Yehovah taigi Samuel: ’Go na a oso fu Isai. Wan fu den manpikin fu en o tron a nyun kownu fu Israel.’ Sobun, Samuel go na a oso fu Isai. Di a si a moro owru manpikin, a prakseri: ’A musu de taki na a yonguman disi Gado teki.’ Ma Yehovah taigi Samuel taki a no en a teki. Yehovah taki: ’Libisma e si soso san na ai e si. Ma mi e si fa na ati de.’

Isai tyari ete siksi fu den manpikin fu en kon gi Samuel. Ma Samuel taki: ’Yehovah no teki nowan fu den. Yu abi tra manpikin?’ Isai taki: ’Mi abi ete wan, a moro yonguwan, David. A de na dorosei e luku den skapu.’ Di David kon na inisei, Yehovah taigi Samuel: ’Na en mi teki!’ Samuel kanti oli na tapu David ede èn na so a salfu en leki a nyun kownu fu Israel.

Baka wan pisi ten den Israelsma ben o go feti nanga den Filisteasma. Den Filisteasma ben abi wan bigi tranga srudati di ben e feti gi den. A man disi ben nen Goliat. Ibri dei Goliat ben e spotu den Israelsma. A ben e bari: ’Seni wan man fu kon feti nanga mi. Efu a wini, dan wi o de unu srafu. Ma efu mi wini, dan unu o de wi srafu.’

David kon na a kampu fu den Israelsma fu di a ben tyari nyanyan kon gi den brada fu en di ben de srudati. Di a yere fa Goliat ben e spotu den, a taki: ’Mi o feti nanga en!’ Kownu Saul taigi en: ’Ma yu na wan boi ete.’ David piki en: ’Yehovah o yepi mi.’

Saul ben wani taki David gebroiki den fetisani fu en, ma David taki: ’Mi no man feti nanga den sani disi.’ David teki en slenger, dan a go na a liba na ini a lagipresi. A teki feifi grati ston èn a poti den na ini en pikin tas. Ne David lon go miti Goliat. Goliat bari: ’Kon dya yu pikin boi. Mi o meki den fowru na loktu èn den busimeti nyan a meti fu yu.’ Ma David no ben frede. A bari: ’Yu e kon na mi tapu nanga wan feti-owru nanga wan lansri, ma mi e kon na ini a nen fu Yehovah. A no nanga wi yu e feti. Yu e feti nanga Gado. Ala sma dyaso o si taki Yehovah tranga moro wan feti-owru noso wan lansri. A o meki wi wini unu.’

David poti wan ston na ini en slenger, dan a fringi en bun tranga go teki Goliat. Yehovah meki taki a ston kisi Goliat na en fesi-ede. A bigi man fadon dede na gron. Di den Filisteasma si disi, den lon gowe. Yu e frutrow na tapu Yehovah neleki David?

Baka di David kiri Goliat, Kownu Saul poti en leki fesiman fu en legre. David wini furu feti èn furu sma ben kon sabi en. Ibri leisi te David ben drai kon baka fu wan feti, den umasma ben e dansi kon miti en èn den ben e singi: ’Saul kiri dusundusun sma, ma David kiri someni tenti dusun sma!’ Saul kon dyarusu tapu David èn a ben wani kiri en.

David ben man prei harpu heri bun. Wan dei di a ben e prei harpu gi Saul, a kownu fringi en lansri teki en. David skoifi èn a lansri go fasi na a muur. Baka dati Saul pruberi omeni leisi fu kiri David. Te fu kaba, David lowe go kibri na ini a sabana.

Saul teki 3000 srudati fu go suku David. A go na ini wan bergi-olo, ma a no ben sabi taki na drape David nanga den man fu en ben e kibri. Den man taigi David: ’Now yu kisi a kans fu kiri Saul.’ David kroipi safrisafri go na Saul, dan a koti wan pisi fu en dyakti puru. Saul no ben sabi srefisrefi san pasa. Bakaten a hati David taki a du disi fu di a ben feni taki a no sori lespeki gi a kownu di Yehovah ben poti. A no meki den man fu en go feti nanga Saul. Bakaten David bari gi Saul taki a ben kan kiri en, ma a no du dati. Yu denki taki Saul bigin denki tra fasi fu David?

Nôno. Saul tan suku fu kiri David. Wan neti David nanga en neef Abisai boro go na ini a kampu fu Saul. Srefi Abner, a legre-edeman ben e sribi. Abisai taki: ’Disi na wi kans! Meki mi kiri en.’ David piki en: ’Libi Saul gi Yehovah. Wi o teki soso en lansri nanga en watrakan, dan wi o gowe.’

David kren go na tapu wan bergi pe a ben kan si a kampu fu Saul. A bari: ’Abner, fu san ede yu no kibri yu kownu? Pe a watrakan nanga a lansri fu Saul de?’ Saul yere taki na David, dan a taki: ’Yu ben kan kiri mi, ma yu no du dati. Mi sabi taki na yu o tron a nyun kownu fu Israel.’ Saul drai go baka na en oso. Ma a no ala den famiriman fu Saul ben e teige David.

Yonatan, a moro owru manpikin fu Kownu Saul, ben de wan deki-ati fetiman. David taki dati Yonatan ben gaw moro wan aka èn a ben tranga moro wan lew. Wan dei Yonatan si wan tu Filistea srudati na tapu wan bergi. A taigi a man di ben e tyari den fetisani fu en: ’Wi o go feti nanga den soso te Yehovah sori wi taki a o yepi wi. Efu den Filisteasma taigi wi fu kren go na den, dan wi o sabi taki wi musu go feti nanga den.’ Den Filisteasma bari: ’Un kren kon feti nanga wi!’ Dati meki den tu man kren a bergi èn den kiri sowan 20 srudati.

Fu di Yonatan ben de a moro owru manpikin fu Saul, meki en ben o tron kownu baka Saul. Ma Yonatan ben sabi taki Yehovah ben teki David fu tron a nyun kownu fu Israel. Toku a no ben dyarusu na en tapu. Yonatan nanga David tron bun mati. Den pramisi taki den ben o yepi makandra ala ten. Yonatan gi David en dyakti, en feti-owru, en bo nanga en leribuba fu sori en taki den na mati.

Di David ben e lowe gi Saul, Yonatan go na en èn a taigi en: ’No frede, abi deki-ati. Yehovah poti yu leki kownu. Srefi mi papa sabi dati.’ Yu ben o wani abi wan bun mati leki Yonatan?

Moro leki wán leisi Yonatan yepi en mati aladi a ben kan lasi en libi. A ben sabi taki Kownu Saul ben wani kiri David. Dati meki a taigi en papa: ’Yu ben o du wan sondu efu yu kiri David. A no du nowan ogri.’ Saul ati bron tapu Yonatan. Wan tu yari baka dati Saul nanga Yonatan dede na ini wan feti.

Baka di Yonatan dede, David suku Mefiboset, a manpikin fu Yonatan. Di David feni en, a taigi en: ’Yu papa ben de wan bun mati fu mi. Dati meki mi o sorgu gi yu solanga yu de na libi. Yu o tan na ini mi kownu-oso èn yu o nyan na mi tafra.’ Noiti David frigiti en mati Yonatan.

Di Saul dede David tron kownu. A ben abi 30 yari. Baka di a ben de kownu wan tu yari kaba, a du wan seryusu sondu. Wan neti di a ben de na tapu a daki fu en kownu-oso, a si wan moi uma. David kon sabi taki na uma ben nen Batseiba èn taki a ben trow nanga wan srudati di nen Uria. David meki Batseiba kon na en kownu-oso. Den ben abi seks èn Batseiba kon de nanga bere. David ben suku fu kibri a tori. A taigi a legre-edeman fu en fu poti Uria na fesisei pe a feti hebi. Dan den ben musu hari densrefi puru èn libi en wawan. Baka di Uria dede na ini a feti, David trow nanga Batseiba.

Ma Yehovah si ala den ogri di pasa. San a ben o du? Yehovah seni a profeiti Natan go na David. Natan taki: ’Wan guduman ben abi furu skapu, ma wan pôtiman ben abi wán pikin skapu nomo di a ben lobi. A guduman teki a wán skapu fu a pôtiman.’ David ati bron èn a taki: ’A guduman dati musu dede!’ Dan Natan taigi David: ’Na yu na a guduman!’ David ben sari èn a taigi Natan: ’Mi sondu teige Yehovah.’ A sondu tyari furu problema kon gi David nanga en osofamiri. Yehovah strafu David, ma a meki a tan na libi fu di a ben taki krin sortu sondu a du èn a ben abi sakafasi.

David ben wani bow wan tempel gi Yehovah, ma Yehovah taki dati na Salomo, a manpikin fu en, ben o bow a tempel. David bigin sreka sani gi Salomo èn a taki: ’A tempel fu Yehovah musu moi moro ala tra oso. Salomo yongu ete, ma mi o sreka sani gi en.’ David gi furu fu en eigi moni fu yepi bow a tempel. A suku bun wrokoman. A tyari gowtu nanga solfru kon na wán, èn a meki sma fu Tirus nanga Sidon tyari sedre-udu kon gi en. Na a kaba fu en libi, David sori Salomo finifini fa a ben musu bow a tempel. A taki: ’Yehovah meki mi skrifi ala den sani disi gi yu. Yehovah o yepi yu. No frede. Abi deki-ati èn du a wroko.’