Fu san ede den e kari Yesus, a Manpikin fu Gado?
A piki fu Bijbel
Furu leisi Bijbel e kari Yesus „a Manpikin fu Gado” (Yohanes 1:49). Den wortu „Manpikin fu Gado” e sori taki Gado na a Mekiman fu ala libisani, sosrefi fu Yesus (Psalm 36:9; Openbaring 4:11). Ma Bijbel no e leri taki Gado meki a pikin disi neleki fa wan libisma papa e meki wan pikin.
Bijbel e taki tu dati den engel na „manpikin fu a tru Gado” (Yob 1:6). Èn a e taki tu dati Adam ben de wan „manpikin fu Gado” (Lukas 3:38). Ma fu di Yesus ben de a fosiwan fu ala den sani di Gado meki èn a wan-enkri sani di Gado wawan meki, meki Bijbel e taki fu Yesus leki a moro prenspari Manpikin fu Gado.
Yesus ben libi na ini hemel fosi a gebore na grontapu?
Iya. Yesus ben de wan yeye na ini hemel fosi a gebore leki wan libisma na grontapu. Yesus srefi ben taki: „Mi . . . saka komoto fu hemel.”—Yohanes 6:38; 8:23.
Gado ben meki Yesus fosi iniwan tra sani. Bijbel e taki fu Yesus:
„En na a fosiwan fu ala sani di Gado meki.”—Kolosesma 1:15.
En na „a fosi sani di Gado meki”.—Openbaring 3:14.
Yesus meki a profeititori kon tru di e taki fu wan tiriman di „de bun langa kaba, sensi owruten”.—Mika 5:2; Mateyus 2:4-6.
San Yesus ben e du fosi a kon na grontapu?
A ben abi wan hei posisi na hemel. Yesus ben taki fu a posisi disi di a ben begi: „Tata, gi mi a srefi glori . . . di mi ben abi, fosi grontapu ben de.”—Yohanes 17:5.
A yepi en Papa fu meki ala tra sani. Yesus ben de „wan tumusi bun wrokoman” di ben e wroko makandra nanga Gado (Odo 8:30). Bijbel e taki fu Yesus: „En na a sma di Gado gebroiki fu meki ala tra sani na hemel èn na grontapu.”—Kolosesma 1:16.
Gado ben meki Yesus yepi en fu meki ala tra sani. Dati na ala tra yeye èn ala tra sani na hemel nanga grontapu (Openbaring 5:11). Yu kan taki dati Gado nanga Yesus ben e wroko makandra neleki fa wan sma di meki wan bow-tekening fu wan oso e taigi a bowman fa fu meki na oso. A wan meki a tekening èn a trawan e bow san a wan teken.
A ben de a Wortu fu Gado. Na ini a pisi ten fosi Yesus kon na grontapu Bijbel e kari en „a Wortu” (Yohanes 1:1). Soleki fa a sori, dan disi wani taki dati Gado ben e gebroiki en Manpikin fu tyari boskopu nanga nyunsu gi den tra yeye.
A sori leki Yesus ben de a Takiman fu Gado tu te libisma ben musu kisi boskopu. A sori leki Gado ben meki Yesus taki gi en tu leki a Wortu di a ben taigi Adam nanga Eva fa den ben musu libi na ini a dyari fu Eden (Genesis 2:16, 17). Kande Yesus ben de na engel tu di ben e tyari den owruten Israelsma pasa na ini a sabana èn na en sten den Israelsma ben musu arki.—Eksodes 23:20-23.a
a A Wortu a no a wan-enkri engel di Gado gebroiki leki takiman. A ben gebroiki tra engel boiti en Fosi Manpikin fu gi den owruten Israelsma a Wet.—Tori fu den apostel 7:53; Galasiasma 3:19; Hebrewsma 2:2, 3.