„Soema ben poti koni na ini den wolkoegroepoe”?
„TE OENOE e si wan wolkoe e opo kon na westsei kontren, dan wantronso oenoe e taki: ’Wan hebi alen e kon’, èn a e kon so toe. Èn te oenoe e si taki wan zuidsei winti e wai, dan oenoe e taki: ’Wan faja winti e kon’, èn a e kon so toe.” Den wortoe disi foe Jesus, di na evangelie skrifiman Lukas ben skrifi, na eksempre foe sori fa sma na owroeten Palestina ben taki na fesi fa a weer o de (Lukas 12:54, 55). Na ini spesroetoe situwâsi, den fositen sma ben kan loekoe den marki èn sjatoe bifo den ben kan taki soifri san ben o pasa.
Na ini a ten disi, den sma foe a meteorologis sabidensi e gebroiki kefalek koni wrokosani, soleki sateliet di e drai lontoe grontapoe, Doppler-radar, èn computer di man doe boen foeroe sani foe marki gi wan moro langa ten fa a weer o de. Ma den sani di den e taki na fesi foeroe tron den no de joisti. Foe san ede?
Foeroe sani e meki taki a tranga foe taki soifri na fesi fa a weer o de. Foe eksempre, kenki na ini a temperatuur di no de foe si na fesi, wan loktoe di foktoe, druk foe a loktoe, o tranga a winti e wai nanga a sei di a e teki, kan meki a tranga foe taki na fesi fa a weer o de. Moro ete, a dangra fasi fa son, den wolkoe nanga den se abi krakti tapoe makandra, wan sani di sabidensiman no man froestan krinkrin ete. Dati meki a taki di sma e taki na fesi fa a weer o de, e tan de wan sabidensi di no de soifri.
A sabi di libisma no sabi ala sani foe a weer, e memre wi na den sani di den ben aksi foe Job: „Soema ben meki den dowdropoe gebore? Foe soema en bere na ijs e komoto na dorosei? . . . Joe kan opo joe sten gi a wolkoe toe, so taki wan hebi watra skwala kan tapoe joe? . . . Soema poti koni na ini den wolkoegroepoe, noso soema gi a natoeroe sani di e sori ensrefi na loktoe, froestan? Soema kan teri den wolkoe soifri nanga koni, noso den watrakan foe hemel — soema kan kanti den trowe?” — Job 38:28-37.
A piki tapoe ala den aksi disi na: No libisma, ma Jehovah Gado. Ija, ala di a sori leki libisma koni, tokoe a koni foe wi Kriaman hei krinkrin moro di foe en. A de troetroe lobi foe a sei foe en taki a meki koni de foe feni na bijbel, so taki sani kan waka boen nanga wi. — Odo 5:1, 2.