1-3. (a) Sortu sani na apostel Paulus no ben lobi kwetkweti di a ben de na Ateine? (b) San wi kan leri te wi e luku na eksempre fu Paulus?

PAULUS de na Ateine na Grikikondre pe a e si wan sani di a no lobi kwetkweti! Ateine na a moro prenspari foto pe sma ben e kisi hei skoroleri èn pe filosofiaman soleki Sokrates, Plato nanga Aristoteles ben e gi leri. Na wan foto pe sma e anbegi furu gado. Ala sei pe Paulus e luku, iya, na ini den tempel, na den pren èn na strati, a e si someni popkigado, bika den sma fu Ateine gwenti anbegi wan lo gado. Paulus sabi fa a tru Gado Yehovah e denki fu na anbegi di sma e anbegi kruktugado (Eks. 20:4, 5). A ret’ati apostel abi a srefi denki leki Yehovah. A e tegu gi kruktugado!

² Te Paulus e doro na a w’woyo, a e si wan sani di e meki taki a e skreki srefsrefi. A e si wan lo popkigado fu Hermes di abi wan bigi syenpresi fu wan mansma. Den popki disi de krosbei fu a bigi portu, na a noordsei uku fu a w’woyo di lai nanga gado-oso. Fa a fayafaya apostel o preiki na ini a presi disi pe sma e anbegi someni kruktugado? A o man hori ensrefi èn a o man feni wan fasi fu taki fu sani di den arkiman e agri nanga dati? A o man yepi sma fu suku a tru Gado so taki den feni En trutru?

³ A lezing di Paulus e hori gi den koniman fu Ateine, soleki fa a skrifi na Tori fu den apostel 17:22-31, na wan bun eksempre. Wi e leri fa wi kan gebroiki den yoisti wortu di e naki na ati fu den arkiman, fa wi kan taki nanga den sondro fu hati den firi èn fa wi kan kon sabi fa den e denki fu sani. Te wi e luku na eksempre fu Paulus, dan wi kan leri fa fu taki fu sani di den arkiman e agri nanga dati èn fa wi kan yepi den fu go denki fu den sani di den yere.

A e gi leri „na w’woyo” (Tori fu den apostel 17:16-21)

4, 5. Pe fu Ateine Paulus go preiki èn fu san ede a no ben o makelek fu meki den sma bribi san a ben e taki?

⁴ Paulus go na Ateine di a ben e teki en di fu tu preikiwaka leki zendeling na a ten fu a yari 50.a Di a ben e wakti Silas nanga Timoteyus di ben o kmoto na Bereya, dan a „bigin taki nanga den Dyu na ini a snoga” soleki fa a ben gwenti. A go na wan presi tu pe a ben o man taki nanga den Ateinesma di no ben de Dyu èn dati ben de a „w’woyo” (Tori 17:17). A w’woyo fu Ateine ben de na a noordwest-sei fu na Akropolis èn a ben bigi sowan feifi hectare. A no ben de wan presi nomo fu bai noso seri sani, ma a ben de wan pren na ini a foto pe ala sma ben e miti. Wan buku e taki dati a presi disi ben de „a moro prenspari presi fu a foto pe sma ben e du bisnis, pe den ben e taki fu politiek èn pe den ben e go teki leri”. Den Ateinesma ben lobi fu kon makandra drape fu taki fu dipi tori.

⁵ Na a w’woyo Paulus ben miti sma di no ben o de gaw fu bribi san a ben taki. Na mindri den arkiman fu en yu ben abi den Epikurus koniman nanga den Stoisi koniman. Den sma disi ben de memre fu tu grupu filosofiaman èn a leri fu den no ben e kruderi nanga makandra.b Den Epikurus koniman ben bribi taki a libi kon fu ensrefi. Den ben e si a libi na a fasi disi: „Yu no abi fu frede Gado. Yu no o firi noti te yu dede. Ala sma kan kon sabi san na bun. Ala sma kan ferdrage ogri.” Den Stoisi koniman ben hori nomo taki wan sma musu gebroiki en ferstan nomo fu kon sabi wan tori èn den no ben e bribi taki Gado na wan trutru sma. Den Epikurus koniman nanga den Stoisi koniman no ben bribi na ini na opobaka soleki fa den disipel fu Krestes ben e leri sma. A de krin taki a denki fu den tu grupu disi no ben abi noti fu du nanga a leri fu a tru Kresten bribi di de a moro soifri leri èn di Paulus ben e taki fu en.

6, 7. San son Griki koniman du di den yere san Paulus ben e leri sma èn san wi kan ferwakti tu fu sma na ini a ten disi?

⁶ San den Griki koniman du di den yere den sani di Paulus taki? Sonwan fu den gebroiki wan wortu di abi fu du nanga wan man di e ferteri trawan lawlaw sani, noso soleki fa den ben o taki en na ini Grikitongo, wan fowru di e pikipiki siri (Tori 17:18). Wan sabiman e taki fu a Griki wortu disi: „Fosi, den ben e gebroiki a wortu disi gi wan pkin fowru di ben e wakawaka e piki siri. Ma bakaten den gebroiki en gi sma di ben e piki n’nyan-sani di ben tan abra na w’woyo, noso ala sortu tra sani di sma trowe na gron. Baka wan pisi ten den gebroiki a wortu na wan agersi fasi gi wan sma di ben e bribi ala sortu tori di a yere, spesrutu gi wan sma di ben no ben man ferstan den tori disi finfini.” Te yu luku en bun, dan den koniman disi ben e taki dati Paulus no ben sabi noti èn taki a ben e taki nomo san a yere tra sma taki. Ma soleki fa wi o si, dan Paulus no ben broko en ede nanga den hati sani di den sma disi ben e taki fu en.

⁷ Na a srefi sortu sani e psa na ini a ten disi. Nofo tron sma taigi wi leki Yehovah Kotoigi hati sani fu di wi e bribi na ini Bijbel. Fu eksempre, son leriman e leri sma na evolutie-leri di e sori taki ala sani kon fu densrefi. Den e taki dati efu yu na wan koni sma dan yu musu bribi a leri disi. Nanga dati den e taki dati den sma di no wani bribi dati na don sma. Den sma disi di kisi hei skoroleri wani meki tra sma denki taki wi de neleki ’fowru di e pikipiki siri’ te wi e sori sma san Bijbel e taki èn te wi e sori den taki den sani na wi lontu musu fu abi wan mekiman. Ma wi no e broko wi ede nanga san den e taki. Na presi fu dati, te wi e ferteri sma taki wi e bribi na ini wan kfalek koni Mekiman, Yehovah Gado, di meki ala libisani na grontapu, dan wi e taki nanga den sondro fu tweifri.​—Openb. 4:11.

8. (a) San son sma du di den yere san Paulus taki? (b) Di den sma tyari Paulus go na a Areopagus, dan san dati ben wani taki? (Luku a futuwortu.)

⁸ Ma son sma di ben yere fa Paulus e preiki na w’woyo no ben denki leki den Griki koniman disi. Den taki: „A gersi leki a e taki fu tra gado” (Tori 17:18). A ben de so trutru taki Paulus ben e meki den sma fu Ateine kon sabi nyun gado? Disi ben de wan seryusu sani. Sowan tu hondro yari na fesi, sma taki wan srefi sortu sani fu Sokrates di meki taki den tyari en go na fesi krutu èn taki a kisi dedestrafu. Dati meki a no musu ferwondru wi taki den Ateinesma tyari Paulus go na a Areopagus èn taki den aksi en meki a ferklari den leri fu en di den no ben sabi.c Fa Paulus ben o sori den sma di no ben sabi noti fu Bijbel, taki a boskopu fu en tru?

„Sma fu Ateine, mi e si taki unu abi lespeki” (Tori fu den apostel 17:22, 23)

9-11. (a) Fa Paulus pruberi fu taki fu sani di den arkiman ben agri nanga dati? (b) Fa wi kan teki na eksempre fu Paulus te wi de na ini a preikiwroko?

⁹ Hori na prakseri taki Paulus no ben lobi en kwetkweti di a si taki den sma fu Ateine ben e anbegi someni kruktugado. Ma a no rigeri nanga den sma taki den ben e anbegi kruktugado. Na presi fu dati a hori ensrefi. A no hati a firi fu den sma, ma a taki fu wan sani di den ben e agri nanga dati èn na so a pruberi fu doro den ati. A bigin so: „Sma fu Ateine, mi e si taki unu abi lespeki gi den gado moro leki tra sma” (Tori 17:22). Yu kan taki dati Paulus ben taki: ’Mi e si taki unu e bribi tranga na ini wan gado.’ Na wan koni fasi Paulus prèise den fu di den ben e bribi. A ben sabi taki sonwan fu den di falsi bribi kori, ben kan tron sma di teki a boskopu bakaten. Iya, Paulus ben sabi taki wan ten ben de taki en srefi ’no ben sabi san a ben e du èn taki a ben e du sani fu di a no ben e bribi’.​—1 Tim. 1:13.

¹⁰ Paulus go doro fu taki fu sani di den sma ben e agri nanga dati. A taigi den taki a si wan sani di sori en krin taki den sma fu Ateine ben e bribi trutru na ini wan gado. A ben si wan altari pe skrifi: ’Altari fu wan gado di wi no sabi.’ Wan buku e taki dati „den Grikisma nanga den tra pipel ben gwenti fu meki altari gi ’gado di den no sabi’, bika den ben frede taki wan gado ben de di ben kan kisi atibron nanga den fu di den fergiti fu anbegi en tu”. Den sma fu Ateine meki so wan altari èn na so den agri taki wan Gado ben de di den no sabi. Paulus ben sori go na a altari disi fu man opo a tori fu a bun nyunsu di a ben e preiki. A taki: „Na fu a Gado disi di unu e anbegi sondro taki unu sabi en, mi e ferteri unu” (Tori 17:23). Paulus taki na so wan fasi taki a no hati a firi fu den arkiman, ma tòg a ben taki na wan krakti fasi. A no taki fu wan nyun gado noso wan gado di den no sabi, soleki fa sonwan fu den ben feni taki a du. A ferteri den suma na a Gado di den no sabi: Dati na a tru Gado.

¹¹ Fa wi kan teki na eksempre fu Paulus te wi de na ini a preikiwroko? Efu wi e poti prakseri na sani di wi e si, dan dati kan sori wi efu wan sma e bribi na ini wan gado. Kande a e weri wan spesrutu sani di e sori dati, noso kande a poti wan sani na a doro fu en oso, noso na ini en dyari di e sori taki a e bribi na ini wan gado. Wi kan taigi a sma: ’Mi e si taki yu e bribi na ini wan gado. Mi ben wani miti wan sma leki yu di e bribi.’ Te wi e hori na prakseri taki a sma e bribi na ini wan gado, dan wi o man taki fu sani di a sma e agri nanga dati. Memre taki wi no e go na ini a preikiwroko fu krutu sma fu den sani di den e bribi. Wan ten ben de taki furu fu wi Kresten brada nanga sisa ben e bribi fayafaya tu na ini falsi kerkileri.

Gado „no de fara fu nowan fu wi” (Tori fu den apostel 17:24-28)

12. Fa Paulus fiti a fasi fa a ben taki na den arkiman fu en?

¹² Paulus ben man taki fu sani di den arkiman ben e agri nanga dati, ma a ben o man du dati tu te a ben e preiki gi den? A ben sabi taki den arkiman fu en ben leri a Griki filosofia èn taki den no ben sabi Bijbel. Dati meki a fiti ensrefi na den èn wan tu leisi a kenki a fasi fa a taki fu a boskopu. Fosi, a taki fu sani di Bijbel e leri sondro fu kari den Bijbeltekst langalanga. Dan a gi den arkiman a firi taki a e ferstan den èn taki en na wan fu den. A du dati fu di a gebroiki wortu leki „wi” nanga „unu”. Baka dati a taki fu sani di skrifi na ini den buku fu den Grikisma fu sori taki sonwan fu den sani di a ben e leri sma skrifi tu na ini den buku fu den. Kow go luku now na sortu krakti fasi Paulus taki nanga den Ateinesma. Sortu prenspari tru tori a tyari kon na krin fu a Gado di den Ateinesma no ben sabi?

13. San Paulus taki fu a fasi fa hemel nanga grontapu kon de èn san a ben wani leri den arkiman?

¹³ Gado meki hemel nanga grontapu. Paulus taki: „A Gado di meki grontapu nanga ala sani na en tapu, na en na Masra fu hemel nanga grontapu. A no e tan na ini tempel di libisma meki” (Tori 17:24).d Hemel nanga grontapu no kon fu densrefi. A tru Gado na a Mekiman fu ala sani (Ps. 146:6). A Moro Hei Masra fu hemel nanga grontapu de tra fasi leki na umagado Ateina noso tra gado di kan kisi glori soso te sma e meki tempel, gado-oso nanga altari gi den. Ma tempel di bow nanga libisma anu no bigi nofo gi a Moro Hei Masra fu hemel nanga grontapu (1 Kow. 8:27). A boskopu fu Paulus ben de krin. A tru Gado bigi moro iniwan popkigado di libisma meki èn di de na ini tempel di libisma bow.​—Yes. 40:18-26.

14. Fa Paulus sori taki Gado no abi noti fanowdu fu libisma?

¹⁴ Gado no abi libisma fanowdu. Sma di ben e anbegi popkigado ben gwenti fu weri moi krosi nanga wan lo pranpran gi den popki disi. Den ben tyari diri kado gi den èn n’nyan nanga dringi, neleki den popkigado ben abi den sani disi fanowdu. Ma a kan taki sonwan fu den Griki filosofiaman di ben sdon na mindri den arkiman fu Paulus ben bribi taki wan gado no abi noti fanowdu fu libisma. Efu dati de so, dan a de seiker taki den ben e agri di Paulus taki dati Gado „no abi libisma fanowdu fu sorgu en”. Iya, libisma no man gi a Mekiman nowan enkri gudu fu di a no abi noti fanowdu! Na presi fu dati en e gi libisma san den abi fanowdu. A e gi den „libi, na en e meki den bro èn na en e gi den ala sani”, soleki son, alen, nanga fatu gron (Tori 17:25; Gen. 2:7). Gado na a sma di e gi èn libisma na den wan di e kisi. Sobun, Gado no abi noti fanowdu fu den.

15. San Paulus taki fu a denki di den Ateinesma ben abi taki den bun moro sma di no de fu Grikikondre èn sortu prenspari sani wi kan leri fu en?

¹⁵ Gado meki libisma. Den Ateinesma ben denki taki den ben bun moro sma di no ben de fu Grikikondre. Ma den tru tori na ini Bijbel no e leri taki wan sma musu denki taki a kondre noso a ras fu en bun moro a di fu wan tra sma (Deut. 10:17). Paulus taki fu a tori disi na wan koni fasi èn sondro fu hati a firi fu den arkiman. Di a taki: „Fu wán sma nomo [Gado] meki ala tra sma”, dan a gi den arkiman na okasi fu denki fu a tori (Tori 17:26). A ben abi a tori fu Genesis na prakseri di e taki fu Adam, a fosi p’pa fu ala libisma (Gen. 1:26-28). Fu di ala libisma kmoto na a srefi afo, meki nowan ras noso kondre bun moro wan trawan. Den arkiman fu Paulus ben musu fu ferstan a sani disi. Wi e leri wan prenspari sani fu na eksempre fu Paulus. Te wi e preiki, wi wani hori den firi fu den sma na prakseri èn wi wani fiti wisrefi na den, ma wi no musu swaki den tru tori fu Bijbel soso fu meki sma arki.

16. San a Mekiman abi na prakseri gi libisma?

¹⁶ Gado wani taki libisma kon krosbei na en. Srefi efu den filosofiaman na mindri den arkiman fu Paulus ben haritaki yari-go-yari-kon fu san ede libisma de na grontapu, tòg den no ben o man ferklari a tori na wan bun fasi. Ma Paulus ben sori krin san a Mekiman ben abi na prakseri gi libisma. A Mekiman ben „wani taki sma musu suku en. Efu den e du muiti fu suku en, den o feni en trutru, bika a no de fara fu nowan fu wi” (Tori 17:27). Iya, sma kan kon leri sabi a Gado di den Ateinesma no ben sabi. Fu taki en leti, a no de fara fu den wan di wani feni en trutru èn di wani kon sabi en (Ps. 145:18). Luku taki Paulus ben gebroiki a wortu „wi” èn na so a poti ensrefi tu na mindri den sma di musu ’suku Gado’ fayafaya.

17, 18. Fu san ede libisma musu wani fu kon krosbei na Gado èn san wi kan leri fu a fasi fa Paulus ben hari a prakseri fu den arkiman fu en?

¹⁷ Libisma musu wani fu kon krosbei na Gado. Paulus ben taki dati na Gado meki taki „wi de na libi, taki wi e beweigi èn taki wi de”. Son sabiman e taki dati Paulus ben sori go na den wortu fu Epimenides, wan puwema-skrifiman fu Kreita di ben libi na ini a di fu siksi yarihondro Fosi Krestes. A man disi ben de „wan prenspari sma gi a bribi fu den Ateinesma”. Paulus taki fu ete wan sani di musu meki taki libisma wani kon krosbei na Gado: „Sonwan fu un eigi puwema-skrifiman taki: ’Bika wi na pkin fu en tu’” (Tori 17:28). Libisma musu abi a firi taki Gado na den P’pa, fu di en na a sma di meki a fosi man di tron na afo fu ala libisma. Fu hari a prakseri fu den arkiman fu en, Paulus du wan koni sani èn a taki langalanga fu sani di skrifi na ini den buku fu Griki skrifiman di den arkiman fu en ben e lespeki. Wi e teki na eksempre fu Paulus èn dati meki wanwan leisi wi e taki fu sani di skrifi na ini historiabuku nanga encyclopedie, noso tra buku di sma e lespeki.e Fu eksempre, te wi e taki fu wan sani di skrifi na ini wan buku di sma e lespeki, dan dati kan yepi wan sma di no de wan Kotoigi fu si pe son gwenti noso fesa di falsi kerki e hori kmoto.

¹⁸ Te nanga now Paulus taki fu prenspari tru tori fu Gado èn na wan koni fasi a fiti den wortu fu en na den arkiman fu en. San na apostel ben wani taki den Ateinesma ben musu du nanga den prenspari sani di a ben e taigi den? Sondro fu draidrai, a taigi den moro fara san den ben musu du.

’Ala libisma musu abi berow’ (Tori fu den apostel 17:29-31)

19, 20. (a) Fa Paulus sori na wan koni fasi taki na wan don sani fu anbegi popki di sma meki? (b) San den arkiman fu Paulus ben musu du?

¹⁹ Now Paulus ben de srekasreka fu gi den arkiman fu en dek’ati fu du wan sani. Ete wan leisi Paulus sori go na wan sani di skrifi na ini den buku fu den Grikisma. A taki: „Fu di wi na pkin fu Gado, meki wi no musu denki taki Gado de leki wan sani di meki fu gowtu, solfru, noso ston. A no de leki wan popki tu di libisma meki nanga den eigi koni” (Tori 17:29). Iya, efu na Gado meki libisma, dan fa Gado kan tron wan popki di libisma meki? Na wan koni fasi Paulus e sori taki na wan don sani fu anbegi popki di libisma meki (Ps. 115:4-8; Yes. 44:9-20). Te Paulus e taki „wi no musu . . . ”, dan kande a wani safu a pir’ai di a gi den arkiman.

²⁰ Na apostel sori krin taki den arkiman ben musu du wan sani. A taigi den: „Gado no ben poti prakseri na den sani disi di sma ben du sani sondro fu sabi. Ma now a e taigi ala libisma na ala sei taki den musu abi berow” (Tori 17:30). A kan taki sonwan fu den arkiman fu Paulus skreki srefsrefi di den yere taki den musu abi berow. Ma a krakti fasi fa a taki, sori den krin taki na Gado gi den libi èn taki den ben musu gi frantwortu na En. Den ben musu suku Gado, den ben musu leri den tru tori fu en èn den ben musu libi na wan fasi di e kruderi nanga den tru tori disi. Gi den Ateinesma, dati ben wani taki dati den ben musu sabi taki na anbegi fu popki na wan sondu èn taki den ben musu drai baka gi dati.

21, 22. Nanga sortu krakti wortu Paulus tapu a taki fu en èn san dati e leri wi na ini a ten disi?

²¹ Paulus tapu nanga den krakti wortu disi: „[Gado] poti wan dei fu krutu ala sma na grontapu na wan reti fasi èn a gi wan man a wroko fu du dati. Ala sma kan de seiker taki a sani disi o psa, fu di a gi a man disi wan opobaka” (Tori 17:31). Wan Krutudei ben de na pasi! Dati na wan seryusu sani di musu meki wan sma suku a tru Gado èn feni en. Paulus no kari a nen fu a Krutuman. Na presi fu dati Paulus taki wan sani fu a Krutuman èn a sani disi meki den sma ferwondru. A taki: A ben libi leki wan libisma, a dede èn Gado gi en wan opobaka!

²² Na ini a ten disi wi e leri furu fu a moi fasi fa Paulus tapu nanga a taki fu en. Wi sabi taki a Krutuman di Gado poti na Yesus Krestes di kisi wan opobaka (Yoh. 5:22). Wi sabi tu taki a Krutudei o de dusun yari langa èn taki a e kon krosbei es’esi (Openb. 20:4, 6). Wi no frede a Krutudei fu di wi sabi taki a o tyari bun furu blesi kon gi den wan di Gado e si leki ret’ati sma. Na opobaka fu Yesus Krestes na a moro bigi wondru di psa. A wondru disi e gi wi a dyaranti taki den moi sani di wi e ferwakti gi a ten di e kon, o kon tru!

„Sonwan fu den sma . . . tron bribiman” (Tori fu den apostel 17:32-34)

23. Sortu difrenti sani den sma du di den yere den sani di Paulus taki?

²³ A no ala sma ben lobi den sani di Paulus taki. „Wan tu fu den bigin meki spotu” di den yere taki a e taki fu wan opobaka. Trawan arki en na wan lespeki fasi, ma den no teki wan besroiti. Den taki: „Wan tra leisi yu musu ferteri wi moro fu a tori disi” (Tori 17:32). Ma wan tu fu den arki èn den teki wan besroiti: „Sonwan fu den sma bigin waka nanga en èn den tron bribiman. Yu ben abi Dionisiyus, wan krutuman fu a krut’oso fu na Areopagus, wan uma di nen Damaris nanga tra sma” (Tori 17:34). Wi e si wan srefi sortu sani te wi de na ini a preikiwroko. A kan taki son sma e spotu wi. Trawan no e spotu wi, ma na wan lespeki fasi den e sori wi taki den no e bribi a boskopu di wi e preiki. Ma wi breiti te son sma e teki a Kownukondre boskopu èn te den e tron bribiman.

24. San wi kan leri fu den sani di Paulus taki di a ben e tnapu na tapu na Areopagus?

²⁴ Te wi e prakseri a fasi fa Paulus taki nanga den sma, dan wi kan leri furu fu dati. Wi kan leri fa wi kan taki na so wan fasi taki a no muilek fu ferstan, fa wi kan kon nanga krin bewijs di musu yepi den arkiman fu bribi san wi e taki èn fa wi kan fiti wisrefi na den arkiman fu wi. Boiti dati, wi kan leri taki wi musu abi pasensi nanga den sma di falsi bribi kori den èn wi kan leri tu taki wi musu hori a firi fu den na prakseri. Wi kan leri ete wan prenspari sani: Noiti wi musu swaki den tru leri fu Bijbel soso fu plisi den arkiman fu wi. Ma te wi e teki na eksempre fu na apostel Paulus, wi kan tron moro bun leriman na ini a preikiwroko. Wan tra sani na taki den owruman kan tron leriman na ini a gemeente di kan gi leri na wan moro bun fasi. Na so wi o man yepi trawan na wan bun fasi fu ’suku Gado èn fu feni en trutru’.​—Tori 17:27.

1-3. Fu san ede na apostel Paulus kon na Korente èn nanga sortu problema a e kisi fu du?

A DE a kbapisi fu a yari 50. Na apostel Paulus de na Korente, wan gudu foto pe furu sma e kon fu du bisnis. Na ini a foto dati furu Grikisma, Romesma nanga Dyu e tan.a Paulus no kon dya fu bai noso seri sani èn a no kon fu suku grontapuwroko. A kon na Korente fu du wan moro prenspari sani èn dati na fu preiki fu Gado Kownukondre. Paulus abi wan tanpresi fanowdu, ma a no wani de wan hebi gi trawan kwetkweti, fu di den musu pai furu moni fu sorgu en. A no wani meki sma denki taki den musu sorgu en fu di a e du a preikiwroko. San a o du?

² Paulus sabi meki tenti. A no makelek fu meki tenti, ma Paulus de klarklari fu wroko nanga en anu fu man sorgu ensrefi. A o feni wroko na ini a foto disi pe bun furu sma e libi? A o feni wan bun presi fu tan? Aladi Paulus e kisi fu du nanga den problema disi, tòg a no e fergiti a moro prenspari wroko fu en. Dati na a preikiwroko.

³ Te fu kba Paulus tan na Korente wan pisi ten èn a preikiwroko fu en ben abi furu bun bakapisi. San wi kan leri fu den sani di Paulus du na Korente èn fa dati o yepi wi fu preiki finfini fu Gado Kownukondre na ini a kontren fu wi?

„Den ben e meki tenti” (Tori fu den apostel 18:1-4)

4, 5. (a) Pe Paulus ben tan di a ben de na Korente èn sortu wroko a ben du fu man sorgu ensrefi? (b) Fa a du kon taki Paulus ben man meki tenti?

⁴ Baka di Paulus ben de wan pisi ten na Korente, a miti wan trowpaar di ben abi switifasi. A trowpaar disi na Akwila, wan man di ben de wan Dyu, nanga en frow Preskela, noso Preska. Den froisi go na Korente fu di Grankownu Klaudiyus ben taigi „ala den Dyu fu gwe libi Rome” (Tori 18:1, 2). Akwila nanga Preskela no teki Paulus na ini den oso nomo, ma den meki a wroko nanga den tu. Bijbel e taki: „Fu di a ben e du a srefi wroko leki den. Den ben e meki tenti èn Paulus ben go tan na den oso fu wroko nanga den” (Tori 18:3). A heri pisi ten di Paulus ben du en preikiwroko na Korente, a tan na a oso fu a trowpaar disi di ben abi switifasi. Di Paulus tan na Akwila nanga Preskela, dan a kan taki a skrifi wan tu fu den brifi di tron wan pisi fu Bijbel bakaten.b

⁵ Fa a du kon taki Paulus, di kisi leri „fu Gamaliyel”, ben sabi meki tenti tu? (Tori 22:3) Soleki fa a sori, dan den Dyu fu a fosi yarihondro no ben si en leki wan lagi sani fu leri den pkin fu den fa fu wroko nanga den anu, awansi a ben de so taki den pkin ben o kisi moro skoroleri bakaten. A kan taki Paulus leri fu meki tenti di a ben yongu, bika a ben de fu Tarsus na Silisia, wan kontren di ben pôpi fu di den ben meki wan krosi drape di nen silisium. Nanga a krosi dati sma ben meki tenti. Fa den ben e du dati? A kan taki densrefi ben meki tentikrosi noso taki den ben koti a grofu tentikrosi disi di ben steifi èn nai en kon na wán fu man meki den tenti. Awansi fa a no fa, a wroko disi ben de wan tranga wroko.

6, 7. (a) Fa Paulus ben si a wroko fu meki tenti èn san e sori taki Akwila nanga Preskela ben denki so tu? (b) Fa Kresten na ini a ten disi e teki na eksempre fu Paulus, Akwila nanga Preskela?

⁶ Paulus no ben si a wroko di a ben e du fu meki tenti, leki a moro prenspari wroko na ini en libi. A ben e du en nomo fu sorgu ensrefi, so taki a ben kan preiki a bun nyunsu ’sondro fu aksi sma pai gi dati’ (2 Kor. 11:7). Fa Akwila nanga Preskela ben denki fu a wroko fu den? A no de fu taki dati neleki Paulus, den Kresten disi no ben e si a wroko fu den leki a moro prenspari sani na ini den libi. Fu taki en leti, di Paulus gwe libi Korente na ini a yari 52, dan Akwila nanga Preskela gwe libi Korente tu èn den go nanga en na Efeise. Na ini na oso fu den drape a gemeente fu a foto dati ben e hori konmakandra (1 Kor. 16:19). Ma den drai go baka na Rome èn bakaten den go baka na Efeise. A trowpaar disi ben de fayafaya èn den ben poti Kownukondre afersi na a fosi presi na ini den libi. Den ben de klarklari fu du ala san den man fu yepi trawan èn na so „ala den gemeente na ini den tra kondre” sori taki den ben de nanga tangi fu den sani di a trowpaar disi du.​—Rom. 16:3-5; 2 Tim. 4:19.

⁷ Kresten na ini a ten disi e teki na eksempre fu Paulus, Akwila nanga Preskela. Fayafaya preikiman na ini a ten disi e wroko tranga ’fu di den no wani taki trawan pai furu moni fu sorgu den, so taki den ben o de wan hebi gi den’ (1 Tes. 2:9). A moi fu si taki furu pionier e wroko wan tu dei na ini a wiki noso wan tu mun na ini a yari fu man sorgu densrefi so taki den kan du a preikiwroko di de a moro prenspari wroko fu den. Neleki Akwila nanga Preskela furu lob’ati futuboi fu Yehovah e meki kring-owruman kon na den oso. Den wan di „abi a gwenti fu gi sma wan switikon” sabi taki den o kisi furu dek’ati te den e du dati.​—Rom. 12:13.

„Furu fu den Korentesma . . . bigin bribi” (Tori fu den apostel 18:5-8)

8, 9. San Paulus du di sma gens en fu di a ben e preiki fayafaya gi den Dyu èn pe a go preiki baka dati?

⁸ Paulus ben e si a wroko di a ben e du leki wan sani di ben e yepi en fu du a preikiwroko. Disi kon na krin di Silas nanga Timoteyus kmoto na Masedonia fu tyari furu sani kon gi en (2 Kor. 11:9). Fa Paulus kisi den sani dati, a „bigin gebroiki ala en ten fu preiki a wortu fu Gado [noso „Paulus teki ala en ten fu preiki”, Nyun Testamenti]” (Tori 18:5). Ma di a ben e preiki so fayafaya gi den Dyu, dan furu sma bigin gens en. Aladi a boskopu fu Krestes ben kan kibri den libi, tòg den Dyu no ben wani arki a boskopu. Paulus di no ben wani tyari a frantwortu te den ben o lasi den libi, seki en krosi èn a taigi den Dyu gensman: „Meki a brudu fu unu kon na tapu un eigi ede. Mi du san mi ben musu du. Vanaf now mi o go na den sma di no de Dyu.”​—Tori 18:6; Esek. 3:18, 19.

⁹ Pe Paulus ben o preiki now? Titiyus Yustus, wan man di ben teki a Dyu bribi, ben tan na sei a snoga èn a teki Paulus na en oso. Dati meki Paulus gwe fu a snoga èn a go na a oso fu Yustus so taki a ben kan preiki drape gi sma (Tori 18:7). Di Paulus ben de na Korente, dan a tan na ini na oso fu Akwila nanga Preskela, ma ala sani di ben abi fu du nanga a preikiwroko, na apostel ben e du na ini na oso fu Yustus.

10. San e sori taki Paulus no ben besroiti fu preiki soso gi sma di no de Dyu?

¹⁰ Di Paulus taki dati a ben o go na den trakondre sma, dan dati wani taki dati a no ben o preiki moro gi nowan enkri Dyu, noso gi sma di teki a Dyu bribi, srefi den wan di ben arki a boskopu? Kwetkweti! Fu eksempre, „Krespus, a fesiman fu a snoga ben tron wan bribiman fu Masra. Ala den sma na ini en osofamiri tron bribiman tu”. Soleki fa a sori, dan wan lo fu den sma di ben e go na a snoga, tron bribiman tu. Bijbel e taki: „Furu fu den Korentesma di ben arki Paulus bigin bribi èn den dopu” (Tori 18:8). Na so na oso fu Titiyus Yustus tron a presi pe a nyun Kresten gemeente fu Korente ben e hori konmakandra. Efu Lukas skrifi Tori fu den apostel na a fasi fa a ben gwenti skrifi sani, dati wani taki soifri soleki fa den sani psa baka makandra, dan den Dyu noso den sma di teki a Dyu bribi tron Kresten baka di Paulus seki en krosi. Efu na so Lukas skrifi a tori, dan dati ben o sori krin taki Paulus ben de klarklari fu fiti ensrefi na difrenti situwâsi.

11. Fa Yehovah Kotoigi na ini a ten disi e teki na eksempre fu Paulus te den e meki muiti fu preiki gi sma fu den Kresten kerki?

¹¹ Na ini furu kondre den Kresten kerki de langa ten kba èn den abi furu krakti na tapu den memre fu den. Na ini son kondre nanga èilanti den zendeling fu den Kresten kerki meki furu sma teki a bribi fu den. Sma di e taki dati den na Kresten, nofo tron e hori densrefi na gwenti, neleki fa a ben de nanga den Dyu fu Korente fu a fosi yarihondro. Ma tòg wi leki Yehovah Kotoigi e meki muiti fu preiki fayafaya gi den sortu sma dati èn wi e yepi den fu kon ferstan Bijbel moro bun, neleki fa Paulus ben e du en. Srefi te den e gens wi noso te den kerki fesiman fu den e ferfolgu wi, wi no e las’ati. Na mindri den sma di ’de fayafaya fu dini Gado, ma di no abi soifri sabi’, yu kan abi furu safri-ati sma di wi musu feni ete.​—Rom. 10:2.

„Mi abi furu sma na ini a foto disi ete” (Tori fu den apostel 18:9-17)

12. Sortu dek’ati Paulus kisi na ini wan fisyun?

¹² Efu Paulus ben tweifri taki a ben musu go doro fu preiki na ini Korente, dan a no ben tweifri moro a neti di Masra Yesus sori ensrefi na en na ini wan fisyun. Masra taigi en: „No frede. Tan taki nanga den sma èn no tan tiri, bika mi de nanga yu. Nowan sma o pruberi fu du yu ogri. Mi abi furu sma na ini a foto disi ete” (Tori 18:9, 10). A ben musu fu de so, taki a fisyun disi gi en dek’ati! Masra srefi gi Paulus a dyaranti taki a ben o sorgu taki ogri no psa nanga en èn taki furu sma ben de na ini a foto ete di ben musu yere a bun nyunsu. San Paulus du di a kisi a fisyun? Bijbel e taki: „A tan drape wán yari nanga siksi mun èn a leri den sma a wortu fu Gado.”​—Tori 18:11.

13. Sortu sani Paulus ben kan prakseri di a ben kon moro krosbei na a krutuman-sturu, ma fu san ede a ben kan ferwakti taki sani ben o waka tra fasi?

¹³ Baka di Paulus tan wán yari na ini Korente, dan a kisi moro bewijs taki Masra e horbaka gi en. „Den Dyu opo densrefi leki wán man teige Paulus èn den tyari en go na fesi a krutuman-sturu”, di den ben kari wan bema (Tori 18:12). Son sma denki taki a bema ben de wan hei podium fu weti nanga blaw marmer-ston èn taki moi prenki ben koti na ini a ston. Kande a ben de krosbei fu a mindrisei fu a w’woyo fu Korente. Na fesi a bema nofo presi ben de pe wan heri ipi sma ben kan kon makandra. Sma feni sani di e sori taki a krutuman-sturu no ben de fara fu a snoga. Sobun, a ben kan de krosbei fu Yustus oso tu. Di Paulus kon moro krosbei na a bema, dan a kan taki a ben prakseri fa sma ben ston Stefanus kiri. Son leisi sma e taki dati Stefanus na a fosi Kresten di dede fu en bribi ede. Paulus, di sma ben sabi na a ten dati leki Saulus, ben feni en bun taki „den kiri Stefanus” (Tori 8:1). Wan srefi sortu sani ben o psa nanga Paulus now? Nôno, fu di Masra ben pramisi en: „Nowan sma o pruberi fu du yu ogri.”​—Tori 18:10, Nyun Testamenti.

14, 15. (a) Sortu ogri den Dyu taki dati Paulus du èn fu san ede Galio no ben wani krutu en? (b) San psa nanga Sostenes èn fa sani waka nanga en kande?

¹⁴ San psa di Paulus doro a krutuman-sturu? A man di ben sdon drape ben de Galio, a granman fu Akaya. A ben de a bigi brada fu Seneca, wan filosofiaman fu Rome. Den Dyu ben taki a sani disi fu Paulus: „A man disi e kisi sma so fara taki den e anbegi Gado tra fasi leki fa a wet e taki” (Tori 18:13). Den Dyu ben feni taki sondro primisi fu lanti, Paulus ben preiki gi sma fu meki den kon na ini a bribi fu en. Ma Galio no ben feni taki Paulus du „wan bigi ogri” noso taki a du „wan tra sani di no bun” (Tori 18:14). Galio no ben wani bemui nanga den trobi fu den Dyu. Iya, fosi Paulus ben man opo en mofo taki wan sani srefi, Galio yagi den sma fu di a no ben wani luku a krutu-afersi! Den Dyu ati ben bron srefsrefi. Den puru atibron na tapu Sostenes, di ben teki presi gi Krespus kande leki fesiman fu a snoga. Den grabu Sostenes „èn den bigin fon en leti na fesi a krutuman-sturu”.​—Tori 18:17.

¹⁵ Fu san ede Galio no ben tapu den Dyu fu fon Sostenes? Kande Galio ben denki taki Sostenes ben de a fesiman fu a grupu ogr’ati man di ben wani fon Paulus èn dati meki a feni taki a ben kisi Sostenes moi taki den fon en. Awansi fa a no fa, soleki fa a sori, dan a tori disi ben abi bun bakapisi. Na ini a fosi brifi di Paulus skrifi furu yari baka dati gi a gemeente na Korente, a ben taki fu wan brada di nen Sostenes (1 Kor. 1:1, 2). Disi ben de a srefi Sostenes di sma ben fon na ini Korente? Efu dati de so, dan a fonfon di Sostenes kisi yepi en fu teki a Kresten bribi.

16. Masra Yesus ben taigi Paulus: „Tan taki nanga den sma èn no tan tiri, bika mi de nanga yu.” San den wortu disi abi fu du nanga wi preikiwroko?

¹⁶ Memre taki na baka di den Dyu no ben wani arki di Paulus preiki gi den, Masra Yesus gi Paulus a dyaranti disi: „No frede. Tan taki nanga den sma èn no tan tiri, bika mi de nanga yu” (Tori 18:9, 10). A bun fu hori den wortu disi na prakseri, spesrutu te sma no wani arki a boskopu fu wi. No fergiti taki Yehovah e leisi sma ati èn taki na en e hari krin-ati sma kon na en (1 Sam. 16:7; Yoh. 6:44). A e gi wi furu dek’ati fu tan de fayafaya na ini a preikiwroko. Ibri yari dusundusun sma e teki dopu, iya, ibri dei hondrohondro sma e du dati. Yesus e gi den wan di e ’go na sma fu ala kondre fu meki den tron disipel’, a dyaranti disi: „Mi o de nanga unu ala dei te na a kba fu grontapu.”​—Mat. 28:19, 20.

„Efu Yehovah wani” (Tori fu den apostel 18:18-22)

17, 18. Fu sortu sani Paulus ben e prakseri di a ben teki boto fu go na Efeise?

¹⁷ Wi no de seiker efu den sani di Galio du nanga den sma di feni taki Paulus du ogri, meki taki sani kon tiri gi a nyun Kresten gemeente na ini Korente. Ma Paulus tan „wan heri pisi ten” drape, fosi a gwe libi den brada fu Korente. Na a bigin fu a yari 52, a seti sani fu go na a lanpe fu Kenkreya di ben de sowan 11 kilometer owstusei fu Korente èn drape a ben o teki boto go na Siria. Ma fosi Paulus kmoto na Kenkreya, a „koti en w’wiri, fu di a ben pramisi Gado wan sani” (Tori 18:18).c Baka dati a meki Akwila nanga Preskela kon nanga en, dan den teki boto abra Egeus Se fu go na Efeise na ini Pkin Asia.

¹⁸ A kan taki di Paulus ben de na ini a boto di ben kmoto na Kenkreya, dan a ben e denki fu a ten di a ben de na Korente. A ben abi furu moi sani fu prakseri èn den sani dati ben gi en furu prisiri. A preikiwroko di a ben du drape 18 mun langa ben abi bun bakapisi. A fosi gemeente na ini Korente ben seti èn den ben kon makandra na ini na oso fu Yustus. Na mindri den sma di ben tron bribiman yu ben abi Yustus, Krespus nanga en osofamiri nanga furu trawan. Paulus ben lobi den nyun bribiman disi fu di a ben yepi den fu tron Kresten. Bakaten a ben o skrifi den wan brifi èn a ben o taki dati den de leki ’brifi di sma e prèise èn di skrifi na tapu en ati’. Wi tu abi wan bun matifasi nanga den wan di wi yepi fu teki a tru anbegi. A e gi wi prisiri fu si den sortu sma disi di de leki ’brifi pe sma e prèise wi’.​—2 Kor. 3:1-3.

19, 20. San Paulus du di a doro na Efeise èn san wi e leri fu en te wi wani doro marki na ini a tru anbegi?

¹⁹ Di Paulus doro na Efeise, a bigin preiki wantewante. A „go na a snoga fu taki nanga den Dyu” (Tori 18:19). A leisi dati Paulus tan wan syatu pisi ten nomo na Efeise. Aladi den aksi en fu tan moro langa, tòg „a no ben wani”. Di a taki adyosi, a taigi den Efeisesma: „Efu Yehovah wani, dan mi o drai kon baka na unu” (Tori 18:20, 21). A no de fu taki dati Paulus ben ferstan taki furu wroko ben de fu du ete na Efeise. Na apostel ben abi na prakseri fu drai kon baka, ma a libi a tori dati gi Yehovah. Dati na wan bun eksempre gi wi, a no so? Te wi e meki muiti fu doro marki di e gi Gado grani, dan wi fosi musu bigin du wan sani. Ma ala ten wi musu abi a fertrow taki Yehovah o tiri wi èn wi musu meki muiti fu du sani di e kruderi nanga a wani fu en.​—Yak. 4:15.

²⁰ Paulus libi Akwila nanga Preskela na Efeise, dan a teki boto go na Sesareya. Soleki fa a sori, dan a „go na Yerusalem” èn a go taigi a gemeente drape odi (Tori 18:22). Baka dati Paulus drai go baka na en oso na Antiokia na ini Siria. A di fu tu preikiwaka di a ben teki leki zendeling ben waka bun èn a ben kon na wan kba. San ben o psa te a ben o teki a lasti preikiwaka fu en?

1, 2. (a) Sortu ogri miti Paulus nanga den mati fu en na ini Efeise? (b) Fu san wi o taki na ini a kapitel disi?

WAN bigi grupu sma e lon na den strati fu Efeise èn den e meki wan lo op’opo nanga b’bari. Wan grupu ogr’ati sma kon makandra èn a sani disi kan tron wan bigi dyugudyugu! Sma e grabu den tu mati fu na apostel Paulus di ben teki waka makandra nanga en èn den e srepi den gwe. A bradi strati di abi gadri pe wenkri de, e kon leigi es’esi te a grupu sma di de nanga atibron èn di e kon moro bigi, e lon go na ini a bigi stadion fu a foto. A stadion disi ben kan teki sowan 25.000 sma. Moro furu fu den sma no sabi srefi san tyari a dyugudyugu kon, ma den yere taki sma wani du wan ogri sani nanga a tempel fu den èn nanga Artemis, na umagado di den lobi so te. Sobun, den e bigin bari bun tranga: „Artemis fu den Efeisesma na wan bigi gado!”​—Tori 19:34.

² Dyaso wi e si baka fa Satan e pruberi fu gebroiki bigi grupu sma fu du ogr’ati sani di musu meki taki a bun nyunsu fu Gado Kownukondre no man preiki na ala sei. Ma a no na ogr’ati sani disi nomo Satan wani du. A e pruberi tra sani tu fu gens a preikiwroko. Na ini a kapitel disi wi o taki fu wan tu fu den sani di Satan du di a pruberi fu tapu a wroko fu den fosi Kresten. Wi o taki tu fa a pruberi fu tyari pratifasi kon na den mindri. Ma a moro prenspari sani di wi o si na taki nowan fu den sani di a pruberi fu du ben waka bun, fu di ’a wortu fu Yehovah ben panya na ala sei èn a ben abi moro krakti’ (Tori 19:20). Fu san ede den Kresten fu a ten dati ben abi bun bakapisi? Na fu den srefi sani di e meki taki wi na ini a ten disi abi bun bakapisi. A no de fu taki dati na Yehovah e meki taki disi e psa. Ma neleki fa a ben de nanga den fosi Kresten, na so wi srefi musu du wan sani fosi. Na a yeye fu Yehovah e yepi wi fu kon abi den fasi di de fanowdu fu abi bun bakapisi na ini a preikiwroko. Kon meki wi go luku na eksempre fu Apolos.

A „ben sabi Gado Buku heri bun” (Tori fu den apostel 18:24-28)

3, 4. Sortu sani Akwila nanga Preskela kon si taki Apolos no ben sabi èn san den du?

³ Di Paulus ben de na pasi fu go na Efeise na a ten di a teki a di fu dri preikiwaka fu en leki zendeling, dan wan Dyu di nen Apolos doro na ini a foto. A man disi ben de fu a pôpi foto Aleksandria na ini Egepte. Apolos ben abi wan tu moi fasi. A ben de wan bun takiman èn a „ben sabi Gado Buku heri bun”. Boiti dati, ’a santa yeye ben meki taki a ben e preiki fayafaya’. Apolos ben de sondro frede èn a ben abi a dek’ati fu taki nanga den Dyu na ini a snoga.​—Tori 18:24, 25.

⁴ Akwila nanga Preskela ben yere fa Apolos ben e taki. A no de fu taki dati den ben e prisiri fu yere fa a ben e leri sma finfini ’fu den sani di abi fu du nanga Yesus’. San a taki fu Yesus ben tru. Ma te fu kba a Kresten trowpaar disi kon si taki wan prenspari sani ben de di Apolos no ben sabi. A „ben sabi soso fu a dopu fu Yohanes”. Akwila nanga Preskela ben abi sakafasi èn a wroko fu den ben de fu meki tenti. Tòg den no ben meki a kfalek fasi fa Apolos ben e taki noso a skoroleri di a ben kisi tapu skreki gi den. Na presi fu dati „den tyari en go na den oso èn den ferteri en moro fini fu a pasi fu Gado” (Tori 18:25, 26). San a bun takiman disi di ben kisi bun leri, du? A de krin taki den sani di Apolos du baka dati e sori taki a ben abi wan fu den moro prenspari fasi di wan Kresten musu abi. Dati na sakafasi.

5, 6. San meki taki Yehovah ben man gebroiki Apolos bun? San wi kan leri fu na eksempre fu Apolos?

⁵ Fu di Apolos teki a yepi fu Akwila nanga Preskela, meki a tron wan futuboi fu Yehovah di ben abi furu bun bakapisi na ini a preikiwroko. A teki waka go na Akaya pe a „du furu fu yepi” den bribiman drape èn a ben man preiki na wan bun fasi gi den Dyu na ini a kontren dati. Den Dyu disi ben e hori nomo taki Yesus no ben de a Mesias di Gado pramisi. Lukas e taki: „A ben de fayafaya di a sori den Dyu krinkrin na fesi ala sma taki den leri fu den no bun. A ben e gebroiki Gado Buku fu sori den taki Yesus na a Krestes” (Tori 18:27, 28). Apolos ben kon de wan bigi blesi gi den gemeente! Fu taki en leti, neleki fa a ben de nanga a preikiwroko fu Paulus, na so a preikiwroko fu Apolos ben meki tu taki „a wortu fu Yehovah” ben e panya na ala sei. San wi kan leri fu na eksempre fu Apolos?

⁶ A prenspari srefsrefi taki ala Kresten abi sakafasi. Ibriwan fu wi abi spesrutu sani di wi man du bun. Kande wi man du wan sani bun fu di wi gebore nanga a koni dati, noso fu di wi abi furu ondrofeni. A kan de so tu taki wi kisi leri fu man du wan spesrutu sani bun. Ma awansi san wi man du bun, sma musu man si krin taki wi abi sakafasi. Noso den sani di wi man du bun o kon de wan problema gi wi. Iya, den kan meki srefi taki wi kon kisi bigifasi (1 Kor. 4:7; Yak. 4:6). Te wi abi trutru sakafasi, dan wi o si trawan moro hei leki wisrefi (Fil. 2:3). Wi ati no o bron te trawan e sori wi taki wi musu du wan sani na wan tra fasi èn wi o arki te trawan wani leri wi wan sani. Te wi kon si taki a fasi fa wi e ferstan sani no e kruderi nanga wan nyun leri di na organisâsi tyari kon na krin nanga yepi fu a santa yeye, dan wi no o abi bigimemre èn tan hori na wi eigi denki. Solanga wi abi sakafasi, Yehovah nanga en Manpkin o man gebroiki wi bun.​—Luk. 1:51, 52.

7. Fa wi kan waka na baka Paulus nanga Apolos di ben abi sakafasi?

⁷ Sakafasi o yepi wi fu no strei nanga makandra. Wi kan ferstan taki Satan ben de nomonomo fu tyari pratifasi kon na mindri den Kresten fu a fosi yarihondro. A ben o breiti kfalek efu Apolos nanga Paulus, di ben de tu fayafaya anbegiman fu Gado, tron feanti fu makandra, kande fu di den ben o bigin dyarusu na tapu makandra noso fu di den ben o strei fu de a moro prenspari sma na ini den gemeente. Den ben kan du dati makelek. Son Kresten na ini Korente ben bigin taki kba: „Mi na fu Paulus.” Ma trawan ben e taki: „Mi na fu Apolos.” Paulus nanga Apolos ben horbaka gi a denki dati di ben kan tyari pratifasi kon? Kwetkweti! Paulus ben abi sakafasi èn a ben agri taki Apolos ben de wan man di ben e wroko tranga. Dati meki a gi en moro grani na ini a gemeente. Apolos fu en sei du san Paulus taigi en (1 Kor. 1:10-12; 3:6, 9; Tit. 3:12, 13). Disi na trutru wan moi eksempre di musu yepi wi na ini a ten disi fu abi sakafasi èn fu wroko nanga makandra.

„A ben e sori den krin taki a Kownukondre fu Gado na wan trutru sani” (Tori fu den apostel 18:23; 19:1-10)

8. Sortu pasi Paulus teki di a drai go baka na Efeise èn fu san ede a du dati?

⁸ Paulus ben pramisi taki a ben o drai go baka na Efeise èn na dati a du tu (Tori 18:20, 21).a Ma luku fa a drai go baka. A lasti leisi di wi ben taki fu en, a ben de na Antiokia na ini Siria. Fu man doro Efeise, a ben kan teki a syatu pasi go na Selesia. Drape a ben kan teki wan sipi èn go langalanga na Efeise. Ma a no du dati. Na presi fu dati a „waka psa na ini a bergikontren”. Soleki fa son sma taki, dan a waka disi fu Paulus di skrifi na ini Tori fu den apostel 18:23 nanga 19:1, teki sowan 1600 kilometer. Fu san ede Paulus teki so wan muilek pasi? Fu di a ben wani „gi den disipel dek’ati” (Tori 18:23). Neleki fa a ben de nanga den fosi tu waka di a ben teki leki zendeling, na so a di fu dri waka disi ben o aksi furu fu en. Ma Paulus ben sabi taki a ben de wan warti sani fu du. Kring-owruman nanga den wefi fu den na ini a ten disi abi a srefi denki. Wi breiti taki den e du ala san den man fu yepi trawan fu di den abi lobi, a no so?

9. Fu san ede wan grupu disipel ben musu teki dopu baka èn san wi kan leri fu den?

⁹ Di Paulus doro na Efeise, a feni wan grupu drape fu sowan 12 sma di ben de disipel fu Yohanes a Dopuman. Den sma disi ben teki dopu leki disipel fu Yohanes, ma a dopu dati no ben e teri moro. Boiti dati, yu ben kan taki dati den no ben sabi noti fu a santa yeye. Paulus tyari sani kon na krin gi den èn neleki Apolos, den ben abi sakafasi èn den ben de klarklari fu teki leri. Baka di den teki dopu na ini a nen fu Yesus, den kisi santa yeye èn den ben man du wan tu wondru. Sobun, disi e sori taki te wi e wroko makandra nanga Yehovah en organisâsi di e tan go na fesi dei fu dei, dan dati e tyari furu blesi kon.​—Tori 19:1-7.

10. Fu san ede Paulus kmoto na a snoga fu go gi leri na wan skoro? San wi kan leri fu disi te wi de na ini a preikiwroko?

¹⁰ Syatu baka dati ete wan sani psa di ben o sori fa sma kan go na fesi. Dri mun langa Paulus preiki na ini a snoga sondro frede. Aladi a „ben e sori den krin taki a Kownukondre fu Gado na wan trutru sani”, tòg sonwan fu den ben tranga-ede èn den bigin gens en hebi. Na presi taki Paulus lasi en ten nanga sma di ben e taki „ogri fu A Pasi fu Masra”, a seti sani fu go na wan skoro fu taki drape nanga den sma (Tori 19:8, 9). Den wan di ben wani wroko skinskin nanga na organisâsi fu Yehovah di e go na fesi, no ben musu tan na a snoga, ma den ben musu go na a skoro. Neleki fa a ben psa nanga Paulus, na so a e psa son leisi tu taki wi e tapu a takimakandra te wi e si taki na ososma no wani arki noso te a wani hartaki nanga wi nomo. Furu sakafasi sma de ete di musu arki a boskopu fu wi di e gi sma dek’ati.

11, 12. (a) Fa Paulus sori taki a ben de wan sma di ben wroko tranga èn di ben man fiti ensrefi na trawan? (b) Fa Yehovah Kotoigi pruberi fu wroko tranga tu èn fu fiti densrefi na sma di den e miti te den e preiki?

¹¹ A kan taki Paulus ben e taki nanga sma na a skoro ibri dei fu erfu yuru m’manten te go miti fo yuru bakadina (Tori 19:9). Kande den yuru dati ben de den moro tiri èn waran yuru fu a dei, te furu sma ben e tapu nanga wroko fu nyan èn rostu pkinso. Wi kan ferstan taki efu Paulus ben hori a hebi schema dati tu yari langa, dan na sowan 3000 yuru a ben o gi leri. Dati na sowan 125 yuru ibri mun.b Disi na ete wan tra sani di ben e meki taki a wortu fu Yehovah ben e panya na ala sei èn taki a ben abi krakti moro nanga moro. Paulus ben wroko tranga èn a ben man fiti ensrefi na sma. A seti sani na so wan fasi taki a ben man yepi den sma fu a kontren dati te a ben o preiki gi den. San ben de a bakapisi? „Ala den sma di ben e tan na ini a distrikt Asia, Dyu nanga Grikisma, kon yere a wortu fu Masra” (Tori 19:10). A no de fu taki dati Paulus ben preiki a wortu finfini.

¹² Yehovah Kotoigi na ini a ten disi e wroko tranga tu èn den e fiti densrefi na trawan. Wi e pruberi fu miti ala sma, awansi pe den de èn awansi o ten wi man feni den. Wi e preiki na strati, na w’woyo èn na presi pe sma e poti den wagi fu den. Kande wi e bel sma noso wi e skrifi brifi gi den. Te wi e preiki oso fu oso, dan wi e du muiti fu miti sma na a yuru di wi denki taki moro furu fu den de na oso.

A Wortu fu Yehovah ben e „panya na ala sei èn a ben abi moro krakti”, awinsi ogri yeye ben e gens a wroko (Tori fu den apostel 19:11-22)

13, 14. (a) San Paulus ben man du fu di Yehovah ben gi en a krakti? (b) Sortu fowtu den manpkin fu Skeifa meki èn fa furu kerkisma na ini a ten disi e meki a srefi sortu fowtu?

¹³ Lukas e ferteri wi taki a no pkin sani Paulus du di Yehovah gi en a krakti fu „du aparti sortu wondru”. Srefi den krosi nanga den feskoki di Paulus ben weri, sma ben tyari go gi siki sma èn den ben kon betre baka. Na a srefi fasi disi den ben e puru ogri yeye na sma tapu tu (Tori 19:11, 12).c A tumsi aparti fasi disi fa Yehovah ben e wini Satan, ben hari a prakseri fu furu sma. Ma a no ala sma ben lobi a tori disi.

¹⁴ Wan tu „Dyu di ben waka e puru ogri yeye na sma tapu” ben e pruberi fu du densrefi wondru di Paulus ben e du. Sonwan fu den Dyu disi ben pruberi fu yagi ogri yeye puru na sma tapu na ini nen fu Yesus nanga Paulus. Lukas e taki fu eksempre taki den seibi manpkin fu Skeifa di ben de fu wan priester-famiri, ben pruberi fu du disi. Na ogri yeye taigi den: „Mi sabi Yesus èn mi sabi Paulus. Ma suma na unu?” Dan a man di ben abi na ogri yeye na en tapu fon den bedrigiman disi èn a dyompo na den tapu neleki wan ogri meti. A gi den mankeri èn den lowe gwe nanga sososkin (Tori 19:13-16). Disi ben de wan moi fasi fa „a wortu fu Yehovah” ben wini a strei krinkrin, fu di a ben sori taki a krakti di Gado ben gi Paulus ben tranga moro a krakti fu den falsi kerkiman disi. Milyunmilyun sma na ini a ten disi denki taki te den e kari a nen fu Yesus, noso te den e kari densrefi „Kresten”, dan dati sari kba. Ma dati no de so kwetkweti. Soleki fa Yesus ben sori, dan na soso den wan di e du a wani fu en Papa abi a tru howpu taki den o kisi libi na ini a ten di e kon.​—Mat. 7:21-23.

15. Te wi e taki fu afkodrei nanga sani di abi fu du nanga dati, dan fa wi kan teki na eksempre fu den Efeisesma?

¹⁵ A syen di den manpkin fu Skeifa kisi meki taki furu sma ben kon abi bigi lespeki gi Gado. Dati meki furu fu den tron bribiman èn den no du afkodrei moro. Den sma fu Efeise ben de hebi bonuman èn dati ben abi furu krakti na tapu a fasi fa den ben e libi. Sma ben gwenti wisi trawan èn den ben e gebroiki tapu. Den ben e taki mofo tu, ma nofo tron den ben skrifi den sani di den ben taki na tapu papira. Ma now furu Efeisesma ben de klarklari fu tyari den buku fu den di ben e taki fu bonu, kon na dorosei èn den bron den na fesi ala sma, aladi den buku disi ben warti dusundusun Amerkan dala te sma ben o teri nanga a moni fu a ten disi.d Lukas e ferteri: „Na so a wortu fu Yehovah panya na ala sei èn a ben abi moro krakti” (Tori 19:17-20). Noiti falsi anbegi nanga afkodrei kan tapu pasi gi a tru anbegi! Den krin-ati sma dati na wan bun eksempre gi wi na ini a ten disi. Wi e libi tu na ini wan grontapu pe sma e du furu afkodrei. Efu wi kon si taki wi abi wan sani di abi fu du nanga afkodrei, dan wi musu du neleki den sma fu Efeise. Trowe en gwe wantewante! Meki wi tan fara fu den sortu tegu sani disi, awansi omeni moni wi o lasi kande.

„Sma ben meki wan bigi dyugudyugu” (Tori fu den apostel 19:23-41)

16, 17. (a) Ferteri san Demetriyus du fu bigin wan dyugudyugu na ini Efeise. (b) Fa den Efeisesma sori taki den ben feni nomonomo taki a gado fu den na a moro bunwan?

¹⁶ Now wi o taki fu a sani di Satan du fu kori den sma. Lukas ben taki fu en di a skrifi taki „sma ben meki wan bigi dyugudyugu fu A Pasi fu Masra”. Di Lukas skrifi a sani dati, dan a no meki sani sori moro ogri leki san den ben de (Tori 19:23).e Wan solfrusmeti di nen Demetriyus bigin a dyugudyugu. Demetriyus bigin hari a prakseri fu den tra solfrusmeti di a sori den taki den ben meki furu moni nanga a seri di den ben e seri popkigado. Baka dati a taigi den taki a boskopu di Paulus ben e preiki no ben bun gi a bisnis fu den fu di Kresten no e anbegi popkigado. Ne a warskow den Efeisesma taki ogri ben kan miti na umagado Artemis nanga a pôpi tempel fu den, fu di wan ten ben o kon taki sma ben o si en „leki noti” (Tori 19:24-27). A ben taki den sani disi fu di a ben sabi taki den Efeisesma ben de fayafaya gi a kulturu fu den èn den ben si en leki wan bigi sani fu de wan borgu fu Efeise.

¹⁷ Sani waka soleki fa Demetriyus ben wani. Den solfrusmeti bigin bari taki: „Artemis fu den Efeisesma na wan bigi gado!” Ne a heri foto bruya. A bakapisi ben de taki wan grupu ogr’ati sma bigin meki dyugudyugu soleki fa wi ben taki kba na a bigin fu a kapitel disi.f Paulus no ben e prakseri ensrefi nomo èn a ben wani go na a stadion fu taki nanga den sma. Ma den disipel begi en fu no go fu di ogri ben kan miti en. Wan man di nen Aleksander go tnapu na fesi den sma fu taki nanga den. Fu di a ben de wan Dyu, meki a ben angri kande fu tyari kon na krin gi den san na a difrenti na mindri Dyu nanga Kresten. Ma den sma no ben wani arki den sani di Aleksander ben wani taigi den. Di den kon ferstan taki a ben de wan Dyu, den bari taki: „Artemis fu den Efeisesma na wan bigi gado!” Den bari so tranga taki a no ben man taki noti moro. Te nanga a dei fu tide, sma de di feni nomonomo taki a bribi fu den na a moro bunwan. A sani disi e meki taki sma no wani arki a boskopu kwetkweti!​—Tori 19:28-34.

18, 19. (a) Fa a komsarsi fu a foto kowru a dyugudyugu di den ogr’ati sma meki na ini Efeise? (b) Fa tiriman kibri a pipel fu Yehovah son leisi èn san wi srefi kan du fu meki taki den wani du dati?

¹⁸ Te fu kba a komsarsi fu a foto kowru a dyugudyugu. A ben de wan koniman di ben de nanga krin ferstan. A taigi a grupu ogr’ati sma taki den no ben abi fu frede taki den Kresten o du wan sani nanga na umagado èn nanga a tempel fu den. A taigi den taki Paulus nanga den mati fu en no du nowan ogri nanga a tempel fu Artemis. A taigi den sma tu taki den ben kan go na krutu fu lusu den sortu afersi disi. Kande a sani di meki den sma skreki moro srefi, na di a memre den taki den Romesma ben kan strafu den fu di den no ben abi a reti fu bondru kon na wán na a fasi disi fu meki dyugudyugu. Ne a seni ala den sma gwe. Na atibron fu den di ben opo kon es’esi, saka wantewante di a komsarsi taigi den krin san ben o psa nanga den efu den no arki.​—Tori 19:35-41.

¹⁹ Disi a no a fosi leisi taki wan heihei tiriman nanga krin ferstan, du sani fu kibri den bakaman fu Yesus èn a no o de a lasti leisi tu. Fu taki en leti, na apostel Yohanes ben si na ini wan fisyun taki na ini den lasti dei grontapu ben o swari wan bigi frudu. A frudu e prenki a ferfolgu di Satan ben o tyari kon na tapu den bakaman fu Yesus. A grontapu disi e prenki den heihei tiriman (Openb. 12:15, 16). A sani disi e psa trutru. Nofo tron na ini krutu-afersi, krutuman nanga krin ferstan kibri a reti di Yehovah Kotoigi abi fu kon makandra fu anbegi Gado èn fu preiki a bun nyunsu gi tra sma. A no de fu taki dati a fasi fa wi e tyari wisrefi meki tu taki wi wini den krutu-afersi disi. Soleki fa a sori, dan a fasi fa Paulus ben tyari ensrefi meki taki son tiriman na ini Efeise ben lespeki en èn den ben e si en leki wan mati fu den. Fu dati ede den no ben wani taki ogri miti en (Tori 19:31). Meki a de so tu taki wi abi wan krin ati èn taki wi e tyari wisrefi na wan lespeki fasi fu di dati kan naki na ati fu den sma di wi e miti. Wi no sabi sortu bun bakapisi dati kan abi.

20. (a) San yu feni fu a fasi fa a wortu fu Yehovah panya na ala sei na ini a fosi yarihondro èn na ini a ten disi? (b) San yu o du now fu meki taki a wortu fu Yehovah panya na ala sei tu na ini a ten disi?

²⁰ A no moi fu si fa ’a wortu fu Yehovah tan panya na ala sei èn fa a ben tan abi moro krakti’ na ini a fosi yarihondro? A moi fu si tu fa Yehovah meki taki a srefi sani e psa na ini a ten disi. Yu ben o wani abi a grani fu yepi nanga a wroko di wi e du fu meki a wortu fu Gado panya na ala sei, awansi yu man du pkinso nomo? Efu dati de so, dan leri wan sani fu den eksempre di wi luku. Tan abi sakafasi. Tan wroko skinskin nanga Yehovah organisâsi di e tan go na fesi. Wroko tranga èn wai pasi gi afkodrei. Boiti dati, yu musu du ala san yu man fu gi sma wan bun kotoigi fu di yu tan abi wan krin ati èn fu di yu e tyari yusrefi na wan lespeki fasi.

1-3. (a) Ferteri san psa a neti di Etikus dede. (b) San Paulus e du èn san a tori disi e leri wi fu en?

PAULUS de na ini wan sodrokamra na ini Trowas èn a kamra furu nanga sma. A e taki wan heri pisi ten nanga den brada fu di disi na a lasti neti di a de nanga den. A de mindrineti now. Den leti furu lampu na ini a kamra. Fu dati ede a kamra e kon moro waran èn kande dati e meki taki a e tapu nanga smoko. Wan yonguman di nen Etikus e sdon na wan fu den fensre. Te Paulus e taki, Etikus e fadon na sribi èn a e fadon fu a di fu dri sodro go na gron!

² Lukas na wan datra èn kande en na wan fu den fosi sma di e lon go na dorosei fu go luku san psa nanga a yonguman disi. A de krin fu si san psa. Di den go na Etikus, „den si taki a dede” (Tori 20:9). Ma now wan wondru o psa. Paulus e go d’don na tapu a yonguman èn a e taigi den sma drape: „No bari moro, bika a de na libi.” Paulus meki taki Etikus kon na libi baka!​—Tori 20:10.

³ A tori disi e sori o bigi a krakti fu a santa yeye fu Gado de. Sma no ben kan taki dati na Paulus meki taki Etikus dede. Tòg a no ben wani meki a dede fu a yonguman pori a prenspari okasi disi èn a no ben wani tu taki sma naki futu. Di Paulus meki Etikus kon na libi baka, dan dati trowstu a gemeente èn den kisi krakti baka fu go doro nanga a preikiwroko. A de krin taki Paulus ben e si a libi fu trawan leki wan tumsi warti sani. A e meki wi prakseri den wortu disi fu en: „Mi no abi nowan brudu-paiman” (Tori 20:26). Kon meki wi go luku fa na eksempre fu Paulus kan leri wi wan sani na ini a tori disi.

„A teki waka go na Masedonia” (Tori fu den apostel 20:1, 2)

4. Sortu hebi tesi miti Paulus?

⁴ Soleki fa wi si na ini kapitel 20, dan Paulus psa wan bun hebi tesi. A preikiwroko fu en na Efeise ben tyari wan lo dyugudyugu kon. Iya, na den solfrusmeti, di ben meki moni nanga na anbegi di sma ben e anbegi na umagado Artemis, ben meki taki a dyugudyugu disi kon. Tori fu den apostel 20:1 e taki: „Baka a dyugudyugu, Paulus seni kari den disipel. Baka di a gi den dek’ati èn a taki den odi, a teki waka go na Masedonia.”

5, 6. (a) O langa Paulus tan na Masedonia kande èn san a du gi den brada drape? (b) Fa Paulus ben e denki fu den Kresten brada nanga sisa fu en?

⁵ Di Paulus ben de na pasi fu go na Masedonia, a tan na a lanpe fu Trowas wan pisi ten. Paulus ben e howpu taki Titus, di a ben seni go na Korente, ben o kon miti en drape (2 Kor. 2:12, 13). Ma di a kon si taki Titus no ben o kon, a go doro na Masedonia èn kande a tan drape wan afu yari „fu gi den disipel drape furu dek’ati” (Tori 20:2).a Te fu kba Titus kon miti Paulus na Masedonia èn a ferteri en a bun nyunsu taki den Korentesma ben breiti di den kisi a fosi brifi di Paulus skrifi gi den (2 Kor. 7:5-7). A sani disi meki taki Paulus skrifi wan tra brifi gi den, di wi sabi now leki 2 Korentesma.

⁶ A moi fu si taki te Lukas e taki fu a ten di Paulus ben go luku den brada na Efeise nanga Masedonia, a e gebroiki a wortu „dek’ati”. A wortu disi e sori krin fa Paulus ben e denki fu den Kresten brada nanga sisa fu en. Paulus no ben de leki den Fariseiman di ben e wiswasi trawan, ma a ben e si den tra bribiman leki sma di ben e wroko makandra nanga Gado tu (Yoh. 7:47-49; 1 Kor. 3:9). Paulus ben tan denki so fu den Kresten brada nanga sisa fu en, srefi te a ben musu gi den pir’ai.​—2 Kor. 2:4.

7. Fa Kresten owruman na ini a ten disi kan teki na eksempre fu Paulus?

⁷ Gemeente owruman na ini a ten disi nanga kring-owruman e pruberi fu teki na eksempre fu Paulus. Srefi te den e gi brada nanga sisa pir’ai, den abi na prakseri fu gi dek’ati na den wan di abi yepi fanowdu. Owruman e meki furu muiti fu ferstan fa trawan e firi èn fu gi den dek’ati, na presi fu krutu den. Wan kring-owruman di abi ondrofeni e taki disi: „Furu brada nanga sisa wani du san bun, ma nofo tron den abi ala sortu sani di e gi den brok’ede. Boiti dati, sani de di e frede den èn den e firi taki den no man du noti fu yepi densrefi.” Owruman kan gi den Kresten brada nanga sisa fu den furu dek’ati.​—Hebr. 12:12, 13.

Den Dyu „ben meki mofo fu kiri en” (Tori fu den apostel 20:3, 4)

8, 9. (a) San meki taki Paulus no teki boto go na Siria moro? (b) Fu san ede den Dyu ben e si Paulus leki wan feanti?

⁸ Di Paulus kmoto na Masedonia, a go na Korente.b Baka di a tan drape dri mun, a ben angri fu go na Kenkreya pe a ben abi a prakseri fu teki boto go na Siria. Fu Siria a ben o man go na Yerusalem fu gi den pôti brada drape den sani di den gemeente ben seni kon gi den (Tori 24:17; Rom. 15:25, 26).c Ma wan sani psa di meki taki sani no waka soleki fa Paulus ben wani. Tori fu den apostel 20:3 e taki: „Den Dyu ben meki mofo fu kiri en”!

⁹ A no musu ferwondru wi taki den Dyu ben e si Paulus leki wan feanti. Gi den a ben de wan sma di ben fadon kmoto na a Dyu bribi. Wan pisi ten na fesi a preikiwroko fu Paulus ben meki taki Krespus, di ben de wan prenspari man na ini a snoga fu Korente, drai en libi èn a tron wan Kresten (Tori 18:7, 8; 1 Kor. 1:14). Wan tra leisi baka den Dyu na ini Korente ben tyari Paulus go na Galio, a granman fu Akaya, fu di den ben feni taki a ben du wan tu sani di no fiti. Ma Galio no ben wani krutu Paulus fu di a feni taki a no du noti. A besroiti fu Galio meki taki den feanti fu Paulus kisi bigi atibron (Tori 18:12-17). Kande den Dyu na ini Korente ben sabi noso ben denki taki Paulus ben o teki boto na Kenkreya di ben de na ini a birti drape. Dati meki den seti luru gi en drape. San Paulus ben o du now?

10. Na frede Paulus ben frede di a no go na Kenkreya moro? Tyari disi kon na krin.

¹⁰ Paulus no ben wani meki ogri miti en èn a no ben wani lasi a moni di den brada ben gi en fu hori. Dati meki a besroiti fu no go na Kenkreya, ma fu drai go baka na Masedonia. A tru taki te a ben o waka go na Masedonia, dan ogri ben kan miti en tu. Nofo tron a ben de so taki na ini a ten dati fufurman ben de na seipasi fu seti luru gi sma di ben e teki waka. Srefi na ini den pkin hotel pe sma ben kan yuru kamra fu sribi te neti, ogri ben kan miti den. Ma tòg Paulus besroiti fu waka den pasi dati, na presi fu teki boto go na Kenkreya pe sma ben seti luru fu kiri en. Ma a bun taki a ben de nanga tra sma. Den sma di ben o de nanga Paulus te a ben o teki a waka fu en disi leki zendeling, ben de Aristarkus, Gayus, Sekundus, Sopater, Tikikus, Timoteyus nanga Trofimus.​—Tori 20:3, 4.

11. San Kresten na ini a ten disi e du fu sorgu taki ogri no miti den? Sortu eksempre Yesus gi wi na ini a tori disi?

¹¹ Neleki Paulus, Kresten na ini a ten disi e du san den man fu sorgu taki ogri no miti den te den e du a preikiwroko. Na ini son kontren den e wroko na ini grupu noso tu na tu, na presi taki wán sma e wroko en w’wan. San den e du te sma e ferfolgu den? Kresten sabi taki den no man wai pasi gi ferfolgu ala ten (Yoh 15:20; 2 Tim. 3:12). Ma den no o poti densrefi fu espresi na ini wan situwâsi pe ogri kan miti den. Luku na eksempre fu Yesus. Wan leisi di gensman na Yerusalem teki ston fu fringi go na tapu Yesus, a „go kibri èn a komoto na ini a tempel” (Yoh. 8:59). Bakaten di den Dyu seti sani fu kiri Yesus, a „no ben go moro na den presi pe den Dyu ben man feni en. Na presi fu dati a gwe fu drape èn a go na ini a birti fu a sabana” (Yoh. 11:54). Yesus ben du san a ben man fu no meki sma du ogri nanga en. Ma disi ben musu kruderi nanga den sani di Gado ben abi na prakseri gi en. Kresten na ini a ten disi e du a srefi.​—Mat. 10:16.

Den kisi „bun furu trowstu” (Tori fu den apostel 20:5-12)

12, 13. (a) Fa a gemeente ben e firi di Etikus kon na libi baka? (b) Sortu Bijbel howpu e trowstu den wan di lasi wan lobiwan na ini dede na ini a ten disi?

¹² Paulus nanga den mati fu en psa na ini Masedonia èn soleki fa a sori, dan bakaten den teki den eigi pasi. Kande a grupu miti baka na ini Trowas.d A tori e taki: „Baka feifi dei wi miti den na ini Trowas” (Tori 20:6).e Na drape Paulus ben meki a yonguman Etikus kon na libi baka, soleki fa wi ben taki na a bigin fu a kapitel disi. Prakseri fa den brada firi di den si taki den mati Etikus kon na libi baka! Soleki fa a tori e taki, dan „den kisi bun furu trowstu”.​—Tori 20:12.

¹³ Wi sabi taki den sortu wondru dati no e psa moro na ini a ten disi. Tòg a de so taki den sma di lasi wan lobiwan na ini dede e „kisi bun furu trowstu”, fu di Bijbel e gi den a howpu taki wan opobaka o de (Yoh. 5:28, 29). Prakseri a tori disi: Fu di Etikus ben de wan sondu sma ete, meki a dede baka te fu kba (Rom. 6:23). Ma den wan di o kisi wan opobaka na ini a nyun grontapu fu Gado, abi a howpu fu libi fu têgo! Boiti dati, den sma di e kisi wan opobaka fu tiri makandra nanga Yesus na ini hemel, e kisi wan skin di no man dede noiti (1 Kor. 15:51-53). Fu dati ede Kresten na ini a ten disi sabi heri bun taki den kan „kisi bun furu trowstu”, awansi den na salfuwan noso „tra skapu”.​—Yoh. 10:16.

Gi leri „na presi pe furu sma de èn oso fu oso” (Tori fu den apostel 20:13-24)

14. San Paulus taigi den owruman fu Efeise di a miti den na Mileite?

¹⁴ Paulus nanga a grupu fu en teki waka fu Trowas go na Asus. Baka dati den go na Mitileine, Kios, Samos nanga Mileite. Paulus ben wani doro Yerusalem biten fu kan de drape gi a Pinksterfesa. Fu dati ede wi kan ferstan fu san ede a teki wan boto di ben o psa Efeise di a ben e drai go baka na Yerusalem. Ma fu di Paulus ben wani taki nanga den brada fu Efeise, meki a aksi den fu miti en na Mileite (Tori 20:13-17). Di den miti nanga Paulus, a taigi den: „Unu sabi heri bun fa mi tyari misrefi na un mindri sensi a fosi dei di mi poti futu na ini a distrikt Asia. Mi ben e dini Masra leki wan srafu nanga ala sakafasi èn nanga watra-ai. Fu di den Dyu meki mofo fu kiri mi, meki mi kisi furu tesi. Tòg dati no tapu mi fu ferteri unu ala sani di o tyari wini gi unu èn fu gi unu leri. Mi du dati na presi pe furu sma de èn oso fu oso. Mi ferteri den Dyu nanga Grikisma finfini taki den musu abi berow, den musu teki Gado sei èn bribi na ini wi Masra Yesus.”​—Tori 20:18-21.

15. Sortu bun bakapisi wi e kisi te wi e preiki oso fu oso?

¹⁵ Na ini a ten disi furu fasi de fa wi kan preiki a bun nyunsu gi sma. Neleki Paulus, wi e pruberi fu miti sma, awansi dati de na den presi pe den e wakti bus, na den strati pe furu sma e waka noso na w’woyo. Ma tòg a moro prenspari fasi fa Yehovah Kotoigi e preiki a bun nyunsu gi sma, na te den e go oso fu oso. Fu san ede? Wán sani na taki te den e preiki oso fu oso, dan ala sma e kisi wan bun okasi fu yere a Kownukondre boskopu ala ten baka èn dati e sori taki Gado no lobi a wán sma moro a trawan. A fasi disi e meki tu taki krin-ati sma kan kisi a yepi di den abi fanowdu. Boiti dati, te den Kotoigi e preiki oso fu oso, dan dati e tranga a bribi fu den èn a e yepi den fu hordoro. Iya, wan prenspari sani di e meki sma sabi suma na den tru Kresten, na fu di den e preiki fayafaya „na presi pe furu sma de èn oso fu oso”.

16, 17. Fa Paulus sori taki a ben de sondro frede? Fa Kresten na ini a ten disi e teki na eksempre fu en?

¹⁶ Paulus e sori den owruman fu Efeise taki a no ben sabi sortu ogri ben o miti en te a ben o drai go baka na Yerusalem. A e taki: „Ma mi no e si mi libi leki wan prenspari sani. A wan-enkri sani di prenspari gi mi, na fu lon a streilon te na a kba èn fu klari a wroko di Masra Yesus gi mi fu du. A wroko dati na fu preiki finfini fu a bun nyunsu taki Gado e sori sma bun-ati” (Tori 20:24). Fu di Paulus ben de sondro frede, meki a no ben meki nowan sani tapu en fu du a wroko di a ben kisi fu du, awansi dati ben o de wan takru gosontu noso taki sma ben wani du en ogri nomonomo.

¹⁷ Kresten na ini a ten disi e hordoro tu, awansi den e kisi fu du nanga difrenti problema. Sonwan fu den e libi na ini kondre pe lanti tapu a wroko fu den èn pe den e suku du ogri nanga den nomonomo. Nanga furu dek’ati, son Kresten e feti nanga siki di e meki taki a skin fu den e go nanga baka dei fu dei noso di e meki taki den no abi prisiri moro na ini a libi. Na skoro, Kresten yonguwan e kisi fu du nanga speri di wani dwengi den fu du san den wani. Awansi sortu sani e miti den Kotoigi fu Yehovah, den e hordoro neleki Paulus. Noti e tapu den fu „preiki finfini fu a bun nyunsu”.

„Poti prakseri na unsrefi èn na ala den skapu” (Tori fu den apostel 20:25-38)

18. Fa Paulus sorgu taki a no ben abi nowan brudu-paiman èn fa den owruman fu Efeise ben kan du a srefi sani?

¹⁸ Now Paulus e gi den owruman fu Efeise krin rai èn a e taigi den taki en srefi ben de wan eksempre gi den. A fosi sani di a taigi den, na taki kande disi ben o de a lasti leisi taki den ben o si en. Ne a taki: „Mi no abi nowan brudu-paiman, bika mi no hori noti na baka. Iya, mi ferteri unu ala sani di Gado wani libisma fu du.” Fa den owruman fu Efeise ben kan teki na eksempre fu Paulus, so taki densrefi no abi brudu-paiman? A taigi den: „Poti prakseri na unsrefi èn na ala den skapu, bika santa yeye poti unu leki skapuman fu teki fesi na ini a gemeente fu Gado di a bai nanga a brudu fu en eigi Manpkin” (Tori 20:26-28). Paulus warskow den taki „ogri busdagu” ben o kon na mindri den skapu èn taki den ben o „taki sani di no tru, fu hari den disipel kon na den baka”. San den owruman ben musu du? Paulus taki: „Tan na ai èn hori na prakseri taki dri yari langa mi tan sori ibriwan fu unu fa fu tyari unsrefi.”​—Tori 20:29-31.

19. San psa na a kba fu a fosi yarihondro di sma fadon kmoto na bribi èn san ben de a bakapisi na ini den yarihondro baka dati?

¹⁹ Den „ogri busdagu” disi kon na ini a gemeente na a kba fu a fosi yarihondro. Na a ten fu a yari 98, na apostel Yohanes skrifi: „Furu feanti fu Krestes de . . . Fosi, den sma disi ben de nanga wi, ma den gwe libi wi fu di den no ben de leki wi, bika efu den ben de leki wi, dan den ben o tan nanga wi” (1 Yoh. 2:18, 19). Na ini a di fu dri yarihondro someni sma fadon kmoto na bribi, taki wan grupu fu kerki fesiman fu den Kresten kerki kon de. Na ini a di fu fo yarihondro Grankownu Konstantijn gi primisi taki sma ben kan teki a falsi „Kresten bribi” disi. Den kerki fesiman teki den gwenti abra fu sma di ben e anbegi falsi gado èn na so den meki a gersi leki den gwenti disi kmoto na a Kresten bribi. Iya, den ben e „taki sani di no tru”. Te nanga a dei fu tide, den leri nanga den gwenti fu den Kresten kerki e sori wi san ben de a bakapisi di sma fadon kmoto na a tru bribi.

20, 21. Fa Paulus ben e sori taki a ben e yepi trawan sondro fu suku wini gi ensrefi? Fa Kresten owruman na ini a ten disi kan teki na eksempre fu en?

²⁰ A fasi fa Paulus ben e libi, ben de heri tra fasi leki a libi fu den wan di ben o kon bakaten fu meki moni na tapu na ipi. A ben e wroko fu man sorgu ensrefi, so taki a no ben o de wan hebi gi a gemeente. A muiti di a ben e meki fu yepi tra bribiman no ben de fu kisi wini gi ensrefi. Paulus ben taigi den owruman fu Efeise fu yepi trawan sondro fu suku wini gi densrefi. A taki: „Yepi den swakiwan. Tan prakseri den wortu di Masra Yesus srefi ben taki: ’Wan sma o de moro koloku te a e gi sani, leki te a e kisi sani.’”​—Tori 20:35.

²¹ Neleki Paulus, na so Kresten owruman na ini a ten disi e yepi trawan sondro fu suku wini gi densrefi. Den no e du leki den fesiman fu den Kresten kerki di e puru moni na a anu fu den kerkisma. Na presi fu dati, den wan di abi a frantwortu leki skapuman fu „teki fesi na ini a gemeente fu Gado”, e du a wroko fu den sondro fu prakseri densrefi. Na ini a gemeente presi no de gi sma di abi heimemre noso di wani kisi biginen, fu di den wan di „e suku den eigi glori”, o fadon te fu kba (Odo 25:27). Te wan sma abi heimemre, dan dati o tyari syen kon gi en.​—Odo 11:2.

22. San meki taki den owruman fu Efeise ben lobi Paulus so?

²² Den brada ben lobi Paulus, fu di a ben lobi den trutru. Iya, di a yuru doro fu a gwe libi den, „den alamala bari krei, den brasa Paulus èn den bosi en” (Tori 20:37, 38). Kresten abi furu warderi nanga lobi gi den wan di neleki Paulus e gi den ten nanga den krakti fu yepi na ipi sondro fu suku wini gi densrefi. Now di wi luku a moi eksempre disi fu Paulus, yu musu fu agri taki a no ben e dyaf noso ben e meki sani gersi moro bigi di a taki: „Mi no abi nowan brudu-paiman.”​—Tori 20:26.

1-4. Fu san ede Paulus e go na Yerusalem èn san o miti en drape?

ALA sma e sari te Paulus nanga Lukas e gwe libi Mileite. A hebi gi den fu gwe libi den owruman fu Efeise di den kon lobi srefsrefi. Den tu zendeling e tnapu na ini a boto. A bagasi fu den lai nanga sani di den abi fanowdu gi a waka fu den. Den abi a moni tu di den brada tyari kon na wán gi den Kresten na ini Yudea di abi yepi fanowdu. Den wani du ala san den man fu tyari a moni disi gi den brada dati.

² Wan switi winti e wai safri èn a e furu den seiri fu a boto. Safsafri a boto e lusu kmoto na a lanpe pe furu b’bari de. Den tu man, makandra nanga den seibi trawan di o teki a waka tu, e luku a sari fesi fu den brada di e tnapu na syoro (Tori 20:4, 14, 15). Den wan di e gwe e wai anu gi den mati fu den teleki den no man si den moro.

³ Sowan dri yari langa Paulus wroko skinskin nanga den owruman fu Efeise. Ma now a e go na Yerusalem fu di a santa yeye taigi en fu du dati. A sabi pkinso san o miti en. A ben taigi den owruman kba: „Mi musu go na Yerusalem, fu di a santa yeye taigi mi fu du dati. Ma mi no sabi san o psa nanga mi drape. Ibri leisi te mi e go na wan tra foto a santa yeye e tan sori mi taki sma o poti mi na straf’oso èn mi o kisi tesi” (Tori 20:22, 23). Aladi ogri kan miti Paulus, tòg a e go fu di ’a santa yeye taigi en taki a musu go’. A sabi taki a abi fu go èn a de klarklari tu fu go na Yerusalem soleki fa a yeye taigi en. A lobi en libi, ma a moro prenspari sani gi en na fu gi yesi na Gado.

⁴ Na so yu e denki tu? Te wi e gi wisrefi abra na Yehovah, dan wi e pramisi en nanga wi heri ati taki a wani fu en o de a moro prenspari sani na ini wi libi. Wi kan kisi wini te wi e luku na eksempre fu na apostel Paulus di ben du ala ten san Gado wani.

Den e psa „na èilanti Siprus” (Tori fu den apostel 21:1-3)

5. Sortu pasi Paulus nanga den mati fu en e teki fu go na Tirus?

⁵ A boto di Paulus nanga den mati fu en teki tyari den „go langalanga” na a presi pe den musu go. Sobun, a winti ben wai kon fu bakasei èn na so a tyari a boto. Fu dati ede den botoman no ben abi fu koti fu a kruktu-anusei go na a ret’anusei fu no meki a winti naki a boto. Na so den waka teleki den doro Kos a srefi dei dati (Tori 21:1). Soleki fa a sori, dan a neti dati a boto tan na a lanpe drape. Ma a dei na en baka, den teki a boto go na Rodos nanga Patara. Na Patara, di de na a zuidsei syoro fu Pkin Asia, den brada e teki wan bigi sipi di e tyari lai èn a sipi dati e tyari den go langalanga na Tirus na ini Fenisia. Te den de na pasi, den e psa „na èilanti Siprus . . . na a kruktu-anusei” (Tori 21:3). Fu san ede Lukas, a skrifiman fu Tori fu den apostel, e ferteri taki den psa Siprus?

6. (a) Fu san ede a kan de so taki Paulus kisi dek’ati di a si Siprus? (b) Te yu e prakseri a fasi fa Yehovah blesi yu èn yepi yu, dan san yu kan taki?

⁶ A kan taki Paulus sori go na a èilanti èn taki a ferteri den mati fu en san miti en drape. Sowan neigi yari na fesi, di Paulus teki a fosi preikiwaka fu en leki zendeling, dan en, Barnabas nanga Yohanes Markus miti a towfruman Elimas di ben gens a preikiwroko fu den (Tori 13:4-12). Di Paulus si na èilanti èn a denki den sani di psa drape, dan a kan taki dati gi en dek’ati nanga krakti fu man psa den sani di ben o miti en. Wi kan kisi wini tu te wi e denki fa Gado blesi unu èn fa a yepi wi fu psa tesi. Te wi e du dati, dan wi kan firi neleki David di ben skrifi: „A sma di e du san reti abi furu problema, ma Yehovah e lusu den alamala gi en.”​—Ps. 34:19.

’Wi feni den disipel’ (Tori fu den apostel 21:4-9)

7. San Paulus nanga den mati fu en du di den doro Tirus?

⁷ Paulus ben ferstan o prenspari a de fu abi Kresten mati èn a ben lobi fu de makandra nanga sma di ben abi a srefi bribi neleki en. Lukas skrifi san den du di den doro Tirus. A taki: ’Wi go suku den disipel èn wi feni den’ (Tori 21:4). Den brada disi di ben e teki a waka ben sabi taki tra Kresten brada nanga sisa ben de na Tirus. Dati meki den go suku den èn a kan taki den tan nanga den. Wan fu den bigi blesi di wi e kisi te wi kon sabi a tru anbegi, na taki awansi pe wi e go, wi kan feni sma di abi a srefi bribi leki wi èn di o gi wi wan switikon. Den sma di lobi Gado èn di abi a tru anbegi abi mati na heri grontapu.

8. Fa wi musu ferstan Tori fu den apostel 21:4?

⁸ Te Lukas e ferteri fu den seibi dei di den tan na Tirus, dan a e skrifi wan sani di kan bruya wan sma efu a e luku en frafra. A taki: „Fu di a santa yeye sori den [brada na ini Tirus] wan tu sani, meki den taigi Paulus omeni leisi fu no poti futu na ini Yerusalem” (Tori 21:4). Yehovah ben kenki en prakseri? A ben sori Paulus now taki a no musu go na Yerusalem? Nôno. A yeye ben sori Paulus taki sma ben o du en ogri na Yerusalem, ma a no taigi en fu no go drape. Soleki fa a sori, dan nanga yepi fu a santa yeye den brada na Tirus ben kon ferstan taki sani ben o miti Paulus na Yerusalem. Sobun, fu di den ben e broko den ede nanga Paulus, meki den begi en fu no go na a foto dati. Wi kan ferstan taki den no ben wani meki ogri miti Paulus. Ma tòg Paulus ben abi a fasti besroiti fu du a wani fu Yehovah èn a hari go doro na Yerusalem.​—Tori 21:12.

9, 10. (a) Di Paulus yere den sani di den brada fu Tirus taigi en fu di den ben broko den ede nanga en, dan sortu sani a prakseri kande? (b) Sortu denki furu sma na ini a ten disi abi èn fa dati de heri tra fasi leki san Yesus taki?

⁹ Di Paulus yere den sani di den brada taigi en fu di den ben broko den ede nanga en, dan a kan taki a memre san ben miti Yesus tu. Baka di Yesus taigi den disipel fu en taki a ben musu go na Yerusalem, taki a ben o nyan furu pina èn taki sma ben o kiri en, dan Petrus di ben meki den firi fu en basi en, taigi en: „Masra, du yusrefi wan bun. A sani disi no o miti yu kwetikweti.” Dan Yesus piki en: „Komoto na mi tapu, Satan! Yu wani taki mi musu fadon, bika yu no e denki leki fa Gado e denki, ma yu e denki leki fa libisma e denki” (Mat. 16:21-23). Yesus ben sabi taki efu a ben wani du san Gado wani, dan a no ben musu denki ensrefi nomo. Fu dati ede a no ben o meki noti tapu en fu du a wani fu Gado. Na so Paulus ben e denki tu. A musu fu de so taki neleki na apostel Petrus, den brada na Tirus ben abi a bun fu Paulus na prakseri. Ma den no ben ferstan san ben de a wani fu Gado na ini a tori disi.

¹⁰ Furu sma na ini a ten disi lobi fu du san moro makelek gi den, awansi dati a no a moro bun sani fu du. Nofo tron sma e suku wan kerki pe den e firi bun èn pe den no abi fu hori densrefi na furu wet. Ma Yesus ben gi wi a dek’ati fu si sani na wan heri tra fasi. A taigi den disipel fu en: „Efu wan sma wani kon na mi baka, dan a no musu teri ensrefi moro, ma a musu teki en pinapostu èn a musu tan waka na mi baka” (Mat. 16:24). A de wan koni sani fu waka na baka Yesus èn dati na a moro bun sani fu du tu. Ma a no makelek.

11. Fa den disipel na Tirus sori taki den ben lobi Paulus èn taki den ben horbaka gi en?

¹¹ Heri esi a ten ben doro taki Paulus, Lukas nanga den trawan di ben de nanga den, ben musu gwe libi Tirus. A musu fu naki yu ati, te yu e leisi san psa di den taki adyosi. A e sori krin fa den brada fu Tirus ben lobi Paulus èn fa den ben horbaka gi en te a ben e du a preikiwroko fu en. Te den e gwe, dan mansma, umasma nanga pkin-nengre e tyari Paulus nanga den mati fu en go na a sesyoro. Ne a heri grupu saka kindi begi Gado, dan den taigi makandra adyosi. Baka dati, Paulus, Lukas nanga den wan di e teki a waka nanga en teki wan tra boto, dan den go na Petolemayis. Drape den miti den brada èn den tan nanga den wan heri dei.​—Tori 21:5-7.

12, 13. (a) Fa Filipus de wan moi eksempre fu wan sma di tan dini Yehovah furu yari langa? (b) Na sortu fasi Filipus de wan bun eksempre gi Kresten p’pa na ini a ten disi?

¹² Baka dati Lukas e ferteri taki Paulus nanga den wan di ben de nanga en, go na Sesareya. Di den doro drape, den „go na a oso fu a preikiman Filipus” (Tori 21:8).a Den ben musu fu breiti fu si Filipus. Sowan 20 yari na fesi di a ben de na Yerusalem, den apostel ben poti en fu yepi prati n’nyan na ini a nyun Kresten gemeente. Filipus ben de wan fayafaya preikiman langa ten kba. Memre taki di sma ben e ferfolgu den disipel, dan den panya go na ala sei. Na a ten dati Filipus go na Samaria èn a bigin preiki drape. Bakaten a preiki gi wan heihei man fu Etiopia èn a dopu en (Tori 6:2-6; 8:4-13, 26-38). Disi na trutru wan moi eksempre fu wan sma di tan dini Yehovah furu yari langa.

¹³ Filipus no ben lasi a faya di a ben abi gi a preikiwroko. Now di a ben e libi na Sesareya, a ben e du a preikiwroko fayafaya ete, soleki fa Lukas e sori te a e kari en „a preikiman”. Wi e kon si tu taki now a ben abi fo umapkin di ben e taki profeititori èn disi e sori taki den ben teki na eksempre fu den p’pa (Tori 21:9).b Sobun, a ben musu fu de so taki Filipus wroko tranga fu meki taki na osofamiri fu en kon lobi Yehovah. A bun te Kresten p’pa na ini a ten disi e teki na eksempre fu Filipus, fu di den e teki fesi na ini a preikiwroko èn e yepi den pkin fu den fu kon lobi a wroko disi.

14. San ben de a bakapisi te Paulus ben go luku den Kresten brada nanga sisa fu en èn fa wan srefi sortu sani e psa na ini a ten disi?

¹⁴ Ala presi pe Paulus ben go a ben suku den Kresten brada nanga sisa fu en èn a tan nanga den wan pisi ten. Wi kan de seiker taki den brada pe a ben e go, ben de klarklari fu sori switifasi gi a zendeling disi nanga den mati fu en èn fu teki den na ini den oso. A musu de so taki a sani disi meki taki den ben „gi makandra deki-ati” (Rom. 1:11, 12). Wan srefi sortu sani e psa tu na ini a ten disi. Efu yu e gi wan kring-owruman nanga en wefi wan kari fu kon na yu oso, awansi o pkin na oso fu yu de, dan yu o kisi furu blesi.​—Rom. 12:13.

„Mi de klarklari . . . fu dede” (Tori fu den apostel 21:10-14)

15, 16. Sortu boskopu Agabus ben abi? Fa den sma di yere a boskopu ben firi baka dati?

¹⁵ Te Paulus de na Filipus oso, dan Agabus, wan tra lespeki man, e doro drape. Den sma di kon makandra na Filipus oso, sabi taki Agabus na wan profeiti. Na en ben taki na fesi taki wan bigi angriten ben o de na a ten di Klaudiyus ben o tiri (Tori 11:27, 28). Kande den ben aksi densrefi: ’Fu san ede Agabus kon dyaso? Sortu boskopu a abi?’ Den e luku bun san a o du èn den e si taki a e teki a berebanti fu Paulus. Dati na wan langa pisi krosi di sma ben gwenti weri na den bere èn pe den ben kan poti moni nanga tra sani na ini. Ne Agabus tai en eigi futu nanga anu nanga a berebanti. Dan a e bigin taki. A ben abi wan seryusu boskopu: „Disi na san a santa yeye taki: ’Na so den Dyu na ini Yerusalem o tai a man di abi a banti disi èn den o gi en abra na den trakondre sma.’”​—Tori 21:11.

¹⁶ A profeititori e sori taki Paulus ben o go na Yerusalem. A e sori tu taki te a ben o preiki gi den Dyu, dan a bakapisi ben o de taki den ben o gi en abra „na den trakondre sma”. A profeititori ben naki na ati fu den sma di ben de drape. Lukas e skrifi: „Di wi yere a sani disi, dan wi nanga den sma di ben de drape bigin begi Paulus fu no go na Yerusalem. Ne Paulus piki wi: ’Fu san ede unu e krei èn fu san ede unu e pruberi fu meki mi las’ati? Un musu sabi taki mi de klarklari fu koti strafu èn fu dede tu na Yerusalem gi a nen fu Masra Yesus.’”​—Tori 21:12, 13.

17, 18. Fa Paulus sori taki a ben abi a fasti besroiti fu go na Yerusalem èn san den brada du?

¹⁷ Prakseri fa a ben de. Den brada, sosrefi Lukas, e begi Paulus fu no go na Yerusalem. Sonwan fu den e krei srefi. A e naki Paulus ati taki den e broko den ede so furu nanga en. Dati meki a e taigi den na wan switifasi taki den e meki a „las’ati”, noso taki den e „broko en ati”, soleki fa son Bijbel e vertaal a Griki wortu. Tòg a abi a fasti besroiti fu go. Sobun, te den brada e begi en fu no gwe èn te den e krei watra-ai, dan a no e meki dati tapu en, neleki fa a ben du di a miti den brada na ini Tirus. Na presi fu dati a e taigi den fu san ede a musu go doro. A ben abi dek’ati èn a no ben o meki noti tapu en fu du san a musu du! Neleki fa Yesus ben du kba, na so Paulus ben de nomonomo fu go na Yerusalem (Hebr. 12:2). Paulus no ben pruberi fu de wan sma di ben musu dede fu en bribi ede, ma efu dati ben o psa, dan a ben o feni en wan grani fu dede leki wan bakaman fu Krestes Yesus.

¹⁸ San den brada du? Wel, den lespeki a besroiti fu Paulus. Bijbel e taki: „Di wi si taki wi no ben man meki Paulus kenki prakseri, wi libi en èn wi taki: ’Meki sani waka soleki fa Yehovah wani’” (Tori 21:14). Den wan di ben e pruberi fu tapu Paulus fu no go na Yerusalem, no ben hori nomo na san den ben wani. Den arki Paulus èn den lespeki a besroiti fu en. Iya, den ben ferstan san na a wani fu Yehovah èn den ben horbaka gi dati tu, awansi a no ben makelek gi den. Paulus ben bigin wan waka di ben o meki taki sma kiri en te fu kba. A ben o de moro makelek gi en efu den sma di ben lobi en no ben pruberi fu tapu en fu go na Yerusalem.

19. Sortu prenspari tori wi e leri fu den sani di miti Paulus?

¹⁹ Wi e leri wan prenspari tori fu a sani di miti Paulus. Noiti wi no musu pruberi fu tapu den wan di de klarklari fu gwe libi ala san den abi fu du a wroko fu Gado. Wi no musu denki so nomo na ini muilek situwâsi pe sma kan lasi den libi, ma someni tra okasi de tu pe wi kan sori taki wi abi a denki disi. Fu eksempre, aladi furu Kresten p’pa nanga m’ma feni en muilek te den pkin fu den e gwe libi oso fu go dini Yehovah na wan fara kondre, tòg den no wani du noti fu meki den las’ati. Phyllis, wan sisa di e libi na ini Ingrisikondre, e memre fa a ben firi di en wan-enkri umapkin go dini leki zendeling na Afrika. Phyllis e taki: „A heri pisi ten dati ben hebi gi mi. A ben tranga gi mi taki a ben o de so fara. Mi ben breiti, ma na a tra sei ben sari tu. Furu leisi mi ben begi Yehovah fu a tori disi. Ma na dati mi umapkin ben besroiti èn noiti mi no pruberi fu meki a kenki en prakseri. Te yu luku en bun, dan ala ten mi ben leri en fu poti Kownukondre afersi na a fosi presi! Na ini den 30 yari di psa, a dini leki zendeling na ini tra kondre èn ibri dei mi e taki Yehovah tangi taki a tan dini en.” Na wan moi sani te wi e gi dek’ati na brada nanga sisa di libi ala san den abi fu du a wroko fu Gado.

„Den brada ben breiti fu si wi” (Tori fu den apostel 21:15-17)

20, 21. San e sori taki Paulus ben angri fu de nanga den brada na ini den difrenti foto? Fu san ede a ben wani de nanga sma di abi a srefi bribi leki en?

²⁰ Baka di den sreka ala sani, Paulus go moro fara, makandra nanga den brada di ben e sori taki den ben wani horbaka gi en nanga den heri ati. Na ala presi pe den tan di den ben de na pasi e go na Yerusalem, Paulus nanga den mati fu en suku den Kresten brada nanga sisa fu den fu kan de nanga den. Di den ben de na Tirus, den feni disipel èn den tan nanga den seibi dei langa. Na Petolemayis den go taki den brada nanga sisa fu den odi èn den tan wán dei nanga den. Na Sesareya den tan wan tu dei na a oso fu Filipus. Baka dati wan tu disipel fu Sesareya go makandra nanga Paulus nanga den mati fu en na Yerusalem pe den tan na a oso fu Menason, wan fu den fosi disipel. Lukas e taki dati di den doro na Yerusalem, „den brada ben breiti fu si” den.​—Tori 21:17.

²¹ A de krin taki Paulus ben wani de nanga sma di ben abi a srefi bribi leki en. Na apostel ben e kisi dek’ati fu den brada nanga sisa fu en, neleki fa dati e psa nanga wi na ini a ten disi. A no abi misi taki a dek’ati di Paulus kisi, ben tranga en fu no frede te a ben o kisi fu du nanga den gensman di ati ben bron èn di ben o suku fu kiri en.