Libisma e pasa a Frudu libilibi

O MORO libisma e kon furu na grontapu, o moro sondu nanga ogridu e panya na ala sei. Heinok di ben de a wan-enkri profeiti, ben warskow sma taki wan dei Gado o pori den ogrisma. Toku ogridu ben pasa ete èn a ben kon moro ogri srefi. Son engel ben opo densrefi teige Yehovah, fu di den gowe libi den tanpresi na hemel, den teki libisma skin na grontapu, èn na wan gridi fasi den teki umasma leki wefi. Disi meki taki den meki basra pikin di ben de bigi tranga ogri-ati man, di den ben kari Neifilim. Den man disi ben meki taki moro ogridu kon na grontapu èn den ben kiri sma. Gado ben sari srefisrefi fu si fa den sani di a meki na grontapu ben e pori gowe.

Baka di Heinok dede, wan man ben de di ben de heri tra fasi leki den ogrisma. En nen ben de Noa. En nanga en osofamiri ben pruberi fu du san reti na ini Gado ai. Di Gado bosroiti fu pori den ogrisma na a ten dati, dan a ben wani kibri Noa nanga den meti na grontapu. Fu dati ede Gado taigi Noa fu bow wan ark, noso wan bigi fokanti boto. Na ini a boto disi, Noa nanga en osofamiri ben o tan na libi, makandra nanga den furu difrenti meti, te a frudu ben o kon na heri grontapu. Noa ben gi yesi na Gado. Na ini den someni tenti yari di Noa ben e bow na ark, a ben de „wan preikiman fu regtfardikifasi” tu (2 Petrus 2:5). A ben e warskow sma gi a Frudu di ben o kon, ma den sma no ben arki en. A ten ben doro gi Noa nanga en osofamiri fu go na ini na ark, makandra nanga den meti. Di den alamala go na ini na ark, Gado tapu a doro. Ne na alen bigin fadon.

Na alen ben e fadon bun hebi 40 dei nanga 40 neti langa, teleki heri grontapu ben sungu. Den ogrisma no ben de moro. Wan tu mun baka dati, di a watra ben e saka, na ark kon fasi na tapu wan bergi. Baka wán heri yari fosi, den sma nanga den meti na ini na ark, ben man kon na dorosei. Fu taki Gado tangi, Noa tyari wan ofrandi gi Yehovah. Gado sori taki a teki na ofrandi dati, di a gi Noa nanga en osofamiri a dyaranti taki noiti moro a o tyari wan frudu kon di o pori ala libisani na grontapu. Fu memre den na a moi pramisi dati, Yehovah meki wan alenbo kon di den ben man si.

Baka a Frudu, Gado gi libisma wan tu nyun komando sosrefi. A gi den primisi fu nyan meti. Ma den no ben mag nyan brudu. A ben taigi den bakapikin fu Noa tu fu panya go na ala sei fu grontapu, ma wan tu fu den no gi yesi na a komando dati. Sma ben kon na wán na ondro a tiri fu a fesiman Nimrod, èn den bigin bow wan bigi toren na ini a foto Babel, di sma ben kari Babilon bakaten. Den ben du dati fu di den no ben wani gi yesi na a komando fu Gado fu panya go na ala sei fu grontapu. Ma Gado tapu den sma disi di ben opo densrefi teige en, fu di a bruya a tongo di den ben taki èn a meki den taki difrenti tongo. Fu di den sma disi no ben e frustan makandra moro, meki den tapu nanga a bow-wroko fu den èn den panya go na ala sei.

​—Den tori disi teki puru fu Genesis kapitel 6 te go miti 11; Yudas 14, 15.