O ten Bijbel ben skrifi?

Bijbel na wan aparti buku. Moro leki dri milyard sma e si den sani di skrifi na ini, leki santa sani. Sma e taki dati nowan tra buku seri so furu leki Bijbel, fu di sowan 6.000.000.000 fu a heri Bijbel noso pisi fu en meki na ini 2400 tongo.

ALADI sma leisi Bijbel moro leki iniwan tra buku na ini a historia, toku furu difrenti denki de te a abi fu du nanga o ten Bijbel skrifi. Disi de spesrutu so nanga den Hebrew Buku fu Bijbel, di sma e kari nofo tron na Owru Testamenti. Kande yu leisi fu den sani disi na ini tijdschrift noso buku, noso yu si telefisi programa pe sabiman e taki fu a sani disi. Luku wan tu sani di sonwan fu den sma disi e taki.

▪ „Den Buku fu Bijbel ben skrifi na a pisi ten fu a di fu aiti yarihondro te go miti a di fu siksi yarihondro bifo Krestes, noso na a ten fu den profeiti Yesaya nanga Yeremia.”

▪ „Na ini den tu hondro yari di pasa, Bijbel sabiman ben feni taki den Hebrew Buku fu Bijbel ben skrifi na a ten fu den Persiasma nanga den Grikisma (a di fu feifi yarihondro te go miti a di fu tu yarihondro bifo Krestes).”

▪ „Ala den Hebrew Buku fu Bijbel, soleki fa wi sabi den now, na fu a ten fu den Grikisma (no moro fruku leki a de fu tu yarihondro te go miti a fosi yarihondro [bifo Krestes]).”

Fa wan Kresten di e bribi taki „na Gado srefi ben meki sma skrifi ala den sani di de na ini Gado Buku” musu si den difrenti sani disi di sma e taki? (2 Timoteyus 3:16) Fu man feni a piki tapu na aksi dati, meki wi go luku ala tu sei fu a tori disi.

Bijbel srefi e sori o ten den sani di skrifi na ini pasa

Den Hebrew Buku fu Bijbel abi bun furu tori na ini di e sori o ten sani pasa baka makandra na ini a historia. Den sani disi e sori taki den fosi buku ben skrifi na a ten fu Moses nanga Yosua, èn dati na sowan 3500 yari pasa. Samuel, David, Salomo, nanga trawan skrifi tra buku na a ten fu a di fu 11 yarihondro bifo Krestes. Baka dati, yu e kisi buku di e taki fu a historia, buku di abi puwema na ini, nanga buku di abi profeititori. Den buku disi na fu a di fu neigi yarihondro te go miti a di fu feifi yarihondro bifo Krestes.

Kopi noso pisi fu den Bijbel buku disi, boiti a buku Ester, de fu feni na ini den Dede Se Lolo. Sma di ondrosuku den sani disi na wan spesrutu fasi, e sori taki den moro owruwan fu den bukulolo disi na fu a ten fu a yari 200 bifo Krestes.

San sabiman e taki

Wan prenspari sani di e meki taki sma e tweifri na den sani di e sori o ten Bijbel skrifi, na taki Bijbel srefi e sori dati na Gado meki sma skrifi en. Te a abi fu du nanga a tori disi, dan Professor Walter C. Kaiser, Jr., skrifi na ini en buku: „Wi no kan bribi Bijbel fu di a e taki dati na Gado skrifi en, fu di a e taki fu wondru èn fu di a e taki fu Gado” (The Old Testament Documents). Sabiman di no e bribi taki na Gado meki sma skrifi Bijbel, e taki dati den musu ondrosuku Bijbel finifini neleki iniwan tra buku.

Fu wan pisi ten, sma ben gebroiki na evolutie-leri fu Darwin fu fruklari fa den sani di sma e bribi kenki na ini a ten di pasa. Na a bigin, den ben anbegi sani na den lontu, baka dati den bigin anbegi furu difrenti gado. Te fu kaba, den kon nanga a denki fu anbegi wán gado nomo. Fu di den fosi buku fu Bijbel e taki fu na anbegi di sma ben e anbegi wán Gado, meki son sma e bribi taki a musu de so taki den sani disi ben skrifi moro lati leki san Bijbel srefi e taki.

Sensi a ten dati, sabiman kon nanga difrenti denki di den ondrosuku den sani di skrifi na ini Bijbel. Fu eksempre, wan wortubuku di tyari kon na doro no so langa pasa èn di e taki fu na Owru Testamenti, e taki finifini fu den wortu di gebroiki na ini Bijbel. Boiti dati, a e sori efu den tori e kruderi nanga a historia, a e sori efu den tori e kruderi nanga den sani di sma ben bribi na a ten dati, èn so moro fara.

Aladi sabiman no e agri nanga makandra o ten Bijbel skrifi, toku furu fu den e agri nanga san Professor R. E. Friedman taki. A professor disi skrifi: „Na ini hondrohondro yari, owruten skrifiman ben meki dokumenti fu puwema, fu difrenti tori, èn fu den wet di sma ben abi. Baka dati, tra skrifiman ben teki sani puru fu den dokumenti disi. Den skrifiman dati gebroiki den dokumenti disi fu skrifi Bijbel.”

A buku Faith, Tradition, and History e taki fu wan tu fu den denki disi di sma abi fu Bijbel èn sosrefi tra denki. Ma fu taki en syatu, a buku e sori disi: „Aladi sabiman e tweifri na Bijbel èn den de seiker fu den eigi denki, toku den e krutu a denki fu makandra.”

Buweisi di e sori o ten Bijbel skrifi

Den fosi Bijbel buku ben skrifi na tapu sani di pori gowe baka wan pisi ten. Fu dati ede wi kan frustan taki sma no o man feni nowan fu den fosi buku noso kopi fu a ten fu Moses, Yosua, Samuel, noso David. Aladi dati de so, toku wi kan ondrosuku den buweisi fu a historia di e sori taki wi kan agri nanga san Bijbel e taki fu den difrenti pisi ten, neleki wan tu lespeki sabiman nanga sma di e ondrosuku owruten sani. San den sortu buweisi dati e sori wi? Luku wan tu eksempre.

▪ A de so taki sma ben skrifi sani 3500 yari pasa na ini owruten Mindri Owstusei, na a ten di Moses nanga Yosua ben de na libi soleki fa Bijbel e sori? Na ini owruten Mesopotamia nanga Egepte, sma ben e skrifi sani fu a historia, fu na anbegi fu den, fu den wet fu den, èn fu tra tori. Fa a de nanga Moses nanga den Israelsma? Wan wortubuku e taki: „Wi no abi fu tweifri taki sma ben skrifi sani na a owruten Kanan na a pisi ten fu [1550 te go miti 1200 bifo Krestes]” (Dictionary of the Old Testament: Pentateuch). A buku e taki moro fara: „Te wi e luku a gwenti di sma ben abi fu skrifi sani na ini owruten, dan wi no abi fu tweifri taki Moses trutru skrifi den sani na a ten di Bijbel e sori dati. Boiti dati, wi no abi fu tweifri tu taki furu fu den tra pisi fu den Hebrew Buku fu Bijbel ben skrifi na a ten di Bijbel e sori.”​—Exodus 17:14; 24:4; 34:27, 28; Numeri 33:2; Deuteronomium 31:24.

▪ A de so taki Bijbel skrifiman ben teki sani puru fu owruten dokumenti? Iya, fu di sonwan fu den e taki fu ’buku’, di ben kan de dokumenti fu a kondre, dokumenti di e taki pe den famiri komoto, dokumenti fu a historia, èn dokumenti fu difrenti lo nanga famiri.​—Numeri 21:14; Yosua 10:13; 2 Samuel 1:18; 1 Kownu 11:41; 2 Kroniki 32:32.

▪ Fu san ede sma no feni tra owruten Bijbel dokumenti di owru moro leki den Dede Se Lolo? Wan tijdschrift e taki disi: „Furu fu den papirus nanga leer dokumenti na ini Palestina, pori gowe. Soso wan tu de ete di ben de fu drei kontren soleki a kontren lontu a Dede Se. Sani leki papirus nanga leer e pori na ini natinati santi. Sobun, aladi sma no feni den sani dati, toku disi no wani taki dati den no ben de” (Biblical Archaeology Review). Fu taki en leti, sma feni hondrohondro stampu fu kleidoti di den ben gebroiki fu tapu dokumenti. Den dokumenti fu papirus nanga leer pori gowe fu di den bron noso fu di den ben de na ini natinati santi, ma den stampu fu kleidoti de ete. Den stampu disi de fu a pisi ten fu a di fu neigi yarihondro te go miti a di fu feifi yarihondro bifo Krestes.

▪ Fa den Bijbel dokumenti no lasi gowe? Wan buku e taki: „A musu de so taki den tori, den psalm, den wet, nanga den profeititori di wi sabi na ini a ten disi leki pisi fu Bijbel, ben skrifi abra furu leisi na ini Bijbel ten. . . . Efu sma ben skrifi den sani disi abra ibri tron baka na ini Bijbel ten, dan den ben du disi fu di den ben gebroiki den sani dati na ini den aladei libi. . . . Nowan sma ben o skrifi den dokumenti dati abra fu soso” (The Bible as It Was).​—Deuteronomium 17:18; Odo 25:1.

Disi wani taki dati den fosi buku fu Bijbel ben skrifi abra ibri tron baka, na ini wan pisi ten fu 1500 yari teleki a fosi yarihondro. Te den ben skrifi den buku disi abra, dan den ben „puru owru wortu èn den ben skrifi sani na a fasi fa sma fu a ten dati ben e taki. A sani disi ben pasa na heri grontapu na a ten fu na owruten Mindri Owstusei,” na so a buku On the Reliability of the Old Testament e taki.a Disi e meki wi aksi wisrefi efu den sma di e tweifri na Bijbel fu di den e luku a fasi fa a skrifi, abi leti.

O ten Bijbel ben skrifi?

Sobun, wi musu denki taki den Buku fu Bijbel no skrifi na a ten di Bijbel e sori, soso fu di dokumenti fu a ten fu Moses, Yosua, Samuel, nanga trawan no de fu feni? Furu sabiman e agri taki a no fu di wi no abi den owruten dokumenti disi, meki buweisi no de taki den ben de trutru. Fu taki en leti, omeni fu den sani di sma skrifi na tapu sani di man pori gowe, de ete? Fu eksempre, K. A. Kitchen, sabiman di e ondrosuku owruten sani fu Egepte, e sori taki pikinmoro ala den sani pori gowe di den Egeptesma skrifi na tapu papirus bifo a ten fu den Grikisma nanga den Romesma.

Den sma di abi lespeki gi Bijbel kan aksi densrefi tu: ’Fa Yesus ben e si den Hebrew Buku fu Bijbel?’ Na ini a ten dati, nowan sma ben tweifri o ten den buku dati skrifi. Soleki fa a sori, dan Yesus, nanga den Dyu fu a ten dati, ben e bribi taki den sani di skrifi na ini Bijbel ben pasa trutru. A ben bribi taki sma soleki Moses, Yosua, Samuel, nanga trawan trutru ben skrifi den fosi Bijbel buku?

Yesus ben taki fu den sani di Moses ben skrifi. Fu eksempre, a ben taki fu „a buku fu Moses” (Markus 12:26; Yohanes 5:46). A ben taki fu den tori na ini Genesis (Mateyus 19:4, 5; 24:37-39); den tori na ini Exodus (Lukas 20:37); den tori na ini Lefitikus (Mateyus 8:4); den tori na ini Numeri (Mateyus 12:5); nanga den tori na ini Deuteronomium (Mateyus 18:16). Yesus ben taki: „Ala san a wet fu Moses, nanga den leri fu den Profeiti, nanga den Psalm skrifi fu mi, musu kon tru” (Lukas 24:44). Efu a ben bribi trutru taki na Moses nanga trawan skrifi den buku dati, dan a no de fu taki dati a ben bribi taki den sani di skrifi na ini den Hebrew Buku fu Bijbel, pasa trutru.

Sobun, o ten Bijbel ben skrifi? Wi kan bribi taki Bijbel skrifi na a pisi ten di Bijbel srefi e taki? Wi ben luku den difrenti denki fu sabiman èn sosrefi san Bijbel srefi e taki. Boiti dati, wi ben luku buweisi fu a historia èn fa Yesus ben denki fu den buku dati. Te yu e luku den sani dati, dan yu o agri nanga san Yesus taigi en Tata, Yehovah Gado, na ini begi: „Yu wortu na waarheid”?—Yohanes 17:17.

[Futuwortu]

[Karta/​Prenki na tapu bladzijde 20-23]

(Efu yu wani si pe den sani disi skrifi, luku a tijdschrift)

(Disi e sori na sortu ten den Bijbel buku ben kaba skrifi)

2000 bifo Krestes

1800

[Prenki]

Skrifiman fu Egepte ben skrifi sani bifo a ten fu Moses

[Sma di abi a reti fu a prenki]

© DeA Picture Library/​Art Resource, NY

1600

[Prenki]

Moses kaba skrifi Genesis na a ten fu 1513 bifo Krestes, na tapu sani di kan pori gowe

Genesis 1513 bifo Krestes

Yosua

1400

1200

Samuel

1000 bifo Krestes

[Prenki]

Sma feni hondrohondro stampu fu kleidoti

A ten fu 900 te go miti 500 bifo Krestes

Yona

800

Yesaya

600

Yeremia

Danièl

[Prenki]

Wan dokumenti fu papirus di fow èn tai nanga wan titei di abi wan stampu fu kleidoti na tapu

A ten fu 449 bifo Krestes

[Sma di abi a reti fu a prenki]

Brooklyn Museum, Bequest of Theodora Wilbour from the collection of her father, Charles Edwin Wilbour

400

200

[Prenki]

Den Dede Se Lolo ben domru na ini linnen krosi èn den ben kibri na ini patu. Disi na den moro owru Bijbel dokumenti di sma feni te now

A ten fu 200 te go miti 100 bifo Krestes

[Sma di abi a reti fu a prenki]

Shrine of the Book, Photo © The Israel Museum, Jerusalem