Fa Kresten musu si a sreka di sma e sreka dedeskin?

Di Yakob ben de fu dede, dan leki lasti sani a getrow famiri-edeman disi ben aksi: „Beri mi nanga den fosi tata fu mi na ini a ston-olo ini a gron fu Efron a Hètsma, na ini a ston-olo fu Makpela di de na abrasei fu Mamre ini a kondre Kanan.”—Genesis 49:29-31.

FU MAN du san en papa ben aksi, dan Yosef ben bosroiti fu du wan sani di sma ben gwenti fu du na ini Egepte na a ten dati. A ben gi „den futuboi fu en, den datra”, a komando „fu sreka a dedeskin fu en papa fu a no pori”. Neleki fa a tori fu Genesis 50 e sori, dan den datra teki 40 dei fu sreka a dedeskin, leki fa den ben gwenti fu du dati. Fu di den ben sreka a dedeskin fu Yakob fu a no pori, meki a bigi grupu fu famiriman, nanga heihei-man fu Egepte, ben kan waka den 400 kilometer fu tyari a dedeskin fu Yakob go na Hebron pe den ben o beri en.—Genesis 50:1-14.

Yu denki taki wan dei sa kon di sma sa feni a dedeskin fu Yakob di den ben sreka fu a no pori? A dedeskin disi a no wan sani di sma ben sa feni so makriki. Israel ben de wan kondre di ben lai nanga watra. Dati e meki taki furu difrenti sortu sani de di sma no sa feni moro te den e diki a gron fu suku owruten sani (Exodus 3:8). Furu sani di sma ben meki fu ston nanga isri na ini a ten dati de ete. Ma furu sani soleki krosi, leribuba nanga dedeskin di sma ben sreka fu den no pori, lasi gowe na ini ala den yari di pasa. Den sani disi di e pori heri esi, no man nanga furu watra, son noso tra sani.

Den sma di ben sreka a dedeskin fu Yakob fu a no pori, no ben abi a srefi bribi leki en. Kande den Egeptesma ben gwenti fu begi èn fu du ala sortu seremonia te den ben e sreka den skin fu dedesma. Ma toku wi no e fruwakti taki Yosef ben aksi den datra fu du dati nanga a dedeskin fu en papa. Ala tu man, Yakob nanga Yosef, ben de man di ben abi tranga bribi (Hebrewsma 11:21, 22). Aladi Yehovah no ben gi a komando fu sreka a dedeskin fu Yakob fu a no pori, toku den Buku fu Bijbel no e krutu a sani disi tu. A sreka di sma ben sreka a dedeskin fu Yakob no ben musu de leki wan eksempre gi a folku Israel noso gi a Kresten gemeente. Te yu luku en bun, dan Gado Wortu no e kari nowan sani di e sori san sma musu du ini a tori disi. A Bijbel tori di e taki fu a sreka di den sreka a dedeskin fu Yosef na ini Egepte, na a lasti tori na ini Bijbel di e taki fu a gwenti disi.—Genesis 50:26.