Job ben hori doro — Wi kan doe dati toe!
„Loekoe! Wi e froeklari denwan di hori doro, kolokoe.” — JAKOBUS 5:11.
1. San wan owroe kresten ben taki foe den tesi di a ben kisi?
’DIDIBRI e kon na mi baka foe kisi mi! Mi e firi neleki Job!’ Nanga den wortoe dati, A. H. Macmillan ben taigi wan krosibei mati na a edekantoro foe Jehovah Kotoigi, fa a ben firi. Brada Macmillan ben kaba en libi na grontapoe di a ben abi 89 jari, tapoe 26 augustus 1966. A ben sabi taki a grani di salfoe kresten leki en e kisi gi a getrow diniwroko foe den, ben sa „go makandra nanga den” (Openbaring 14:13). Ija, langalanga den ben sa go doro ini a diniwroko foe Jehovah, foe di den ben o kisi wan opobaka na hemel foe libi sondro foe man dede. Den mati foe brada Macmillan ben prisiri taki a ben kisi a pai dati. Ma ini den lasti jari foe en libi na grontapoe, a ben kisi foe doe nanga difrenti tesi di ben abi na ini toe, problema nanga a gosontoe foe en, di ben meki en froestan heri boen taki Satan ben proeberi foe broko en soifri retifasi na Gado.
2, 3. Soema ben de Job?
2 Di brada Macmillan ben taki dati a ben firi neleki Job, dan a ben sori go na wan man di ben hori doro na ondro bigi tesi na tapoe en bribi. Job ben libi na „a kondre Uz”, kande na a noordsei foe Arabia. Leki wan bakapikin foe Noa en manpikin Sem, a ben de wan sma di ben anbegi Jehovah. A gersi leki Job ben kisi den tesi foe en na wan ten baka a dede foe Josef èn bifo a ten di Moses srefi ben sori foe de opregti. Ini a ten dati no wan sma na grontapoe ben de leki Job ini a gi di a ben e gi ensrefi ini a dini foe Gado. Jehovah ben si Job leki wan opregti man, sondro fowtoe, di ben frede Gado. — Job 1:1, 8.
3 Leki „a moro bigiwan foe ala sma foe Owstoesei”, Job ben abi foeroe foetoeboi, èn den meti foe en ben teri 11.500. Ma goedoe na jeje fasi ben de toemoesi prenspari gi en. Soleki fa a sori, dan Job ben leri en seibi manpikin nanga dri oemapikin, sani ini a tori foe Jehovah, neleki fa den papa di lobi foe dini Gado, e doe ini a ten disi. Srefi baka di den no ben libi na en oso moro, a ben de gi den leki wan osofamiri priester, foe di a ben tjari srakti-ofrandi gi den, efoe a ben de so taki den ben doe wan sondoe. — Job 1:2-5.
4. (a) Foe san ede kresten di e kisi froefolgoe moesoe go prakseri foe a man Job? (b) Sortoe aksi, di abi foe doe nanga Job, wi sa go loekoe?
4 Job na wan sma di kresten, di e kisi froefolgoe, moesoe go prakseri foe en, so taki den kan tranga densrefi foe hori doro nanga pasensi. „Loekoe!”, a disipel Jakobus ben skrifi. „Wi e froeklari denwan di hori doro, kolokoe. Joe jere foe a hori di Job ben hori doro èn joe si a bakapisi di Jehovah ben tjari, taki Jehovah safoe srefisrefi na ini firi foe lobi èn a abi sari-atifasi” (Jakobus 5:11). Neleki Job, den salfoe bakaman foe Jesus nanga a disiten „bigi ipi” moesoe hori doro foe kakafoetoe gi den tesi di den e kisi tapoe a bribi foe den (Openbaring 7:1-9). So boen, na ondro sortoe tesi Job ben hori doro? Foe san ede den ben pasa? Èn fa wi kan abi wini foe den ondrofenitori foe en?
Wan toemoesi prenspari strei
5. San ben pasa na hemel, di Job no ben sabi?
5 Heri esi wan bigi strei ben o tjari kon na fesi na hemel, wan sani di Job no ben sabi. Wan dei „den manpikin foe a troe Gado ben kon foe go tanapoe na fesi Jehovah” (Job 1:6). Gado en wan-enkri Manpikin, a Wortoe, ben drape (Johanes 1:1-3). Den regtfardiki engel nanga den trangajesi engel ’manpikin foe Gado’, ben drape toe (Genesis 6:1-3). Satan ben drape, foe di den no ben o trowe en komoto na hemel, te leki baka te a Kownoekondre ben sa opo ini 1914 Gewoon Teri (Openbaring 12:1-12). Ini a ten foe Job, Satan ben sa tjari wan toemoesi prenspari strei kon na fesi. A ben de foe taki sani foe meki sma tweifri, efoe Jehovah ben abi a reti foe de a Soeverein foe ala den mekisani foe En.
6. San Satan ben proeberi foe doe, èn fa a ben taki ogri-ati lei foe pori Jehovah nen?
6 „Pe joe komoto?”, na so Jehovah ben aksi. Satan ben piki: „Foe a waka di mi waka lontoe grontapoe èn a koiri di mi koiri lontoe en” (Job 1:7). A ben soekoe foe poeroe wan sma na pasi (1 Petrus 5:8, 9). Nanga a broko di Satan ben o broko a soifri retifasi foe sma di e dini Jehovah, a ben sa proeberi foe boeweisi taki no wan sma ben sa gi jesi na Gado dorodoro, foe di a sma disi lobi Gado. Di Jehovah ben poti en prakseri tapoe a strei, dan a ben aksi Satan: „Joe poti joe ati na tapoe mi foetoeboi Job, taki no wan sma de leki en na grontapoe, wan man sondro fowtoe èn opregti, di e frede Gado èn e tan fara foe ogri?” (Job 1:8) Job ben libi akroederi Gado en markitiki, di ben hori na onvolmaaktifasi foe en na prakseri (Psalm 103:10-14). Ma Satan ben piki baka: „Na foe soso taki Job frede Gado? A no joesrefi poti wan skotoe lontoe en èn lontoe en oso èn lontoe ala san a abi? A wroko foe en anoe joe blesi, èn den meti foe en srefi kon foeroe na grontapoe” (Job 1:9, 10). Na so fasi Didibri ben froeteri ogri-ati lei foe pori Jehovah nen, foe di a ben taki dati no wan sma lobi En èn e anbegi En foe san A de, ma taki A e breni na ai foe den mekisani nanga presenti, so taki den kan dini En. Sondro foe Satan ben abi boeweisi foe dati, a ben taki dati Job ben dini Gado, foe di Job ben soekoe en eigi wini, no foe di a ben lobi Gado.
Satan e doe den ogri foe en!
7. Na sortoe fasi Didibri ben tjalensi Gado, èn fa Jehovah ben piki?
7 „Ma”, na so Satan ben taki, „foe wan kenki, grantangi, langa joe anoe pikinso, èn fasi ala san a abi èn loekoe efoe a no sa floekoe joe leti na joe fesi.” Fa Gado ben sa piki na tapoe so wan tjalensi foe afrontoe en? „Loekoe!”, na so Jehovah ben taki. „Ala san a abi de na ini joe anoe. Ma no langa joe anoe go na ensrefi!” Didibri ben taki dati ala san Job ben abi, Gado ben blesi, ben meki kon moro foeroe, èn ben gi kibri. Gado ben sa gi pasi taki Job ben o kisi pina, ala di no wan sani ben mag pasa nanga en skin. Nanga a fasti bosroiti foe doe ogri, Satan gowe libi a konmakandra. — Job 1:11, 12.
8. (a) Sortoe lasi foe goedoe na skin fasi, Job ben ondrofeni? (b) San ben de troe foe „a faja foe Gado srefi”?
8 Heri esi, Satan ben bigin doe na ogri foe en. Wan foe den foetoeboi foe Job ben tjari a takroe njoensoe disi gi en: „Den kaw ben proegoe a gron èn den oema-boeriki ben njan grasi na sei foe den, di den Sabeasma ben kon èn ben fadon kon na den tapoe èn ben teki den, èn den kiri den foetoeboi nanga a srapoesei foe a feti-owroe” (Job 1:13-15). Den goedoe foe Job no ben kisi kibri moro. Pikinmoro wantewante, den ogri jeje ben gebroiki a krakti foe den langalanga, bika wan tra foetoeboi ben kon froeteri: „A faja foe Gado srefi, ben fadon kon foe hemel èn a ben bron na mindri den skapoe nanga den foetoeboi èn a njan den” (Job 1:16). Fa a ben de wan didibri sani foe meki a gersi leki Gado ben de frantiwortoe foe so wan rampoe na tapoe en eigi foetoeboi srefi! Foe di koti-faja e kon foe hemel, meki makriki Jehovah ben kan kisi a fowtoe, ma troetroe a faja ben kon foe den ogri jeje.
9. Fa bigi lasi na ekonomia sei ben abi krakti na tapoe a matifasi di Job ben abi nanga Gado?
9 Ala di Satan ben go doro foe doe na ogri foe en, wan tra foetoeboi ben kon froeteri taki den Kaldewsma ben teki den kameili foe Job èn ben kiri ala den tra foetoeboi (Job 1:17). Ala di Job ben ondrofeni bigi lasi na ekonomia sei so boen, tokoe disi no ben pori a matifasi di a ben abi nanga Gado. A de so, taki joe ben sa kan hori doro na ondro a bigi lasi foe goedoe na skin fasi, sondro foe broko joe soifri retifasi na Jehovah?
Moro bigi rampoe e naki kon
10, 11. (a) San ben pasa nanga den tin pikin foe Job? (b) Fa Job ben prakseri foe Jehovah, baka a sari dede foe den pikin foe en?
10 Didibri no ben kaba ete foe doe Job ogri. Ete wan tra foetoeboi ben kon froeteri: „Den manpikin nanga den oemapikin foe joe ben e njan èn ben e dringi win na ini na oso foe a brada foe den, a fosi geborewan. Èn, loekoe! ne wan bigi winti foe a gran sabana kon èn a bigin naki den fo oekoe foe na oso, so taki a fadon na tapoe den jongoe sma èn den dede. Èn mi wawan ben man foe komoto, foe kon froeteri joe” (Job 1:18, 19). A sma di den no ben froeteri den troetori, ben sa kan taki dati a rampoe di a winti dati ben tjari kon, ben de ’wan sani di Gado ben doe’. Ma a krakti foe den ogri jeje ben kisi Job spesroetoe pe a ben hati den firi foe en.
11 Foe di sari ben naki Job wantronso, meki a ’priti en djakti sondro mow, koti a wiwiri poeroe foe en ede, fadon go na gron, èn ben boigi’. Ma arki den wortoe foe en. „Jehovah srefi gi, èn Jehovah srefi teki poeroe. Meki a nen foe Jehovah tan kisi blesi.” A tori e taki moro fara: „Na ini ala den sani disi, Job no ben sondoe noso no ben taki wan sani foe Gado di no fiti” (Job 1:20-22). Ete wan tron Satan ben lasi. Fa a de efoe wi ben sa lasi wan lobiwan na ini dede èn wi ben sa sari leki Gado en foetoeboi? Efoe wi e gi wisrefi ini a dini foe Jehovah sondro foe prakseri wisrefi nomo èn e froetrow tapoe en, dan dati kan meki taki wi man hori doro leki sma di e hori den soifri retifasi, neleki fa Job ben doe dati. Salfoewan nanga den kompe foe den di abi a howpoe foe libi na grontapoe, troetroe kan kisi trowstoe nanga krakti foe a tori disi foe a hori di Job ben hori doro.
A strei e kon moro faja
12, 13. San Satan ben aksi na wan tra konmakandra na hemel, èn fa Gado ben piki?
12 Sjatoe baka dati, Jehovah ben abi wan tra konmakandra na hemel. Job ben kon tron wan pôti man sondro pikin èn a ben gersi leki Gado ben naki en, ma a ben hori en soifri retifasi ete. A no de foe taki, dati Satan no ben o erken taki den kragi foe en teige Gado nanga Job ben de wan lei. Now den ’manpikin foe Gado’ ben de foe jere a reide di ben o gi leki boeweisi nanga a reide di ben o gi kontrari den boeweisi disi, ala di Jehovah ben tjari Didibri kon so fara, taki a strei ben kan kon na wan kaba.
13 Di Jehovah ben aksi Satan frantiwortoe, A ben aksi: „Foe pe joe komoto?” San Satan ben piki? „Foe a waka di mi waka lontoe grontapoe èn a koiri di mi koiri lontoe en.” Agen Jehovah ben poti a prakseri na tapoe en foetoeboi Job, di ben de sondro fowtoe, opregti èn di ben frede Gado, èn di ben hori steifi ete na en soifri retifasi. Didibri ben piki: „Boeba foe skin gi boeba foe skin, èn ala san wan sma abi a sa gi foe en sili ede. Foe wan kenki, grantangi, langa joe anoe pikinso, èn fasi en te na ini en bonjo nanga en meti èn loekoe efoe a no sa floekoe joe leti na ini joe fesi.” Dati meki Gado ben taki: „Dja a de ini joe anoe! Ma loekoe boen foe no fasi en sili srefi!” (Job 2:2-6) Nanga tra wortoe Satan ben wani taki, dati Jehovah no ben poeroe ala skotoe ete di ben gi Job kibri èn foe dati ede a ben aksi foe doe ogri na Job en bonjo nanga skin. Didibri no ben sa kisi primisi foe kiri Job; ma Satan ben sabi taki siki na a skin ben o hati Job èn a ben sa gersi leki Job ben pina, foe di Gado ben strafoe en foe sondoe di a ben doe na kibrifasi.
14. Nanga sortoe sani Satan ben naki Job, èn foe san ede no wan libisma ben kan gi froelekti na Job di ben pina?
14 Baka di Gado ben seni Satan gowe foe a konmakandra dati, dan a ben go doro nanga wan didibri sortoe prisiri. A ben naki Job nanga „wan takroe soro, komoto na en ondrofoetoe te go na en ede-krabasi”. Fa Job ben pina hebi, ala di a ben sidon na ini asisi èn ben kraboe ensrefi nanga wan pisi broko patoe! (Job 2:7, 8) No wan libisma datra ben kan tjari froelekti kon gi en foe a tegoe siki disi di ben e hati en skin kefalek, èn di ben de wan sjen, bika a krakti foe Satan ben tjari disi kon. Jehovah wawan ben kan meki Job kon betre. Efoe joe na wan foetoeboi foe Gado di siki, noiti no frigiti taki Gado kan jepi joe foe hori doro èn a kan gi joe libi na ini wan njoen grontapoe sondro siki. — Psalm 41:1-3; Jesaja 33:24.
15. Sortoe deki-ati a wefi foe Job ben gi Job, èn san Job ben doe na tapoe?
15 Te foe kaba, a wefi foe Job ben taki: „Joe e hori fasti ete na joe soifri retifasi? Floekoe Gado èn dede!” „Soifri retifasi” e sori go na a gi di wan sma e gi ensrefi ini a dini foe Gado sondro foe abi fowtoe, èn kande a wefi foe en ben taki na wan spotoefasi foe meki Job floekoe Gado. Ma Job ben piki: „Neleki fa wan foe den oema sondro froestan e taki, na so joe e taki toe. Wi sa teki soso san boen foe a troe Gado èn no teki san ogri toe?” Srefi a triki sani disi di Satan ben doe foe kori Job, no ben wroko, bika den e froeteri wi: „Na ini ala den sani disi Job no ben sondoe nanga en mofoboeba” (Job 2:9, 10). Kon wi taki dati osofamiri memre di e gens wi, ben sa taki dati wi law foe weri wi ede nanga a feti di wi e feti na baka kresten marki èn taki den e gi wi deki-ati foe drai wi baka gi Jehovah Gado. Neleki Job, wi kan hori doro na ondro so wan tesi, bika wi lobi Jehovah èn wi e angri foe prèise en santa nen. — Psalm 145:1, 2; Hebrewsma 13:15.
Dri bidrigiman di ben abi heimemre
16. Soema ben kon èn ben doe neleki den ben trowstoe Job, ma fa Satan ben gebroiki den na wan trikifasi?
16 Dri „kompe” ben kon èn doe neleki den ben trowstoe Job, san baka ten ben sori foe de wan tra plan di ben kon foe Satan. Wan foe den ben de Elifas, kande wan bakapikin foe Abraham èn foe Esau. Foe di Elifas ben abi primisi foe taki fosi, meki kande a ben de a moro owroewan. Bildad, wan bakapikin foe Sua, wan foe den manpikin di Abraham ben kisi nanga Ketoera, ben drape toe. A di foe dri man ben de Sofar, di den ben kari wan Na-amansma foe kon sabi foe sortoe famiri a ben komoto noso pe a ben libi, kande noord-westsei foe Arabia (Job 2:11; Genesis 25:1, 2; 36:4, 11). Neleki den sma di e proeberi foe meki Jehovah Kotoigi drai den baka gi Gado ini a ten disi, na so Satan ben gebroiki den dri man disi na wan trikifasi foe proeberi foe meki Job erken taki den falsi kragi teige en ben troe èn foe meki a broko en soifri retifasi.
17. San den dri man di ben kon loekoe Job ben doe, èn san den no ben doe seibi dei nanga seibi neti langa?
17 Den dri man ben meki wan lo pranpran foe sori taki den ben sari Job, foe di den ben e krei, den ben e priti den tapoesei krosi foe den, èn den ben e trowe doti na tapoe na ede foe den. Ma baka dati den ben sidon seibi dei nanga seibi neti nanga Job sondro foe taki wán wortoe foe trowstoe! (Job 2:12, 13; Lukas 18:10-14) Den dri bidrigiman disi di ben abi heimemre, ben abi so pikinso jejefasi, taki den no ben abi no wan sani foe taki foe gi trowstoe ini a tori foe Jehovah nanga den pramisi foe en. Tokoe den ben kon na fowtoe bosroiti èn den ben sreka densrefi foe gebroiki den fowtoe bosroiti disi teige Job, so esi leki den ben kaba nanga na officieel pisi foe sori sari na poebliki. A de wan moi sani foe si, taki bifo den seibi dei di den no ben taki noti, ben kaba, a jonkoeman Elihu ben kon sidon, pe a ben man jere san den ben taki.
18. Foe san ede Job ben soekoe vrede na ini dede?
18 Te foe kaba Job bigin taki. Foe di a no ben kisi no wan trowstoe foe den dri man di ben kon loekoe en, meki a ben floekoe a dei di a ben gebore èn a ben aksi ensrefi foe san ede a pina libi foe en ben e go doro ete. A ben soekoe vrede na ini dede, foe di a no ben man prakseri srefi taki wan ten ben o kon taki a ben kan abi troetroe prisiri baka bifo a ben o dede, now di a ben kon pôti, a ben lasi lobiwan na dede, èn a ben siki hebi. Ma Gado no ben sa gi pasi taki den ben sa doe Job ogri, so taki a ben sa dede. — Job 3:1-26.
Den sma di e kragi Job, bigin kroetoe en
19. Na sortoe fasi Elifas ben kragi Job na wan falsifasi?
19 Elifas ben taki fosi ini a takimakandra di ben o teki dri pisi, foe tesi Job en soifri retifasi moro fara. Na ini en fosi taki, Elifas ben aksi: „Pe den regtfardikiwan ben kisi pori wan ten?” A ben kon na a bosroiti taki Job ben moesoe foe doe wan ogri sani foe a kisi a strafoe foe Gado (Job kapitel 4, 5). Na ini en di foe toe taki, Elifas ben taki na wan spotoefasi foe a koni foe Job èn a ben aksi: „Foe taki en leti, san joe sabi di wi no sabi?” Nanga tra wortoe, Elifas ben wani taki dati Job ben proeberi foe sori ensrefi moro hei leki na Almaktiwan. Di a kaba nanga en di foe toe kragi, dan a ben taki finifini foe Job leki wan sma di ben fadon komoto na bribi, di ben gi sma tjoekoe èn di ben kori sma (Job kapitel 15). Na ini en lasti taki, Elifas ben kragi Job na wan falsifasi, taki a ben doe foeroe ogri — a foefoeroe di a ben e foefoeroe, a gi di a no ben e gi brede nanga watra na den sma ini nowtoe, èn a kwinsi di a ben e kwinsi den weduwe nanga den pikin sondro papa nanga mama. — Job kapitel 22.
20. Na sortoe fasi Bildad ben kroetoe Job?
20 Bildad, di ben de a di foe toe sma di ben e taki ini a takimakandra di ben abi dri pisi, moro foeroe ben taki na a srefi fasi fa Elifas ben taki. Den taki foe Bildad ben de moro sjatoe, ma den ben krasi moro. A ben kragi den pikin foe Job srefi, taki den ben doe ogri èn foe dati ede den ben froedini en foe dede. A ben taki-go-taki-kon na wan fowtoe fasi, ala di a ben e gebroiki na agersitori disi: Neleki fa papirus nanga ken e drei gowe èn e dede sondro watra, na so a de nanga „ala den sma di e frigiti Gado”. A froeklari disi troe, ma a no ben fiti Job (Job kapitel 8). Bildad ben taki dati den kwinsi di Job ben kisi, ben de leki den kwinsi di ogrisma e kisi (Job kapitel 18). Na ini a sjatoe di foe dri taki foe en, Bildad ben taki dati libisma na „wan woron” èn foe dati ede a no de krin na fesi foe Gado. — Job kapitel 25.
21. Foe sortoe sani Sofar ben kragi Job?
21 Sofar ben de a di foe dri sma foe taki na ini a takimakandra. A fasi fa a ben denki èn ben taki, moro foeroe ben gersi di foe Elifas nanga Bildad. Sofar ben kragi Job foe ogridoe èn a ben gi Job deki-ati foe tapoe nanga den sondoe di a ben doe (Job kapitel 11, 20). Baka toe pisi ini a takimakandra, Sofar ben tapoe foe taki. A no ben abi no wan sani foe taki moro ini a di foe dri pisi. Ma ini a heri takimakandra, Job ben piki den man di ben kragi en, nanga deki-ati. Foe eksempre, wan leisi a ben taki: „Oen alamala na trowstoeman di tjari trobi kon! Wan kaba sa kon na den wortoe di no wani taki no wan sani?” — Job 16:2, 3.
Wi kan hori doro
22, 23. (a) Fa Didibri kan proeberi foe broko a soifri retifasi foe wi na Jehovah Gado, neleki fa a ben doe ini a kefal foe Job? (b) San wi ben sa kan aksi ini a tori foe a fasi fa Job ben doe, ala di a ben hori doro na ondro difrenti tesi?
22 Neleki Job, wi kan kon tanapoe na fesi moro leki wán tesi na a srefi ten, èn Satan kan gebroiki lasi-ati noso tra sani foe proeberi foe broko wi soifri retifasi. A kan proeberi foe meki wi drai wi baka gi Jehovah, efoe wi abi problema na ekonomia sei. Efoe wan lobiwan foe wi dede noso wi abi wan takroe gosontoe, dan Satan kan proeberi foe meki wi gi Gado a fowtoe. Neleki den kompe foe Job, na so wan sma ben sa kan kragi wi na wan falsifasi srefi. Soleki fa brada Macmillan ben sori, dan a kan taki Satan e ’kon na wi baka’, ma wi kan hori doro.
23 Soleki fa wi ben si te so fara, dan Job ben hori doro na ondro den difrenti tesi di a ben kisi. Ma a ben hori doro pikinso nomo? A ben abi troetroe wan jeje di ben broko? Meki wi go loekoe efoe Job troetroe ben lasi ala en howpoe.
Fa joe ben sa piki?
◻ Sortoe bigi strei Satan ben tjari kon na fesi ini a ten foe Job?
◻ Na sortoe fasi Job ben kisi tesi pikinmoro pasa marki?
◻ Foe sortoe sani den dri „kompe” foe Job ben kragi en?
◻ Fa Satan kan proeberi foe broko wi soifri retifasi na Jehovah, neleki fa a ben doe ini a kefal foe Job?
[Prenki na tapoe bladzijde 17]
A. H. Macmillan