6. San a di fu fo profeititori fu „den nyun hemel nanga wan nyun grontapu” e taki na fesi?

⁶ Meki wi go ondrosuku now a lasti presi pe den wortu „den nyun hemel nanga wan nyun grontapu” de fu feni, na ini Yesaya 66:22-24: „’Neleki fa den nyun hemel nanga a nyun grontapu di mi e meki e tanapu na mi fesi,’ na so Yehovah taki, ’na so den bakapikin fu un pipel èn a nen fu un pipel sa tan tanapu. Èn a sa pasa trutru taki fu wan nyun mun te go miti wan nyun mun èn fu wan sabadei te go miti wan sabadei ala skin sa kon fu boigi na mi fesi’, na so Yehovah taki. ’Èn den sa go na dorosei trutru èn den sa si den dedeskin fu den man di ben sondu teige mi; bika den woron srefi di de na den tapu no sa dede èn a faya fu den srefi no sa dede, èn den musu tron wan tegu sani gi ala skin.’”

7. Fu san ede wi musu bribi taki Yesaya 66:22-24 sa abi wan kontru na ini a ten di e kon?

⁷ A profeititori disi ben kon tru na mindri den Dyu di ben seti densrefi baka na ini a kondre fu den, ma wan tra kontru ben o de. Dati ben o de furu yari baka di a di fu tu brifi fu Petrus èn a buku Openbaring ben skrifi, bika den ben taki fu wan ’nyun hemel nanga grontapu’ na ini a ten di e kon. Wi kan fruwakti a bigi èn lasti kontru dati na ini a nyun sistema. Luku wan tu fu den situwâsi di wi kan fruwakti fu nyan bun fu den.

10. Fu san ede yu kan abi a frutrow taki den godelowsu sma no sa pori a nyun grontapu fu ala ten?

¹⁰ Yesaya 66:24 e gi wi a dyaranti taki a vrede nanga a regtfardikifasi fu a nyun grontapu no sa de na ini kefar noiti. Godelowsu sma no sa pori en. Memre taki 2 Petrus 3:7 e taki dati ’a dei fu krutu èn a pori di godelowsu sma sa kisi’ de na wi fesi. Den godelowsu sma na den wan di sa kon na wan kaba. No wan ogri sa miti den sma di no abi fowtu, èn dati na heri tra fasi leki san e pasa na ini den orloku fu libisma, pe den borgu di e lasi den libi de moro furu leki den srudati di e lasi den libi. A Gran Krutuman e gi wi a dyaranti taki a dei fu en sa de wan pori fu den godelowsu sma.

11. Fa a ten di e kon sa de gi iniwan sma di de teige Gado èn teige na anbegi fu En, soleki fa Yesaya e sori?

¹¹ Den regtfardiki sma di sa tan na libi sa si taki a profeiti wortu fu Gado tru. Vers 24 e taki na fesi taki „den dedeskin fu den man di ben sondu teige” Yehovah, sa de wan buweisi fu a krutu fu En. Den krin èn libilibi wortu di Yesaya ben gebroiki kan skreki son sma. Ma a de akruderi wan sani di ben pasa trutru na ini a historia. Na dorosei fu den skotu fu na owruten Yerusalem yu ben abi presi pe den ben trowe doti èn, wanwan leisi, den dedeskin fu ogriman di den ben kiri èn di den no ben feni bun fu gi wan bun beri.a Drape den woron nanga a kefalek hati faya ben o pori a doti èn den dedeskin dati. Soleki fa a sori, dan na agersifasi fa Yesaya e taki sani e sori a fasti bosroiti fu a krutu fu Yehovah na tapu sondari.