MWBR21 07 Verwijzing gi Wi Kresten libi nanga a preikiwroko studie-buku

5-11 YULI

GUDU NA INI GADO WORTU | DEUTERONOMIUM 11-12

„A fasi fa Yehovah wani taki wi musu dini en”

it-2-O 1353 ¶4

Libi (Sili)

Dini Yehovah nanga un heri libi. Soleki fa a sori, dan furu tron a „libi noso sili” wani taki wan sma srefi. Toku son Bijbeltekst e gi wi a deki-ati fu lobi Gado èn fu dini en nanga ’un heri ati èn nanga un heri libi’ (De 4:29; 11:13, 18). Deuteronomium 6:5 e taki: „Un musu lobi Yehovah un Gado nanga un heri ati, nanga un heri libi, èn nanga ala un krakti.” Yesus ben taki dati den wan di e dini Gado ben musu du dati nanga den heri libi nanga ala den krakti èn „nanga den heri frustan” (Mr 12:30; Lu 10:27). Ma efu wi heri libi wani taki ala sani fu wi, dan fu san ede den kari ala den tra sani disi? Yu kan agersi en so: Wan sma kan seri ensrefi (en libi noso sili) leki srafu. Na so a no de basi fu ensrefi moro, ma wan tra sma e tron en basi. Toku a kan de so taki a no e gi ala en krakti te a e wroko gi a sma, noso a kan taki a no e wroko gi en nanga en heri ati. Na so wi kan taki dati a no e wroko nanga en heri frustan fu tyari wini gi a masra fu en. (Luku sosrefi Ef 6:5; Kol 3:22.) Den kari den tra sani disi tu fu yepi wi fu poti prakseri na a fasi fa wi e dini Yehovah. Den e memre wi taki wi na fu Yehovah nanga en manpikin di bai wi nanga yepi fu a lusu-paiman. Sobun fu dini Gado nanga wi „heri libi” wani taki dati wi e gi en wi heri skin, den koni fu wi nanga ala tra sani di wi abi.​—Luku Mt 5:28-30; Lu 21:34-36; Ef 6:6-9; Fp 3:19; Kol 3:23, 24.

it-1-O 98 ¶1

Altari

Yehovah ben taigi den Israelsma fu broko ala den altari fu den trakondre sma èn sosrefi den santa postu nanga den santa pilari fu den (Eks 34:13; De 7:5, 6; 12:1-3). Den no ben musu meki den sani disi èn den no ben musu tyari den pikin leki ofrandi na ini faya, neleki fa den Kanansma ben e du dati (De 12:30, 31; 16:21). Den Israelsma ben musu meki wán altari nomo fu anbegi a wan enkri tru Gado, na a presi pe a ben o sori den (De 12:2-6, 13, 14, 27; na a tra sei den Babilonsma ben abi 180 altari gi a gado Istar wawan). Den ben kisi a komando taki baka te den ben abra a Yordan liba, den ben musu meki wan altari fu ston di no koti nanga isri wrokosani (De 27:4-8). Na Yosua ben meki na altari disi tapu Ebal-bergi (Yos 8:30-32). Baka di den prati a Pramisi Kondre, den lo fu Ruben nanga Gad èn na afu lo fu Manase ben meki wan bun bigi altari na a Yordan-liba. A sani disi meki taki den kisi trobi nanga den tra lo. Na bakaten fosi den tra lo kon frustan taki den no ben meki en fu di den ben drai baka gi Yehovah, ma den ben meki na altari disi fu memre den taki na Yehovah wawan den musu dini.​—Yos 22:10-34.

Diki moro dipi

it-1-O 796

Gerizim, Bergi

Baka di den Israelsma ben wini a foto Ai nanga yepi fu Yosua, den kon makandra na den bergi fu Gerizim nanga Ebal, soleki fa Moses ben taigi den. Drape den leisi gi den sortu blesi den ben o kisi te den tan gi yesi na Yehovah èn san na den fluku di ben o kon na den tapu te den no ben o du dati. Den lo fu Simeon, Leifi, Yuda, Isaskar, Yosef, nanga Benyamin ben tanapu na a sei fu Gerizim-bergi. Den Leifisma ben tan tanapu nanga na ark ini a lagi presi èn den tra siksi lo ben tan tanapu fesi Ebal-bergi (De 11:29, 30; 27:11-13; Yos 8:28-35). A kan taki den lo di ben tanapu fesi Gerizim-bergi ben e piki te den ben e leisi den blesi. Èn a kan taki den tra lo di ben tanapu fesi Ebal-bergi ben e piki te den ben e leisi den fluku. Aladi di Bijbel no e taki noti fu a sani disi, toku sma taki dati den ben e leisi den blesi na a sei fu Gerizim-bergi, fu di a ben moi èn sani ben e gro bun drape. Na a tra sei a moro bigi pisi fu Ebal-bergi ben drei. Den ben e leisi a wet bun tranga èn „heri Israel ben kan yere en, iya, ala den umasma, ala den pikin, nanga ala den trakondre sma di ben de na den mindri yere san a taki” (Yos 8:35). A kan taki ala sma di ben de drape ben man frustan den wortu disi, fu di den ben de na mindri tu bergi.​—Luku EBAL, BERG.

12-18 YULI

GUDU NA INI GADO WORTU | DEUTERONOMIUM 13-15

„A wet ben e sori taki Yehovah e broko en ede nanga den pôtiwan”

it-2-O 1021 ¶5

A di fu tin pisi

Soleki fa a sori dan den Israelsma ben e gi ete wan di fu tin pisi ibri yari. A wan disi no ben de a srefi leki a wan di den ben e gi fu horibaka gi den priester. Furu tron den osofamiri na ini Israel ben e gebroiki a di fu tin pisi disi te den ben e hori den alayari fesa. Efu a ben fara gi wan osofamiri fu tyari a di fu tin pisi disi go na Yerusalem noso efu a ben furu tumusi fu tyari en go drape, dan den ben kan seri en èn den ben kan gebroiki a moni fu bai san den abi fanowdu te den ben de ini Yerusalem fu hori den fesa (De 12:4-7, 11, 17, 18; 14:22-27). Na a kaba fu ala dri nanga siksi yari den no ben musu gebroiki a di fu tin pisi disi gi den fesa. Ma den ben musu poti en na wan sei gi den Leifisma, gi den trakondre sma na den mindri, den uma di no abi masra moro èn gi den pikin di no abi papa.​—De 14:28, 29; 26:12.

it-2-O 767

Sabat yari

Den ben e kari a Sabat-yari „a yari fu frulusu [hash·shemit·tahʹ]” (De 15:9; 31:10). Na ini a yari dati den ben musu meki a gron rostu, den no ben musu prani noti (Eks 23:11). Sma no ben abi fu pai den paiman fu den. A ben de wan ’seti di e gi Yehovah grani.’ Sma e taki difrenti sani fu disi. Son sabiman e taki dati a no de so trutru taki sma no ben abi fu pai den paiman moro. Ma a sma di ben leni en kondreman moni no ben musu dwengi a sma fu pai en, fu di na ini a yari dati den no ben o wroko a gron. Efu a ben de wan trakondre sma dan den ben kan meki a pai (De 15:1-3). Son Dyu sabiman e taki dati efu a ben de wan pôtisma dan a no ben abi fu pai a paiman moro. Ma efu a sma ben meki wan paiman fu di a e du bisnis dan disi ben de wan tra sani. Den e taki dati na ini a fosi yari hondro, Hillel ben seti sani so taki wan sma di ben leni trawan moni ben kan go na wan krutu oso fu ben meki wan papira gi en, so taki a ben kan de seiker taki a ben o kisi en moni baka.​—The Pentateuch and Haftorahs, di J. Hertz skrifi baka, London, 1972, blz. 811, 812.

it-2-O 880 ¶6

Srafu

Wet di ben e taki fu srafu nanga masra. Den Hebrew srafu nanga srafu di ben de trakondre sma no ben abi den srefi reti. Wan srafu di ben de wan trakondre sma ben e tan fu en masra ala ten èn den ben kan gi a srafu disi na den pikin fu en masra (Le 25:44-46). Ma wan Hebrew srafu ben musu kon fri na ini a di fu seibi yari noso na ini a prisiri yari. Den ben musu luku sortu wan fu den yari disi ben e doro fosi. Wan masra ben musu handri nanga wan Hebrew srafu leki na wan wrokoman (Eks 21:2; Le 25:10; De 15:12). Wan Hebrewsma di ben seri ensrefi leki srafu gi wan trakondre sma ben kan kon fri ibri momenti. A ben kan pai fu kon fri noso wan sma di ben abi a reti fu bai en ben kan du dati. Den ben musu luku omeni yari ben tan abra ete fosi a Prisiri-yari noso a di fu seibi yari, fu sabi omeni a sma ben musu pai (Le 25:47-52; De 15:12). Te wan Hebrew srafu ben kon fri, dan en masra no ben musu seni en gowe nanga leigi anu, so taki a ben kan bigin wan nyun libi leki wan sma di kon fri (De 15:13-15). Efu den ben bai wan srafu nanga en wefi, dan en wefi ben musu go nanga en te a ben kon fri. Ma efu a ben kisi wan wefi fu en masra (kande wan trakondre uma di no ben abi a reti fu kon fri na ini a di fu seibi yari), dan a frow nanga den pikin ben musu tan na a masra. Te disi ben de so, dan a Hebrew srafu ben kan bosroiti fu tan na en masra. Den ben musu boro en yesi nanga wan prin fu sori taki a o tan en srafu fu ala ten.​—Eks 21:2-6; De 15:16, 17.

19-25 YULI

GUDU NA INI GADO WORTU | DEUTERONOMIUM 16-18

„Gronprakseri di ben e yepi fu koti krutu na wan retifasi”

it-1-O 359 ¶5

Breni

Te wan krutuman no ben krutu sani na wan retifasi, dan a ben de leki a breni. A wet ben e krutu sma di e teki tyuku, wan kado noso di e teki sei, fu di dati ben o meki taki a krutuman no du sani na wan yoisti fasi. „Tyuku e breni wan sma di e si sani krin” (Eks 23:8). „Tyuku e breni den koniwan” (De 16:19). Awinsi wan krutuman eerlijk, toku a no ben o krutu sani nanga wan krin ati moro efu a ben o teki kado fu sma di de na ini a tori. A wet fu Gado ben e sori taki a no den sani disi nomo ben kan meki wan krutuman kon breni, ma den firi fu en ben kan meki dati pasa tu. Bijbel e taki: „Un no musu teki a sei fu nowan sma, awinsi na wan mofina sma noso wan gudu sma” (Le 19:15). Sobun wan krutuman no ben musu meki wan guduman lasi wan krutu afersi fu di a wani taki furu sma lobi en, noso fu di a e wroko nanga en eigi firi nomo.​—Eks 23:2, 3.

it-1-O 813 ¶6

Nomru

Tu. Sma e gebroiki a nomru tu moro furu na ini krutu afersi. Te tu sma de leki kotoigi, dan dati e poti moro krakti tapu wan tori di tyari go na fesi krutu. Te wan krutuman ben o krutu wan tori dan tu noso dri kotoigi ben de fanowdu. Den e gebroiki a gronprakseri disi na ini a Kresten gemeente tu (De 17:6; 19:15; Mt 18:16; 2Kor 13:1; 1Ti 5:19; Heb 10:28). Gado ben hori ensrefi na a gronprakseri disi di a seni en manpikin fu kon frulusu libisma. Yesus taki: „Sosrefi na ini un eigi wet skrifi, ’efu tu kotoigi e taki a srefi sani dan a sani dati tru.’ Mi na mi eigi Kotoigi èn a Tata di seni mi kon na wan kotoigi gi mi tu.”​—Yoh 8:17, 18.

it-2-O 644 ¶4

Priester

Na den priester ben de den fosiwan di ben abi a grani fu fruklari Gado Wortu. Den ben abi wan spesrutu wroko tu na ini den krutu afersi fu Israel. Den ben e horibaka gi den krutuman na ini den foto fu den. Den ben e wroko makandra nanga den tu fu krutu muilek afersi pe wan krutuman srefi no ben man teki wan bosroiti (De 17:8, 9). Efu wan sma ben kiri wan trawan, ma den no ben sabi suma du dati, dan den priester ben musu go makandra nanga den owruman na a presi pe a sani pasa. Den ben musu du soifri san Yehovah taki fu puru brudu paiman na a foto dati (De 21:1, 2, 5). Efu wan masra ben kon dyarusu fu di a denki taki en frow du sutadu, dan a ben musu tyari en go na a santa presi. Drape a priester ben musu du den sani di Yehovah taki, fu di na Yehovah ben sabi efu na uma du a sani dati noso efu a no du en. Den ben e aksi Yehovah fu koti krutu na ini na afersi disi (Nu 5:11-31). Na ini ala den afersi disi sma ben musu du san den priester nanga den krutuman bosroiti. Efu wan sma no ben wani arki, dan a sma dati ben musu dede.​—Nu 15:30; De 17:10-13.

Diki moro dipi

it-2-O 1059

Uitsluiting

A wet ben e taki dati wan sma ben kan kisi dedestrafu soso te tu noso moro kotoigi ben taki dati a du wan ogri (De 19:15). Na den kotoigi disi ben musu de den fosiwan di ben o fringi wan ston tapu a sma di du na ogri (De 17:7). A sani disi ben o gi den na okasi fu sori taki den e horibaka fayafaya gi a wet fu Gado, taki den wani a pipel tan krin èn a ben e tapu den fu gi wan falsi kotoigi tu.

DU MUITI FU TRON WAN MORO BUN PREIKIMAN

it-1-O 794 ¶3

Krutu, Krutu-oso

A Kresten gemeente. Aladi a Kresten gemeente no abi a srefi makti leki den krutu-oso fu grontapu, toku a man handri teige den wan na ini a gemeente di no e tyari densrefi bun èn di abi piri-ai fanowdu. A kan puru den fu a gemeente srefi. Fu dati ede Paulus ben taigi a gemeente, sobun den wan di e teki fesi, taki na den ben musu krutu den wan di de na ini na organisâsi (1Kor 5:12, 13). Di Paulus nanga Petrus ben seni brifi gi difrenti gemeente, den ben sori krin taki den owruman musu luku bun fa a e go nanga a gemeente èn taki den musu warskow den skapu di e du sani di no bun, den musu gi den rai èn den musu yepi den. (2Ti 4:2; 1Pe 5:1, 2; luku Ga 6:1.) Den musu warskow den wan di e tyari pratifasi nanga falsi leri kon na ini a gemeente èn den musu du disi wán te go miti tu leisi fosi den handri teige den (Tit 3:10, 11). Ma sma di e tan du sondu musu puru fu a gemeente. A piri-ai disi e sori a sma taki den sani di a e du no e fiti na ini a gemeente (1Ti 1:20). Paulus ben taigi den man di e teki fesi na ini a gemeente fu koti krutu èn fu kon makandra fu krutu den tori fu a gemeente (1Kor 5:1-5; 6:1-5). Den musu luku den tori finifini èn teki wan bosroiti soso te tu noso dri kotoigi de. Den musu luku efu wan tori tru. Den musu du dati sondro fu teki bosroiti fosi den kon sabi a fini fu wan tori èn sondro fu teki sma sei.​—1Ti 5:19, 21.

26 YULI–1 AUGUSTUS

GUDU NA INI GADO WORTU | DEUTERONOMIUM 19-21

„A libi prenspari gi Yehovah”

it-1-O 360

Brudu

Di Gado meki libisma, a gi den a reti fu nyan bun fu a libi. Nowan sma abi a reti fu teki a libi fu wan trawan. Ibri sma di ben o du dati, ben o abi fu gi frantwortu na Gado. Disi ben de krin fu si di Gado taigi Kain: „A brudu fu yu brada e bari kari mi komoto fu a gron” (Ge 4:10). Srefi wan sma di ben e teige en brada èn di ben e winsi taki a dede ben o tyari brudu paiman kon tapu ensrefi. Disi ben de so tu efu a ben o taki ogri-ati lei fu poti a libi fu en brada na ini kefar.​—Le 19:16; De 19:18-21; 1Yh 3:15.

Diki moro dipi

it-1-O 792¶8

Krutu, Krutu-oso

A presi pe den ben e hori krutu ben de den portu fu a foto (De 16:18; 21:19; 22:15, 24; 25:7; Ru 4:1). A „portu” disi ben wani taki na opo presi di ben de krosibei fu den trutru portu. Furu sma ben gwenti de na den presi disi èn na dyaso a pipel ben gwenti kon makandra te den ben e leisi a wet gi den, noso te prenspari sani ben musu meki bekènti (Neh 8:1-3). A ben makriki fu feni kotoigi gi difrenti afersi dyaso, soleki te wan sma ben seri wan pisi gron gi wan trawan. Disi ben de so fu di furu sma ben e waka pasa drape. Furu sma ben kan si fa den krutuman ben krutu wan tori. A sani disi ben e meki taki den krutuman ben e ondrosuku sani finifini èn den ben e krutu sani na wan reti fasi. A sori leki sani ben seti so taki den krutuman ben abi den eigi sidonpresi drape (Yob 29:7). Samuel ben e go ibri yari na Betel, Gilgal, nanga Mispa „fu koti krutu gi den Israelsma.” A ben e du dati tu na ini Rama, a foto pe a ben e tan.​—1Sa 7:16, 17.

2-8 AUGUSTUS

GUDU NA INI GADO WORTU | DEUTERONOMIUM 22-23

„A wet ben e sori taki Yehovah e broko en ede nanga meti”

it-2-O 159

Lai

Na ini owruten sma ben gwenti gebroiki meti fu tyari lai. Yehovah ben taigi den Israelsma taki efu wan sma ben si a meti fu wan trawan di no lobi en, e didon na gron fu di a lai fu en hebi tumusi, dan a no ben musu libi en so. A sma ben ’musu puru a lai fu a meti’ (Eks 23:5). Na den sani di wan meti e tyari den e kari lai.​—2Kow 5:17.

it-1-O 494 ¶4

Deuteronomium

A buku disi e sori tu fa den Israelsma ben musu poti prakseri na den meti. Den no ben musu teki wan mamafowru puru fu en nesi. Disi ben kan pasa makriki fu di na Gado ben meki en nanga a firi fu kibri den yongu pikin fu en. Den ben musu libi a mamafowru fu a gowe, ma den ben kan teki den pikin fowru. Na sowan fasi a mamafowru ben kan kisi nyun pikin (De 22:6, 7). Wan gronman no ben musu poti wan kaw nanga wan buriki na a srefi plugu, bika dati ben o hebi gi a moro swaki meti (22:10). Den no ben musu tai a mofo fu wan mankaw te a e masi aleisi, so taki angri no kiri en, aladi na aleisi de krosibei fu en. Na so fasi a ben kan nyan fu kisi krakti baka.​—25:4.

Diki moro dipi

it-2-O 841

Paiman

Wan paiman na wan sani di wan sma fruplekti fu gi wan trawan. A kan de moni noso wan tra sani. Na ini owruten Israel, sma ben kan abi paiman fu di den ben abi moni problema. Te wan Israelsma ben abi paiman dan disi ben kan abi takru bakapisi gi en, fu di a ben o tron wan futuboi fu a sma di leni en a moni (Odo 22:7). Dati meki Yehovah ben taigi en pipel fu sori sari-ati èn taki den no ben musu denki densrefi nomo, te den ben o yepi wan Israelsma di de na nowtu. Den no ben musu suku fu kisi wini fu di den ben o aksi rente, aladi a sma de na ini wan muilek situwâsi (Eks 22:25; De 15:7, 8; Ps 37:26; 112:5). Ma te den ben e leni trakondre sma moni, dan den ben kan aksi rente (De 23:20). Son Dyu sabiman e taki dati, disi ben abi fu du soso nanga moni di sma ben leni fu du bisnis, a no ben abi fu du nanga sma di ben de na nowtu. Furu tron trakondre sma ben e tan fu wan pisi ten nomo na ini Israel, den ben e bai èn seri sani. Den Israelsma ben kan aksi den rente, fu di den trakondre sma disi ben e aksi sma rente tu.

9-15 AUGUSTUS

GUDU NA INI GADO WORTU | DEUTERONOMIUM 24-26

„A wet ben e sori taki Yehovah e broko en ede nanga umasma”

it-2-O 1212 ¶6

Umasma

Srefi den weti fu a legre ben e taki dati wan man di no trow so langa ete, no ben abi fu go na feti na ini a fosi yari. Disi ben e gi a trowpaar na okasi fu kisi pikin. A sani disi ben de wan bigi trowstu gi na uma te en masra ben gowe, èn spesrutu efu a masra ben dede na ini a feti.​—De 20:7; 24:5.

it-2-O 403¶3

Nyanyan di ben libi na baka

A seti disi ben de wan bigi yepi gi den pôtiwan na ini a kondre, a ben e gi sma deki-ati fu no denki densrefi nomo, fu lobi fu gi sani èn fu frutrow tapu Yehovah. Ma a no ben e gi sma deki-ati fu kon lesi. A e meki wi frustan moro bun san David ben wani taki nanga den wortu disi: „Mi no si noiti taki Gado libi wan reti-ati sma en wawan. Noiti mi no si taki den pikin fu en waka e suku nyanyan” (Ps 37:25). Te den Israelsma ben o meki bun gebroiki fu a seti disi, dan srefi den pôtiwan no ben o abi fu de nanga angri, fu di den e wroko tranga èn den pikin fu den no ben o abi fu begi sma nyanyan.

Diki moro dipi

it-1-O 560 ¶3

Brokotrow

Brokotrow-papira. Moses ben gi den Israelsma a wet disi, ma bakaten den ben e gebroiki en fu brokotrow fu ala pikinpikin sani. Ma a wet disi srefi no ben e meki en makriki gi den mansma fu brokotrow nanga den wefi. Fosi a ben man broko a trow a ben musu du wan tu prenspari sani. A ben „musu skrifi na tapu wan papira taki a broko a trow nanga en.” A man ben „musu gi dati na a uma èn a musu seni na uma gowe fu en oso” (De 24:1). Aladi Bijbel no e taki finifini fa a sani disi ben musu pasa, toku a kan taki den owruman fu a foto ben musu kon ini a tori fosi fu luku efu den ben kan yepi den fu no broko a trow. Fu di a ben e teki ten fu sreka den papira disi, meki dati ben e gi a man na okasi fu denki bun fu a bosroiti di a wani teki. Wan bun reide ben musu de fu broko a trow èn te den ben o du sani leki fa a wet e taki, dan den no ben o de gaw fu broko a trow. Na so fasi den ben hori den reti fu na uma na prakseri tu. Bijbel no e taki san ben skrifi na ini „a brokotrow-papira.”

16-22 AUGUSTUS

GUDU NA INI GADO WORTU | DEUTERONOMIUM 27-28

Diki moro dipi

it-1-O 882

Marki fu den gron

A wet ben e taki dati den Israelsma no ben musu skoifi den marki fu wan gron (De 19:14; luku Odo 22:28). Fu taki en leti fluku ben musu kon na tapu wan sma di ben skoifi „den marki fu wan tra sma en gron” (De 27:17). Furu sma di ben e wroko gron ben musu libi fu den sani di den ben prani. Sobun efu wan sma ben skoifi den marki fu wan tra sma gron, dan a ben teki wan pisi fu san a sma dati ben abi fanowdu fu tan na libi. A sani disi ben de wan fasi fu fufuru èn na so sma na ini a ten dati ben e si en tu (Yob 24:2). Toku son sma di no abi konsensi ben e du a sani disi. Den granman fu Yuda na ini a ten fu Hosea ben de leki sma di ben e skoifi den marki fu tra sma gron.​—Hos 5:10.

23-29 AUGUSTUS

GUDU NA INI GADO WORTU | DEUTERONOMIUM 29-30

Diki moro dipi

it-2-O 496¶3

Yesi

Yehovah ben taigi den tranga-ede Israelsma nanga yepi en futuboi taki den ’yesi ben tapu’ (Yer 6:10; Tori 7:51). A ben de leki wan sani ben tapu den yesi fu no man yere. Yehovah no ben opo den yesi fu den, fu di na en e meki taki den sma di e suku en yere en èn frustan en. Ma na wan agersi fasi a e tapu den yesi fu den wan di no wani arki (De 29:4; Ro 11:8). Na apostel Paulus ben taki dati wan ten ben o kon pe sma di ben taki dati den na Kresten ben o drai baka gi a tru bribi. Den no ben o wani arki den tru leri fu Gado Wortu. Ma na presi fu dati, den ben o arki falsi leriman di ben o taki sani di den wani yere fu „switi” den yesi (2Ti 4:3, 4; 1Ti 4:1). Den sani di wan sma e yere, kan „seki” en tu, spesrutu efu na takru nyunsu.​—1Sa 3:11; 2Kw 21:12; Yer 19:3.

30 AUGUSTUS–5 SEPTEMBER

GUDU NA INI GADO WORTU | DEUTERONOMIUM 31-32

„Leri wan sani fu den agersitori fu wan prenspari singi”

w09-O 1/5 14 ¶4

Agersitori na ini Bijbel​—Yu e frustan den?

Bijbel e teki Yehovah gersi tu nanga sani di no de na libi. Bijbel e kari en „a Stonbergi fu Israel,” wan „bigi ston,” nanga wan „fortresi” (2 Samuel 23:3; Psalm 18:2; Deuteronomium 32:4). Fu san ede den e kari en so? Neleki fa wan stonbergi e tanapu steifi èn noti no man puru en fu en presi, na so wi kan de seiker taki te wi go na Yehovah a o kibri wi, wi no abi fu tweifri.