3, 4. (a) Foe san-ede wi moe kweki dekati? (b) Fa wi kan doe disi?

³ A pipel foe Gado heri esi now sa hari go na ini Jehovah njoen seti foe sani. Te wi hori den sani di e psa na ini grontapoe na ini prakseri, dan wi moe kweki dekati. Fa wi kan doe disi? Aladi Jozua ben sreka sani foe go na ini na Pramisi Kondre, dan Jehovah e gi en na komando: „Soso de nanga dekati èn de tranga sref’srefi foe handri soifri akroederi heri na wet di mi knegti Mozes ben komanderi joe. No drifi komoto foe dati no na letanoesé no na kroektoeanoesé, sodati alape joe e go joe mag handri nanga koni. Na wetboekoe disi no mag drifi komoto foe joe mofo èn joe moe lési nanga wan safri sten, sodati joe mag handri soifri akroederi ala sani san skrifi na ini; bika dan joe sa meki joe pasi waka boen èn dan joe sa handri koni.” — Jozua 1:7, 8.

⁴ Aha, drape wi abi na kibritori! Lési na bijbel aladé. Na drape na wet foe Gado tanapoe gi wi. Go prakseri dipi foe en. Poti prakseri tapoe ala den fermane di e gi na ini. No meki na grontapoe disi di lobi goedoe nanga hoeroe tjari joe na ondro a krakti foe en go so fara foe drifi komoto foe Gado wet. Ini sortoe situwasi joe mag de ooktoe, handri nanga koni. Tjari na jeje loekoe èn soifri sabi di joe kisi nanga na studie foe joe foe a Wortoe foe Gado kon ini joe libi. Taki nanga tra sma foe en. Te joe e doe disi èn te joe e fertrow tapoe Jehovah, dan foe troe ’joe kan de nanga dekati èn de tranga srefsrefi èn meki joe pasi waka boen’. — Teki gersi Psalm 1:1-3; 93:5; 119:165-168.

5. (a) Fa jongoe bedinari na ini a ten disi kan kisi netleki Jozua krakti? (b) Sortoe toemsi moi marki jongoe Kotoigi kan poti a den fesi ini a ten disi?

⁵ Jozua ben de „na dinari foe Mozes foe en jongoe jari kaba” (Numeri 11:28). A no de foe taki dati na krosbé demakandra disi ben jepi en foe kisi jeje krakti. A net so toe jongoe bedinari na ini a ten disi kan kisi krakti te den e wroko makandra nanga papa nanga mama, pionier, brada nanga sisa di de boen langa kaba Kotoigi foe Jehovah èn tra loyaal dienst-knegti foe Jehovah di e gi densrefi ini a dini foe Gado. Foe abi wan prati nanga den sortoe faja prékiman disi na ini na gi foe kotoigi oso foe oso kan de wan prisiri èn kan meki dati den jongoewan foe wi gro kon lepi èn e kisi na lostoe foe go na fesi na ini na diniwroko (Tori foe den Apostel 20:21; Jesaja 40:28-31). Jongoe Kotoigi no ben sa kan poti wan moro boen marki na den fesi leki na foeroetendienst foe na boen foe Jehovah kownoekondre! — Psalm 35:18; 145:10-12.

6. A sortoe fasi Jozua ben de wan eksempre gi wi ini a tori foe na feti tege Amalek?

⁶ Di Mozes ben seni Jozua go foe feti nanga den Amalekietsma, „dan Jozua ben doe joisti soleki Mozes ben taigi en”. A ben gi jesi èn ben wini foe dat’ede. Ooktoe wi sa abi wan prati ini na regtvaardiki foe Jehovah efoe wi poti prakseri soifri tapoe den feti instructie di wi e kisi nanga jepi foe en organisatie. Jehovah ben taigi Mozes foe skrifi na tori foe a wini foe en tapoe den Amaleksma leki wan memre ini wan boekoe èn foe poti en ini den jesi foe Jozua. A no de foe taki dati Jozua ben meki na barinen foe na wini foe Jehovah kon moro bigi ete foe di a ben taki nanga trawan foe en. A net so toe wi ini a ten disi kan meki den bigi wroko foe na Soeverein Masra Jehovah bekenti èn wi kan ferteri foe en „dé foe refensi” di de foe kon tapoe den ogri sma. — Exodus 17:10, 13, 14; Jesaja 61:1, 2; Psalm 145:1-4.

7, 8. (a) Sortoe fertrow Jozua nanga Kaleb ben tjari kon na fesi di den ben drai kon baka foe Kanaän? (b) Sortoe warskow nanga dekati wi e feni ini a fasi tapoe fa Jehovah ben opo doe ini a ten dati nanga na afersi?

⁷ Di Mozes ben seni twarfoe spion go ini na Pramisi Kondre, dan Jozua ben de wan foe den. Di den ben drai kon baka, dan tin foe den spion ben sori bigi frede gi den Kanaänietsma foe na kondre èn den ben overtoigi na pipel foe meki oproeroe foe drai go baka na Egypte. Ma Jozua nanga Kaleb sondro foe frede ben taki: „Efoe Jehovah ben feni prisiri na ini wi, dan seker a sa tjari wi go na ini a kondre disi èn gi en na oenoe, wan kondre di e lon merki nanga honi. Soso no tranga-ede Jehovah; èn oenoe no frede a pipel foe a kondre, bika den de brede gi wi. Na skotoe foe den wai komoto foe den, èn Jehovah de nanga wi. No frede foe den.” — Numeri 13:1–14:36.

⁸ Ma na komakandra foe Israël ben tan knoroe, sodati Jehovah ben opo doe wan sani èn ben kroetoe den Israëlsma dati di ben frede foe den waka lontoe fotenti jari ini na sabana. Ala den sroedati boiti Kaleb nanga Jozua ben dede sondro foe ben si na Pramisi Kondre. Fa disi de wan warskow gi wi ini a ten disi! Meki wi no knoroe noiti tege den seti foe Jehovah. Meki wi de nanga dekati èn sori taki wi de tranga srefi efoe wi moe wroko ini kontren pe a de moeilek foe gi kotoigi, te wi e go nanga a kownoekondre boskopoe di e gi libi na den oso foe den sma. Meki wi no de noiti leki den disiten sma di fadon komoto na bribi, di moro esi e ferteri lé foe pori den brada ofoe den nen èn e fadon go baka na ini den pasi foe na grontapoe, na agersi Egypte, leki foe teki prati na a publiki kotoigiwroko. — Numeri 14:1-4, 26-30; Lukas 12:45, 46; teki gersi Tori foe den Apostel 5:27-29, 41, 42.

Poti na nen foe Jehovah na fesi!

9. Fa Jozua ben libi ini akroederi nanga san en njoen nen ben wani taki?

⁹ Ini na kari foe den nen foe den twarfoe spion ini bijbel dan na nen foe Jozua de leki Hosea, san wani taki „ferloesoe”. Ma na tori e taki tapoe na presi disi: „Mozes tan kari Hosea, na manpikin foe Nun, Jozua [san wani taki ’Jehovah na ferloesoe’].” Foe san-ede Mozes na a fasi disi poti krakti na tapoe Jehovah nen? Foedi Jozua morofoeroe ben doe wroko foe regtvaardiki a nen dati. Jozua ben de wan libi eksempre foe a gi jesi na a gebod di Mozes bakaten ben sa poti krakti a tapoe meki Israël jere: „Oen moesoe lobi Jehovah, oen Gado nanga heri oen ati nanga heri oen sili nanga heri oen libikrakti.” Foedi a ben doe disi, meki a ben abi na grani foe sori dati Jehovah ’na ferloesoe’. — Numeri 13:8, 16; Deuteronomium 6:5.