16. Fu san ede wi kan abi a dyaranti taki Yehovah e si wi leki krin sma baka te a gi wi pardon fu den sondu fu wi?

¹⁶ Oiti yu pruberi fu puru wan flaka fu wan weti-weti krosi? Kande a flaka no komoto, aladi yu du ala sortu sani fu puru en. Luku san Yehovah e taki fu a fasi fa en e gi sma pardon: „Awansi den sondu fu unu ben sa de leki redi kloru, toku den sa meki kon weti neleki snew; awansi den ben sa redi leki redi krosi, den sa tron srefi leki wol” (Yesaya 1:18).a Noiti wisrefi sa man fu puru a flaka fu sondu. Toku Yehovah kan meki taki den sondu fu wi di de leki redi kloru noso redi krosi, kon weti leki snew noso leki weti wol. Sobun, te Yehovah e gi wi pardon fu den sondu fu wi, dan wi no abi fu firi leki a flaka fu den sondu dati sa tan wi heri libi langa.