Moro diri leki koraal

Moro nanga moro fisitiman ati ben djompo foe prisiri ede, foe den sani di ben de foe si, so leki a sani disi ini den watra foe a Redi Se.

Den heri ipi fisi, di de ini ala den kloroe foe na alenbo nanga kloroe di moksi makandra, e hari a prakseri foe denwan di e swen ini den krin watra. Ma loekoe taki na lontoe den fisi djaso di lai nanga kloroe, tra wondroe di de na ondro a se, de foe si krinkrin, pe joe abi na ini toe den brenki koraal di lai nanga kloroe.

Den moi koraal de foe feni ini foeroe fasi èn kloroe. So leki fa joe kan prakseri, dan srefi ini owroeten toemoesi moi pisi foe koraal ben abi wan hei waarde. Wrokoman, di e meki sani nanga anoe, ben meki moimoi sani foe den koraal, èn bijbel skrifiman ben kari koraal makandra nanga gowtoe, solfroe nanga robijn (Odo 3:14, 15; Esekièl 27:16). Ma den skrifiman dati e jepi wi foe si moro leki a waarde èn a moi foe den koraal srefi.

Den ben poti krakti na tapoe taki wan toe sani warti moro leki dati srefi èn taki wi moesoe abi moro bigi warderi gi den. Wan boen wefi di bekwaam, na wan foe den, foe di wi e leisi: „Wan bekwaam wefi, soema kan feni en? A waarde foe en e pasa a di foe koraal” (Odo 31:10). Joe na wan man di trow? Loekoe den toemoesi moi koraal djaso baka èn go prakseri efoe joe e gi a wefi foe joe a waarde di a moesoe kisi.

Efoe wi na mansma noso oemasma, efoe wi trow noso wi de wi wawan sondro foe trow, dan te wi e loekoe den toemoesi moi koraal, dan disi moesoe jepi wi foe warderi a moro bigi waarde foe a koni foe Gado, a koni foe si sani èn a sabi di wi sabi sani. A Wortoe foe Gado e taki: „Kolokoe a libisma de di feni koni èn a libisma di e kisi a koni foe si sani, bikasi foe abi en leki wini, de moro boen leki abi solfroe leki wini èn foe abi en leki ala san joe ben meki, moro boen leki gowtoe srefi. A moro diri leki koraal, èn ala joe tra prisiri sani no kan kon de a srefi leki en.” — Odo 3:13-15; 8:11.

So boen, efoe wi e si den foe di wi e swen wisrefi noso foe di wi e loekoe fowtow, den koraal foe a Redi Se moesoe tjari ala toe sani kon na krin gi wi, namkoe, a moi di den moi èn den de sani foe hori na prakseri na wan fasi di e gi wini.