Problema di e sori taki howpu de

„Na ini den lasti dei muilek ten o de di tranga fu pasa.”​—2 TIMOTEYUS 3:1.

OITI yu yere, noso si wan fu den sari sani di e kon now?

● Wan takru siki e kiri furu sma.

● Angriten e meki taki hondrohondro sma dede.

● Wan gronseki e kiri dusundusun sma èn a e meki taki furu trawan no abi oso moro.

Na tapu den bladzijde di e kon, yu o leisi wan tu sani di abi fu du nanga den problema di wi kari na a bigin fu na artikel disi. Den sani disi o gi yu deki-ati fu denki seryusu fu a situwâsi na grontapu. Yu o si tu taki Bijbel ben taki na fesi dati den problema disi ben o pasa na ini wan pisi ten di nen „den lasti dei”.a

Den artikel disi no skrifi fu sori yu taki wi e libi na ini wan grontapu di lai problema, fu di yu srefi kan si dati kaba. Na presi fu dati, den artikel disi skrifi fu gi yu howpu. Den o sori taki a kontru fu den siksi profeititori disi wani taki dati heri esi „den lasti dei” o kon na wan kaba. Den artikel disi o poti prakseri tu na sani di sma gwenti taki fu di den no e bribi taki wi e libi na ini den lasti dei. Boiti dati, den o sori yu fu san ede yu kan bribi taki heri esi wan moro bun ten o kon.

[Futuwortu]

Profeititori 1. Gronseki

„Bigi gronseki o de.”​—LUKAS 21:11.

● Den ben hari Winnie, di abi pikinmoro wán nanga afu yari, komoto na ondro wan fu den oso di fadon broko na ini Haiti. Den sma fu wan telefisi station di ben de drape fu taki fu a rampu, ben yere a pikin e krei. Winnie pasa a gronseki disi libilibi, ma en papa nanga mama lasi den libi.

SAN DEN SANI DISI E SORI? Di wan bigi gronseki ben pasa na ini Haiti, tapu 10 yanuari 2010, dan moro leki 300.000 sma lasi den libi. Boiti dati, sowan 1.3 milyun sma lasi den oso wantronso. Aladi a gronseki na ini Haiti ben de wan bigiwan, toku a no de a wan-enkri gronseki di pasa. Fu april 2009 te go miti april 2010, sowan 18 bigi gronseki pasa na grontapu.

SAN SMA GWENTI TAKI? Wi no e kisi fu du nanga moro gronseki, ma now sma e poti moro prakseri na den sani disi leki fosi. Dati de so, fu di nanga yepi fu sabidensi nyunsu e panya moro makriki.

A SANI DISI DI SMA E TAKI, TRU? Luku a buweisi disi: Bijbel no e taki dati furu gronseki ben o de na ini den lasti dei, ma a e taki dati „bigi gronseki” ben o de „na difrenti presi”. Disi e meki den gronseki de wán fu den sani di e sori krin taki wi e libi na ini wan prenspari ten.​—Markus 13:8; Lukas 21:11.

SAN YU E DENKI? A de so taki wi e si bigi gronseki e pasa soleki fa Bijbel taki na fesi?

Den gronseki di e pasa, a no a wan-enkri buweisi taki wi e libi na ini den lasti dei. Den e meki wán profeititori nomo kon tru. Meki wi go luku wan di fu tu profeititori.

[Prenspari pisi na tapu bladzijde 4]

„Wi [sabiman] e kari den bigi gronseki. Ala tra sma e kari den bigi rampu.”​—KEN HUDNUT, FU WAN AMERKAN ORGANISÂSI DI E ONDROSUKU A GRON.

[Sma di abi a reti fu a prenki na tapu bladzijde 4]

© William Daniels/​Panos Pictures

Profeititori 2. Angriten

„Angriten o de.”​—MARKUS 13:8.

● Wan man e suku yepi na ini a dorpu Quaratadji na ini Niger. Tra famiriman fu a man disi komoto sosrefi fu farawe presi na ini a kondre fu di angriten de drape. Ma a man e didon en wawan na tapu wan matamata na gron. Fu san ede a de en wawan? „A no man sorgu taki en osofamiri abi wan sani fu nyan èn a no man si moro fa den e pina”, na so Sidi e taki di de a kapten fu a dorpu.

SAN DEN SANI DISI E SORI? Na heri grontapu, pikinmoro 1 fu ibri 7 sma no abi nofo fu nyan ibri dei. Na ini den Afrikan kondre na zuidsei fu a Sahara, a sani disi de moro ogri fu di 1 fu ibri 3 sma no abi nofo nyanyan gi wan langa pisi ten. Fu man frustan disi meki wi prakseri wan osofamiri di abi wan papa, wan mama nanga wan beibi. Efu nofo nyanyan de nomo gi tu fu den, dan a papa nanga mama o meki a pikin nyan fosi. Ma suma o tan nanga angribere? A papa? Noso a mama? Disi na a bosroiti di den sortu osofamiri disi musu teki ibri dei.

SAN SMA GWENTI TAKI? Grontapu e meki moro leki nofo nyanyan gi ala sma. Sma musu sorgu taki sani orga moro bun so taki ala sma abi nyanyan.

A SANI DISI DI SMA E TAKI, TRU? A tru taki gronman kan prani èn tyari moro nyanyan go na tra presi leki fositen. Fu dati ede libisma tirimakti ben o musu man sorgu taki a nyanyan fu grontapu prati na so wan fasi taki angri no de moro. Ma aladi den pruberi omeni tenti yari kaba, toku den no man du dati.

SAN YU E DENKI? A de so taki Markus 13:8 e kon tru? A de so taki sma na grontapu e pina nyanyan, aladi sabidensi go na fesi?

Nofo tron te gronseki nanga angriten e pasa, dan tra problema e opo kon di de wan buweisi tu taki wi e libi na ini den lasti dei.

[Prenspari pisi na tapu bladzijde 5]

„Moro leki wan di fu dri pisi fu a nomru fu pikin di dede fu di den siki na den fokofoko, fu di den kisi lusubere, noso fu di den kisi wan tra siki ben o man tan na libi efu den ben abi nofo gosontu nyanyan.”​—ANN M. VENEMAN, FOSI A BEN DE A DRIKTORO FU NA ORGANISÂSI FU DEN VERENIGDE NÂSI DI E LUKU DEN RETI FU PIKIN-NENGRE.

[Sma di abi a reti fu a prenki na tapu bladzijde 5]

© Paul Lowe/Panos Pictures

Profeititori 3. Siki

„Ala sortu takru siki . . . o de.”​—LUKAS 21:11, Nyun Testamenti.

● Bonzali, wan datra fu wan Afrikan kondre pe borgufeti pori a kondre, e du ala san a man fu yepi den sma di e wroko na ini mijn na ini a foto fu en, èn di abi a Marburg siki.a A ben begi lantiman na ini wan moro bigi foto fu yepi en, ma a no ben yere noti fu den. Fo mun baka dati den seni yepi, ma a ben lati fu di Bonzali dede. A kisi a Marburg siki fu den sma di a ben pruberi fu yepi.

SAN DEN SANI DISI E SORI? Den siki di sma e kisi na den fokofoko, lusubere, HIV noso AIDS, tuberculose (TBC), nanga malaria, na wan tu fu den moro takru siki di libisma e kisi. No so langa pasa, den feifi sortu siki disi kiri sowan 10.7 milyun sma. Fu taki en tra fasi, wan heri yari langa, ibri dri sekonde, den siki disi e kiri wán sma.

SAN SMA GWENTI TAKI? Moro nanga moro sma de na grontapu èn fu dati ede moro siki de. Sobun, moro sma de di kan kisi wan siki.

A SANI DISI DI SMA E TAKI, TRU? A nomru fu sma na grontapu kon de bun furu. Ma a de so tu taki libisma man ondrosuku sani moro bun, den man sorgu taki siki no e panya èn den man dresi siki moro bun. We, a no musu de so taki siki no de so furu moro? Ma dati no e pasa.

SAN YU E DENKI? A de so taki sma e kisi takru siki soleki fa Bijbel ben taki na fesi?

Gronseki, angriten nanga siki na sani di e tyari bigi bruya kon gi milyunmilyun sma. Ma moro sma e nyan pina fu di trawan e du ogri nanga den. Nofo tron na den sma di musu kibri den e du ogri nanga den. Luku san ben o pasa soleki fa Bijbel profeititori taki.

[Futuwortu]

[Prenspari pisi na tapu bladzijde 6]

„A de wan ogri sani te wan lew noso wan tra ogri meti ben o nyan yu, ma a ogri a srefi te wan takru siki e nyan yu fu inisei èn te yu e si san a e du nanga sma lontu yu.”​—DATRA MICHAEL OSTERHOLM.

[Sma di abi a reti fu a prenki na tapu bladzijde 6]

© William Daniels/​Panos Pictures

Profeititori 4. Sma no o lobi trawan

„Dem no sa lobi dem famiri.”​—2 TIMOTEYUS 3:1-3, Da Bijbel na ini Sranantongo.

● Chris e wroko gi wan organisâsi na ini Noord Wales di e yepi sma te trawan na ini den osofamiri du ogri nanga den. „Mi sabi ete taki wan uma kon dyaso fu di wan sma na ini en osofamiri ben naki en. Ma a lasti leisi di a kon dyaso baka, a ben kisi so hebi mankeri taki mi no ben sabi srefi taki na en”, na so Chris e taki. „Tra umasma e frede so te taki den no e opo den ede luku yu srefi.”

SAN DEN SANI DISI E SORI? Na ini wan Afrikan kondre, sowan 1 fu ibri 3 umasma ondrofeni taki sma ben abi seks nanga den di den ben pikin. Wan ondrosuku di ben du na ini a srefi kondre dati, sori taki moro leki wán fu ibri dri mansma ben feni taki a no fowtu fu fon den wefi. Ma a no umasma wawan e ondrofeni ogri na ini den osofamiri. Fu eksempre, na ini Kanada, 3 fu ibri 10 mansma ondrofeni taki den patna fon den noso du tra ogri nanga den.

SAN SMA GWENTI TAKI? Ala ten sma ben du ogri nanga trawan na ini den osofamiri. Na ini a ten disi sma e poti moro prakseri na a sani disi leki fosi.

A SANI DISI DI SMA E TAKI, TRU? A tru taki sma e poti moro prakseri na a ogri di sma e du nanga trawan na ini den osofamiri, na ini den yari di pasa. Ma a sani dati meki taki sma no e du so furu ogri moro nanga trawan na ini den osofamiri? Nôno, dati no de so. A de krin taki na ala sei sma no lobi den memre fu den osofamiri.

SAN YU E DENKI? A de so taki 2 Timoteyus 3:1-3 e kon tru? A de so taki furu sma no abi a lobi di musu de na ini na osofamiri?

A di fu feifi profeititori di e kon tru now, abi fu du nanga grontapu, a tanpresi fu wi. Luku san Bijbel e taki fu a tori disi.

[Prenspari pisi na tapu bladzijde 7]

„Ogri di e miti sma na ini den osofamiri na wan fu den sani di sma no e tyari go na skowtu so furu. Nofo tron te wan umasma e go na skowtu, dan a patna fu en du ogri nanga en sowan 35 leisi kaba.”​—WAN UMA DI E WROKO GI WAN ORGANISÂSI PE SMA KAN BEL GO TE SMA NA INI DEN OSOFAMIRI DU OGRI NANGA DEN.

Profeititori 5. Sma e pori grontapu

„[Gado o] tyari wan pori kon na tapu den wan di e pori grontapu.”​—OPENBARING 11:18.

● Wan man di nen Pirri abi a wroko fu meki win fu palmbon na ini Kpor, na Nigeria. A no man du a wroko fu en moro fu di furu oli fadon na ini a watra fu a Niger-liba. „Na oli e kiri den fisi, a e pori wi skin, èn a e pori a watra fu den kriki fu wi,” na so Pirri e taki. „Mi no man wroko moro fu sorgu misrefi.”

SAN DEN SANI DISI E SORI? Soleki fa son sabiman e taki, dan 6.5 milyard kilo doti nanga tra sani e kon na ini den se fu grontapu ibri yari. Afu fu a doti dati na plastiek di o drifi hondrohondro yari ete na tapu a watra, fosi a pori gowe. Boiti taki libisma e doti a grontapu, den e gebroiki den gudu fu grontapu so te taki den sani dati no de so furu moro. Ondrosuku e sori taki grontapu abi wán yari nanga feifi mun fanowdu fu meki den sani baka di libisma gebroiki na ini wan yari. „Efu moro nanga moro sma o kon de na grontapu, èn den e tan gebroiki sani, dan wi o abi tu grontapu fanowdu na a ten fu 2035,” na so Sydney Morning Herald, wan koranti fu Australia e taki.

SAN SMA GWENTI TAKI? Libisma koni nofo fu feni lusu gi problema di de. Wi kan lusu den problema disi èn sorgu taki grontapu no pori gowe.

A SANI DISI DI SMA E TAKI, TRU? Furu sma nanga organisâsi e du tranga muiti fu meki sma frustan sortu problema de na grontapu. Ma toku, sma e tan pori bigi pisi fu grontapu.

SAN YU E DENKI? A de fanowdu taki Gado du wan sani fu sorgu taki a grontapu fu wi no pori gowe soleki fa a pramisi wi?

Boiti den feifi profeititori di wi ben luku kaba, Bijbel ben taki na fesi tu sortu bun sani ben o pasa na ini den lasti dei. Meki wi go luku wán eksempre di abi fu du nanga a di fu siksi profeititori.

[Prenspari pisi na tapu bladzijde 8]

„Mi e firi neleki mi ben tan na ini wan paradijs, ma now a gersi leki mi e tan na tapu wan doti-ipi.”​—ERIN TAMBER, WAN SMA FU AMERIKANKONDRE DI BEN TAKI FU NA OLI DI BEN FADON NA INI A GOLF FU MEKSIKOW NA INI 2010.

[Faki na tapu bladzijde 8]

Na Gado de frantwortu?

Bijbel ben taki na fesi fu den takru sani di wi e si na ini a ten disi. Disi wani taki dati na Gado de frantwortu gi den sani dati? Na en e meki taki wi e pina? Yu kan feni bun piki tapu den aksi dati na ini kapitel 11 fu a buku San Bijbel e leri wi trutru? Yehovah Kotoigi tyari a buku disi kon na doro.

[Sma di abi a reti fu a prenki na tapu bladzijde 8]

U.S. Coast Guard photo

Profeititori 6. Wan preikiwroko di e du na heri grontapu

„A bun nyunsu disi fu a kownukondre o preiki gi sma na heri grontapu.”​—MATEYUS 24:14.

● Vaiatea e libi na wan farawe èilanti na ini a Stille Oceaan èn na èilanti dati na wan fu den 80 pikin èilanti na ini wan grupu di nen Tuamotu Archipelago. Den èilanti disi de na ini wan kontren di de sowan 802.900 fokanti kilometer, èn sowan 16.000 sma e tan drape. Ma toku Yehovah Kotoigi fisiti Vaiatea nanga den birtisma fu en. Fu san ede? Fu di den Kotoigi wani fruteri ala sma a bun nyunsu fu Gado Kownukondre, awinsi pe den e libi.

SAN DEN SANI DISI E SORI? A Kownukondre boskopu e doro na ala sei fu grontapu. Na ini 2010 wawan, Yehovah Kotoigi gebroiki moro leki 1.6 milyard yuru fu preiki a bun nyunsu disi na ini 236 kondre. Te yu e luku en bun, dati wani taki dati ibri Kotoigi e preiki sowan 30 miniti ibri dei. Na ini den tin yari di pasa, den meki moro leki 20 milyard publikâsi fu gi sma leri fu Bijbel.

SAN SMA GWENTI TAKI? Sma preiki a Bijbel boskopu dusundusun yari kaba.

A SANI DISI DI SMA E TAKI, TRU? A tru taki furu sma ben preiki wan tu sani fu a boskopu fu Bijbel. Ma furu fu den du dati fu wan syatu pisi ten nomo èn na ini wan pikin kontren. Tra fasi leki dati, Yehovah Kotoigi e preiki na wan orga fasi na heri grontapu èn den e preiki gi milyunmilyun sma. Den Kotoigi e horidoro na ini a preikiwroko fu den, aladi den kisi hebi gens fu den moro makti èn ogri-ati organisâsi di libisma sabi (Markus 13:13).a Boiti dati, Yehovah Kotoigi no e kisi pai gi a preikiwroko di den e du. Na presi fu dati, den de klariklari fu gi den ten, èn den no e aksi moni gi den publikâsi di den e prati. Den man du a wroko disi fu di sma e gi bijdrage.

SAN YU E DENKI? A „bun nyunsu fu a kownukondre” e preiki na heri grontapu? A kontru fu a profeititori disi wani taki dati heri esi wan moro bun sani o pasa?

[Futuwortu]

[Prenspari pisi na tapu bladzijde 9]

„Solanga Yehovah e gi pasi ete, wi o tan preiki a bun nyunsu fu a Kownukondre fayafaya, fu di wi o du ala muiti di wi man fu miti sma.”​—JAARBOEK VAN JEHOVAH’S GETUIGEN 2010.

Heri esi wan moro bun ten o kon!

„Ete wan syatu pisi ten èn den ogriwan no sa de moro . . . Ma den safri-ati sma o kisi grontapu èn den o prisiri srefisrefi, fu di vrede o de pasa marki.”​—PSALM 37:10, 11.

YU BEN o wani si a profeititori di skrifi na tapusei kon tru? A no de fu taki dati yu ben o wani dati. Krin buweisi de fu san ede wi kan bribi taki den sani dati o kon tru heri esi.

Den artikel na fesi ben taki fu wan tu fu den Bijbel profeititori di e sori krin taki wi e libi na ini „den lasti dei” (2 Timoteyus 3:1-5). Gado meki den skrifiman fu Bijbel taki na fesi dati den sani dati ben o pasa so taki wi kan abi howpu (Romesma 15:4). A kontru fu den profeititori dati wani taki dati den problema di wi abi now, o kon na wan kaba heri esi.

San o pasa baka den lasti dei? Gado Kownukondre o tiri ala libisma (Mateyus 6:9, 10). Luku fa grontapu o de na ini a ten dati soleki fa Bijbel e taki:

● Angriten no sa de moro. „Furu nyanyan o kon de na grontapu. Srefi na tapu den ede fu den bergi nyanyan o de pasa marki.”​—Psalm 72:16.

● Siki no sa de moro. „Nowan sma di e tan na ini a kondre o taki: ’Mi siki.’”​—Yesaya 33:24.

● Grontapu o kon bun baka. „A sabana nanga den presi sondro watra o bari fu prisiri. Iya, a drei sabana o breiti srefisrefi èn a o lai bromki.”​—Yesaya 35:1.

Disi na wan tu fu den moi Bijbel profeititori di o kon tru heri esi. Fu san ede yu no e aksi Yehovah Kotoigi fu sori yu fu san ede den de so seiker taki heri esi wan moro bun ten o kon?