Neutraal kristen ini wan grontapoe di flaka nanga broedoe
„Ibriwan sma di trowe a broedoe foe wan tra sma, en égi broedoe sma sa trowe baka, bika Gado ben meki libisma akroederi en prenki.” — GENESIS 9:6.
1. Sortoe sani di psa na grontapoe foe sensi 1914 e gi brokede?
SE FOE broedoe, na broedoe foe moro leki hondro miljoen sma, ben trowe na ini feti foe sensi 1914. Èn san de a froewakti foe a ten di e kon? Na pori foe toe Japan foto na ini 1945 ben meki wan kaba kon na sowan 200.000 libi èn te foe kaba ben meki a de so dati wan njoen politiek leri ben kon di den super makti ben meki, èn di den e kari na wan fasi di fiti leki „MAD” (Ini Ingrisitongo a wani taki „law” — Mutually Assured Destruction, ofoe wan djaranti pori foe ala toe sé). Disi tron na fundamenti foe wan balansifasi pe frede de, èn di steun tapoe voorraad kernwapen di kan poti wi grontapoe foeroe tron na ini asisi. Ondro-se-boto e waka psa den se nanga didibri fetisani, èn no solanga psa kaba dan na kefar foe na feti na ini loktoe ben meki a kefar kon moro bigi. Srefi na balansifasi foe frede e seki now tapoe en fundamenti. Wan pasi de foe komoto foe na lawfasi disi?
2. San Jezus ben taki a fesi foe den ten disi, ma sortoe djaranti a ben gi kristensma?
2 Ija séker! Ma a no de a pasi foe komoto di den naatsi e teki. Jezus e taki a fesi foe na disiten moeilek situwasi di ben de: „Marki sa de na ini son èn moen èn stari, èn na grontappe frede-skreki foe den naatsi, di foe na babari foe na se èn na sekseki foe en no sabi wan pasi foe komoto, aladi den sma e kon weri foe frede èn froewakti foe den sani di e kon tapoe na grontapoe pe sma e libi; bika den krakti foe hemel sa kon seki.” Jezus ben bosroiti na profétitori disi nanga na djaranti dati kristensma di ’e tan na ai, sa man foe komoto foe ala den sani disi di séker sa psa’. — Lukas 21:25, 26, 36.
Feti baka a vréde nanga Gado
3. (a) Fa den naatsi e dini den belang foe na „gado foe na grontapoe disi”? (b) Fa Jehovah sa koti na kroetoe?
3 Den naatsi, èn spesroetoe den naatsi di abi kernwapen, de na ini wan greep foe stré foe kisi grontapoe makti èn di heri boen ben sa kan tron grontapoe pori. Nanga disi den afersi foe „na gado foe na grontapoe disi” e kon na fesi. Den naatsi „moksi konmakandra leki wan blok tegen Jehovah èn tegen en [Kristus]”, di de now ini hemel tapoe na troon. Te Jehovah e gi na komando, dan Kristus sa broko den naatsi dati leki nanga wan isri tiki. Dan na pramisi sa kon troe: ’na Gado di e gi vréde, heri esi sa masi Satan ondro oen foetoe.’ — 2 Korinte 4:4, Leidse Vertaling; Psalm 2:2, 6-9, Romeini 16:20.
4. Fa wi kan feti na baka vréde nanga Gado? (1 Petrus 3:11)
4 Wi, foe wi sé, moe wani foe feti baka vréde nanga a Gado dati. Fa wi kan doe dati? Wan foe den fasi de dati wi moe wani abi na fasi fa Gado e si sani, ini a tori foe na santafasi foe na libismalibi èn foe na diri libibroedoe di e lon na ini den broedoe tité foe wi.
5. Sortoe eksempre e kon na krin dati Jehovah e teki refensi foe na espresi trowe foe broedoe?
5 Jehovah de na Mekiman foe libisma èn na wondroe broedoe di e tjari njanjan go na ala pisi foe libisma skin sodati wi kan tan a libi. A no ben de noiti na prakseri foe Gado dati foe espresi libismabroedoe ben moe trowe. Baka di Kaïn ben kiri wan sma foe a fosi tron, Jehovah ben ferklari dati a broedoe foe Abel e kari foe teki refensi. Bakaten wan foe den bakapikin foe Kaïn, Lamech, ben tron wan kiriman èn a ben taki na ini wortoe foe poëmaman dati efoe wan sma ben sa kiri en na broedoepaiman di ben sa doe kon foe dati sma ben moe teki refensi foe dati. Te fe kaba wan pori grontapoe ben kon foeroe nanga ogridoe. Jehovah ben meki na bigi Froedoe ben kon foe pori na fosi libisma grontapoe dati. Soso na osofamiri foe Noach di ben lobi vréde èn di en nen ben wani taki „rostoe”, ben tan a libi. — Genesis 4:8-12, 23, 24; 6:13; 7:1.
6. Fa na wet foe Gado de ini a tori foe broedoe èn gi soema disi de wan wet?
6 Moro fara Jehovah e ferteri Noach foe en wani ini a tori foe broedoe. Leki wan hémarki foe en bodoi ai taki: „Ala sma di e trowe a broedoe foe wan tra sma, en égi broedoe sma sa trowe baka, bika den ben meki libisma akroederi a prenki foe Gado” (Genesis 9:3-6). Na heri disiten libismafamiri abi en roetoe na Noach; foe dat’ede meki na wet disi foe Gado di e poti krakti tapoe na respeki foe a libi de wan sani di de gi ala sma di wani abi na boenati foe Gado. Ooktoe na ini na di foe siksi foe den tin komando den e taki: „Joe no moe kiri.” Broedoepaiman e kari foe opo doe wan sani èn foe pai na wan fasi di fiti. — Exodus 20:13; 21:12; Deuteronomium 21:1-9; Hebrewsma 10:30.
7. (a) Foe san-ede a ben de wan sani di fiti dati Jehovah ben gi komando na Israël foe feti? (b) Na ini sortoe feti kristensma de now?
7 Foe san-ede-Jehovah, foe di a trowe foe broedoe de so krin wan sani di no mag, ben gi na naatsi Israël pasi, ija srefi komando, foe feti? Wi moe hori na ini prakseri dati disi ben de wan santa feti nanga jepi foe san Jehovah, na Kroetoeman foe heri grontapoe, ben wai naatsi di ben e anbegi ogri jeje poeroe a pasi. Den Kanaänsma foe eksempre ben de sma di ben libi na ini na Pramisi Kondre di no ben abi reti a tapoe èn ben abi wan hoeroedoe libifasi di ogri jeje ben de basi a tapoe sodati a santa pipel foe Gado ben sa kon na ini kefar. Jehovah ben sorgoe dati na kondre „ben braak” den pori libisma dati foe a kontren foe en èn a ben gebroiki foe disi wan theokratis feti (Leviticus 18:1-30; Deuteronomium 7:1-6, 24). Disi e gi krakti na a jeje feti foe wan kristen na ini a ten disi. — 2 Korinte 10:3-5; Efese 6:11-18.
8. San e sori dati Gado no e feni a trowe foe broedoe foe sma di no doe noti boen?
8 Jehovah no ben feni en boen foe trowe broedoe zomaar. Foe dat’ede den ben skrifi foe wan kownoe foe Judah: „Manasse ben trowe ooktoe foeroe broedoe foe sma di no ben doe noti, te leki a ben foeroe Jeruzalem nanga dati foe na wan oekoe go te na a tra wan.” Aladi bakaten Mannasse ben abi berow èn ben saka ensrefi na fesi foe Jehovah, tokoe na broedoepaiman ben tan fasi na èn en kownoe-oso. Na granpikin foe Mannasse di ben e frede Gado, kownoe Josía ben doe positief sani foe krin a kondre èn foe meki a krin anbegi kon baka, ma a no ben kan poeroe na broedoepaiman. Na a ten foe a tiri foe a pikin foe Josía Jehovah ben opo foe doe wan sani foe di a ben meki Nebukadnezar opo kon feti nanga Juda foe tjari na kroetoe kon tapoe na naatsi dati. „A ben de soso tapoe na komando foe Jehovah dati disi ben psa nanga Juda, foe figi en poeroe foe en ai foe na sondoe ede foe Manasse akroederi ala sani san a ben doe; èn ooktoe foe a broedoe ede di a ben trowe foe sma di no ben doe noti, sodati a ben foeroe Jeruzalem nanga broedoe foe sma di no ben doe noti, èn Jehovah no ben wani gi pardon.” — 2 Kownoe 21:16; 24:1; 2 Kronieken 33:10-13.
Na markitiki gi kristensma
9. Sortoe markitiki ini a tori foe a trowe broedoe Jezus ben poti gi kristensma?
9 Wi ben sa froewakti dati Jezus, na sma di opo na kristendom, ini a tori foe na trowe foe broedoe ben sa poti wan markitiki gi kristensma. A ben doe disi? Sjatoe baka di Jezus ben poti na memre foe a dede foe en, a ben loekoe a tapoe, dati en discipel ben abi toe feti-owroe. Nanga sortoe marki? Foe poti krakti tapoe wan prenspari gronprakseri, wan gronprakseri di ala kristensma ben sa moe hori a prakseri. Di na afdeling sroedati ben kon foe kisi Jezus na ini Gethsémané, dan na fagafaga Petrus ben gebroiki wan feti-owroe èn koti na letisé jesi foe Malchus, wan srafoe foe na hépriester. A no ben de wan toemsi boen sani foe stré na sowan fasi gi na Manpikin foe Gado? Jezus no ben prakseri so foe a tori. A ben dresi na jesi foe na srafoe èn a ben memre Petrus dati en hemel Tata ben man foe seni twarfoe legioen engel foe jepi Jezus. Jezus ben tjari na fundamenti gronprakseri kon dja a fesi: „Ala sma di e graboe na feti-owroe, sa dede nanga na feti-owroe.” — Mattéus 26:51-53; Lukas 22:36, 38, 49-51; Johannes 18:10, 11.
10. (a) Sortoe prenspari gronprakseri e leri na ini Johannes 17:14, 16 èn 18:36? (b) Sortoe waka nanga libi ben tjari ferloesoe kon gi kristensma na ini na fosi jarhondro?
10 Kristensma di ben libi na ini a fosi jarhondro, ben sa tjari bakaten na faja begi foe Jezus kon ini prakseri pe a ben taki foe en discipel: „Den no de wan pisi foe a grontapoe, net soleki mi no de wan pisi foe na grontapoe.” Den ben sa memre na piki foe Jezus na Pontius Pilatus: „Mi kownoekondre no de wan pisi foe na grontapoe disi. Efoe mi kownoekondre ben de wan pisi foe na grontapoe disi, dan den dinari foe mi ben sa stré sodati mi no ben sa gi abra na den djoe, ma mi kownoekondre no de foe na fonten disi” (Johannes 17:14, 16; 18:36). Na ini a ten dati den djoe politiek partij ben e stré nanga makandra nanga wortoe èn ooktoe ini wan letterlek stré pe broedoe ben fadon. Ma Jezus discipel no ben meki den tjari den kon na ini na revolutionair feti disi. Sowan dritenti jari den ben wakti na ini Jeruzalem, ne na profétimarki di Jezus ben gi ben de foe si, èn den ben opo doe wan sani tapoe dati foe di den ben ’lon go na den bergi’. Na neutraalfasi foe den èn a lon di den lon komoto ben tjari ferloesoe gi den. — Mattéus 24:15, 16.
11, 12. (a) Sortoe bosroiti Cornelius nanga Sergius Paulus ben moe teki di den ben tron bribiman? (b) Foe sortoe sé den ben sa kisi jepi foe kan teki na joisti bosroiti? (c) Sortoe marki disi e gi wi na ini a ten disi?
11 Son sma e aksi kande: ’Fa a de nanga Cornelius, na edeman foe hondro, èn Sergius Paulus, na proconsul foe Cyprus di a legre ben hori baka gi en? Den man disi no ben de wan pisi foe na sroedati aparaat?’ Ija, tapoe a momenti di den ben teki na kristen boskopoe, dati ben de so, ma na bijbel no e ferteri wi san Cornelius bn trawan ben doe baka di den ben teki bribi. Sondro degedege a sa de so dati Sergius Paulus di ben de wan man nanga ferstan èn „di ben froewondroe foe na leri foe Jehovah” ben sa ondrosoekoe heri esi na grontapoe positsi foe en na ini na leti foe na bribi di a ben feni èn teki wan joisti bosroiti. Cornelius ben sa doe disi ooktoe (Tori foe den Apostel 10:1, 2, 44-48; 13:7, 12). Wan tori no de dati den discipel ben taigi den san den moe doe. Den ben kan kon sabi dati foe na égi studie foe den foe na Wortoe foe Gado. — Jesaja 2:2-4; Micha 4:3.
12 Na so kristensma ooktoe na ini a ten disi no kan ferteri trawan persoonlek sortoe sé den moe teki ini afersi di abi foe doe nanga kristen neutraliteit. Ibri sma ini akroederi nanga a ferstan di a ferstan bijbel gronprakseri moe teki en égi bosroiti akroederi en konsensi. — Galacia 6:4, 5.
Ini a ten disi
13. Fa a ben go nanga den Bijbelondrosoekoeman di den ben proeberi na ini na Fosi Grontapoefeti foe tan farawe foe broedoepaiman?
13 Na ini 1914 na totale oorlogvoering ben sori ensrefi a grontapoe. Ala den hulpbron foe den naatsi di ben feti, makandra nanga den heri krakti foe den man foe den, den ben poti go na ini a feti. Foeroe foe den Bijbelondrosoekoeman, soleki den ben kari Jehovah Kotoigi na ini a ten dati, ben doe moeiti di de foe prijse foe tan farawe foe broedoepaiman. Den ben ferfolgoe den na wan bitafasi soleki Jezus ben taki a fesi. — Johannes 15:17-20.
14, 15. (a) Fa Jehovah ben sorgoe ini tiri na ini a ten foe na di foe Toe Grontapoefeti? (b) Sortoe bosroiti di de faste Jehovah Kotoigi teki? (c) Fa disi ben de precies a tra sé foe san grontapoe kerkiman ben doe?
14 Di na ini 1939 agen wan grontapoefeti ben broko kon, dan Jehovah ben sorgoe gi krin tiri gi en dienstknegti. Bifo toe moen baka na feti ben bigin, na tiri disi ben kon na ini na vorm foe bijbelstudiemateriaal na ini na nen „Neutraliteit”, na ini den uitgave foe The Watchtower foe 1 november 1939 (Bakratongo uitgave foe januari 1940). Na artikel ben tapoe nanga na zin: „Ala sma di e tanapoe na a sé foe Masra, sa hori densrefi neutraal na fesi foe den naatsi di e feti èn tanapoe sondro wan prati ati èn sondro wan kondisi na fesi na Bigi Theokraat èn en Kownoe.”
15 San ben de a bakapisi? Leki wan bradafasi di de na a heri grontapoe Jehovah Kotoigi ben hori densrefi konsequent farawe foe trowe a broedoe foe sma di no doe noti, èn ooktoe foe den brada foe den ini tra kondre. Aladi katholiek, anitri, boeddhist nanga tra sma e srakti densrefi, dan troe discipel foe Jezus ben gi jesi na en njoen gebod: ’Net soleki mi ben lobi oenoe, na so oenoe moe lobi makandra.’ — Johannes 13:34.
16. Fa Jehovah Kotoigi ben sorgoe taki den de boen borgoe? (b) Fa den Kotoigi ben tan pai Gado san ben de foe Gado èn disi ben tjari sontron san kon?
16 Den kristen disi ben tan pai Caesar san ben de foe caesar. Leki boen borgroe den ben gi jesi na a wet foe a kondre (Mattéus 22:17-21; Romeini 13:1-7). Ma san ben de moro prenspari, ben de dati den ben pai baka na Gado san ben de foe en, makandra nanga a libi foe den leki kristen di gi densrefi abra èn a kristen anbegi foe den. Di caesar ben aksi dati den sma ben gi en san de foe Gado, den ben handri foe dat’ede ini akroederi nanga den gronprakseri di tanapoe na ini Tori foe den Apostel kapitel 4:19 èn 5:29. Efoe a ben e go now foe a trowe foe broedoe ofoe foe doe dienst leki sma di no teki prati na a stré leki wan sroedati, wroko di ben kon na ini na presi foe sroedatidienst ofoe a taki odi foe wan symbool soleki na fraga foe wan naatsi, getrow kristen ben abi na méne dati wan mindri pasi no ben de. Ini wan toe geval den ben kiri den foe na bosroiti disi ede. — Mattéus 24:9; Openbaring 2:10.
Den no ben skeki densrefi
17. (a) Fa den naatsi ben behandel Jehovah Kotoigi akroederi a boekoe di den kari dja na nen? (b) Fa Jehovah Kotoigi ben kakafoetoe ini a tjalansi trafasi leki tra sma?
17 Na ini wan boekoe di no solanga psa kaba ben kon a doro èn di ben abi leki nen Of Gods and Men tanapoe dati Jehovah Kotoigi na ini na ten foe na di foe Dri Tirimakti foe Hitler ben de na kerki groepoe di „ben ondrofeni den moro takroe sortoe gens”. Jehovah Kotoigi no ben skeki densrefi. Den sma foe Doisrikondre di ben de foe wan tra kerki ben waka na baka den domri nanga prékiman foe den di ben e préki gi sroedati, sodati den ben doe anbegi gi na Doisri-Tirimakti èn ben kisi „na marki” foe na politiek wilde meti „na den reti-anoe ofoe tapoe den fesi-ede foe den” (Openbaring 13:16). Den ben gi na reti-anoe foe hori baka actief gi na Doisri politiek organisaatsi èn den sori krin sortoe sé den ben teki di den ben bari „Heil Hitler!” èn ben gi odi na a hakenkruisfraga.
18. (a) Sortoe tori e meki oen si efoe Jehovah Kotoigi ben de neutraal na ini a tori foe na politiek? (b) Sortoe krakti na historia tori disi moe abi tapoe ibriwan foe wi na ini a ten disi?
18 Sortoe sé troe kristensma ben teki na ini disi? Na ini a boekoe di wi ben kari dja na tapoesé tanapoe: „Soso Jehovah Kotoigi ben kakafoetoe gi na tiri. Den ben kakafoetoe nanga ala san den ben abi èn leki wan bakapisi foe dati afoe foe na nomroe foe den ben poti na ini strafoso èn wan kwart foe den dan ben kiri. . . . Ini kontrari nanga [tra kerki] den no de foe a grontapoe ini a fasi dati den no e soekoe na boenati ofoe den paiman foe na grontapoe èn no e si densrefi leki memre foe en. Den de neutraal nanga politiek foe di den de kaba foe wan tra grontapoe, a grontapoe foe Gado, den no e soekoe wan skeki èn den no e pristeri densrefi ooktoe . . . Dini na ini na legre, stem ofoe tjari wan odi gi Hitler ben sa wani taki dati den ben gi wan moro bigi waarde na den reti di a grontapoe disi e gebroiki leki gi den reti foe Gado.” Dati Jehovah Kotoigi de fesiman foe vréde èn wan libi pe sma no e gebroiki tranga, sma ben erken srefi na ini den koncentratiekampoe. San e sori dati? Foedi „soso Kotoigi ben mag scheer den SS-waktiman nanga kefarlek srapoe srebinefi, foedi den waktiman ben kan abi soso ini den na fertrow dati den no ben sa kiri nowan sma.”
19. Fa Jehovah Kotoigi ben waka na baka na dekati eksenpre foe Jezus, èn nanga sortoe bakapisi?
19 Na ini na di foe Toe Grontapoefeti Jehovah Kotoigi ben de wan toemsi aparti eksempre foe kristen neutraliteit. Ala pe na grontapoe nanga dek’ati den ben waka na baka na eksempre foe Jezus Kristus na wan konsequent fasi foe di „den no ben de wan pisi foe na grontapoe”; netleki Kristus den ben wini na grontapoe disi di lai nanga broedoepaiman. — Johannes 17:16; 16:33; 1 Johannes 5:4.
Feni wan kibripresi na ini a tori foe broedoepaiman
20. (a) Foe san-ede a de tranga fanowdoe foe lon komoto foe falsi fasi foe bribi? (b) Pe wawan ini a ten disi wan sma kan feni wan troetroe kibripresi?
20 Kerki organisaatsi na ini den hondrohondro jari di psa redi den bladzijde foe na historia foe di den ben trowe broedoe foe sma di no ben doe noti na ini kruistochten ten, „santa” feti nanga inquisitie. Den ben sroto ferbontoe nanga dictator di ben angri foe trowe broedoe. Den ben agri te den dictator disi ben sroto Jehovah Kotoigi na ini strafoso noso concentratiekampoe, pe foeroe foe den ben dede. Nanga den fri wani den ben gi jepi na führers (tiriman) di ben kiri Jehovah Kotoigi foe di den soetoe den kiri ofoe ben koti den ede trowe. Den kerki sistema no kan lon komoto foe na regtvaardiki kroetoe foe Jehovah. Wan tra ten no sa poti foe dati. Ooktoe wan sma di lobi regtvaardikifasi no moe poti a lon komoto foe na falsi fasi foe bribi, „Babylon na Bigiwan” di flaka nanga broedoe, na wan tra ten èn foe wakti foe soekoe wan kibripe na ini Gado organisaatsi. — Openbaring 18:2, 4, 21, 24.
21. San den kibrifoto foe na seti foe Gado e agersi?
21 Foeroe foe wi ben trowe kande sma broedoe, bifo wi ben studeri a Wortoe foe Gado of ben de wan pisi foe kerki ofoe politiekorganisaatsi pe broedoepaiman e rostoe a tapoe. Ini na tori disi den kan teki wi gersi nanga na kiriman foe Israël di no ben kiri foe espresi. A ben kan lon go na wan foe den siksi foto di den ben kari spesroetoe na nen pe a ben kan lon go kibri èn pe te foe kaba, na a dede foe na hépriester foe Israël a ben kan fri komoto. Na ini a ten disi disi wani taki foe teki den winimarki foe na actief dienst foe Gado hépriester, Jezus Kristus, èn no komoto na ondro na seti dati. Te wan sma tan drape makandra nanga Gado salfoe pipel, dan a kan tan na libi te na disiten „refensiman foe broedoe”, Kristus Jezus, e tjari Gado kroetoe kon tapoe den sma tapoe soema broedoepaiman e rostoe. Den memre foe na „bigi ipi”, di e lon go now na Gado organisaatsi tan na ini na kibripresi dati te leki Kristus, na ini en wroko foe Hépriester, dede na a fasi dati, taki a tjari en ferioesoewroko kon na wan kaba. — Numeri 35:6-8, 15, 22-25; 1 Korinte 15:22-26; Openbaring 7:9, 14.
22. Te oen loekoe Jesaja 2:4 dan san de na difrenti a mindri den naatsi di de memre foe den VN èn na santa naatsi foe Gado?
22 Tapoe a pren foe VN ini New York joe kan lési den wortoe di e kon now di poeroe foe Jesaja 2:4 (King James Version): „Den sa naki den feti-owroe tron ploegoe. Èn den lansri foe den tron kronnefi: Naatsi no sa opo feti-owroe tegen naatsi. Èn den no sa leri feti moro”. Ma soema e handri na ini a ten disi ini akroederi nanga den wortoe disi? No wan enkri memre foe na sokari Verenigde Naatsi. Soso na „naatsi” na a heri grontapoe di e feti baka vréde èn di de moro leki dri miljoen Kotoigi foe Jehovah, ben sori krin fa foe sori kristen neutraliteit ini wan grontapoe di flaka nanga broedoe.
Aksi foe loekoe san wi ben leri
◻ Fa wi kan feti na baka vréde nanga Gado?
◻ Fa Jehovah e si a trowe foe espresi foe broedoe?
◻ San wi e bedoel nanga kristen neutraliteit?
◻ Sortoe toemsi moi eksempre foe soifri retifasi wi abi?
◻ Fa wi kan feni kibripresi di e tjari ferloesoe kon?
[Faki na tapoe bladzijde 6]
Wan bericht foe bribi, dekati nanga soifri-reti-fasi
A boekoe New Religious Movements: A Perspective for Understanding Society meki moro fara den sani di e kon now bekenti foe a fasi fa Jehovah Kotoigi ben hori tranga na a soifri-reti-fasi foe en kontrari na ferfolgoe foe den naatsi:
„Foe di den ben wégri foe gi densrefi abra, meki Jehovah Kotoigi ben de wan tjalansi gi na totalitair concept foe na njoen maatschappij èn a ben de krin dati na tjalansi disi èn na tranga-ede nanga san disi ben e tan, ben frede den bowman foe na njoen seti. Omoro den Kotoigi ben kisi ferfolgoe, omoro tranga den ben de wan troetroe ideologis tjalansi. Den methode foe ferfolgoe, gi sma pina. poti sma na strafoso èn spotoe den no ben abi leki bakapisi dati den Kotoigi ben drai go teki na sé foe den naatsi èn den sani disi ben wroko leki wan boemerang tapoe na ede foe den disi baka. Den naatsi ben kon na ini broeja na fesi foe na fasi disi di den Kotoigi ben abi di no ben kan si a fesi.”
„Na stré a mindri den toe partij disi, di ben feti foe loyaal erkenning, ben de wan bitawan. èn disi ben de moro so foe di den nazi, di ben tranga moro na skinfasi na ini foeroe fasi no ben de so seker foe densrefi, no ben de so tranga ini den égi overtoigi, no ben de so seker foe a ten foe na Doesoen jari kownoekondre. Den Kotoigi no ben degedege na den égi roetoe bika a bribi foe den ben de foe sensi a ten foe Abel. Ala di den nazi ben moesoe foe kwinsi gens kon na ondro èn overtoigi den sma di ben de na den sé, aladi nofotron den ben gebroiki wortoe nanga eksempre foe na sektarische kristendom, dan den Kotoigi ben de séker foe na totale loyaliteit foe den memre foe den di no ben kan seki, srefi te na dede.”
A sa de troetroe wan kolokoe dé te na wini disi foe na kristen loyaliteit sa doro (Romeini 8:35-39). Dan na ondro na kowoekondretiri foe na „Vrédekownoe”, na glori Jezus Kristus, „na kownoe tirimakti foe vréde sa de psa marki èn wan kaba no sa de na en”. — Jesaja 9:6, 7.
[Faki na tapoe bladzijde 5, 6]
Jongoe man di e kibri den soifri-reti-fasi
A sani di e kon now de wan sani di teki foe wan déboekoe di no so langa psa kaba ben tjari kon a doro foe na anoe foe wan sma ini wan Europeeskondre. A boekoe e sori fa jongoe Kotoigi, nanga dekati, ben kibri den stanfastefasi di den ben moesoe boewijsi dati „den no de wan pisi foe na grontapoe”. — Johannes 17:14.
’12 maart 1945: Wan kroetoe ben de foe na kroetoebangi foe sroedati. Toe jongoe Jehovistsma de den sma di tanapoe na fesi kroetoe. Na kragi: den wégri foe doe dienst leki sroedati (ini akroederi nanga a bribi foe den). Na moro jongoewan di no ben de 20 jari ete ben kisi 15 jari strafoso strafoe. Ma na moro owroe den ben lési strafoe gi en dati a moe dede, èn wantewante den ben tjari en go na a presi pe a ben libi foe den ben kiri en drape na publiki leki wan eksempre di ben moe meki sma skreki. En ben de na di foe tinafoe sma di den kiri dja. Meki a rostoe na ini vréde. Mi ben firi a tori disi srefsrefi. Joe no kan doe na a fasi disi nanga den Jehovistsma. Den no abi wan warskow eksempre foe na jongoe disi ma den ben meki en tron wan sma di dede foe en bribi. A ben de wan gesontoe jongoeman. Mi e sari foe en.
Tidebakadina wi ben kon sabi moro fini foe na kiri foe net jongoeman disi di ben feni presi na fesi foe wan bigi nomroe foe sma tapoe na wowojopren. Wan foe den sroedati di ben de na ini na kordon, ben sjen so kefarlek dati a ben soetoe ensrefi kiri bifo den ben kiri a boi. Disi ben de di wan kolonel ben wani dati a ben go jepi a sma di boo kiri a boi. Ma a no ben de klari foe doe dati. A moro boen a ben tjari wan kaba kon na en égi libi. Na jongoeman srefi ben dede nanga dekati. A no ben taki wan wortoe.’
O kolokoe den sortoe jongoe sma disi sa de na a ten foe na opobaka foe den, dati moro boen den ben ondrofeni na maka foe dede leki foe lasi wan presi ini Jehovah njoen seti foe sani! — Teki gersi nanga Hosea 13:14.