Wan mati di no bun

Yu abi wan mati di yu kon sabi di yu ben yongu. A ben meki yu firi leki wan bigisma èn a ben meki tra yongu sma lobi yu tu. Ala ten te yu ben e stress, a ben e meki yu firi bun baka. Yu kon si now taki ibri tron baka yu abi en fanowdu.

Ma baka wan pisi ten yu kon si taki a mati disi abi en takru sei tu. Ala ten a wani de nanga yu, srefi na son presi pe sma no wani taki yu kon nanga en. A ben meki yu firi leki wan bigisma, ma a meki yu kon siki tu. Èn efu dati no sari, a fufuru yu moni tu.

Den dei disi yu no wani bumui nanga en moro, ma toku a no wani lusu yu. A sori leki a tron yu basi. Now yu e winsi taki noiti yu ben miti en.

GI FURU sma sikaret na so wan mati. Earline, wan uma di ben e smoko 50 yari langa, taki: „A sikaret ben e yepi mi moro leki iniwan sma. A ben de wan mati di mi ben sabi langa ten kaba èn son leisi a ben de a wan-enkri mati di mi ben abi.” Ma bakaten Earline kon si taki a sikaret a no wan mati èn taki a e du sma ogri. Earline ben ondrofeni a srefi sani di skrifi na a bigin fu na artikel disi, ma toku a situwâsi fu en kenki bakaten. A kon sabi taki Gado no lobi te sma e smoko, fu di smoko e pori a skin di wi kisi fu Gado. A sani disi meki taki a tapu nanga smoko.​​—2 Korentesma 7:1.

Wan man di nen Frank ben tapu nanga smoko tu fu di a ben wani gi yesi na Gado. Ma wan tu dei baka di a smoko en lasti sikaret, a ben e kroipi na ondro en oso fu suku pisipisi owru sikaret di ben fadon na mindri de planga fu na oso. Frank taki: „Ne mi kisi misrefi. Na tapu mi anu nanga mi kindi mi ben e kroipi e suku pisipisi sikaret na ini a doti. Mi ben fisiti gi misrefi. Noiti moro mi fasi wan sikaret.”

Fu san ede a muilek so fu tapu nanga smoko? Sabiman kon si wan tu sani: (1) Wan sma kan tron wan srafu fu tabaka fu di a de neleki drugs. (2) Na ini seibi sekonde nomo nikotine kan doro na ini wan sma en frustan. (Nikotine na a sani na ini a tabaka di e meki taki sma no man tapu nanga smoko.) (3) Smoko na wan aladei sani gi furu sma. Den e smoko te den e nyan, te den e dringi, te den e taki tori nanga trawan, te den e blo den ede, noso te den e du tra sani.

Ma soleki fa a tori fu Earline nanga Frank e sori, dan wan sma man tapu nanga a takru gwenti disi. Efu yu e smoko, ma yu wani stop, dan den artikel baka a wan disi kan yepi yu fu du dati.

Tan hori yusrefi na a bosroiti di yu teki

„A moro prenspari sani di yepi den sma di ben man tapu nanga smoko, na taki den tan hori densrefi na a bosroiti di den teki.”​—A buku “Stop Smoking Now!”

SOBUN, efu yu wani tapu nanga smoko, dan yu musu wani du dati trutru. San kan yepi yu? Wan sani, na fu prakseri fa yu libi o kon moro bun te yu tapu nanga smoko.

Yu o abi moro moni. Efu yu e smoko wan paki sikaret na ini wan dei, dan yu kan lasi omeni dusun dala wan yari. „Noiti mi no ben denki taki mi ben e gebroiki so furu moni fu bai tabaka.”​—Gyanu, Nepal.

Yu o abi moro prisiri na ini a libi. „Mi libi kenki di mi tapu nanga smoko èn dei fu dei a e kon moro bun” (Regina, Zuid-Afrika). Te sma e tapu nanga smoko, dan den man smeri èn tesi moro bun. Nofo tron den e kisi moro krakti tu fu du sani èn den no e sori so owru.

Yu kan kon moro gosontu. „Furu man nanga uma, awinsi omeni yari den abi, ben e firi moro bun di den tapu nanga smoko, èn wantewante den e kon moro gosontu.”​—Na organisâsi Centers for Disease Control and Prevention na Amerkankondre.

Yu o kon de moro seiker fu yusrefi. „Mi tapu fu smoko fu di mi no ben wani taki a tabaka na mi basi. Mi ben wani de basi fu mi eigi skin.”​—Henning, Deinsikondre.

Yu famiri nanga mati o kisi wini tu. „Smoko . . . kan meki den sma na yu lontu kon siki. . . . Ondrosuku sori taki a smoko di sma e blo go na ini a loktu e meki taki dusundusun trawan e dede fu longkanker nanga atisiki.”​—Na organisâsi American Cancer Society.

A Sma di meki yu o breiti nanga yu. „Lobiwan, . . . meki wi krin wisrefi fu ibri sani di kan doti wi skin” (2 Korentesma 7:1). „Gi un skin na Gado leki wan srakti-ofrandi . . . di de santa èn di Gado feni bun.”​—Romesma 12:​1.

„Di mi kon frustan taki Gado no lobi taki wi e du sani di e doti wi skin, mi bosroiti fu tapu nanga smoko.”​—Sylvia, Spanyorokondre.

Ma nofo tron a no sari fu wani noso fu bosroiti nomo taki yu o tapu fu smoko. Kande yu abi a yepi fanowdu tu fu yu famiri, mati, noso tra sma. Fa den kan yepi?

Suku yepi

„Kande wan sma ben kan basi wan trawan di de en wawan. Ma te tu sma ben o de, dan den ben o man feti nanga en.”​—Preikiman 4:​12.

TE TRAWAN e horibaka gi wi, dan a moro makriki gi wi fu wini wan feanti, a no abi trobi suma noso san na dati. Sobun, efu yu wani tapu nanga smoko, dan a bun fu suku yepi na yu famiri nanga mati, noso na iniwan sma di wani yepi yu trutru èn di abi a pasensi fu du dati.

Kande yu kan suku yepi na sma di ben man tapu nanga a takru gwenti disi. Nofo tron den sma disi o frustan fa yu e firi èn den o man yepi yu fu feti nanga a sani disi. Torben, wan Kresten di e libi na Deinsikondre, taki: „A yepi di mi kisi fu trawan ben prenspari gi mi srefisrefi.” Abraham, di e libi na India, skrifi: „A trutru lobi di mi famiri nanga den Kresten brada nanga sisa sori gi mi, yepi mi fu tapu nanga smoko.” Ma son leisi, srefi a yepi fu famiri nanga mati no sari.

Wan man di nen Bhagwandas taki: „Mi smoko 27 yari langa. Ma di mi kon sabi san Bijbel e taki fu gwenti di e doti wan sma skin, mi bosroiti fu tapu nanga smoko. Mi pruberi fu du en safrisafri. Mi no ben e bumui moro nanga den mati fu mi di ben e smoko. Mi go suku yepi na sma di e yepi trawan fu tapu nanga a gwenti disi. Ma nowan fu den sani disi yepi mi. Te fu kaba, mi begi Yehovah Gado wan neti. Mi fruteri en ala san de na tapu mi ati èn mi aksi en fu yepi mi fu tapu nanga smoko. Na so wawan mi ben man stop.”

Wan tra prenspari sani di yu musu du, na fu sreka yusrefi gi problema di kan opo kon te yu wani tapu nanga smoko. San na den problema disi? A tra artikel o taki fu a tori disi.

[Faki]

A BUN FU GEBROIKI DRESI FU TAPU NANGA SMOKO?

Sma meki dresi nanga plèister fu yepi sma fu tapu nanga smoko èn bun furu sma e gebroiki den sani disi. Ma fosi yu bosroiti fu gebroiki den sani disi, a bun fu poti prakseri na den aksi disi:

Fa den sani disi kan yepi mi? Furu sma e taki dati den sortu dresi disi e sorgu taki a sma no e lostu tabaka so tranga moro, èn na so a o moro makriki gi en fu tapu nanga smoko. Ma son sma no de seiker efu den sani disi e yepi trutru.

San den dresi disi kan du nanga sma? Sonwan fu den dresi disi e meki sma kon siki. Son sma e firi leki den wani braak, den e firi brokosaka ala ten, èn son leisi den wani kiri densrefi tu. Hori na prakseri taki den dresi disi abi nikotine na ini den tu, èn den kan meki yu kon siki. Te yu luku en bun, dan na puru bruku weri bruku, fu di den dresi no e yepi a sma fu tapu nanga smoko.

Sortu tra san kan yepi? Wan ondrosuku sori taki 88 procent fu den sma di tapu nanga smoko ben man du dati wantronso sondro fu gebroiki dresi.

Sreka yusrefi gi problema di kan opo kon

„Mi bosroiti fu tapu nanga smoko fu di a no bun gi a nyunyun beibi fu mi. Dati meki mi poti wan bord na ini mi oso pe skrifi ’Nowan sma mag smoko dya’. Ma wán yuru baka dati, mi bigin lostu tabaka. A firi kon leki wan skwala na mi tapu. Ne mi leti wan sikaret.”​—Yoshimitsu, Yapan.

SOLEKI fa a tori fu Yoshimitsu e sori, dan a kan muilek fu tapu nanga smoko. Boiti dati, ondrosuku sori taki sowan 90 procent fu den sma di ben tapu nanga smoko èn di misi wan leisi, teki smoko leki wan gwenti baka. Fu dati ede, te yu e pruberi fu tapu nanga a gwenti disi, a bun fu sabi san o miti yu. Sortu problema yu kan kisi?

Yu o lostu tabaka: Nofo tron a lostu disi e kon tranga sowan dri dei baka te yu smoko yu lasti sikaret èn a e gowe baka sowan tu wiki. A heri pisi ten dati „a firi fu smoko e go-kon leki skwala. A no e tan doronomo”, na so wan sma di ben gwenti smoko taki. Ma srefi baka wan tu yari yu kan kisi a lostu wantronso fu smoko baka. Efu dati pasa, no go suku wan sikaret wantewante. Wakti sowan feifi miniti, dan a lostu disi o gowe.

Tra problema di yu kan kisi: Biginbigin te wan sma stop smoko, a kan muilek gi en fu tan na ai noso fu poti ala en prakseri na wan sani. Boiti dati, a kan kon fatu tu. A kan kisi skin-ati, a kan kisi krasikrasi, a kan sweti hebi, a kan kosokoso furu èn den firi fu en kan kenki wantronso. Kande a no abi pasensi, en ati e bron esi èn a kan firi brokosaka ala ten. Ma furu fu den problema disi e gowe baka fo noso siksi wiki.

Te yu e du muiti fu tapu nanga smoko, dan kande den sani disi o yepi yu:

● Pruberi fu sribi moro.

● Dringi furu watra noso sap. Nyan gosontu nyanyan.

● Du wan sport noso tra sani fu oefen yu skin.

● Hari blo dipi èn te yu e du dati prakseri fa krin loktu e go na ini yu skin.

Sani di kan wiki a lostu fu smoko: Son sani di yu e du noso son firi di yu abi, kan wiki a lostu fu smoko. Fu eksempre, kande yu ben gwenti smoko te yu ben e dringi wan sani. Efu dati de so, dan no teki yu ten fu dringi a sani. A no de fu taki dati bakaten yu o man teki yu ten fu dringi wan sani sondro taki a firi opo kon.

Ma awinsi yu tapu nanga smoko wan heri pisi ten kaba, toku a kan pasa ete taki yu e kisi a lostu fu smoko baka. Torben di wi ben kari kaba na ini wan fu den artikel disi, taki: „Tinaneigi yari baka di mi tapu nanga smoko, mi e kisi a firi ete fu smoko baka te mi e teki wan pikin pauze na wroko.” Ma nofo tron a firi di yu e kisi fu smoko te yu e du son sani, no de so tranga moro baka wan pisi ten èn te fu kaba yu o man basi en.

Luku bun nanga sopi. Te yu e pruberi fu tapu nanga smoko, a ben o bun fu no dringi sopi èn fu no go na presi pe sma e dringi sopi. A sani disi prenspari fu di furu sma e bigin smoko baka fu di den e dringi sopi. Fu san ede disi de so?

● Wan pikinso sopi nofo kaba fu meki sma firi moro bun te den abi nikotine na ini den skin.

● Nofo tron te sma gwenti dringi sopi na presi soleki bar nanga restaurant, dan den e smoko tu.

● Sopi e meki taki sma no man denki krin èn taki den e du sani di den no ben o du noiti efu den ben de nanga den krin frustan. Dati meki Bijbel e taki: ’Win e meki taki sma e lasi den frustan.’​​—Hosea 4:​11.

Mati: Luku bun suma yu e hori leki mati. Efu a no de fanowdu, no bumui nanga sma di e smoko noso sma di wani taki yu smoko. No bumui tu nanga sma di e spotu yu fu di den no wani yu tapu nanga smoko.

Den firi fu yu: Wan ondrosuku sori taki bun furu fu den sma di tapu nanga smoko ben e stress, noso den ben e atibron syatu fosi den bigin smoko baka. Efu den sortu firi disi e meki taki yu wani smoko baka, dan pruberi fu du wan sani fu puru yu prakseri na smoko. Kande yu musu dringi watra, kaw bubblegum, noso go waka pikinso fu blo yu ede. Pruberi fu furu yu frustan nanga bun sani. Kande yu kan begi Gado, noso kande yu kan leisi wan pisi fu Bijbel.​​—Psalm 19:14.

Denki di kan meki taki yu bigin smoko baka

● Mi o teki wán hari nomo.

San e pasa nofo tron: Wán hari nomo kan meki nikotine abi krakti tapu yu frustan dri yuru langa. Nofo tron disi e meki taki wan sma e teki a gwenti baka fu smoko.

● Smoko e yepi mi te mi e stress.

San e pasa nofo tron: Ondrosuku sori taki nikotine e meki sma stress moro. Nofo tron wan sma e firi leki a stress e gowe te a e smoko, fu di nikotine e meki yu firi bun fu wan pisi ten.

● Mi e smoko so langa kaba, taki mi no denki taki mi o man stop moro.

San e pasa nofo tron: Efu yu e denki so, dan yu no o wani stop tu. Bijbel e taki: „Yu e firi brokosaka te nowtu miti yu? Efu dati de so, dan yu no o abi furu krakti” (Odo 24:10). Sobun, no denki taki yu no man stop. Efu wan sma wani stop nanga smoko trutru, èn efu a e du den sani di o yepi en fu stop, soleki den wan di kari na ini a artikel disi, dan a o man stop trutru.

● Mi no e firi bun srefisrefi te mi no e smoko.

San e pasa nofo tron: A tru taki biginbigin wan sma no e firi bun srefisrefi te a stop smoko, ma baka wan tu wiki a e firi moro bun. Dus horidoro! Efu baka wan tu mun noso wan tu yari yu e firi fu smoko baka, dan a firi dati o gowe tu. Nofo tron a e gowe baka wan tu miniti, efu yu no leti wan sikaret fu smoko baka.

● Mi e siki na mi frustan.

San e pasa nofo tron: Efu yu depressief noso efu yu abi schizofrenie, dan aksi yu datra fu yepi yu fu tapu nanga smoko. Nofo tron datra de klariklari fu yepi yu efu yu wani stop. Kande a o yepi yu na so wan fasi taki a siki fu yu no e kon moro ogri èn taki yu no e kisi problema nanga den dresi fu yu, fu di yu wani tapu nanga smoko.

● Te mi no man hori misrefi fu no smoko baka, dan mi e firi leki noiti mi o man stop.

San e pasa nofo tron: Furu sma di e pruberi fu tapu nanga smoko e misi son leisi. Ma disi no wani taki dati noiti yu o man stop. No gi abra. Efu yu fadon, dan yu no e tan didon na tapu a gron, a no so? Yu e opo baka èn yu e go doro. Sobun, tan meki muiti. Te fu kaba yu o man stop!

Luku na eksempre fu Romualdo di ben e smoko 26 yari langa èn di tapu nanga smoko moro leki 30 yari kaba. A skrifi: „Mi no man taigi yu omeni leisi mi no ben man hori misrefi fu smoko. Ibri leisi te dati ben pasa, mi ben e firi brokosaka èn mi ben e denki taki yepi no de gi mi. Ma di mi teki a seryusu bosroiti fu tron wan mati fu Yehovah Gado èn di mi aksi en furu leisi fu yepi mi, dan dati yepi mi te now ete fu no smoko moro.”

Na ini a lasti artikel, wi o luku ete wan tu sani di yu kan du fu tapu nanga smoko fu ala ten.

[Faki/Prenki]

ALA SORTU TABAKA KAN KIRI SMA

Sma e gebroiki tabaka na difrenti fasi. Son leisi den e seri tabaka srefi na ini wenkri di e seri nyanyan nanga dresi di bun gi a gosontu. Ma toku na Organisâsi fu gosontu afersi na heri grontapu e taki dati „ala sortu tabaka kan kiri sma”. Tabaka kan meki sma kisi siki soleki kanker, atisiki, noso tra siki di kan kiri sma te fu kaba. Bere-uma kan du ogri nanga a beibi na ini den bere te den e smoko. Na sortu fasi sma e gebroiki tabaka?

Bidi (Blaka titei): Disi na pikin sikaret di sma e lolo nanga anu. Furu sma na ini den kondre fu Asia e smoko den. Den sikaret disi abi moro tara, nikotine nanga koolmonoxide gas leki den gewoon sikaret.

Sigara: Disi na pisipisi tabaka di lolo na ini wan tabaka blad noso na ini papira di meki fu tabaka. Fu di a tabaka fu den sigara de tra fasi leki a tabaka na ini sikaret, meki nikotine kan go na ini yu skin kaba te yu hori wan sigara na ini yu mofo nomo. Yu no abi fu leti en srefi.

Kretek noso nagri sikaret: Nofo tron den sikaret disi abi 60 procent tabaka èn 40 procent nagri. Den abi moro tara, nikotine nanga koolmonoxide gas leki den gewoon sikaret.

Pipa: Pipa no bun moro sikaret, fu di ala tu kan meki sma kisi den srefi sortu kanker nanga tra siki.

Tabaka di yu no e smoko: Disi na den sortu tabaka di sma e kaw èn di sma e snoifi. Sma na ini Zuid-Oost Asia gwenti gebroiki wan sortu tabaka tu di den e kari gutkha èn di abi difrenti tesi. Te sma e hori den sortu tabaka disi na ini den mofo noso te den e kaw den, dan a nikotine e go na ini a brudu fu den. Ma awinsi sma no e smoko den sortu tabaka disi, toku den kan siki sma noso den kan kiri sma te den e gebroiki den.

Watra pipa (bong, hookah, narghile, shisha): Te sma e smoko den sortu pipa disi, dan a smoko fu a tabaka e pasa na ini watra fosi a sma e hari en. Ma disi no wani taki dati a smoko di sma e hari go na inisei no o abi sani na ini di kan siki den noso di kan meki den kisi kanker.

[Faki/Prenki]

FA YU KAN YEPI WAN SMA FU TAPU NANGA SMOKO

● Gi a sma deki-ati. A moro bun fu prèise a sma èn fu gi en wan kado, leki fu krutu en èn fu gi en rai ibri leisi baka. Na presi fu taki sani soleki „Yu smoko baka!”, a moro bun fu taki „Mi denki taki yu o man stop efu yu pruberi en baka.”

● No mandi nanga a sma. Te wan sma di e pruberi fu tapu nanga smoko e atibron esi noso a e du fruferi, dan pruberi fu no mandi nanga en. Na wan switi fasi yu kan taigi en sani soleki „Mi sabi taki a muilek gi yu, ma mi breiti taki yu e du en.” Noiti no taki: „Mi ben lobi yu moro di yu ben e smoko!”

● De wan trutru mati gi a sma. Bijbel e taki: „Wan trutru mati e sori lobi ala ten. En na wan brada di gebore fu te nowtu de” (Odo 17:17). Sobun, pruberi fu abi pasensi èn fu „sori lobi ala ten” gi wan sma di e pruberi fu tapu nanga smoko. Du dati awinsi sortu yuru fu a dei noso awinsi fa a sma e firi.

Yu man tapu nanga smoko!

NOW a ten doro fu ’abi deki-ati èn fu du’ wan sani (1 Kroniki 28:10). Sortu sani yu kan du ete fu tapu nanga smoko?

Poti wan dei. Na organisâsi Department of Health and Human Services na Amerkankondre taki dati te yu bosroiti taki yu o tapu nanga smoko, dan fosi tu wiki pasa yu musu stop trutru. Disi o gi yu moro deki-ati fu no smoko moro. Marki a dei na tapu yu kalender, taigi den mati fu yu, èn hori yusrefi na a dei dati awinsi san pasa.

Skrifi tapu wan pisi papira fu san ede yu no wani smoko moro. Yu kan skrifi iniwan sani di kan yepi yu fu no smoko moro, soleki:

● Fu san ede yu wani stop smoko

● Telefon-nomru fu sma di yu kan bel efu yu e kisi a firi fu smoko baka

● Sani di kan gi yu deki-ati fu no smoko moro, soleki Bijbeltekst. Wan moi tekst na Galasiasma 5:22, 23

Sorgu taki yu abi a pisi papira disi na yu ala ten èn leisi en ibri tron baka. Srefi te yu stop smoko kaba, yu kan leisi den sani disi te yu e firi leki yu wani smoko baka.

No du sani di kan meki taki yu bigin smoko baka. Fosi a dei di yu poti fu stop smoko doro, yu musu tapu nanga iniwan gwenti di kan meki taki yu bigin smoko baka. Fu eksempre, efu yu gwenti smoko wantewante te yu opo mamanten, dan pruberi fu hori yusrefi wán yuru noso moro langa leki dati. Efu yu gwenti smoko te yu e nyan noso wantewante baka te yu nyan, dan pruberi fu no du dati moro. No go na presi pe sma e smoko. Èn bigin oefen gi yusrefi fu taigi sma: ’No, thanks. Mi no e smoko moro.’ Den sani disi o yepi yu fu sreka yusrefi gi a dei te yu o stop smoko. Den o memre yu tu taki heri esi yu o kon fri fu a sani disi.

Sreka yusrefi. Syatu fosi a dei di yu poti fu stop smoko doro, bigin bai wan tu sani fu kawkaw, soleki bubblegum, noto nanga den sortu sani dati. Memre yu famiri nanga mati sortu dei yu o stop smoko èn fa den kan yepi yu. Syatu fosi a dei dati yu musu trowe ala sani di kan meki yu smoko baka, soleki asbak, aansteker nanga ala sikaret di yu abi na ini yu oso, na ini yu wagi, na ini den saka fu yu krosi, noso na yu wrokope. Kande yu no o de so gaw fu aksi wan sma wan sikaret noso fu bai wan paki sikaret. Ma te yu abi sikaret na ini wan kasi na oso, dan a no o muilek gi yu fu teki wan! No frigiti tu fu begi Gado fu yepi yu, èn du dati nanga moro faya baka te yu tapu nanga smoko.​—Lukas 11:13.

Furu sma ben man tapu nanga smoko, a takru mati di den ben abi fosi. Yu srefi kan du dati tu. Yu o de moro gosontu èn yu o firi taki yu kon fri.

[Prenki]

Sorgu ala ten taki yu abi a pisi papira na yu pe yu skrifi fu san ede yu wani stop smoko, èn leisi en ibri tron baka