en tapu	Yesaya 50:6	Mateyus 26:67; 27:27, 30
Sma naki en tapu en ede	Mika 5:1	Markus 15:19
Sma wipi en	Yesaya 50:6	Yohanes 19:1
A no feti nanga den sma di naki en	Yesaya 50:6	Yohanes 18:22, 23
Tiriman span anu makandra fu du en ogri	Psalm 2:2	Lukas 23:10-12
Den spikri en anu nanga en futu na wan postu	Psalm 22:16	Mateyus 27:35; Yohanes 20:25
Sma iti lòt (noso, dòbel) gi den krosi fu en	Psalm 22:18	Yohanes 19:23, 24
Sma ben si en leki wan sondari	Yesaya 53:12	Mateyus 27:38
Sma ben spotu en, den taki ogri fu en	Psalm 22:7, 8	Mateyus 27:39-43
A pina gi sondusma	Yesaya 53:5, 6	1 Petrus 2:23-25
A ben gersi leki Gado gowe libi en	Psalm 22:1	Markus 15:34
Sma ben gi en asin nanga bita fu dringi	Psalm 69:21	Mateyus 27:34
Leti fosi a dede, watra ben kiri en	Psalm 22:15	Yohanes 19:28, 29
A poti en libi na ini Gado anu	Psalm 31:5	Lukas 23:46
A dede gi libisma	Yesaya 53:12	Markus 15:37
A sorgu taki wan lusu-paiman de fu puru sondu	Yesaya 53:12	Mateyus 20:28
En bonyo no broko	Psalm 34:20	Yohanes 19:31-33, 36
Den boro en seibere	Sakaria 12:10	Yohanes 19:33-35, 37
Den beri en nanga guduman	Yesaya 53:9	Mateyus 27:57-60
A kon na libi baka	Psalm 16:10	Tori fu den apostel 2:29-31
Den poti wan tra sma ini a presi fu a sma di gi en abra na en feanti	Psalm 109:8	Tori fu den apostel 1:15-20
A go sidon na Gado en reti-anusei	Psalm 110:1	Tori fu den apostel 2:34-36

a Wan buku e taki: „Wi sabi seiker taki den buku pe den nen fu den Dyu lo nanga famiri ben skrifi, ben de ete fosi Yerusalem kisi pori, ma na baka di a foto disi kisi pori, den lasi gowe” (McClintock and Strong’s Cyclopedia).

b A Hebrew nen Imanuwel wani taki „Gado de nanga wi”. A nen disi e sori krin san Yesus ben o du leki a Mesias. Den sani di a du di a ben de dya na grontapu e sori taki Gado de nanga den sma di e anbegi En.—Lukas 2:27-32; 7:12-16.

c Soleki fa a sori, dan a wortu „Nasaretsma” komoto fu a Hebrew wortu netser, san wani taki „pransun”.

d Efu yu wani leisi moro Bijbeltekst di e sori taki a yari 29 ben de a yari di a Mesias kon, dan luku na artikel „Fa a profeititori fu Danièl e sori o ten a Mesias ben o kon”.

e Aladi a profeititori disi de na ini a buku Sakaria, toku a Bijbel skrifiman Mateyus e taki dati na „a profeiti Yeremia taki” en (Mateyus 27:9). Soleki fa a sori, dan son leisi sma ben e poti a buku Yeremia leki a fosiwan fu den Bijbel buku di den e kari „den Profeititori” (Lukas 24:44). A kan taki Mateyus gebroiki a wortu „Yeremia” fu sori go na ala den buku disi èn a buku Sakaria ben de wan fu den buku disi tu.