YONGUSMA E AKSI
Fa Bijbel kan yepi mi?—Pisi 1: Kon sabi den moi sani fu yu Bijbel
„Mi pruberi fu leisi Bijbel, ma mi ben kon weri kaba di mi luku o furu a de!”—Briana, 15.
Disi e pasa nanga yu tu? Na artikel disi kan yepi yu!
Fu san ede yu musu leisi Bijbel?
Yu ben o wani leisi Bijbel? Yu denki taki a soi? A no yu wawan e denki so. Te yu e denki fu Bijbel, dan yu e denki kande: So wan deki buku nanga fini letter, sondro wán prenki. Te mi e luku TV noso wan felem, dan dati moro span.
Ma luku a tori so: Efu yu ben o feni wan bigi kisi fu owruten nanga gudu na ini, dan yu ben o wani sabi san de na ini, toch?
Bijbel de leki a kisi dati. A abi furu gudu na ini. Fa so? A abi koni rai na ini di kan yepi yu fu
teki bun bosroiti
sabi san yu musu du fu kan feni en nanga yu papa nanga mama
feni bun mati
sabi san yu kan du te yu e stress
Fa a kan taki so wan owruten buku kan yepi wi na ini a ten disi? Na fu di „Gado srefi ben meki sma skrifi ala den sani di de na ini Gado Buku” (2 Timoteyus 3:16). Dati wani taki dati den rai di skrifi na ini Bijbel na den moro bunwan di yu kan feni fu di den e komoto fu Gado.
Bijbel de leki wan kisi di abi furu koni rai na ini
Fa mi musu leisi Bijbel?
Wán fasi fa yu kan leisi Bijbel, na te yu leisi en fu bigin te na a kaba. Dati o meki yu si san na a moro prenspari boskopu fu Bijbel. Difrenti fasi de fa yu kan leisi Bijbel. Luku tu eksempre:
Yu kan leisi den 66 Bijbel buku fu Genesis te go miti Openbaring, precies leki fa den e kon baka makandra na ini yu Bijbel.
Yu kan leisi den Bijbel buku soleki fa sani pasa baka makandra na ini a historia.
Tip: Go na Appendix A7 na ini a Nieuwewereldvertaling. Drape yu o si den prenspari sani di pasa baka makandra na ini Yesus libi di a ben de na grontapu.
A di fu tu fasi fa yu kan leisi Bijbel, na te yu e leisi wan tori na ini di abi fu du nanga den problema di e miti yu. Fu eksempre:
Yu wani abi mati di yu kan frutrow? Leisi a tori fu Yonatan nanga David (1 Samuel kapitel 18-20). Baka dati, gebroiki a werkblad „Hoe je trouwe vrienden kunt vinden” fu si san yu kan leri fu a tori disi.
Yu wani leri fa fu tranga yusrefi so taki yu man kakafutu moro bun gi tesi? Leisi a tori fu Yosef di ben man kakafutu gi tesi (Genesis kapitel 39). Baka dati gebroiki a werkblad „Hoe zeg je nee tegen verleidingen? Jozef — Deel 1” nanga „Vals beschuldigd! Jozef — Deel 2” fu si san yu kan leri fu a tori disi.
Yu wani si fa begi kan yepi yu? Leisi a tori fu Nehemia (Nehemia kapitel 2). Baka dati gebroiki a werkblad „God luisterde naar zijn gebed” fu si san yu kan leri fu a tori disi.
Tip: Te yu e leisi Bijbel, dan du dati na wan tiri presi so taki yu man poti ala yu prakseri na san yu e leisi.
A di fu dri fasi fa yu kan leisi Bijbel, na te yu suku wan tori noso wan psalm di yu wani leisi, èn baka dati yu e luku san yu srefi kan leri fu a tori. Baka te yu leisi a tori, yu kan poti den sortu aksi disi gi yusrefi:
Fu san ede Yehovah ben meki sma skrifi a tori disi na ini Bijbel?
San disi e leri mi fu Yehovah, a fasi fa a de noso a fasi fa a e du sani?
Fa mi kan du den sani di mi leri na ini mi eigi libi?
Tip: Poti wan marki! Skrifi a dei te yu wani bigin fu leisi Bijbel.