YONGUSMA E AKSI
Fa Bijbel kan yepi mi?—Pisi 2: Meki Bijbel leisi tron wan span sani gi yu
„A kan gersi leki a no span srefisrefi fu leisi Bijbel, te yu no sabi fa fu du en bun”, na so wan yonguwan di nen Will e taki.
Yu wani kon sabi san e meki en span fu leisi Bijbel? Na artikel disi o yepi yu.
Meki den tori fu Bijbel span
Pruberi fu si na yu fesi san e pasa. Yu kan du disi:
Suku wan Bijbel tori di yu wani studeri. Yu kan teki wan heri tori ini Bijbel noso wan pisi fu den Evangelietori. Yu kan teki wan fu den span Bijbel tori fu jw.org tu.
Leisi a tori. Yu kan leisi a tori gi yusrefi, noso yu kan leisi en nanga wan tranga sten makandra nanga mati noso famiriman. Wan sma kan leisi leki a fruteriman èn den trawan kan leisi den pisi fu den difrenti sma na ini a tori.
Pruberi fu du den sani disi, awinsi na wán nomo:
Meki wan tekening fu a tori. Noso yu kan meki wan tu makelek tekening fu sori san e pasa baka makandra. Skrifi ondro den tekening san e pasa.
Skrifi wan tu prenspari sani. Fu eksempre, te yu e leisi fu wan sma di ben tan gi yesi na Yehovah, dan skrifi den fasi fu a sma, skrifi san a ben du èn sortu blesi a kisi. Hari strepi fu si fa ala den sani dati abi fu du nanga makandra.
Skrifi a tori leki wan nyunsu. Skrifi a tori na so wan fasi leki na difrenti sma e taki fa den e denki fu a tori. Hori interview nanga den moro prenspari sma ini a tori èn den sma di si fa sani pasa.
Efu wan fu den sma na ini a tori teki wan don bosroiti, dan prakseri fa a ben o de efu a ben du sani tra fasi. Fu eksempre, prakseri di Petrus taki dati a no sabi Yesus (Markus 14:66-72). San Petrus ben kan du moro bun di a kisi tesi?
Efu yu firi taki yu wani du moro leki dati, dan skrifi yu eigi drama fu wan Bijbel tori. Poti ini a drama tu san yu kan leri fu a tori.—Romesma 15:4.
Meki den tori fu Bijbel span!
Ondrosuku a tori!
Te yu e ondrosuku den sani finifini, dan yu si sani di yu no ben sabi ete. Den sani dati de leki gudu di kibri. Son leisi, wán wortu noso tu wortu na ini wan Bijbel tori kan meki yu kon sabi wan sani moro fini.
Fu eksempre, teki Mateyus 28:7 gersi nanga Markus 16:7.
Fu san ede Markus skrifi taki Yesus ben o sori ensrefi na den disipel „nanga Petrus”?
Tip: Markus no ben de drape di den sani disi pasa. Soleki fa a sori dan na Petrus fruteri en den sani disi.
A les: Fu san ede Petrus ben firi bun di a yere taki Yesus ben wani si en baka? (Markus 14:66-72) Fa Yesus sori taki a ben de wan trutru mati fu Petrus? Fa yu kan de leki Yesus èn de wan trutru mati gi trawan?
Te yu e meki den Bijbeltori de leki trutru tori di yu e si na yu fesi èn yu e ondrosuku den finifini, dan yu o feni en moro switi fu leisi Bijbel.