Kon krosibei na Gado
„Mi sabi heri bun fa den e pina”
’YEHOVAH, de santa, santa, santa’ (Yesaya 6:3). Den wortu dati di skrifi nanga yepi fu santa yeye, e sori taki nowan sma de leki Yehovah Gado, fu di a krin èn soifri dorodoro. Kande yu e aksi yusrefi: ’A de so taki Gado no e broko en ede nanga mi fu di a de so santa? So wan santa Gado trutru kan broko en ede nanga wan sondu libisma leki mi?’ Meki wi go luku den wortu di Gado taigi Moses na ini Exodus 3:1-10. Den wortu disi o gi wi deki-ati.
Di Moses ben e luku skapu wan dei, dan a si wan aparti sani. A ben si faya na wan makabusi, ma a makabusi „no ben e bron” (vers 2). Fu di a ben wani sabi fa dati kan, meki a go moro krosibei fu luku. Nanga yepi fu wan engel, Yehovah ben taki nanga Moses fu mindrisei fu a faya: „No kon krosibei. Puru yu susu na yu futu, bika yu e tanapu na tapu santa gron” (vers 5). Denki a tori disi, fu di a makabusi di ben e bron ben e prenki taki Gado di santa ben de drape, meki srefi a gron drape ben kon santa!
A santa Gado ben abi wan reide fu san ede a ben taki nanga Moses. Gado ben taki: „Mi si fa mi pipel e pina na ini Egepte, èn mi yere fa den e bari krei fu di sma e dwengi den fu wroko. Iya, mi sabi heri bun fa den e pina” (vers 7). Gado ben si fa en pipel ben e pina, èn a ben yere den sten di den ben suku yepi na en. Iya, a ben de leki na ensrefi ben pina. Luku taki Gado ben taki: „Mi sabi heri bun fa den e pina.” Wan buku e taki disi fu den wortu „mi sabi heri bun”: „Den wortu disi e sori fa Gado srefi e firi gi sma, èn taki a abi sari-ati.” Den sani di Yehovah taigi Moses e sori taki En na wan Gado di e broko en ede trutru nanga sma.
San Gado ben o du? A no ben sari nomo di a ben si taki en pipel ben e pina, ma a ben du wan sani fu yepi den. A bosroiti fu frulusu en pipel fu Egepte èn fu tyari den go „na wan kondre di lai merki nanga oni” (vers 8). Fu dati ede, Yehovah gi Moses a komando disi: „Tyari mi pipel . . . komoto fu Egepte” (vers 10). Moses gi yesi na a komando dati, èn a tyari den Israelsma komoto fu Egepte na ini a yari 1513 bifo Krestes.
Yehovah no kenki. Den sma di e anbegi en na ini a ten disi, kan abi a dyaranti taki a e si fa den e pina èn a e yere den te den e suku yepi na en. A sabi heri bun fa den e pina. Ma Yehovah no e firi sari nomo gi den futuboi fu en. A lobi-ati Gado disi e yepi den fu di „a e broko en ede” nanga den.—1 Petrus 5:7.
Fu di Gado abi sari-ati, meki wi abi howpu. Fu di Gado e yepi wi, meki wi leki sondu libisma kan pruberi fu de santa èn na so fasi Gado sa feni wi bun (1 Petrus 1:15, 16). Wan Kresten uma di ben pina fu di a ben brokosaka srefisrefi, ben kisi trowstu di a leisi a tori fu Moses na a makabusi. Na uma disi e taki: „Efu Yehovah kan meki srefi a gron kon santa, dan kande pikinso howpu de gi mi. A sani disi yepi mi trutru.”
A sani disi e meki taki yu wani sabi moro fu a santa Gado, Yehovah? Yu kan abi wan bun matifasi nanga Yehovah, fu di a „sabi heri bun fa wi meki; a e hori na prakseri taki wi na doti”.—Psalm 103:14.