Bijbel rai noiti e kon owru

PRAKSERI A TORI DISI: Kon meki wi taki dati yu e koiri na ini wan museum nanga bun owru skedrei. Furu fu den skedrei disi pritipriti. Fu sonwan fu den bigi pisi e mankeri. Ma wan fu den bun. A no abi nowan flaka, a no pritipriti èn a moi. Yu e aksi a sma di e tyari yu luku a presi: „A disi nyun moro ala den trawan?” A e piki: „Nôno, a owru moro furu fu den èn noiti wan sani pasa nanga en.” Yu e aksi: „Na fu di sma ben kibri en bun na wan presi pe noti no ben kan pasa nanga en?” A sma e piki: „Nôno, hebi winti nanga tranga alen naki en furu. Èn furu sma pruberi fu pori en.” Kande yu no man bribi èn yu e prakseri: ’Nanga san a meki? Fa a du kon taki a tan bun?’

Bijbel de leki a skedrei dati. Bijbel na wan bun owru buku. A owru moro bun furu buku. A no de fu taki dati tra owruten buku de. Ma na ini ala den hondrohondro yari di pasa den pori èn den kon de leki den pritipriti skedrei. Fu eksempre, son sani na ini den buku disi no e kruderi nanga san sabiman kon sabi na ini a ten disi. Furu fu den rai di den buku dati e gi fu sori fa fu dresi sma kan kiri sma srefi. Èn furu owruten buku no tan bun srefisrefi fu di bigi pisi fu den lasi noso den pori krinkrin.

Ma Bijbel de tra fasi leki den buku dati. Sma bigin skrifi Bijbel moro leki 3500 yari pasa. Toku a tan bun. Èn aladi sma du ala sortu sani fu pori en, toku den no ben man du dati. Sma bron en, den tapu sma fu gebroiki en èn den fruteri wan lo lei fu en. Aladi sma kon sabi furu nyun sani na ini a ten disi, toku Bijbel e taki fu sani di sabiman kon sabi furu yari na baka.​—Luku a faki „Bijbel ben taki fu sani di sabiman no ben sabi ete”.

RAI DI WI ABI FANOWDU NA INI A TEN DISI

Kande yu e aksi yusrefi: ’Bijbel rai kan yepi mi na ini a ten disi?’ Aksi yusrefi: ’San na den moro bigi problema di libisma abi now? Sortuwan fu den e meki sma frede srefisrefi?’ Kande yu e prakseri kondre di e feti nanga makandra, a doti di sma e doti grontapu, ogridu noso den kruka sani di libisma e du. Poti prakseri now na wan tu prenspari sani di Bijbel e leri. Te yu o du dati, dan aksi yusrefi: ’Grontapu ben o de wan moro bun presi efu sma ben e du san Bijbel e taki?’

LOBI FREIDE

„Koloku fu den sma di e suku fu libi bun nanga trawan, bika sma o kari den ’pikin fu Gado’” (Mateyus 5:9). „Du ala san yu man fu libi bun nanga ala sma.”​—Romesma 12:18.

ABI SARI-ATI, GI PARDON

„Koloku fu den sma di abi sari-ati gi trawan, bika sma o abi sari-ati gi den” (Mateyus 5:7). „Tan frudrage makandra èn gi makandra pardon nanga un heri ati, srefi te wan sma feni taki wan trawan du wan hati sani nanga en. Soleki fa Yehovaha e gi unu pardon nanga en heri ati, na so un musu gi trawan pardon tu.”​—Kolosesma 3:13.

SMA FU DIFRENTI RAS E LIBI BUN NANGA MAKANDRA

„Fu wán sma nomo [Gado] meki ala tra sma fu libi na heri grontapu” (Tori fu den apostel 17:26). „Gado no lobi a wan sma moro a trawan, ma awansi fu sortu kondre wan sma de, efu a e lespeki Gado èn a e du san reti, dan Gado feni en bun.”​—Tori fu den apostel 10:34, 35.

ABI WARDERI GI GRONTAPU

„Yehovah Gado teki a man èn a poti en na ini a dyari fu Eden fu wroko a gron èn fu sorgu a dyari” (Genesis 2:15). Gado o „pori den wan di e pori grontapu”.​—Openbaring 11:18.

NO GRIDI ÈN NO LOBI HURUDU

„Luku bun taki unu no kisi bigi-ai na nowan fasi, bika srefi te wan sma abi furu gudu, toku den sani di a abi no kan gi en libi” (Lukas 12:15). „Un no musu taki srefi fu hurudu, noso fu iniwan sani di no krin, noso fu tori di e sori taki unu abi bigi-ai, bika dati no fiti gi santa sma.”​—Efeisesma 5:3.

DE EERLIJK, WROKO TRANGA

„Wi wani du ala sani nanga wan krin ati” (Hebrewsma 13:18). „A sma di e fufuru, no musu fufuru moro, ma a musu wroko tranga.”​—Efeisesma 4:28.

A PRENSPARI FU YEPI DEN WAN DI DE NA NOWTU

„Taki na wan fasi di e trowstu den sma di lasi-ati. Yepi den swakiwan èn abi pasensi nanga ala sma” (1 Tesalonikasma 5:14). „Sorgu gi pikin di no abi papa nanga mama moro èn gi uma di den masra dede kaba, te den sortu sma disi de na nowtu.”​—Yakobus 1:27.

Bijbel no e gi wi rai nomo. A e sori wi tu fa wi kan kon lobi den rai disi èn fa wi kan fiti den na ini wi ala dei libi. Efu moro sma ben o du den sani di wi kari didyonsro, dan so furu problema no ben o de na grontapu, a no so? Sobun, den rai fu Bijbel bun ete gi a ten disi! Ma fa Bijbel rai kan yepi yu now?

BIJBEL RAI KAN YEPI YU NOWNOW KABA

A moro koniman taki wan leisi: „Na den bun sani di wan sma e du, e sori taki a koni” (Mateyus 11:19). Yu e agri nanga disi? A moro bun fasi fa yu kan kon sabi efu wan rai bun, na fu luku efu a rai e tyari bun bakapisi gi yu. Kande yu e prakseri: ’Efu Bijbel bun so, dan a musu man yepi mi na ini mi libi. Fa a kan yepi mi nanga den problema di mi abi now?’ Luku wan eksempre.

Delphineb ben abi wan bun libi èn a ben abi furu fu du. Ma wantronso difrenti sari sani miti en. A yongu meisje fu en dede, a trowlibi fu en broko èn a ben abi moni problema. Delphine taki: „Mi no ben sabi misrefi moro. Mi no ben abi mi meisje moro, mi masra, nanga mi oso. Mi ben firi leki mi na noti. Mi no ben abi krakti, mi no ben man denki èn mi no ben sabi san fu du nanga mi libi.”

Noiti ete Delphine ben si so krin taki den wortu disi tru: „Wi kan libi seibitenti yari èn efu wi tranga wi kan libi aititenti yari. Toku den yari dati lai soso broko-ede nanga pina, bika den o pasa gowe esi-esi èn wi no o de moro.”​—Psalm 90:10.

Na ini a muilek ten dati Delphine feni yepi na ini Bijbel. Bijbel yepi en na wan tumusi moi fasi. Den dri artikel baka a wan disi o sori fa Bijbel rai yepi furu tra sma di ben kisi bigi problema. Den kon si taki Bijbel de leki a skedrei di kari na a bigin fu na artikel disi. A no de leki den tra owru buku di no man yepi sma na ini a ten disi. Kande yu e aksi yusrefi: ’Fa a du kon taki Bijbel abi rai di wi no kan feni na ini nowan tra buku fu libisma? Na fu di a kon fu Gado trutru?’​—1 Tesalonikasma 2:13.

Kande yu srefi si taki a libi syatu èn taki a lai nanga problema. Te den problema disi e moro yu, dan pe yu kan feni trowstu, yepi nanga bun rai?

Meki wi poti prakseri na dri prenspari fasi fa Bijbel kan yepi yu. A kan yepi yu fu

1. no kon na ini problema.

2. lusu muilek problema.

3. horidoro te yu de na ini wan muilek situwâsi di yu no man kenki.

Den artikel di e kon o taki fu den dri sani disi.