Wan Warskow fu Fositen

Yehovah no sa gi takru sma pasi meki den pori Paradijs. Soso den mati fu en sa libi drape. San sa pasa nanga takru sma? Fu kon sabi san na a piki, dan luku a tru tori fu Noa. Noa ben libi dusundusun yari pasa kaba. A ben de wan bun man di ben du muiti ala ten fu du a wani fu Yehovah. Ma den tra sma na grontapu ben du takru sani. Dati meki Yehovah ben taigi Noa taki A ben o tyari wan frudu kon fu kiri ala den ogri sma dati. A ben taigi Noa fu bow wan ark so taki en nanga en osofamiri no ben o dede te a Frudu ben kon.​—Genesis 6:9-18.

Noa nanga en osofamiri ben bow na ark. Noa ben warskow sma taki a Frudu ben o kon, ma den no ben arki en. Den ben tan du takru sani. Baka di na ark ben kaba, dan Noa ben tyari meti go na ini na ark. En nanga en osofamiri ben go na inisei tu. Baka dati Yehovah ben meki wan hebi alen fadon. Alen ben fadon 40 dei nanga 40 neti langa. A watra ben sungu heri grontapu.​—Genesis 7:7-12.

Den ogri sma ben lasi libi, ma Noa nanga en osofamiri ben tan na libi. Yehovah ben tyari den pasa a Frudu sondro taki den kisi mankeri, so taki den ben kan libi na ini wan grontapu pe ogri no ben de moro (Genesis 7:22, 23). Bijbel e taki dati a ten sa kon baka taki Yehovah sa kiri den wan di e weigri fu du san bun. A no sa kiri bun sma. Den sa libi fu têgo na ini a Paradijs grontapu.​—2 Petrus 2:5, 6, 9.

Na ini a ten disi furu sma e du takru sani. Grontapu lai problema. Yehovah e seni den Kotoigi fu en go na sma ibri leisi baka fu warskow den, ma toku moro furu fu den no wani arki den wortu fu Yehovah. Den no wani kenki a fasi fa den e libi. Den no wani teki san Gado e taki fu bun nanga ogri. San sa pasa nanga den sma disi? Den sa kenki wan dei? Furu sma no sa kenki noiti. A ten e doro taki Gado sa kiri ogri sma èn noiti moro den sa libi baka.​—Psalm 92:7.

Grontapu no sa pori; a sa kon tron wan Paradijs. Den sma di e tron Gado mati sa libi fu têgo na ini a Paradijs na grontapu.​—Psalm 37:29.