Na ini Egepte, sma ben sabi a famiri fu Yakob leki den Israelsma. Baka di Yakob nanga Yosef dede, wan tra Farao bigin tiri Egepte. A Farao disi ben frede taki den Israelsma ben o kon tranga moro den Egeptesma. Dati meki a poti den Israelsma fu wroko leki srafu. A ben dwengi den fu meki ston èn fu wroko tranga na ini den gron. Ma o moro den Egeptesma ben meki den Israelsma wroko tranga, o moro den Israelsma ben e kon furu. Fu di Farao no ben lobi a tori, meki a taigi sma fu kiri ala den Israel boi di ben gebore. Prakseri fa den Israelsma ben frede di den yere a sani disi.

Wan Israel uma di nen Yokebed, ben kisi wan moi beibi. A ben wani kibri a boi disi èn dati meki a poti en na ini wan manki, ne a go kibri en na mindri den warimbo fu Nijl-liba. Miryam, a sisa fu a beibi, ben e tan krosibei fu luku san ben o pasa.

Na umapikin fu Farao kon wasi na a liba èn a si a manki. Di a opo en, a si wan beibi e krei èn a ben firi sari. Miryam aksi en: ’Mi kan go suku wan frow di kan sorgu a beibi gi yu?’ Na umapikin fu Farao ben feni en bun èn Miryam go kari en mama Yokebed kon. Ne na umapikin fu Farao taigi en: ’Teki a beibi disi, dan yu sorgu en gi mi. Mi o pai yu.’

Di a pikin kon moro bigi, Yokebed tyari en gi na umapikin fu Farao. Na umapikin disi kari a boi Moses èn a kweki en leki en eigi manpikin. Moses gro kon bigi leki kownupikin èn a ben kan abi ala san a wani. Ma noiti Moses frigiti Yehovah. A ben sabi taki a no ben de wan Egeptesma, ma wan Israelsma. Dati meki a bosroiti fu dini Yehovah.

Di Moses ben abi 40 yari, a ben wani yepi en pipel. Di a si taki wan Egepte man ben e fon wan Israelsma di ben de srafu, a naki na Egepte man bun tranga taki a man dede. Ne Moses kibri a dedeskin na ini a santi. Di Farao yere a tori, a ben wani kiri Moses. Ma Moses lowe go na a kondre Midian. Drape Yehovah sorgu en.

Moses libi 40 yari na ini Midian. A trow èn a kisi pikin. Wan dei di a ben e luku den skapu fu en krosibei fu Sinai-bergi a si wan sani di meki a skreki. Faya ben de na wan makabusi, ma a makabusi no ben e bron. Di Moses go krosibei fu luku fu san ede a busi no e bron, a yere wan sten na ini a busi. A sten taki: ’Moses! No kon moro krosibei. Puru yu susu na yu futu, bika yu e tanapu na tapu santa gron.’ Na Yehovah ben e taki nanga en nanga yepi fu wan engel.

Moses ben frede èn dati meki a tapu en fesi. A sten taigi en: ’Mi si fa den Israelsma e pina. Mi o frulusu den fu den Egeptesma èn mi o tyari den go na wan bun kondre. Na yu o tyari mi pipel komoto fu Egepte.’ Efu yu ben de Moses, yu no ben o skreki fu yere so wan sani?

Moses aksi Gado: ’San mi musu taki te a pipel aksi mi suma seni mi?’ Gado piki en: ’Taigi den taki na Yehovah, a Gado fu Abraham, a Gado fu Isak nanga a Gado fu Yakob, seni yu.’ Ma Moses taki: ’San mi musu du efu a pipel no wani arki?’ Yehovah sori Moses taki a o yepi en. A taigi Moses fu trowe a tiki fu en na tapu a gron. Ne a tiki tron wan sneki! Di Moses grabu a sneki na en tere, a tron wan tiki baka. Yehovah taigi en: ’Te yu du a sani disi, den o si taki na mi seni yu.’

Moses taki: ’Ma mi no man taki bun.’ Yehovah pramisi en: ’Mi o taigi yu san yu musu taki èn mi o seni yu brada Aron fu yepi yu.’ Fu di Moses ben sabi taki Yehovah de nanga en, meki a teki en frow nanga den manpikin fu en èn a go na Egepte.

Den Israelsma ben musu wroko tranga leki srafu. Yehovah seni Moses nanga Aron fu gi Farao, a kownu fu Egepte a boskopu disi: ’Seni mi pipel gowe, so taki den kan anbegi mi na ini a sabana.’ Farao di ben abi heimemre piki: ’Mi no e span nanga san Yehovah taki èn mi no o seni den Israelsma gowe.’ Farao meki den Israelsma wroko moro tranga. Yehovah ben o strafu Farao. Yu sabi fa a du dati? A tyari tin rampu kon na tapu Egepte. Yehovah taigi Moses: ’Farao no e arki mi. Na mamanten a o de na Nijl-liba. Go na en èn taigi en taki mi o meki a watra fu Nijl-liba tron brudu, fu di a no seni mi pipel gowe.’ Moses go na Farao soleki fa Yehovah taigi en. Farao ben e luku fa Aron naki en tiki na tapu a watra fu a liba. Ne a watra tron brudu. A liba bigin tingi, den fisi dede èn nowan krin watra ben de na ini Nijl-liba di den ben kan dringi. Toku Farao no ben wani seni den Israelsma gowe.

Seibi dei baka dati, Yehovah seni Moses go baka na Farao fu taigi en disi: ’Efu yu no seni mi pipel gowe, Egepte o furu nanga todo.’ Farao no seni den Israelsma gowe. Dati meki Aron opo en tiki go na loktu, dan todo bigin furu a heri kondre. Todo ben de na ini den sma oso, na tapu den bedi èn na ini den baki pe den e masi blon. Todo ben de na ala sei! Farao aksi Moses fu begi Yehovah fu puru den todo. A pramisi taki a ben o seni den Israelsma gowe. Dati meki Yehovah puru den todo. Den Egeptesma tyari den todo kon na wán èn den poti den na ipi. A heri kondre bigin tingi. Toku a leisi disi srefi Farao no seni a pipel gowe.

Dan Yehovah taigi Moses: ’Aron musu naki a gron nanga en tiki, dan a doti o tron maskita.’ Wantewante maskita ben de na ala sei. Sonwan fu den man di ben e wroko gi Farao taigi en: ’Na Gado tyari a rampu disi kon.’ Toku Farao no ben wani seni den Israelsma gowe.

Gado seni Moses nanga Aron go baka na Farao, a kownu fu Egepte fu taigi en disi: ’Efu yu no seni mi pipel gowe, mi o seni kawfrei kon na ini a kondre.’ Bun furu kawfrei bigin go na ini den oso fu den Egeptesma, den guduwan nanga den pôtiwan. A heri kondre ben lai nanga kawfrei. Ma na ini a kondre Gosen pe den Israelsma ben e tan, kawfrei no ben de. A rampu disi nanga ala den tra rampu baka dati miti soso den Egeptesma. Te fu kaba Farao aksi Moses: ’Begi Yehovah fu puru den kawfrei na ini a kondre. A pipel fu yu kan gowe.’ Ma di Yehovah puru den kawfrei, Farao kenki prakseri. O langa Farao ben o tan trangayesi Yehovah?

Yehovah taki: ’Efu Farao no seni mi pipel gowe, mi o meki den meti fu den Egeptesma kon siki èn den o dede.’ A tra dei den meti bigin dede. Ma den meti fu den Israelsma no dede. Toku Farao trangayesi Yehovah èn a no seni den Israelsma gowe.

Yehovah taigi Moses fu go baka na Farao èn fu trowe asisi go na loktu. Na asisi tron puiri di furu a heri loktu, dan a saka na tapu ala den Egeptesma. A puiri meki den Egeptesma nanga den meti fu den kisi wan lo butsweri di ben hati den. Toku Farao no seni den Israelsma gowe.

Yehovah seni Moses go baka na Farao nanga a boskopu disi: ’Te now ete yu e weigri fu seni mi pipel gowe? Tamara mi o meki pisipisi ijs fadon na ini a kondre leki wan bun hebi alen.’ A tra dei Yehovah meki dondru bari, a meki pisipisi ijs fadon èn faya ben komoto fu hemel kon na grontapu. Noiti ete so wan sani ben pasa na ini a kondre Egepte. Ala den bon nanga den sani di den Egeptesma ben prani ben pori. Ma noti no pasa na ini Gosen. Farao taki: ’Begi Yehovah fu puru a rampu disi! Dan unu kan gowe.’ Ma di Farao si taki alen nanga pisipisi ijs no ben e fadon moro, a kenki prakseri.

Baka dati Moses taki: ’Now sprenka o nyan ala sani di den pisipisi ijs no pori.’ Na so milyunmilyun sprenka nyan ala den wiwiri na den bon èn ala den sani di ben tan abra na den gron. Farao taki: ’Begi Yehovah fu meki den sprenka gowe.’ Aladi Yehovah meki den sprenka gowe, toku Farao trangayesi en.

Yehovah taigi Moses: ’Langa yu anu go na loktu.’ Wantewante a kondre ben kon dungru pikapika. Dri dei langa den Egeptesma no ben man si nowan sani èn nowan sma. Soso a presi pe den Israelsma ben e tan ben abi leti.

Farao taigi Moses: ’Yu nanga yu pipel kan go. Ma un musu libi den meti fu unu dyaso.’ Moses taigi en: ’Wi musu tyari den meti gowe tu, so taki wi kan tyari ofrandi gi wi Gado.’ Farao kisi wán bigi atibron. A bari: ’Komoto na mi tapu! Efu mi si yu baka, mi o kiri yu.’

Moses pramisi Farao, a kownu fu Egepte taki a no ben o kon na en moro. Ma fosi a gowe a taigi Farao: ’Mindrineti ibri fosi pikin na ini Egepte o dede. Awinsi na a manpikin fu Farao noso a manpikin fu den srafu, den alamala o dede.’

Yehovah taigi den Israelsma taki den musu sreka wan spesrutu nyanyan. A taki: ’Kiri wan manskapu noso wan bokoboko fu wán yari, dan poti pikinso fu en brudu na den doropostu fu unu. Losi a meti èn nyan en nanga brede sondro srudeki. Un musu weri un krosi nanga un susu èn un musu de srekasreka fu gowe. A neti disi mi o frulusu unu.’ Yu kan frustan fa den Israelsma ben breiti.

Mindrineti na engel fu Yehovah go na ibri oso na ini Egepte. A kiri ala den fosi pikin na ini den oso di no ben abi brudu na den doropostu. Ma na engel pasa den oso di ben abi brudu na den doropostu. Ala osofamiri na ini Egepte, guduwan nanga pôtiwan, lasi wan pikin. Ma nowan fu den pikin fu den Israelsma dede.

Srefi a manpikin fu Farao dede. Farao no ben man teki en moro. Wantewante a taigi Moses nanga Aron: ’Un gowe fu dya. Un go anbegi un Gado. Teki den meti fu unu, dan un gowe!’

A mun ben e skèin di den Israelsma hari komoto na ini Egepte. Den sma fu a srefi famiri nanga a srefi lo ben e waka makandra na ini wán grupu. Yu ben abi 600.000 mansma èn furu umasma nanga pikin. Boiti dati, furu tra sma go nanga den, so taki den ben kan anbegi Yehovah tu. Now den Israelsma ben fri!

Ibri yari den Israelsma ben musu nyan a spesrutu nyanyan disi fu memre fa Yehovah frulusu den. Sma e kari a fesa disi Paskafesa.

Di Farao, a kownu fu Egepte yere taki den Israelsma gowe libi a kondre, a ben hati en taki a seni den gowe. A taigi den fetiman fu en: ’Sreka ala den asiwagi fu mi èn meki wi hari go na den baka! Wi no ben musu meki den gowe.’ Dan en nanga den fetiman fu en hari go baka den Israelsma.

Yehovah ben tyari en pipel nanga wan wolku na deiten èn nanga wan faya na neti. A tyari den go na Redi Se, dan a taigi den fu seti kampu drape.

Den Israelsma si taki Farao nanga a legre fu en hari kon na den baka. Den no ben abi nowan sei fu go. A se ben de na den fesi èn a legre fu Egepte ben de na den baka. Den bari gi Moses: ’Wi o dede! Betre yu ben libi wi na ini Egepte.’ Ma Moses taki: ’No frede. Un wakti èn luku fa Yehovah o frulusu unu.’ Moses ben e frutrow trutru tapu Yehovah!

Yehovah taigi den Israelsma taki den musu sreka sani fu gowe. A neti dati Yehovah poti a wolku na mindri den Egeptesma nanga den Israelsma. A sei fu den Egeptesma ben kon dungru. Ma na a sei fu den Israelsma leti ben e skèin.

Yehovah taigi Moses fu langa en anu go na a se. Dan Yehovah meki wan tranga winti wai heri neti. A se prati na tu èn wan pasi opo gi den Israelsma. Den milyunmilyun Israelsma waka go na a tra sei na tapu drei gron, aladi a watra ben de leki wan skotu na den reti-anusei èn na den kruktu-anusei.

A legre fu Farao hari go na baka den Israelsma di ben e waka na ini a se na tapu drei gron. Ne Yehovah tyari bruya kon na ini a legre. Den wiel fu den asiwagi bigin lusu komoto. Den srudati bari: ’Meki wi lon gowe fu dya! Yehovah e feti gi den.’

Yehovah taigi Moses: ’Langa yu anu go na a se.’ Wantewante a watra kon na tapu a legre fu Egepte. Farao nanga ala den fetiman fu en dede. Nowan fu den tan na libi.

Na a tra sei fu a se wan bigi grupu sma bigin prèise Gado. Den ben singi: „Singi gi Yehovah, bika a kisi bigi glori. A trowe den asi nanga den sma na den tapu, go na ini a se.” Den uma ben e dansi nanga tyengretyengre na ini den anu aladi a pipel ben e singi. Ala sma ben breiti taki den kon fri.

Sowan tu mun baka di den Israelsma gowe libi Egepte, den doro na Sinai-bergi èn drape den seti den kampu. Moses ben go na tapu a bergi, ne Yehovah kari en èn a taigi en: ’Mi frulusu den Israelsma. Efu den gi yesi na mi èn den hori den wet fu mi, dan den o de mi spesrutu pipel.’ Moses saka go baka na den Israelsma èn a taigi den san Yehovah taki. San den Israelsma piki? Den taki: ’Wi o du ala san Yehovah taigi wi fu du.’

Moses kren go baka na tapu a bergi. Drape Yehovah taigi en: ’Baka dri dei mi o taki nanga yu. Warskow a pipel taki den no musu kon na tapu Sinai-bergi.’ Moses saka a bergi, dan a taigi den Israelsma fu sreka densrefi fu di Yehovah ben o taki nanga den.

Dri dei baka dati, den Israelsma si wan dungru wolku na tapu a bergi èn faya ben koti na hemel. Den yere dondru e bari èn den yere wan tranga babari fu wan tutu. Dan Yehovah saka kon na tapu a bergi nanga faya. Den Israelsma ben frede so te, taki den bigin beifi. A heri bergi ben e seki hebi èn a ben tapu nanga smoko. A babari fu a tutu ben kon moro tranga. Dan Gado taki: ’Mi na Yehovah. Un no musu anbegi nowan tra gado.’

Moses kren go baka na tapu a bergi èn Yehovah gi en wet di ben sori fa a pipel ben musu anbegi en èn fa den ben musu libi. Moses skrifi den wet disi, dan a leisi den gi den Israelsma. Den pramisi: ’Wi o du ala san Yehovah taigi wi fu du.’ Iya, den pramisi Gado taki den o du en wani. Ma den ben o du san den pramisi?

Yehovah taigi Moses: ’Kon na mi na tapu a bergi. Mi o skrifi den wet fu mi na tapu plata ston, dan mi o gi yu den.’ Moses kren go na tapu a bergi èn a tan drape 40 dei nanga 40 neti. Di a ben de drape, Yehovah skrifi den Tin Komando na tapu tu plata ston èn a gi Moses den.

Di den Israelsma si taki Moses tan langa na tapu a bergi, den ben denki taki a gowe libi den. Den taigi Aron: ’Wi wani wan tra fesiman. Meki wan gado gi wi!’ Aron taigi den: ’Gi mi den gowtu sani fu unu.’ A smèlter a gowtu, dan a meki wan pikin kaw. A pipel taki: ’Disi na wi Gado di tyari wi komoto fu Egepte!’ Den bigin anbegi a gowtu kaw èn den hori wan fesa. Na wan ogri a pipel du? Iya, bika den ben pramisi taki den ben o anbegi Yehovah wawan. Ma now den no du san den pramisi.

Yehovah si san ben e pasa èn a taigi Moses: ’Saka go na a pipel. Den e trangayesi mi. Den e anbegi wan falsi gado.’ Moses saka fu a bergi. A ben abi den tu plata ston na ini en anu.

Di Moses kon moro krosibei fu a kampu, a yere a pipel e singi. A si fa den e dansi èn e boigi gi a pikin kaw. Moses ati ben bron. A trowe den tu plata ston na gron èn den broko pisipisi. Dan wantewante a bron a pikin kaw èn a masi en kon tron puiri. Ne a aksi Aron: ’Fa a pipel ben kan meki yu du so wan ogri sani?’ Aron taki: ’No atibron nanga mi. Yu sabi fa a pipel disi tan. Den ben wani wan gado. Dati meki mi trowe den gowtu sani fu den na ini faya, dan a tron a pikin kaw disi!’ Aron no ben musu du a sani dati. Baka dati Moses go baka na tapu a bergi èn a begi Yehovah fu gi a pipel pardon.

Yehovah gi den wan di ben wani arki en, pardon. Yu si fu san ede a ben prenspari taki den Israelsma arki Moses, a fesiman fu den?

Di Moses ben de na tapu Sinai-bergi, Yehovah taigi en fu meki wan spesrutu tenti di den ben e kari tabernakel. Na ini a tenti disi den Israelsma ben kan anbegi Gado. Te den ben o froisi go na wan tra presi, den ben o man tyari a tabernakel disi go nanga den.

Yehovah taki: ’Taigi a pipel meki den gi yu san den man fu yepi bow a tabernakel.’ Den Israelsma gi gowtu, solfru, kopro, diriston nanga tra gowtu sani. Den gi skapu-wiwiri, linnen-krosi, metibuba nanga furu tra sani tu. Den tyari so furu sani kon, taki Moses ben musu taigi den: ’A sari! Un no tyari kon moro.’

Furu man nanga uma di ben sabi fa fu du ibri sortu wroko, yepi fu bow a tabernakel. Yehovah ben gi den koni fu du a wroko. Sonwan fu den ben e meki titei, trawan ben e meki krosi noso den ben e borduur krosi. Trawan ben e seti ston, den ben e wroko nanga gowtu èn den ben e koti moi prenki na ini udu.

A pipel meki a tabernakel precies leki fa Yehovah ben taigi den. Den meki wan moi garden fu prati a tabernakel na ini tu pisi. A wan pisi ben nen a Santa Presi èn a tra pisi ben nen a Moro Santa Presi. Na ini a Moro Santa Presi yu ben abi a santa kisi fu a frubontu. A ben meki fu akasia-udu nanga gowtu. Na ini a Santa Presi yu ben abi wan gowtu kandratiki, wan tafra nanga wan altari fu bron switismeri. Na ini a dyari yu ben abi wan kopro beki nanga wan bigi altari. A santa kisi fu a frubontu ben e memre den Israelsma taki den pramisi fu gi yesi na Yehovah. Yu sabi san na wan frubontu? Wan frubontu na wan spesrutu pramisi di wan sma e meki.

Yehovah teki Aron nanga den manpikin fu en fu wroko leki priester na ini a tabernakel. Den ben musu sorgu taki a tan bun èn drape den ben musu tyari ofrandi gi Yehovah. Soso Aron, a granpriester, ben mag go na ini a Moro Santa Presi. A ben e du disi wán leisi wan yari fu tyari ofrandi gi en eigi sondu, gi den sondu fu en famiri èn gi den sondu fu a heri pipel Israel.

Den Israelsma kaba meki a tabernakel wán yari baka di den komoto na ini Egepte. Now den ben abi wan presi fu anbegi Yehovah.

Yehovah sori taki a ben breiti nanga a tabernakel èn dati meki a poti wan wolku na tapusei fu en. Solanga a wolku ben de na tapusei fu a tabernakel, den Israelsma ben e tan na a presi pe den de. Ma te a wolku ben opo go na loktu, dan den ben sabi taki den ben musu sreka sani fu gowe. Den ben e lusu a tabernakel, dan den ben e go pe a wolku ben e go.

Den Israelsma gowe libi Sinai-bergi. Den waka pasa na ini a sabana fu Paran, dan den doro na wan presi di nen Kades. Drape Yehovah taigi Moses: ’Seni 12 man fu go luku a kondre Kanan di mi o gi den Israelsma. Yu musu teki wán man fu ibri lo.’ Dati meki Moses teki 12 man èn a taigi den: ’Go na a kondre Kanan èn luku efu a gron bun fu prani. Luku efu den sma tranga noso swaki, èn efu den e tan na ini kampu noso na ini foto.’ Den 12 man go na Kanan. Yosua nanga Kaleb ben de na ini a grupu disi tu.

Baka 40 dei den 12 man drai kon baka. Den tyari figa, granaki-apra nanga droifi. Den taki: ’A kondre bun, ma den sma drape tranga èn den foto fu den abi hei skotu.’ Ma Kaleb taki: ’Wi kan wini den. Meki wi go wantewante!’ Yu sabi fu san ede Kaleb taki dati? Fu di en nanga Yosua ben e frutrow tapu Yehovah. Ma den tra 10 man taki: ’Nôno! Den sma dati bigi èn den tranga. Te wi tanapu na den sei, wi pikin leki sprenka.’

Den Israelsma lasi-ati. Den bigin kragi èn den ben e taigi makandra: ’Meki wi poti wan tra fesiman èn meki wi drai go baka na Egepte. Fu san ede wi musu go na ini a kondre disi fu meki sma kiri wi?’ Ma Yosua nanga Kaleb taki: ’No trangayesi Yehovah èn no frede. Yehovah o kibri wi.’ Den Israelsma no ben wani arki. Den ben wani kiri Yosua nanga Kaleb srefi!

San Yehovah du? A taigi Moses: ’Mi du so furu gi den Israelsma, toku den no e gi yesi na mi. Dati meki den o tan na ini a sabana 40 yari langa èn dyaso den o dede. Soso den pikin fu den nanga Yosua nanga Kaleb o libi na ini a kondre di mi pramisi den.’

Bakaten di den Israelsma ben de na ini a sabana, Korak, Datan, Abiram nanga 250 tra man bigin meki trobi nanga Moses nanga Aron. Den taigi den: ’A sani fu unu musu kaba now! Fu san ede yu musu de wi fesiman èn Aron wi granpriester? Yehovah no de soso nanga yu nanga Aron, ma a de nanga wi alamala.’ Yehovah no ben breiti. A ben feni taki den man disi trangayesi en.

Moses taigi Korak nanga den sma di ben e horibaka gi en: ’Tamara un musu kon na a tabernakel èn un musu tyari den pan fu unu fu bron switismeri. Yehovah o sori wi suma a teki.’

A tra dei Korak nanga den 250 man go miti Moses na a tabernakel. Drape den bron switismeri neleki den na priester. Yehovah taigi Moses nanga Aron: ’Komoto na mindri Korak nanga den tra man.’

Aladi Korak go na Moses na a tabernakel, Datan, Abiram nanga den famiri fu den no ben wani go. Yehovah taigi den Israelsma fu komoto na den tenti fu Korak, Datan nanga Abiram. Wantewante den Israelsma gowe. Datan, Abiram nanga den famiri fu den ben e tanapu na mofodoro fu den tenti. Wantronso a gron priti opo, dan a swari den alamala! Na a tabernakel wan faya komoto na hemel èn a bron Korak nanga den 250 man di ben e horibaka gi en.

Baka dati Yehovah taigi Moses: ’Teki a tiki fu den edeman fu ibri lo èn skrifi en nen na en tapu. Ma na tapu a tiki fu a lo Leifi yu musu skrifi a nen fu Aron. Poti den na ini a tabernakel èn a tiki fu a man di mi teki o gi bromki.’

A tra dei Moses tyari ala den tiki kon na doro èn a sori den edeman den tiki. A tiki fu Aron ben gi bromki nanga lepi amandra. Na a fasi disi Yehovah sori baka taki a teki Aron leki granpriester.