Sma ben e kari den „Manpikin fu Dondru”

TE ALEN e kon bun tranga, dan son leisi yu kan yere dondru e bari. Oiti yu ben frede a sani dati?—a We, Yesus e kari tu fu den bakaman fu en „manpikin fu dondru.” Meki wi go luku fu san ede a e du dati.

Den tu bakaman disi fu Yesus na Yakobus nanga Yohanes. Den na brada fu makandra, èn sosrefi manpikin fu Sebedeyus nanga en wefi Salome. A kan taki Salome ben de wan sisa fu Maria, a mama fu Yesus. Sobun, a kan taki Yesus, Yakobus nanga Yohanes na tu sisa pikin, èn a kan de so tu taki den ben de bun mati di den ben e gro kon bigi.

Yakobus nanga Yohanes na fisiman neleki den papa Sebedeyus. Den ben de tu fu den fosi sma di Yesus ben teki leki den bakaman fu en. Te a e gi den wan kari, dan wantewante den e libi a fisiwroko fu den fu tron bakaman fu en. Bakaten, Yesus e teki 12 fu den bakaman fu en fu tron en apostel. Yakobus nanga Yohanes na tu fu den.

Wan tu mun fosi sma kiri Yesus, en nanga den apostel fu en e waka na ini a bergikontren fu Samaria. A e kon lati kaba, èn den alamala weri srefisrefi. Ma den Samariasma e taki dati den no wani taki Yesus nanga den apostel fu en e tan sribi na ini a foto fu den. Yu sabi fu san ede?— Meki wi go luku.

Yesus nanga den apostel fu en na Dyu, èn furu Dyu no e libi bun nanga den Samariasma. A no de fu taki dati Yesus no de so. Ala ten a e sori switifasi gi den, èn na dati Yakobus nanga Yohanes musu du tu. Ma den tu disipel e kisi atibron nanga den Samariasma di no gi den wan switikon, èn den e aksi Yesus: ’Masra, yu wani taki wi meki faya fu hemel saka kon na den tapu fu kiri den?’ San yu denki Yesus e piki den?— A e taigi den taki a no bun kwetikweti fu taki so wan sani! Yakobus nanga Yohanes ben musu leri fu sori sari-ati na wan moro bun fasi.

Wan tra bigi problema di Yakobus nanga Yohanes abi, na taki den e pusu go na fesi fu di den wani de den moro prenspariwan. Syatu bifo Yesus dede, den ben seni den mama fu go taigi en: „Pramisi mi taki den tu manpikin fu mi o sidon na yu sei na ini a Kownukondre fu yu, wan fu den na yu reti-anusei èn a trawan na yu kruktu-anusei.” We, te den tra tin apostel yere san Yakobus nanga Yohanes du, dan den e mandi. Yu ben o mandi tu?—

Iya, kande yu ben o mandi tu. Wi no lobi te tra sma e pusu densrefi go na fesi èn te den wani de den moro prenspariwan. Bakaten, Yakobus nanga Yohanes e kon si taki den no ben tyari densrefi na wan bun fasi èn taki den no ben sori switifasi. Fu dati ede, den e kenki den fasi fu den. Den e tron apostel di abi lobi nanga switifasi. San wi kan leri fu a sani disi?—

Wan sani di wi musu leri fu Yesus, na taki wi musu sori switifasi tu gi makandra. Yesus ben sori switifasi gi sma, iya, gi man, uma, nanga pikin. Yu o du tranga muiti ala ten fu memre na eksempre fu en èn fu du leki en?—