Yesus du furu di a ben e preiki na ini a heri kontren fu Galilea. Ma di a taki, „Mi musu go fruteri a bun nyunsu fu Gado Kownukondre na tra foto tu”, a no ben abi na prakseri fu preiki na ini Galilea wawan. Dati meki a e go „preiki na ini den snoga fu Yudea” (Lukas 4:43, 44). Wi kan frustan taki a e go drape, fu di a de a pisi ten fu maart nanga april èn a ten e doro taki ala sma o go na Yerusalem fu hori a Paskafesa.

Bijbel e taki furu fu Yesus en preikiwroko na ini Galilea, ma a no e taki furu fu a preikiwroko fu en na ini Yudea. Awinsi furu sma na ini Yudea no wani arki Yesus, toku a no e tapu fu preiki fayafaya èn fu du bun na iniwan presi pe a e go.

A no e teki langa fosi Yesus e go na Yerusalem, a mamafoto fu Yudea, fu hori a Paskafesa fu a yari 31. Krosibei fu a Skapuportu pe furu sma de, yu abi wan watra-olo di den e kari Betsata. Furu breni sma, lan sma nanga tra siki sma e kon na a watra-olo disi. Fu san ede? Furu sma e bribi taki den sma disi kan kon betre te den e go na ini a watra-olo te a watra e seki.

A de wan Sabat-dei now èn Yesus e si wan man na a watra-olo disi. A man disi siki 38 yari kaba. Yesus e aksi en: „Yu wani kon betre?” A man e piki: „Masra, mi no abi nowan sma fu tyari mi go na ini a watra te a e seki èn te mi wani go, wan tra sma e saka go fosi mi na ini a watra.”​—Yohanes 5:6, 7.

Yesus e taki wan sani di e meki a man nanga den tra sma di e yere san a taki fruwondru. A taki: „Opo teki yu bedi èn waka” (Yohanes 5:8). Na dati a man e du tu. Wantewante a e kon betre, a e teki en bedi èn a e bigin waka!

Ma son Dyu di e si a man no breiti taki so wan moi sani pasa nanga en. Na presi fu dati den e krutu a man èn den e taki: „Disi na wan Sabat-dei, èn a no fiti taki yu e tyari a bedi.” A man e piki den: „Na a sma di meki mi kon betre taigi mi: ’Teki yu bedi èn waka’” (Yohanes 5:10, 11). Den Dyu disi e krutu wan sma di dresi wan man na Sabat-dei.

Den e aksi a man: „Suma na a sma di taigi yu: ’Teki yu bedi èn waka’?” Fu san ede den e aksi en dati? Fu di „Yesus ben gowe kaba” èn a man di a dresi no sabi fa a nen (Yohanes 5:12, 13). Ma a man disi o miti Yesus baka. Bakaten na ini a tempel a e miti Yesus èn a e kon sabi taki na Yesus dresi en na a watra-olo.

A man e go suku den Dyu di ben aksi en suma meki en kon betre. A e taigi den taki na Yesus dresi en. Te den Dyu kon sabi disi, den e go na Yesus. Yu denki taki na sabi den wani sabi fa a du kon taki Yesus man du den wondru disi? Nôno. Na presi fu dati den e krutu Yesus fu di a du bun na Sabat-dei. Den e bigin frufolgu en srefi!

Yesus ben dresi wan man na Sabat-dei. Te son Dyu e krutu en fu di den feni taki a trangayesi a wet fu Sabat-dei, dan Yesus e piki den: „Mi Tata tan wroko teleki now èn mi srefi e tan wroko tu.”​—Yohanes 5:17.

A sani di Yesus du, no de teige a wet di Gado ben gi fu Sabat-dei. Neleki fa Gado tan du bun, na so Yesus e tan du bun ibri dei. Dati meki a e preiki gi sma èn a e dresi den sikiwan. Ma a sani di a piki den sma di e krutu en, e meki den ati bron moro nanga en èn den e suku fu kiri en. Fu san ede?

Boiti taki den feni taki Yesus trangayesi a wet fu Sabat-dei fu di a dresi sma na a dei dati, den ati e bron tu fu di Yesus taki dati en na Gado Manpikin. Den feni taki a meki ensrefi kon tron neleki Gado, fu di a taki dati Gado na en Papa. Sobun, den feni taki a no abi nowan lespeki gi Gado. Ma Yesus no e frede den. A e taigi den moro sani fu a fasi fa en nanga en Papa de. A e taki: „A Tata lobi a Manpikin, èn a Tata e sori a Manpikin ala sani di en srefi e du.”​—Yohanes 5:20.

En Papa Yehovah na a sma di e gi libi. Yehovah sori taki a man du disi di a ben gi sma na ini owruten a makti fu gi dedesma wan opobaka. Yesus e taki moro fara: „Neleki fa a Tata e gi sma wan opobaka èn a e meki den kon na libi baka, na so a Manpikin e gi libi baka na suma a wani” (Yohanes 5:21). A moi sani disi di Yesus taki e gi wi howpu trutru! Na ini a ten disi srefi, yu kan taki dati a Manpikin e gi sma libi baka fu di a e yepi den fu tron mati fu Gado. Dati meki Yesus taki: „Efu wan sma yere san mi taki èn a e bribi a sma di seni mi kon, dan a o kisi têgo libi èn a Manpikin no o krutu en. A no o de leki wan dede sma, ma leki wan sma di kon na libi.”​—Yohanes 5:24.

Bijbel no e sori taki Yesus ben gi wan dede sma wan opobaka kaba na a ten di a taki den sani disi. Ma a taigi den sma di e krutu en taki a sani disi o pasa trutru. A taki: „A yuru o kon te ala den sma di de na ini den grebi o yere en sten èn den o komopo drape.”​—Yohanes 5:28, 29.

Yesus abi furu makti, ma toku a e sori krin taki a musu saka ensrefi na Gado ondro. A taki: „Mi no man du noti fu misrefi. . . . Mi no e du san misrefi wani, ma mi e du a wani fu a sma di seni mi kon” (Yohanes 5:30). Teleki now Yesus no ben taki krin na fesi ala sma sortu prenspari frantwortu Gado gi en. Ma den sma di e krutu en no yere a tori disi fu Yesus nomo. Yesus e memre den: „Unu seni sma go na Yohanes [a Dopuman] èn a fruteri suma mi de trutru.”​—Yohanes 5:33.

A kan taki sowan tu yari pasa den sma di e krutu Yesus ben yere di Yohanes fruteri den Dyu kerki fesiman fu a sma di ben o kon baka en. A ben kari a sma dati a „Profeiti” èn a „Krestes” (Yohanes 1:20-25). Yesus e memre den fa den ben e lespeki Yohanes di de na strafu-oso now. A taki: „Wan syatu pisi ten unu ben breiti nanga a leti di a ben e skèin” (Yohanes 5:35). Ma Yesus e taki fu sani di bigi moro leki den sani di Yohanes a Dopuman taki.

Yesus taki: „Den wroko di mi e du [sosrefi a dresi di a dresi a siki man didyonsro], e sori taki a Tata seni mi kon.” A taki tu: „Srefi a Tata di seni mi kon e taki fu mi” (Yohanes 5:36, 37). Di Yesus dopu, Gado ben taki dati Yesus na en Manpikin.​—Mateyus 3:17.

Iya, den sma di e krutu Yesus no abi nowan reide fu no bribi Yesus. Den feni taki den e ondrosuku Gado Buku, ma srefi den buku dati e taki suma na Yesus. Te fu kaba Yesus e taki: „Efu unu ben bribi Moses trutru, dan unu ben o bribi mi, bika na en skrifi fu mi. Ma efu unu no e bribi den sani di a skrifi, dan fa unu o bribi den sani di mi e taki?”​—Yohanes 5:46, 47.

Now Yesus nanga den disipel fu en e waka go na Galilea di de na noordsei. Na a pisi ten disi fu a yari na aleisi na den gron e gi nyanyan kaba. Fu di angri e kiri den disipel, meki den e piki pikinso aleisi fu nyan. Ma den e du disi na Sabat-dei èn sonwan fu den Fariseiman e si san den e du.

Memre taki a no langa pasa son Dyu ben wani kiri Yesus na Yerusalem fu di den ben feni taki a trangayesi a wet fu Sabat-dei. Now den Fariseiman feni taki a sani di den disipel fu en e du de teige a wet fu Sabat-dei tu. Den e taki: „Luku! Den disipel fu yu e du wan sani di den no musu du na Sabat-dei.”​—Mateyus 12:2.

Den Fariseiman taki dati te wan sma e piki aleisi èn a e wrifi dati na ini en anu fu nyan, dan dati de a srefi leki te a e koti aleisi èn masi en na den gron (Eksodes 34:21). Fu di den e si a wet fu Sabat-dei so fini, meki Sabat-dei kon de wan hebi gi a pipel. Ma di Gado ben gi a pipel a wet disi, a ben wani taki Sabat-dei ben musu de wan prisiri dei pe sma e gi makandra deki-ati èn pe den e leri sani fu Gado. Yesus e gi den wan tu eksempre fu sori den taki den no e si a tori disi na a yoisti fasi èn taki noiti Yehovah Gado ben wani taki sma ben musu si a wet fu Sabat-dei na a fasi disi.

Wan fu den eksempre di Yesus gi abi fu du nanga David nanga den man fu en. Di angri ben e kiri den, den go na a tabernakel èn den nyan den brede di ben poti leki ofrandi gi Gado. Na den priester ben e kisi den brede disi te den ben puru den fu a tafra fu poti tra brede. Ma disi leisi David nanga den man fu en ben nyan den èn nowan sma krutu den fu a sani disi.​—Lefitikus 24:5-9; 1 Samuel 21:1-6.

Ne Yesus gi den ete wan eksempre. A taki: „Unu no leisi na ini a Wèt taki na Sabat-dei den priester na ini a tempel ben e wroko, ma toku dati no ben de wan ogri sani?” A wani sori den taki srefi na Sabat-dei den priester e srakti den meti di den musu tyari leki ofrandi èn den e du tra wroko tu na ini a tempel. Yesus taki: „Mi e taigi unu taki wan sma de dyaso di bigi moro a tempel.”​—Mateyus 12:5, 6; Numeri 28:9.

Dan Yesus e gi den ete wan eksempre fu Gado Buku fu tyari kon na krin san a wani sori den. A taki: „Unu no e frustan den wortu disi: ’Mi wani sari-ati, mi no wani srakti-ofrandi.’ Efu unu ben frustan dati, dan unu no ben o krutu den sma di no du ogri.” Te fu kaba a e taki: „Bika a Manpikin fu libisma na Masra fu Sabat.” Dyaso Yesus e taki fu a ten te a o tiri dusun yari leki Kownu di o tyari freide kon.​—Mateyus 12:7, 8; Hosea 6:6.

Bun langa kaba Satan e pina libisma na ini a grontapu disi di lai feti nanga ogridu. Ma sani o de heri tra fasi na a ten fu a moro bigi Sabat, noso a ten te Krestes o tiri. Na a ten dati a o gi wi a rostu di wi abi fanowdu èn di wi wani trutru!

Na wan tra Sabat-dei Yesus e go na ini wan snoga. Soleki fa a sori, dan a de na ini Galilea. Na ini a snoga a e si wan man di malengri na en anu (Lukas 6:6). Den Fariseiman nanga den leriman fu Wet e luku Yesus. Fu san ede? Disi e kon na krin te den e aksi: „Sma kan meki trawan kon betre na Sabat-dei?”​—Mateyus 12:10.

Den Dyu kerki fesiman e bribi taki wan sma kan yepi wan siki sma na Sabat-dei, soso te a siki sma kan lasi libi. Sobun, efu wan sma drai en futu noso efu a broko en anu na Sabat-dei, dan wan tra sma no mag dresi en fu di a no de wan sani di kan meki a lasi libi. A de krin taki den Fariseiman nanga den leriman fu Wet no poti na aksi disi gi Yesus fu di den e broko den ede nanga a man di malengri na en anu. Na wan sani den e suku fu krutu Yesus.

Ma Yesus sabi taki den abi wan lo kruktu denki. A sabi taki den e si a wet fu Sabat-dei tumusi fini. Den e si ala sortu pikinpikin sani leki wroko na Sabat-dei aladi a wet no e taki fu den sani disi (Eksodes 20:8-10). Den ben krutu en kaba fu di a du bun sani gi tra sma. Now Yesus o du wan sani di o meki den ati bron moro. A e taigi a man nanga a malengri anu: „Opo go tanapu na mindrisei.”​—Markus 3:3.

Dan Yesus e drai luku den Fariseiman nanga den leriman fu Wet èn a e taki: „Efu unu abi wán skapu nomo èn a skapu e fadon na ini wan peti na Sabat-dei, dan suma fu unu no o grabu a skapu hori èn puru en na ini a peti?” (Mateyus 12:11) Wan skapu e kostu furu moni. Sobun, den no ben o libi en na ini wan peti te a tra dei. A skapu ben kan dede èn den ben o lasi furu moni. Gado Buku e taki tu: „A reti-ati sma e sorgu bun gi en osometi.”​—Odo 12:10.

Dan Yesus e sori den fa den musu si a tori disi. A e taki: „We, wan libisma warti moro wan skapu! Dati meki sma kan du bun na Sabat-dei” (Mateyus 12:12). Sobun, Yesus no ben o pasa a wet fu Sabat-dei efu a ben o dresi a man. Iniwan sma di de nanga krin frustan èn di e firi gi trawan ben o agri nanga Yesus. Fu di den kerki fesiman sabi taki Yesus abi leti, meki den no e taki noti moro. Den e tan pî.

Yesus ati e bron nanga den, ma a e sari den tu fu di den no e si a tori disi na wan yoisti fasi. A e luku lontu, dan a e taigi a man: „Langa yu anu” (Mateyus 12:13). Te a man e langa en anu gi Yesus, en anu e kon betre. A man e prisiri. Ma fa a de nanga den sma di wani krutu Yesus?

Na presi fu breiti tu taki a man kon betre, den Fariseiman e go na dorosei èn wantewante den e go taki nanga ’den partèiman fu Herodes fu luku fa den kan kiri Yesus’ (Markus 3:6). A sori leki wan tu fu den partèiman disi na man fu a kerkigrupu di den e kari Saduseiman. Den Saduseiman nanga den Fariseiman no ben e bumui nanga makandra, ma now den e span anu makandra fu kiri Yesus.