SAKAFASI na wan sani di furu sma lobi. Nofo tron a de so taki wi lobi sma di abi sakafasi. Ma a sari fu si taki furu sma na ini a grontapu disi no abi trutru sakafasi, spesrutu den wan di abi makti noso di e tiri trawan. Ma fa a de nanga Yehovah Gado, a moro makti sma fu hemel nanga grontapu? A abi sakafasi? Kon meki wi luku san a profeiti Yeremia taki na ini Sari singi 3:20, 21.​—Leisi.

Yeremia sabi taki Yehovah o „beni” go na den wan di e sari trutru fu den sondu fu den. Den wortu disi e yepi wi fu si Yehovah leki wan safu-ati sma. Yu kan taki dati Yehovah, „a Moro Heiwan fu heri grontapu”, o beni kon èn o puru den anbegiman fu en na ini a takru situwâsi pe den de na ini. Dan a o blesi den baka (Psalm 83:18). A sani disi e meki taki Yeremia abi wan tranga howpu, a e gi en furu trowstu èn now a no e sari moro. A reti-ati profeiti disi abi a fasti bosroiti fu wakti nanga pasensi, teleki a ten doro taki Yehovah o frulusu en pipel di sori berow.​—Vers 21.