MWBR17 06 Verwijzing gi Wi Kresten libi nanga a preikiwroko studie-buku
5-11 YUNI
GUDU NA INI GADO WORTU | YEREMIA 51, 52
„Ala san Yehovah taki e kon tru”
(Yeremia 51:11) „Srapu den peiri. Un man, go tanapu na baka den lontu skelt. Yehovah o meki den kownu fu den Mediasma go feti nanga Babilon fu pori en, bika na dati a abi na prakseri. Yehovah o puru atibron na Babilon tapu. Na fu en tempel ede a o puru atibron na en tapu.
(Yeremia 51:28) Sreka den pipel, den kownu fu Media, den granman nanga den ondro-granman fu Media, nanga ala den kontren di den e tiri, fu go feti nanga en.
it-2-O 279 ¶1, 2
Mediasma, Media
Den wini Babilon makandra nanga den Persiasma. Na ini a di fu aiti yarihondro Fosi Krestes, a profeiti Yesaya ben taki na fesi taki Yehovah ben o meki „den Mediasma go feti nanga” Babilon. „Den sma dati e si solfru leki noti èn den no gridi fu gowtu. Nanga den bo den o masi den yonkuman” (Yes 13:17-19; 21:2). A kan taki a wortu „Mediasma” abi fu du tu nanga den Persiasma. Furu Griki historia skrifiman fu owruten ben e gebroiki a wortu disi te den ben e taki fu den Mediasma nanga den Persiasma. Den sma disi ben e si solfru nanga gowtu leki noti. Sobun, den no go feti nanga Babilon fu kan teki a gudu fu den, ma fu teki en abra. Dati meki awinsi den Babilonsma ben wani pai den, toku dati no ben o tapu den Mediasma fu go feti nanga den. A bo ben de a moro prenspari fetisani fu den Mediasma nanga den Persiasma. Den bo fu den ben meki fu udu, ma den ben e meki bo fu kopro nanga udu tu (luku Ps 18:34). Den someni peiri di den ben e sutu nanga den bo disi ben „masi den yonkuman” fu Babilon. Den srapu peiri disi ben e boro go dipi na ini a skin fu den.—Yer 51:11.
A moi fu si taki Yeremia (51:11, 28) e taki dati „den kownu fu den Mediasma” go feti nanga Babilon. Kande a e taki disi fu di boiti Kownu Sirus fu Media, tra kownu ben e tiri a kondre tu, ma den no ben abi so furu makti leki en. Disi ben de wan gwenti fu a ten dati. (Luku sosrefi Yer 25:25.) Di den Mediasma, den Persiasma, den Elamsma nanga tra lo fu a kontren dati teki Babilon abra, dan den poti Darius „leki kownu fu a kownukondre fu den Kaldeyasma”. Soleki fa a sori, dan na Kownu Sirus fu Persia ben poti en leki kownu.—Da 5:31; 9:1.
(Yeremia 51:30) Den tranga man fu Babilon no man feti moro. Den sidon na ini den fortresi fu den èn den no abi krakti moro. Den tron leki umasma. Den oso fu a foto bron èn den sroto fu den portu broko.
it-2-O 392 ¶3
Nabonidus
Na tapu a Nabonidus-ston, wan moi sani skrifi di abi fu du nanga a neti di Babilon fadon: „A legre fu Sirus go na ini Babilon sondro fu feti.” Disi e kruderi nanga a profeititori fu Yeremia di ben taki dati ’den tranga man fu Babilon no ben o feti moro’.—Yer 51:30.
(Yeremia 51:37) Mi o meki Babilon tron wan ipi ston èn wan tanpe gi sabanadagu. Sma o skreki èn den o froiti te den si san pasa nanga en. Nowan sma o tan drape moro.
(Yeremia 51:62) Yu musu taki: ’Yehovah, yu taki dati ogri o miti a presi disi. Yu taki dati a o kisi pori so taki nowan sma èn nowan meti o man tan drape moro. A o tron wan brokopresi fu ala ten.’
it-1-O 217 ¶9
Babilon
Sensi di Babilon fadon na ini a yari 539 F.K., a foto bigin lasi en glori safrisafri. Tu leisi den sma fu a foto opo densrefi teige Grankownu Darius I (Hystaspis) fu Persia èn a di fu tu leisi den pori a foto. Bakaten den seti wan pisi fu a foto baka. Den sma fu a foto opo densrefi teige Serkses I. Dati meki Serkses I broko go ini a foto èn a teki ala den gudu tyari gowe. Aleksander a Bigiwan ben wani meki Babilon tron a mamafoto fu a Kownukondre fu en, ma a dede wantronso na ini 323 F.K. Nikator teki a foto abra na ini 312 F.K. Furu fu den sani di a gebroiki fu bow en nyun mamafoto Seleusia na a syoro fu Tigris-liba, a teki fu Babilon. Ma na ini a ten fu den fosi Kresten Babilon ben de ete èn wan tu Dyu ben e tan drape ete. Dati meki na apostel Petrus ben go na Babilon, soleki fa a skrifi na ini a brifi fu en (1Pe 5:13). Son dokumenti di sma feni drape sori taki wan tempel fu Bel ben de na ini Babilon na a ten fu a yari 75 F.K. Na ini a pisi ten baka a yari 300 B.K. a foto ben de wan brokopresi èn te fu kaba a no ben de moro. A foto tron „wan ipi ston”, soleki fa Bijbel taki.—Yer 51:37.
Diki moro dipi
(Yeremia 51:25) Yehovah taki: „Yu na wan bergi èn yu e pori a heri grontapu. Dati meki mi o strafu yu. Mi o langa mi anu fu naki yu. Mi o lolo yu puru na a hei presi fu yu èn yu o tron wan bergi di bron te na gron.”
it-1-O 282 ¶4
Bergi
Bergi e prenki tirimakti. Na ini Bijbel, bergi kan prenki kownukondre noso tirimakti. (Da 2:35, 44, 45; luku Yes 41:15; Opb 17:9-11, 18.) Di Babilon go feti nanga tra kondre a pori furu fu den. Dati meki Bijbel e kari en ’wan bergi di e pori heri grontapu’ (Yer 51:24, 25). Na ini wan psalm di e taki san Yehovah e du te sma wani feti nanga en, skrifi taki ’soso leti e lontu Yehovah. A bigi moro den bigi bergi pe busimeti lai’ (Ps 76:4). A kan taki „den bigi bergi pe busimeti lai” e prenki kownukondre di lobi feti. (Luku Na 2:11-13.) David ben taki fu Yehovah: „Yu poti mi bergi tanapu steifi.” Disi e sori taki Yehovah meki a kownukondre fu David kisi moro glori èn a meki en kon moro tranga. (Ps 30:7; luku 2Sa 5:12.) Fu di bergi kan prenki kownukondre, meki wi kan frustan o prenspari den wortu na ini Openbaring 8:8 de. A tekst e taki fu „wan sani di ben gersi wan bigi bergi di ben e bron nanga faya”. A kan taki disi abi fu du nanga wan tirimakti di e pori sani leki faya.
(Yeremia 51:42) A se wasi Babilon gowe. Furu skwala tapu en.
it-2-O 1327 ¶5
Se
Legre di e kon na sma tapu leki wan frudu. Yeremia ben taki dati den srudati di ben o kon feti nanga Babilon ben o de leki „a babari fu wan krasi se” (Yer 50:42). Sobun, di a taki dati „a se” ben o kon na tapu Babilon, a ben e taki fu den bun furu srudati fu Media nanga Persia di ben o kon feti nanga a foto.—Yer 51:42; luku Da 9:26.