A moro bun ten fu de na libi

TE YU e kisi fu du nanga problema, dan yu no e winsi taki sani ben e go leki fosi? Efu dati de so, dan poti prakseri na den wortu fu a koni Kownu Salomo: „No aksi taki: ’Fu san ede den dei na wi baka de moro bun leki den dei disi?’ Bika yu no sori koni efu yu aksi a sani disi.”—Preikiman 7:10, Da Bijbel na ini Sranantongo.

Fu san ede Salomo ben gi wi a rai disi? Fu di a ben sabi taki te wi abi wan yoisti denki fu a fasi fa sani ben de fosi, dan dati sa yepi wi trutru fu man kakafutu gi den fruferi sani di e pasa na ini a ten disi. Den wan di abi a tranga winsi taki sani ben kan de baka soleki fa den ben de fosi, ben kan frigiti taki problema ben lai tu na ini a ten dati, èn taki noiti ala sani na ini a libi ben e waka bun. Kande son sani fu fositen ben moro bun, ma tra sani no ben de so bun. Soleki fa Salomo ben taki, dan a no ben sa de wan koni sani fu tan prakseri a ten di pasa, fu di a de krin taki noiti sani sa de soleki fa den ben de bifo.

A de wan fowtu sani fu winsi taki sani ben de leki fosi? Iya, efu dati e meki taki wi no man fiti wisrefi na a ten disi, noso efu dati e tapu wi fu abi warderi gi a ten di wi e libi na ini, èn gi a howpu di wi kan kisi.

Te yu e luku en bun, dan a ten disi na a moro bun ten fu de na libi, awansi a de so taki den problema na heri grontapu e kon moro nanga moro. Fu san ede dati de so? Fu di wi heri esi sa ondrofeni den sani di Gado sa du nanga a grontapu fu wi. Boiti dati, wi sa ondrofeni sosrefi den blesi fu a Kownukondre fu en di sa tyari vrede kon. Bijbel e pramisi wi: „A sa figi puru ala watra na den ai, èn dede no sa de moro, nowan sari, nowan babari, nowan pen no sa de moro. Den fositen sani pasa kaba” (Openbaring 21:4). Na a ten dati, te a libi na grontapu sa de moro bun leki noiti bifo, dan nowan sma sa abi reide fu winsi taki sani ben e go leki fosi.