Wantoe edepunt foe den Psalm

Gi jesi na a „Moro Héwan”

Lési Psalm 78 te nanga 83. Den psalm disi na foe Asaf. Den e ferteri foe na historia foe Israël (Psalm 78). Dan den e sari gi na brokobroko toestand foe na tempel, èn bakadati wan begi e kon foe Israël kon boen baka. (Psalm 79, 80). Baka wan singi di e taki foe na fri di kon foe Gado èn di e gi dek’ati na en pipel foe gi jesi na en, dan tranga begi e go na Jehovah foe tjari kroetoe kon na pori kroetoeman èn na den féanti foe Israël. — Psalm 81 te nanga 83.

◆ Psalm 82:1 — Fa Gado e taki reti „na mindri den gado”?

A de krin dati den e bedoel nanga „den gado” den kroetoeman foe Israël. Den de kari den gado, foedi den ben abi bigi makti, tangi foe den kroetoe bevoegtoe foe den. Jehovah, leki na Moro Hé Kroetoeman, ben abi na reti leki Gado foe poti ensrefi a mindri foe den sortoe kroetoeman disi foe pir’ai gi den foedi den no ben taki reti ini akroederi nanga en wet. — Jesaja 33:22; Psalm 8:2-4.

Psalm 83:9-15 — Na teki foe refensi ben de na bewégi foe ati foe na psalmsingiman?

Kwetkweti. A ben begi Gado foe na strafoe kon tapoe den sma di ’no wani si Jehovah na ai srefsrefi’ (vers 2). Tra natie ben sa leri na a fasi disi, dati na Gado di nen Jehovah de troetroe „na Moro Héwan na a heri grontapoe” (vers 18). Na sori disi foe makti ben sa abi leki bakapisi dati a nen foe Gado, Jehovah, ben kisi grani na a heri grontapoe.

Leri gi wi: Dati Jehovah e pai den sma di e gi jesi na en foeroe, de foe si ini den wortoe „na atoe foe a tarwe” (Psalm 81:16). A wortoe „fatoe” e gebroiki dja na wan agersi fasi foe tjari na prakseri foe a moro boen sani go abra. (Teki gersi nanga Psalm 63:5.) Efoe den Israëlsma ben ’arki na a sten foe Jehovah’, den a ben sa blesi den nanga „na fatoe foe na tarwe” — a moro boen pisi, ija, a moro aparti pisi (Psalm 81:11; Deuteronomium 32:13, 14). Na a srefi fasi Jehovah sa blesi wi foeroe efoe ’wi arki na en sten’. — Odo 10:22.

◆ Psalm 84:3 — Foe san-ede den e taki foe fowroe?

Na psalmsingiman, di de wan bakapikin foe na leviet Korach, ben angri foe de na ini Jehovah „gran tenti” (vers 1, 2). Ma tintin doesoen leviet ben de. Ibri afdeling ben abi soso wan tron ini wan afoe jari na wroko foe dini wan wiki ini na tabernakel (tenti). Kontrari nanga dati dan srefi fowroe ben abi wan moro faste presi ini na santa presi, foedi den ben bow den nesi drape. Fa a ben sa prisiri Jehovah foedi ai libi dape ooktoe alaten.