Kande yu ben prakseri fu leisi Bijbel, ma yu no du dati fu di yu ben denki leki den sma di kari dyaso. Furu sma feni taki a muilek fu leisi Bijbel. Ma efu yu sabi taki Bijbel kan yepi yu fu abi wan moro koloku libi, yu ben o wani leisi en? San yu ben o du efu yu sabi taki sani de di yu kan du fu leisi Bijbel nanga prisiri? Yu ben o wani kon sabi fa Bijbel kan yepi yu?

Furu sma di bigin leisi Bijbel, kisi wini fu dati. Luku san sonwan fu den sma disi taki:

Ezekiel, di pasa 20 yari e taki: „Fosi, mi ben de leki wan sma di e rèi wan wagi, ma di no sabi pe a e go. Ma di mi leisi Bijbel, mi kon sabi san mi musu du nanga mi libi. Bijbel abi bun rai di kan yepi mi ibri dei.”

Frieda, di pasa 20 yari tu e taki: „Fosi, mi ben e haritaki nanga sma fu ala pikinpikin sani. Ma fu di mi e leisi Bijbel, meki mi leri fu hori misrefi. Disi meki taki mi man feni en moro bun nanga trawan èn mi abi moro mati now.”

Wan uma di nen Eunice èn di pasa 50 yari, e taki: „Bijbel e yepi mi fu tron wan moro bun sma èn a e yepi mi fu tapu nanga gwenti di no bun.”

Den sma disi nanga milyunmilyun trawan di leisi Bijbel, kon si taki Bijbel kan yepi sma fu abi wan moro koloku libi (Yesaya 48:17, 18). Boiti dati, a kan yepi yu (1) fu teki bun bosroiti, (2) fu meki bun mati, (3) fu sabi san yu kan du te yu abi stress èn (4) fu kon sabi Gado trutru. Disi na a moro prenspari sani. Den rai fu Bijbel e kon fu Gado. Sobun, a kan yepi yu ala ten. Noiti Gado o gi wi rai di no bun.

Ma san prenspari, na fu bigin leisi Bijbel. San kan meki en makelek gi yu fu bigin leisi en èn fu leisi en nanga prisiri?

San yu kan du fu kon lobi leisi Bijbel èn fu leri furu fu en? Luku feifi sani di yepi furu sma.

Suku wan bun presi. Suku wan presi pe furu babari no de. Sorgu taki sani no e puru yu prakseri te yu e leisi. Suku wan presi pe nofo faya e skèin èn pe a no banawtu. Disi o yepi yu fu poti prakseri na san yu e leisi.

Opo yu ati gi den sani di yu e leisi. Bijbel e kon fu wi Papa na hemel. Sobun, yu o man leri furu fu Bijbel te yu e si yusrefi leki wan pikin-nengre di de klariklari fu teki leri fu en papa di lobi en. Efu yu e denki takru fu son sani di skrifi na ini Bijbel, dan pruberi fu poti den denki dati na wan sei so taki Gado kan gi yu leri.​—Psalm 25:4.

Begi fosi yu leisi. Na Gado prakseri skrifi na ini Bijbel. Sobun, wi abi a yepi fu en fanowdu fu man frustan Bijbel. Gado pramisi taki a o gi „santa yeye na den sma di e aksi en” (Lukas 11:13). A santa yeye o yepi yu fu frustan den prakseri fu Gado. Te fu kaba, a o yepi yu fu frustan „srefi den dipi sani fu Gado”.​—1 Korentesma 2:10.

Pruberi fu frustan san yu e leisi. Yu no musu leisi fu di yu wani klari wan buku. Prakseri bun fu san yu e leisi. Aksi yusrefi den sani disi: ’Sortu fasi a sma di mi e leisi fu en, abi? Fa mi kan du san mi e leisi dya?’

Pruberi fu leri wan sani. Efu yu wani kisi wini fu a leisi di yu e leisi Bijbel, dan suku fu leri wan sani di o yepi yu na ini yu libi. Kande yu kan suku fu leri sabi Gado moro bun. Noso yu kan luku fa yu kan tron wan moro bun sma, wan moro bun masra noso wefi. Baka dati, leisi pisi na ini Bijbel di o yepi yu fu du san yu abi na prakseri.a

Den feifi sani disi o yepi yu fu bigin leisi Bijbel. Ma san kan yepi yu fu kon lobi leisi Bijbel? A tra artikel o taki fu wan tu sani di yu kan du.

A fasi fa yu o leisi Bijbel kan meki taki a o soi gi yu noso taki yu o lobi en. Meki wi go luku san yu kan du fu kon lobi leisi Bijbel èn fu feni en wan prisiri sani.

Gebroiki wan bun vertaling di makriki fu frustan. Efu yu e leisi wan Bijbel di abi wan lo owru wortu di yu no e frustan, yu no o prisiri fu leisi en. Sobun, suku wan Bijbel di abi wortu di makriki fu frustan èn di o naki yu ati. Ma sorgu tu taki a Bijbel vertaal soifri.a

Gebroiki wan computer, tablet noso telefon. Na ini a ten disi yu kan leisi Bijbel tu tapu yu computer, tablet noso telefon. Yu kan leisi son Bijbel tapu Internet noso yu kan download en fu leisi en o ten yu wani. Sonwan fu den Bijbel disi seti na so wan fasi taki yu kan luku tra Bijbeltekst di e taki fu a srefi tori di yu e leisi noso yu kan luku fa tra Bijbel vertaal a srefi tori. Yu kan arki Bijbel tu tapu mp3 na ini son tongo. Furu sma lobi arki en te den de e sidon na ini bus noso wagi, te den e wasi krosi noso te den e du tra sani di e meki en makriki gi den fu arki. Yu kan luku san moro bun gi yu.

Gebroiki sani di kan yepi yu fu ondrosuku Bijbel moro bun. Son sani meki fu yepi yu fu frustan moro bun san yu leisi. Yu o leri furu te yu e gebroiki den sani disi. Yu abi karta di e sori yu pe den kondre na ini Bijbel de. Disi kan yepi yu fu sabi pe den presi de di yu e leisi èn den kan yepi yu fu frustan sani moro bun. Artikel so leki den wan na ini a tijdschrift disi noso tapu wi website jw.org/srn kan yepi yu fu kon frustan furu tori na ini Bijbel.

Luku pe yu wani bigin leisi. Efu yu feni en muilek fu leisi Bijbel fu a bigin te na a kaba, dan kande yu kan bigin leisi wan pisi di yu lobi. Efu yu wani sabi moro fu sma na ini Bijbel di furu sma sabi, dan yu kan leisi den tori di e taki fu den sma disi. A faki di nen „Kon sabi den sma di kari na ini Bijbel”, na a bigin fu na artikel disi kan yepi yu. Noso kande yu wani leisi fu spesrutu tori na ini Bijbel noso yu wani leisi fa sani waka a wan baka a trawan. Yu kan pruberi wan fu den sani disi.

Bijbel no de leki tra buku. Den rai na ini e kon fu Gado, a sma di meki wi (2 Timoteyus 3:16). A boskopu fu Bijbel kan kenki wi heri libi. Bijbel srefi e taki: „A wortu fu Gado de na libi. A abi krakti” (Hebrewsma 4:12). Bijbel kan yepi wi na den tu fasi disi: A e gi wi rai di kan yepi wi fu abi wan moro bun libi èn a e yepi wi fu kon sabi Gado nanga den sani di a pramisi.​—1 Timoteyus 4:8; Yakobus 4:8.

Yu kan abi wan moro bun libi now. Bijbel abi bun rai di kan yepi yu nanga difrenti sani na ini a libi.

• A kan yepi yu fu libi bun nanga tra sma. ​—Efeisesma 4:31, 32; 5:22, 25, 28, 33.

• A kan yepi yu te yu e sari èn a kan yepi yu fu abi wan moro bun gosontu. ​—Psalm 37:8; Odo 17:22.

• A kan yepi yu fu libi wan krin libi. ​—1 Korentesma 6:9, 10.

• A e sori yu san yu kan du fu man sorgu yusrefi.​—Odo 10:4; 28:19; Efeisesma 4:28.a

Wan yongu trowpaar na ini Asia ben abi furu warderi gi den rai di Bijbel e gi. Neleki furu sma di trow paspas, den ben musu leri fu kon gwenti makandra èn fu taki krin nanga makandra. Disi no ben makriki gi den. Ma den bigin du san den leisi na ini Bijbel. San pasa di den du dati? Vicent, a masra, e taki: „Den sani di mi leisi na ini Bijbel yepi mi fu sori lobi te wi ben e kisi problema na ini a trowlibi. Fu di wi e du san Bijbel e taki meki wi abi wan koloku trowlibi.” En wefi di nen Annalou e agri nanga en. A taki: „Den eksempre di wi leisi na ini Bijbel yepi wi. Now mi e firi taki wi abi wan koloku trowlibi èn mi breiti nanga a fasi fa wi e libi now.”

Bijbel e yepi wi fu kon sabi Gado. Boiti den sani di Vicent taki fu a trowlibi, a taki tu: „Fu di mi e leisi Bijbel, meki mi firi taki mi tron wan moro bun mati fu Yehovah.” Den sani di Vicent taki e leri wi a prenspari tori disi: Bijbel kan yepi yu fu kon sabi Gado. Te yu kon sabi en, dan yu no o kisi wini nomo fu den rai fu en, ma yu o leri sabi en tu leki wan mati. Yu o si tu taki a e fruteri finifini sortu bun ten e wakti wi. Te a ten dati doro yu kan kisi „a trutru libi” èn yu kan de koloku fu têgo (1 Timoteyus 6:19). Nowan tra buku e fruteri wi den moi sani disi.

Efu yu bigin leisi Bijbel èn yu e tan du en, dan yu srefi o kisi den wini disi: Yu o abi wan moro bun libi now èn yu o kon sabi Gado. Ma kande yu o abi furu aksi te yu e leisi Bijbel. Te dati de so, dan a bun fu prakseri na eksempre fu wan heihei man fu Etiopia di ben libi 2000 yari pasa. A ben abi furu aksi fu Bijbel. Di Filipus, wan bun Bijbel leriman di ben de wan disipel fu Yesus, aksi en efu a ben e frustan san a e leisi, a piki: „We, fa mi ben sa sabi dati dan, efu nowan sma e leri mi?”b Baka dati a teki a yepi di Filipus gi en (Tori fu den apostel 8:30, 31, 34). Efu yusrefi wani sabi moro fu Bijbel neleki na Etiopia man, dan aksi wan Bijbelstudie na a website fu wi, www.pr418.com/srn noso skrifi go na wan fu den adres di kari na ini a tijdschrift disi. Yu kan taki tu nanga Yehovah Kotoigi na ini yu birti noso yu kan go na wan fu den Kownukondre zaal na ini yu birti. Kande yu kan bigin leisi Bijbel tide kaba, dan yu srefi o si taki a o meki yu abi wan moro bun libi.