Den fisyun di Yohanes kisi

Di na apostel Yohanes ben de na strafu na tapu na èilanti Patmos, Yesus meki a si 16 fisyun di sori en san ben o pasa na ini a ten di e kon. Den fisyun disi sori fa a nen fu Yehovah ben o kon santa, fa en Kownukondre ben o kon èn fa en wani o pasa na grontapu, neleki fa a e pasa na hemel.

Na ini wan fisyun Yohanes si Yehovah na tapu en bigi kownusturu na hemel. Na en lontu 24 owru man ben de di weri weti krosi èn di abi wan kownu-ati na tapu den ede. Faya ben e koti komoto fu a kownusturu èn dondru ben e bari. Den 24 owru man boigi na fesi Yehovah èn den anbegi en. Na ini wan tra fisyun Yohanes si wan bigi grupu sma fu ala kondre, pipel nanga tongo e anbegi Yehovah. A Pikin Skapu, Yesus, e tiri den èn a e tyari den go na watra di e gi libi. Bakaten, na ini wan tra fisyun, Yesus bigin tiri leki Kownu na hemel makandra nanga den 24 owru man. Na ini a fisyun di Yohanes kisi baka dati, a si Yesus e feti nanga a bigi kaiman Satan èn nanga den ogri yeye fu en. Yesus trowe den fu hemel kon na grontapu.

Baka dati Yohanes si wan moi fisyun pe a Pikin Skapu nanga den 144.000 sma e tanapu na tapu Sion-bergi. A si wan engel tu di e frei lontu grontapu. A e taigi sma fu abi bigi lespeki gi Gado èn fu gi Gado glori.

Na ini a tra fisyun a feti fu Armagedon bigin. Na ini a feti dati, Yesus nanga a legre fu en wini na ogri grontapu fu Satan. Na ini a lasti fisyun Yohanes si taki freide nanga wánfasi de na hemel èn na grontapu. Satan nanga ala den sma di e horibaka gi en e kisi pori. Ala sma na hemel èn na grontapu o abi lespeki gi a santa nen fu Yehovah èn den o anbegi en wawan.