PISI 6
Yob e tan du san reti
Satan e taigi Gado taki Yob no o tan du san reti, ma Yob no e drai baka gi Yehovah
A DE SO taki libisma o tan gi yesi na Gado efu den kisi a moro hebi tesi èn efu a gersi leki den no o kon gudu fu dati? Na aksi disi ben opo kon èn a kisi piki tu te wi e luku a tori fu a man di nen Yob.
Di den Israelsma ben de ete na ini Egepte, dan Yob, wan famiriman fu Abraham, ben e libi na ini a kontren di nen Arabia now. Na a ten dati, den engel na hemel ben kon makandra na fesi Gado, èn Satan di opo ensrefi teige Gado ben de na mindri den tu. Na a konmakandra dati na ini hemel, Yehovah taki dati a ben abi a frutrow taki Yob ben o tan gi yesi na en. Fu taki en leti, Yehovah ben taki dati nowan tra libisma de leki Yob, di ben tan du san reti. Ma Satan ben taki dati Yob ben e dini Gado soso fu di Gado ben blesi en èn kibri en. Satan ben taki dati efu Yob ben o lasi ala san a abi, dan a ben o fluku Gado.
Gado ben gi pasi taki Satan meki Yob lasi ala den gudu fu en, èn baka dati en pikin. Te fu kaba Yob ben kon siki tu. Yob no ben sabi taki na Satan ben meki ala den sani disi pasa. Dati meki a no ben man frustan fu san ede Gado ben e gi pasi taki den tesi disi miti en. Ma toku, Yob noiti no drai baka gi Gado.
Dri falsi mati ben kon na Yob. Na ini a buku fu Yob, wi e leisi san den man disi ben taki. Na wan fowtu fasi den pruberi fu overtoigi Yob taki na Gado ben e strafu en gi sondu di a ben du kibrikibri. Den ben taki srefi dati Gado no e prisiri nanga den futuboi fu en èn taki a no e frutrow den. Yob weigri fu bribi den sani dati di no ben tru. Nanga overtoigi Yob taki dati a ben o tan du san reti teleki a dede!
Ma Yob ben broko en ede tumusi fu sori taki a no meki fowtu. Wan moro yongu man di nen Elihu ben arki tu di den man ben e taki, èn now ensrefi opo taki. Elihu piri-ai gi Yob, fu di Yob no ben frustan taki a musu kon na krin dati na Yehovah Gado abi a reti fu tiri. A sani disi moro prenspari leki a sori di wan libisma wani sori taki en na wan bun sma. Elihu ben piri-ai tu gi den falsi mati fu Yob.
Baka dati, Yehovah Gado taki nanga Yob, fu kenki a fasi fa a ben e denki. Yehovah ben sori Yob den kefalek moi sani di a meki. Na so fasi Yehovah sori Yob taki libisma no de noti te yu e teki den gersi nanga Gado. Nanga sakafasi, Yob teki a piri-ai fu Gado. Yehovah, di ’lobi sma trutru èn di abi sari-ati’, meki Yob kon betre baka. Boiti dati, a gi en tu tron so furu gudu, èn a blesi en nanga tin pikin (Yakobus 5:11). Fu di Yob tan du san reti na ini Yehovah ai, aladi a ben kisi hebi tesi, meki a sori na wan moi fasi taki Satan no abi leti di a taki dati libisma no o tan gi yesi na Gado te den e kisi tesi.
—Den tori disi teki puru fu a buku Yob.