Krosibei fu Babel wan foto ben de di nen Ur. Den sma drape no ben e dini Yehovah, ma den ben e dini furu tra gado. Ma wan man ben de na ini Ur di ben e anbegi Yehovah wawan. En nen na Abraham.

Yehovah taigi Abraham: ’Gowe libi yu oso nanga yu famiri èn go na wan kondre di mi o sori yu.’ Baka dati Gado pramisi en: ’Mi o meki yu tron afo fu wan bigi pipel èn fu yu ede mi o du bun sani gi furu sma na heri grontapu.’

Abraham no ben sabi pe Yehovah ben seni en go, ma a ben e frutrow tapu Yehovah. Dati meki Abraham, en frow Sara, en papa Tera nanga en neef Lot teki den sani fu den, dan den bigin teki waka go na wan farawe presi, soleki fa Yehovah ben taigi den fu du.

Abraham ben abi 75 yari di en nanga en famiri doro na ini a kondre di Yehovah ben wani sori den. A kondre ben nen Kanan. Drape Gado taki nanga Abraham èn a pramisi en a sani disi: ’Mi o gi den pikin fu yu a heri kondre di yu e si dyaso.’ Ma Abraham nanga Sara ben owru èn den no ben abi nowan pikin. Sobun, fa Yehovah ben o du san a pramisi den?

Abraham nanga Sara ben trow furu yari kaba. Den gowe libi den moi oso na ini Ur èn den ben e libi na ini tenti. Ma Sara no ben e krutukrutu fu di a ben e frutrow tapu Yehovah.

Sara ben wani wan pikin so te, taki a taigi Abraham: ’Efu mi umasrafu Hagar kisi wan pikin, dan a o de leki na mi pikin.’ Bakaten Hagar kisi wan manpikin. En nen na Ismael.

Furu yari baka dati, di Abraham ben abi 99 yari èn Sara ben abi 89 yari, dri man kon na den. Abraham kari den kon fu rostu pikinso na ondro wan bon èn fu nyan wan sani. Yu sabi suma na den man disi? Den ben de engel. Den taigi Abraham: ’Tra yari yu nanga yu frow o abi wan manpikin.’ Sara ben de na ini a tenti e arki. A lafu èn a ben prakseri: ’Mi o man kisi wan pikin, now di mi kon owru so?’

A tra yari Sara kisi wan manpikin, soleki fa na engel fu Yehovah ben pramisi. Abraham kari en Isak. A nen disi wani taki „Lafu”.

Di Isak ben abi feifi yari, Sara si taki Ismael ben abi a gwenti fu dreigi en. Fu di a no ben wani taki Ismael du ogri nanga a boi fu en, meki a go na Abraham èn a aksi en fu seni Hagar nanga Ismael gowe. Na a bigin Abraham no ben wani. Ma fu di Yehovah ben wani taki sani go bun nanga Isak, meki a taigi Abraham: ’Arki Sara. Mi o sorgu gi Ismael. Ma na Isak mi o gebroiki fu du san mi pramisi.’

Lot ben libi nanga en omu Abraham na ini a kondre Kanan. Bakaten Abraham nanga Lot ben kon abi so furu meti, taki nofo presi no ben de gi den alamala. Dati meki Abraham taigi Lot: ’Wi no man libi na a wán presi moro. Luku sortu sei yu wani go, dan mi o go na a tra sei.’ Disi e sori taki Abraham no ben gridi, a no so?

Lot si wan moi presi krosibei fu wan foto di nen Sodom. A presi ben abi furu watra nanga grun grasi. Dati meki en nanga en famiri froisi go tan drape.

Den sma fu Sodom nanga a foto Gomora di ben de krosibei, ben ogri. Den ben ogri so te, taki Yehovah bosroiti fu pori den foto dati. Ma Gado no ben wani taki Lot nanga en osofamiri dede. Dati meki a seni tu engel fu warskow den. Den engel taki: ’Du esi! Komoto na ini a foto disi! Yehovah o pori en.’

Lot no gowe wantewante. A ben e draidrai. Dati meki den engel grabu Lot, den grabu en frow nanga den tu umapikin fu en na den anu èn den tyari den go na dorosei fu a foto. Den taigi den: ’Lon! Lon efu unu wani tan na libi. No drai luku go na baka, noso unu o dede!’

Di den doro na wan foto di nen Sowar, dan Yehovah meki faya nanga ston di ben e bron, fadon kon na tapu Sodom nanga Gomora. Noti fu den tu foto disi ben tan abra. A frow fu Lot no arki Yehovah. A drai luku go na baka, dan a tron wan pilari fu sowtu! Ma Lot nanga den umapikin fu en tan na libi fu di den arki Yehovah. Den ben musu fu sari taki Lot en frow no gi yesi na Yehovah. Disi e sori wi o prenspari a de fu du san Yehovah taki.

Abraham ben leri en boi Isak fu lobi Yehovah èn fu bribi ala den pramisi fu en. Ma di Isak ben abi 25 yari, Yehovah aksi Abraham fu du wan sani di no ben makelek. San a aksi en fu du?

Gado taigi Abraham: ’Grantangi, teki yu wan-enkri manpikin èn gi en leki wan ofrandi na tapu wan bergi na ini a kondre Moria.’ Abraham no ben man frustan fu san ede Yehovah aksi en fu du dati. Ma toku a gi yesi na Yehovah.

A tra dei, Abraham opo fruku mamanten. A teki Isak nanga tu futuboi fu en, dan den bigin waka go na Moria. Baka dri dei den ben kan si den bergi farawe na den fesi. Abraham taigi den futuboi fu en fu wakti drape fu di en nanga Isak ben o go tyari wan ofrandi gi Gado. Abraham meki Isak tyari na udu fu meki a faya, dan en teki a nefi. Isak aksi en papa: ’Pe a meti de di wi o tyari leki ofrandi?’ Abraham piki en: ’Mi boi, Yehovah o sorgu gi dati.’

Di den doro na a bergi, den meki wan altari. Dan Abraham tai Isak anu nanga futu èn a poti en na tapu na altari.

Di Abraham teki a nefi, dan wan engel fu Yehovah kari en komoto fu hemel. A taki: ’Abraham! No du a boi ogri! Now mi sabi taki yu e bribi trutru na ini Gado, fu di yu ben de klariklari fu gi yu eigi boi leki ofrandi.’ Dan Abraham si wan manskapu fasi nanga en tutu na ini wan busibusi. Esi-esi a lusu Isak, dan a tyari a manskapu leki ofrandi.

Sensi a dei dati Yehovah ben kari Abraham en mati. Yu sabi fu san ede? Fu di Abraham ben du ala san Yehovah taigi en, awinsi a no ben frustan fu san ede Yehovah ben aksi en fu du son sani.

Yehovah pramisi Abraham ete wan leisi: ’Mi o blesi yu èn yu o kisi furu bakapikin.’ Disi wani taki dati Yehovah ben o blesi ala bun sma nanga yepi fu Abraham famiri.