Son sma feni en muilek fu lobi Gado. Den sma disi feni taki noiti den o man kon sabi Gado, den feni taki a no e broko en ede srefisrefi nanga wi, èn taki a abi ogri-ati srefi. Luku den sani disi di sma taki:

• „Mi begi Gado fu yepi mi, ma na a srefi ten mi ben e firi taki a ben de tumusi farawe fu mi. Mi no ben e si Gado leki wan sma di abi firi.”​—Marco, Italiakondre.

• „Aladi mi ben wani dini Gado nanga mi heri ati, toku a ben gersi leki a ben de tumusi farawe fu mi. Mi ben denki taki a ben de wan ogri-ati Gado di e suku nomo fu strafu wi. Mi no ben e bribi taki a abi switifasi noso sari-ati.”​—Rosa, Gwatemala.

• „Di mi ben pikin, mi ben e bribi taki Gado ben de nomo fu kon sabi sortu fowtu wi e meki, èn taki a ben de klariklari fu strafu wi te dati ben de fanowdu. Bakaten, mi ben feni taki a ben e hori ensrefi aparti fu wi. Gi mi, Gado ben de leki wan presidenti di e luku den afersi fu den sma di a e tiri, ma di no e broko en ede nanga den.”​—Raymonde, Kanada.

San yu e denki? Yu denki taki libisma man lobi Gado? Kresten e aksi densrefi a sani disi hondrohondro yari langa kaba. Fu taki en leti, na ini a pisi ten na mindri a yari 500 nanga 1500, furu sma fu den Kresten kerki no ben wani begi na Almakti Gado srefi. Fu san ede? Sma ben e frede en srefisrefi. Historia skrifiman Will Durant e taki: Fa wan sondu sma ben kan prefuru fu begi so wan Gado di den ben e frede?”

Fa a du kon taki sma bigin frede Gado? San Bijbel e leri trutru fu Gado? Te yu e kon leri sabi san tru fu Gado, dan yu denki taki dati o yepi yu fu kon lobi en?

SAN FURU SMA E BRIBI

„Te nanga now wi no man sabi krin ete efu trutru Gado abi wan nen, èn efu a abi wan nen, dan wi no sabi en tu.”​—Professor David Cunningham, Theological Studies.

SAN BIJBEL E TAKI

Gado ben taki: „Mi na Yehovah. Dati na mi nen” (Yesaya 42:8). „Yehovah” na wan Hebrew nen di wani taki „A e meki kon tron”.​—Genesis 2:4; Luku Moro sani 1, par. 1 na ini Bijbel​—Nyun-Grontapuvertaling.

Yehovah wani taki wi musu gebroiki en nen. „Kari en nen”, na so Bijbel e taki. „Meki den pipel sabi san a du. Fruteri taki en nen bigi trutru.”​—Yesaya 12:4.

Yesus ben e gebroiki Gado nen. Na ini begi, Yesus ben taigi Yehovah: „Mi meki den [Yesus disipel] kon sabi yu nen èn mi o tan fruteri den fu yu nen.” Fu san ede Yesus ben meki den disipel fu en kon sabi a nen fu Gado? A ben taki moro fara: „So taki den kan abi a srefi lobi di yu [Gado] abi gi mi èn mi kan de wán nanga den.”​—Yohanes 17:26.

FU SAN EDE A PRENSPARI

„Wan sma di no sabi a nen fu Gado, no sabi en leki wan trutru sma”, na so kerki leriman Walter Lowrie ben taki. A ben taki moro fara dati „a sma disi no kan lobi Gado tu efu a e si en leki wan krakti nomo”.

Wan man di nen Victor ben e go na kerki ibri wiki, ma a no ben e firi leki a ben sabi Gado trutru. „Ne mi kon sabi taki Gado en nen na Yehovah, èn a ben de leki now fosi mi ben kon sabi en”, na so a e taki. „Mi ben e firi leki now fosi mi ben miti a sma di mi ben yere so furu sani fu en. Mi kon si en leki wan trutru sma èn mi bigin leri sabi en fu tron en mati.”

Ma Yehovah e kon krosibei na sma di e gebroiki en nen. Gado e pramisi den wan di „e hori en nen na prakseri” a sani disi: „Mi o sori sari-ati gi den neleki fa wan papa e sori sari-ati gi en manpikin di e gi yesi na en” (Maleaki 3:16, 17). Boiti dati, Gado e blesi den wan di e kari en nen. Bijbel e taki: „Ibri sma di e kari a nen fu Yehovah o kisi frulusu.”​—Romesma 10:13.

SAN FURU SMA E BRIBI

Den dri bigi Kresten bribi, „a Lomsu Bribi, na Orthodox bribi fu den Owstusei kondre, nanga a Protestant bribi, e leri taki Gado na dri sma na ini wán: Gado a Papa, Gado a Manpikin, nanga Gado a Santa Yeye. Soleki fa den leri fu den Kresten kerki e taki, dan disi no wani taki dati dri difrenti gado de, ma taki ala den dri gado disi na a srefi sma”.​—The New Encyclopædia Britannica.

SAN BIJBEL E TAKI

Yesus, a Manpikin fu Gado, noiti ben taki dati a de a srefi leki en Papa. Na presi fu dati a taki: „Mi e go na a Tata, bika a Tata bigi moro mi” (Yohanes 14:28). A ben taigi wan fu den bakaman tu: „Mi o opo go na mi Tata nanga un Tata èn na mi Gado nanga un Gado.”​—Yohanes 20:17.

A santa yeye a no wan sma. Fu eksempre Bijbel e taki dati sma e ’dopu nanga santa yeye’ èn a e taki fu sma di ben „furu nanga santa yeye” (Mateyus 3:11; Lukas 1:41, 67). A santa yeye a no wan fu den dri sma di sma e si leki wán gado. A de a krakti di Gado e gebroiki fu du sani.

FU SAN EDE A PRENSPARI

Luku san den Lomsu sabiman Karl Rahner nanga Herbert Vorgrimler e taki fu a leri di e taki dati Gado na dri sma na ini wán: „Sma no man frustan a leri disi efu wan trawan no e fruklari en fosi, èn srefi efu den fruklari en, toku yu no o man frustan en krin.” Yu kan lobi wan sma trutru te yu no man kon sabi noso frustan a sma dati? Dati meki a leri di e taki dati Gado na dri sma na ini wán, e tapu pasi gi sma fu kon sabi Gado èn fu kon lobi en.

Na so Marco di kari na ini wan artikel na fesi, ben si a leri dati. A e taki: „Mi ben denki taki Gado no ben wani taki mi kon sabi en. Dati meki mi no ben e si en leki wan sma di yu man frustan, èn di yu kan tron wan mati fu en.” Ma „Gado a no wan Gado fu bruya” (1 Korentesma 14:33). A no tru taki a e kibri ensrefi gi wi. A wani taki wi kon sabi en. Yesus ben taki: „Wi e anbegi san wi sabi.”​—Yohanes 4:22.

Marco e taki: „Di mi kon sabi taki Gado a no dri sma na ini wán, dan fosi mi ben man kon tron wan mati fu en.” Te wi e si Yehovah leki wan trutru sma, na presi fu si en leki wan sma di wi no man kon sabi, dan a o moro makriki fu lobi en. „A sma di no lobi trawan, no kon sabi Gado,” na so Bijbel e taki, „bika Gado na lobi”.​—1 Yohanes 4:8.

SAN FURU SMA E BRIBI

„Wantewante baka te den sili fu den dedewan di du sondu saka go na hèl, dan den e bron na ini hèl, ’noso têgo faya’” (Catechism of the Catholic Church). Son kerki fesiman e si hèl leki wan situwâsi pe Gado no abi notinoti fu du nanga libisma.

DEN TRU TORI FU BIJBEL

„A sma di e sondu, na en o dede” (Esekièl 18:4). Den dedewan „no sabi notinoti” (Preikiman 9:5). Efu a sili e dede èn a no sabi notinoti, dan fa a kan pina na ini „têgo faya”? Noso fa a o man firi sari fu di Gado no abi notinoti fu du nanga en?

Na ini Bijbel, den Hebrew nanga den Griki wortu di vertaal nanga „hèl”, abi fu du nanga a grebi fu libisma. Fu eksempre, Bijbel e taki fu wan profeititori di abi fu du nanga Yesus: „Yu no o libi mi na ini Grebi” [„na ini hel”, Da Bijbel na ini Sranantongo] (Tori fu den apostel 2:27). A de krin taki Yesus no ben de na ini wan presi pe a ben e bron noso pe a ben de farawe fu Gado, ma a ben de na ini grebi.

FU SAN EDE A PRENSPARI

Efu Gado abi ogri-ati dan wi no sa lobi en. Wi sa tan fara fu en. Rocío di e libi na ini Meksikow e taki: „Sensi di mi de wan yongu pikin, mi ben leri taki sma o bron na ini hèl. „Mi ben frede so te taki mi no ben man bribi taki Gado abi bun fasi. Mi ben denki taki a ben ati bron èn taki a no ben e broko en ede nanga libisma.”

Den sani di Bijbel e taki fu a fasi fa Gado e krutu sma èn fu a situwâsi fu den dedewan, kenki a fasi fa Rocío ben e si Gado. A e taki „Mi ben e firi fri, a ben de neleki wan bigi hebi ben komoto na mi tapu. Mi bigin bribi taki Gado wani san bun gi wi, taki a lobi wi, èn taki mi kan kon abi lobi gi en. A de leki wan papa di e hori na anu fu en pikin èn di abi a bun fu den na prakseri.”​—Yesaya 41:13.

Furu sma du muiti fu gi yesi na Gado soso fu di den frede helfaya. Ma Gado no wani taki yu e dini en fu di yu frede en. Na presi fu dati, Yesus ben taki: „Un musu lobi Yehovah un Gado” (Markus 12:29, 30). Boiti dati, te wi e kon frustan taki ala ten Gado e du san reti, dan wi kan abi a frutrow tu taki a o krutu sma na wan reti fasi na ini a ten di o kon. Neleki Elihu, a mati fu Yob, wi kan taki nanga overtoigi: „A no tru kwetikweti taki Gado e du ogri! Noiti na Almaktiwan e du kruktu sani!”​—Yob 34:10.

Wan dei di Yesus ben de na ini Yerusalem, a ben e taki fu en Papa, Yehovah, èn a ben e krutu den falsi kerki leriman fu a ten dati (Yohanes 8:12-30). A sani di a taki na a okasi dati e leri wi fa wi musu ondrosuku den sani di sma e bribi fu Gado na ini a ten disi. Yesus ben taki: „Efu unu tan du den sani di mi taki, dan unu na mi disipel trutru. Unu o sabi san tru èn dati o meki unu kon fri.”​—Yohanes 8:31, 32.

„Tan du den sani di mi taki.” Dyaso Yesus e sori wi san wi musu du fu kon sabi efu wan kerki leri „tru”. Te wan sma e taki wan sani fu Gado, dan aksi yusrefi: ’A sani disi e kruderi nanga den sani di Yesus ben taki èn nanga san skrifi na ini den Santa Buku fu Bijbel?’ Yu musu de leki den sma di ben yere den sani di na apostel Paulus ben taki èn di ben „ondrosuku Gado Buku finifini ibri dei fu si efu den sani di den yere tru”.​—Tori fu den apostel 17:11.

Marco, Rosa, nanga Raymonde, di kari na ini a fosi artikel, ondrosuku finifini efu den sani di den ben e bribi ben tru. Den studeri Bijbel nanga Yehovah Kotoigi. San den kon sabi?

Marco: „A sma di studeri Bijbel nanga wi ben gebroiki Gado Wortu fu piki ibri aksi di mi nanga mi wefi ben abi. A lobi di wi abi gi Yehovah bigin gro, èn wi kon moro krosibei na makandra leki masra nanga wefi!”

Rosa: „Na a bigin, mi ben denki taki Bijbel ben de wan buku nomo di e sori fa libisma e denki fu Gado. Ma safrisafri Bijbel piki den aksi di mi ben abi. Now, Yehovah na wan trutru sma gi mi. A de wan sma di mi kan frutrow.”

Raymonde: „Mi begi Gado fu yepi mi fu kon sabi en. Syatu baka dati, mi nanga mi masra bigin studeri Bijbel. Te fu kaba, wi leri den tru tori fu Yehovah! Wi ben breiti srefisrefi di wi kon sabi sortu Gado na en.”

Bijbel no e sori wi nomo san na den lei di sma e fruteri fu Gado, ma a e sori wi tu san na den moi fasi fu en. Bijbel na a Wortu fu en di skrifi nanga yepi fu santa yeye, èn a e yepi wi fu kon „sabi den sani di Gado gi wi fu di a abi bun-ati” (1 Korentesma 2:12). Fu san ede yu no e kon sabi gi yusrefi fa Bijbel e piki wan tu prenspari aksi di abi fu du nanga Gado, nanga den sani di a o du, èn nanga a tamara fu wi? Yu kan leisi den piki tapu wan tu fu den aksi disi na www.pr418.com/srn. Tapu a site disi yu kan aksi fu wan sma kon studeri Bijbel nanga yu, noso yu kan aksi wan Yehovah Kotoigi srefi. Wi de seiker taki te yu e du dati, yu o skreki fu si o esi yu o kon lobi Gado.