• „Meki Wi Poti Afersi Kon Reti”
    A Profeititori fu Yesaya — Leti gi a Heri Libisma Famiri I

    • 1, 2. Nanga suma Yehovah e agersi den tiriman nanga a pipel fu Yerusalem nanga Yuda, èn fu san ede disi fiti?

      DEN sma di e libi na ini Yerusalem kande wani krin densrefi baka te den yere a krutu di skrifi na Yesaya 1:1-9. Sondro tweifri a ben de so, taki na wan bigimemre fasi den ben sa wani fu sori go na ala den srakti-ofrandi di den e tyari gi Yehovah. Ma vers 10 te go miti vers 15 e gi a piki di Yehovah e gi fu krutu den sortu denki dati na wan krakti fasi. A e bigin: „Yere a wortu fu Yehovah, un ogri-ati tiriman fu Sodom. Poti yesi arki a wet fu wi Gado, un pipel fu Gomora.”​—Yesaya 1:10.

      2 Gado ben pori Sodom nanga Gomora, no soso fu den lagi seks du fu den, ma so srefi fu a tranga-ati nanga a heimemre fasi fu denki di den ben abi (Genesis 18:20, 21; 19:4, 5, 23-25; Esekièl 16:49, 50). Den sma di ben arki Yesaya musu e skreki srefisrefi fu yere taki Yesaya e teki den gersi den sma fu den foto dati di Gado ben fluku.a Ma Yehovah e si en pipel soleki fa den de, èn Yesaya no e safu a boskopu fu Gado fu „switi den yesi fu den”.​—2 Timoteus 4:3.