Koni rai fu Gado di e tiri wi libi

YEHOVAH na wan koni Tiriman? Wan prenspari fasi fa wi kan gi piki tapu na aksi dati, na fu luku den rai di a e gi wi. Den rai fu en bun? A de so taki te sma e fiti den rai dati, dan den e kon abi wan moro bun èn koloku libi? A koni Kownu Salomo ben skrifi hondrohondro odo. Den odo disi abi fu du nanga pikinmoro ibri pisi fu a libi. Luku wan tu eksempre.

Frutrow tapu Gado. A de tumusi prenspari fu frutrow tapu Yehovah, efu wi wani abi wan bun matifasi nanga en. Salomo ben skrifi: „Frutrow tapu Yehovah nanga yu heri ati. No frutrow tapu yu eigi frustan. Poti prakseri na en, awinsi sortu pasi yu e waka, dan na en o meki yu pasi kon reti” (Odo 3:5, 6). Te wi e frutrow tapu Gado, fu di wi e suku tiri na en èn e gi yesi na en, dan wi o de koloku trutru. Te wan sma e du dati, dan a e meki Gado ati prisiri èn a e gi wan piki tapu na aksi fu Satan, a Gensman fu Yehovah.​—Odo 27:11.

Fa fu handri nanga trawan. A rai di Gado e gi masra, wefi, nanga pikin fiti trutru na ini a ten disi, moro leki iniwan ten bifo. Gado taigi masra: „Prisiri nanga a wefi di yu teki sensi di yu yongu.” Disi wani taki dati wan masra musu tan lobi en wefi (Odo 5:18-20). Na wan moi fasi a buku Odo e taki fu wan bun uma di e tyari ensrefi na so wan fasi taki en masra nanga en pikin e lespeki en. Disi na wan moi rai gi uma di trow (Odo kapitel 31). Pikin e kisi rai tu fu gi yesi na den papa nanga mama (Odo 6:20). A buku disi e sori tu taki a de tumusi prenspari fu abi mati, fu di efu wan sma e hori ensrefi aparti a o denki ensrefi nomo (Odo 18:1). Mati kan abi bun noso takru krakti tapu wi. Fu dati ede wi musu suku wi mati nanga koni.​—Odo 13:20; 17:17.

Fa fu tyari yusrefi. A buku Odo abi tumusi moi rai na ini di e sori fa wi kan sorgu taki wi no dringi sopi pasa marki, fa wi kan kon abi bun fasi, fa wi kan kakafutu gi takru fasi, èn fa wi kan wroko tranga (Odo 6:6; 14:30; 20:1). A buku disi e warskow wi taki wi no musu poti frutrow tapu libisma koni di e difrenti fu a koni fu Gado, fu di dati o meki wi abi takru bakapisi (Odo 14:12). A buku e gi wi a deki-ati tu fu kibri wi ati, noso den moro dipi firi fu wi, gi sani di kan abi takru krakti tapu wi. Fu dati ede a e memre wi taki „na [ini na ati] den rutu fu a libi de”.​—Odo 4:23.

Milyunmilyun sma na heri grontapu kon si taki te den e teki den rai dati, a libi fu den e kon moro bun. Leki bakapisi fu dati, den abi furu reide fu teki Yehovah leki den Tiriman.

​—Den tori disi teki puru fu a buku Odo.