Arki — Yehovah waktiman e taki!

„Mi ben meki yu leki wan waktiman ini na oso fu Israël, èn na ini mi nen yu mu warskow den. — EZECHIËL 3:17.

1. Fu san-ede wi mu arki te Yehovah „waktiman” e taki?

YEHOVAH waktiman e taki now, na tapu na momenti disi, na boskopu fu Gado. Yu e arki? Yu libi e anga fu dati efu yu e teki nanga warderi na boskopu dati èn e go abra fu du wan sani. Heri esi ’den nâsi sa musu sabi suma na Yehovah’ te a e santa en bigi nen fudi a e pori na goddelowsu seti disi èn e hori en pipel na libi. Yu e howpu fu de a mindri den? (Ezechiël 36:23; 39:7; 2 Petrus 3:8-13) Na mogelijkheid dati yu e kisi, ma soso te yu e arki te Yehovah „waktiman” e taki.

2. San ben de a bakapisi taki a kownukondre fu Yuda no ben arki den profeiti fu Gado?

² Fudi Yuda ben poti en na wan sei fu arki na den profeiti fu Gado, meki dati rampu ben kon na ini 607 bifo G.T. tapu na kownukondre dati. Feyanti nâsi ben luku nanga ogri-ati prisiri na pori di den Babylonsma ben tyari kon. Ma fa a nen fu Yehovah ben kisi grani, di a ben meki taki getrow dyu ben drai kon baka na den kondre na ini 537 bifo G.T.

3. San wi e feni na ini na buku Ezechiël?

³ Na pori dati èn na kon bun baka ben taki na fesi nanga mofo fu Yehovah waktiman Ezechiël. Na bijbelbuku di e tyari en nen èn di a ben klari na ini sowan sani fu 591 bifo G.T. na ini Babylon, ben abi na ini en (1) na wroko di Gado ben gi Ezechiël; (2) profeitis prenki; (3) boskopu teige Israël; (4) sani di ben taki a fesi fu na krutu fu Yerusalem; (5) profeititori teige tra nâsi; (6) pramisi fu a kon bun fu sani baka; (7) wan profeititori teige Gog fu Magog èn (8) wan visioen fu na santa presi fu Gado. Wi e gi yu na kari fu leisi na buku aladi wi o meki wan studie fu en. Yu sa si dan fa a abi fu du nanga wi na ini a ten disi èn yu sa arki te Yehovah „waktiman” e taki.a

A waktiman fu Gado kisi wroko fu du

4. (a) San Ezechiël ben si na ini wan visioen? (b) Suma ben de den „libi mekisani”, èn sortu eigifasi den ben abi?

⁴ Na tapu 5 Tamuz 613 bifo G.T (na ini na di fu feifi yari fu na katibo fu na dyu kownu Yoyachin na ini Babylon) dan na priester Ezechiël di ben owru dritenti yari ben de a mindri den dyu katiboman na „na liba Kebar”, wan prenspari kanaal fu na liba Eufraat. Ini wan visioen a ben si Yehovah hemel wagi, ini kampani fu „fo libi meki sani”. (Leisi Ezechiël 1:4-10.) Ibriwan fu den libi mekisani”, ofu cherubs nanga frei ben abi fo fesi (Ezechiël 10:1-20; 11:22). Den disi e sori a tapu taki den cherubs di ben abi eigifasi fu lobi (libisma), geregtigheid (na lew), krakti (na burkaw), nanga koni (na aka) di den ben kisi fu Gado. Ibri cherub ben tanapu na sei wan kefarlek bigi ’wiel na ini wan wiel’ èn Gado yeye ofu wroko krakti ben kan buweigi cherubs nanga wiel go ini ibri richting. — Ezechiël 1:1-21.

5. San na hemel wagi e agersi, èn fa na prenki disi musu abi krakti tapu Yehovah pipel?

⁵ Na Sma di ben e rèi na wagi ben de wan glori prenki di ben sori fu Yehovah. (Leisi Ezechiël 1:22-28.) O bun na wagi e agersi na organisâsi Fu Gado di de fu engel! (Psalm 18:10; 103:20, 21; Daniël 7:9, 10) Yehovah e rèi a tapu na ini a fasi disi taki a e tiri tapu den mekisani disi èn e gebroiki den akruderi en prakseri. Na sma di e rèi a wagi ben de tiri, leki na alenbo di e go nanga en, ma Ezechël ben fruwondru. Seiker a mu de so taki na kefarlek bigi prenki fu Yehovah glori èn makti leki na moro hei Orgaman fu en hemel legre mu furu wi nanga sakafasi èn tangi gi na grani fu mag dini en leki wan pisi fu en.

6. (a) Sortu wroko Ezechël ben kisi, èn fa a ben si a dienst fu en gi Gado? (b) Na mindri sortu sma Ezechiël ben mu taki profeititori, èn fu san-ede a sabi di wi abi fa Gado handri nanga en, kan tyari bun gi wi?

⁶ Aladi Ezechiël ben kisi fu memre taki en na wan libisma èn de ini wan mendri toestand fudi den kari en „libismapikin”, toku den ben poti en fu du wroko leki Yehovah profeiti. (Leisi Ezechiël 2:1-5.) Ezechiël ben sa mu go na „tranga-ede nâsi”, den kownukondre Israël nanga Yuda. Fosi tapu na komando fu Gado a ben nyan wan lolo di ben abi kragisingi, ma a ben tesi leki oni fudi a ben de grantangi fu de na profeiti fu Gado. Na net so salfu kristen nanga den kompe dienstknegti fu den e feni en wan switi ondrofeni fu de Kotoigi fu Yehovah. Ezechiël ben mu taki profeititori a mindri fu sma di ben de tranga fu ati èn tranga fu ede, ma Gado ben sa meki en fesi net so nanga wan faste bosroiti leki na fesi fu den, èn en fes’ede so tranga leki diamanti. A ben sa taki profeititori fri èn sondro frede, efu den ben sa arki now ofu no. Na wan sani di e gi dek’ati fu sabi taki soleki Gado ben hori Ezechiël tanapu na ini muilek omstandigheden, èn sa yepi wi na wan dek’atifasi ini sortu kontren tu fu gi kotoigi. — Ezechiël 2:6–3:11.

7. Sortu frantwortu di na kisi di Ezechiël ben kisi wroko, ben tyari kon nanga en?

⁷ Na nyan fu na lolo ben tyari kon na ini Ezechiël ’wan atibron fu yeye’ kon di ben fiti gi na inibere fu en. Na ini Tel-Abíb a ben tan seibi dei nanga fruwondru fu prakseri san a boskopu wani taki (Ezechiël 3:12-15). ooktu wi mu go denki dipi èn studeri fayafaya fu ferstan dipi yeye sani. Now di Ezechiël ben abi wan boskopu fu meki bekenti, dan a ben kisi a wroko leki Gado waktiman. (Leisi Ezechiël 3:16-21.) Na waktiman di ben poti a wroko nyunyun ben warskow Israëlsma di ben psa a wet taki wan strafu di komoto fu Gado ben e wakti den.

8. Suma na ini a ten disi e dini leki Yehovah „waktiman” èn suma moksi densrefi nanga den?

⁸ Efu Ezechiël leki waktiman ben misi, dan Yehovah ben sa hori en frantwortu fu na dede fu den sma. Aladi den sma di no ben wani taki a ben mu gi pir’ai, na agersifasi go tai titei lontu en, toku a ben kan meki nanga dek’ati na boskopu fu Gado bekenti (Ezechiël 3:22-27). Na ini wi ten na kristenheid e weigri fu arki èn a e pruberi fu poti skotu gi salfu kristen. Ma sensi 1919 den salfuwan disi ben dini leki Yehovah „waktiman” èn ben ferteri nanga dek’ati en boskopu gi na „ten fu na kaba” fu na seti disi (Daniël 12:4). Makandra nanga den na ini na wroko disi yu abi wan „bigi ipi” fu Yesus „tra skapu” di dei fu dei e kon moro bigi (Openbaring 7:9, 10; Yohannes 10:16). Fudi na „waktiman”-klasse e tan taki a boskopu fu Gado, dan seiker ibriwan fu den salfuwan èn na „bigi ipi” sa wani teki prati na a meki bekenti dati leki wan geregelde preikiman.

Profeititori di ben gi na ini wan eksempre

9. (a) Fa Ezechiël ben gi wi wan eksempre? (b) San Ezechiël hen du fu sori na ini wan eksempre na fasi fa den Babylon legre ben o lontu Yerusalem, èn san den 390 dei nanga den 40 dei e sori?

⁹ Now Ezechiël e sori nanga sakafasi èn nanga fri fu taki sondro frede ini wan eksempre na agersifasi sani di o psa, èn nanga a fasi dati e gi wan eksempre di mu buweigi wi fu du na wroko di wi kisi fu Gado nanga sakafasi èn nanga dek ati. Fu sori fa na lontu di den Babylonsma ben o lontu Yerusalem, dan a ben mu go didon nanga en fesi e luku wan bow-ston pe a ben marki wan prenki fu Yerusalem. Ezechiël ben mu didon 390 dei tapu en kruktu anusei fu tyari na sondu fu na tin-lo kownukondre Israël èn morofara 40 dei tapu en reti-anusei fu tyari na sondu fu na tu-lo kownukondre Yuda. Wán dei ben de fu wán yari. Den 390 yari ben waka sobun fu na ten di na Israël kownukondre ben opo na ini 997 bifo G.T. te na a pori fu Yerusalem na ini 607.bifo G.T. Den 40 yari fu Yuda ben waka fu a ten di Yeremia ben kisi en wroko leki profeiti na ini 647 bifo G.T. te leki Yuda ben kon kisi pori na ini 607 bifo G.T. — Ezechiël 4:1-8; Yeremia 1:1-3.

10. Fa na agersifasi Ezechiël ben sori den bakapisi fu na lontu di srudati ben o lontu Yerusalem, èn sortu leri kan kisi fu a sani disi taki Yehovah ben hori baka gi en?

¹⁰ Ezechiël morofara ben sori den bakapisi fu na lontu di den srudati ben lontu a foto. Fu agersi fa a ben o de nanga angriten, dan a ben libi tapu wan sani fu moro leki tu ons nyanyan èn sowan sani fu wan afu liter watra wan dei. En brede (kontrari na wet ben de wan moksi moryon fu tarwe, gerst, tuinbonki, linzen, gierst nanga spelt, èn den dati ben baka tapu wan faya fu kuku fu kunkun) èn dati ben de wan sani di no krin (Leviticus 19:19). Na sani disi ben meki sma si taki Yerusalem ben sa pina fu nyanyan srefsrefi. Ma fa a e gi dek’ati fu sabi taki soleki Yehovah ben hori baka gi Ezechiël ondro muilek ten, Gado sa meki wi tan getrow èn fu du wi preikiwroko awansi pina de! — Ezechiël 4:9-17.

11. (a) Sortu du den e kari ini Ezechiël 5:1-4, èn san den ben wani taki? (b) Sortu krakti a mu abi tapu wi taki Yehovah ben meki den sani di Ezechiël ben sori ini eksempre kontru?

¹¹ Dan Ezechiël e gebroiki wan feti-owru fu krabu en wiwiri èn barba puru. (Leisi Ezechiël 5:1-4.) Den sma di ben o dede leki wan bakapisi fu na angriten èn na pestsiki ben sa de leki na di fu dri pisi fu na wiwiri fu na profeit di a ben bron na ini a mindri fu Yerusalem. Den sma di ben o fadon na ini na feti ben sa de na di fu dri pisi di a ben naki nanga a fet’-owru. Den sma di ben tan a libi ben sa panya go na mindri den nâsi leki na di fu dri pisi fu en wiwiri di a ben stroi na ini na winti. Ma son katiboman ben sa de leki den wantu wiwiri di ben teki fu na pisi di ben stroi èn di ben domru na ini na krosi fu Ezechiël fu kan sori nanga dati taki den sma ben sa teki drape nyun baka na tru anbegi, baka te Yuda ben didon seibitentin yari leigi èn brokobroko (Ezechiël 5:5-17). Dati Yehovah ben meki den profeitiprenki disi nanga trawan kon tru, mu buweigi wi fu bow tapu en leki na sma di e meki profititori kon tru. — Yesaya 42:19; 55:11).

Pori di de fu kon!

12. (a) San den sma di o hari kon na inisei ben sa du leki fa Ezechiël 6:1-7 e taki? (b) Leki fa na profeititori fu Ezechiël taki dan san na a agersi Yerusalem, èn san sa pasa nanga en?

¹² Na ini 613 bifo G.T. Ezechiël ben opo taki gi na kondre fu sori san ben sa psa nanga den sma fu Yuda di ben e anbegi kruktu gado. (Leisi Ezechiël 6:1-7.) Den sma di ben o fadon kon na inisei ben sa pori den heipresi, den switi smeri tafra èn altari fu falsi anbegi. Soso na prakseri kaba fu na kiri di angriten, pestsiki nanga feti ten sa kiri sma puru, ben sa mu buweigi wan sma fu bari taki „Ke!” èn fu poti krakti na a bari fu en di a ben o klap na ini den anu èn stampu nanga futu. Den heipresi ben sa furu nanga dedeskin fu yeye sutaduman. Te na kristenheid, na agersi Yerusalem, sa ondrofeni sowan sortu pori, dan a sa sabi taki a rampu fu en komoto fu Yehovah. — Ezechiël 6:8-14.

13. San ben de „na tiki” na ini Yehovah anu, èn san na gebroiki fu en ben tyari kon leki bakapisi?

¹³ ’Na kaba ben kon tapu den fo uku fu na kondre’, na ontrow kerki sistema fu Yuda. Wan „krans” fu rampu sani ben sa de lontu na ede fu wan kruktu gado diniman te na „tiki” na ini Gado anu — Nebukadnezar nanga en Babylon grupu — ben sa bigin du sani teige Yehovah pipel èn en tempel. Den sma di ben de a mindri Yuda „ipi” fu bai man nanga seriman, den ben sa kiri ofu tyari go na ini katibo, èn den anu fu den sma di ben sabi fu tan a libi, ben sa kon slap fu swakifasi, pe den ben si fa na falsi kerki sistema fu den ben trowe na gron, dan a ben o de leki den ben sa krebi den ede leki wan marki fu row. — Ezechiël 7:1-18.

14. San tyuku no ben sa du gi Yerusalem, èn san disi e sori gi na kristenheid?

¹⁴ Yehovah nanga den legre fu en fu tyari strafu kon sma no kan bai den nanga moni fu no du so. (Leisi Ezechiël 7:19.) Nowan tyuku no seni ben kan kibri „na kibri presi” na moro santa presi, fu kon de wan presi di no de krin di Chaldew „fufuruman” ben fufuru santa sani èn ben libi na tempel na baka brokobroko. Yehovah ben meki ’na heimemre fu den trangawan tapu’ di kownu Zedekia ben teki gwe leki strafuman èn prenspari memre fu na priesterwroko fu Levi ben dede (2 Kownu 25:4-7, 18-21). Nono, sondari na ini na Yerusalem di srudati ben lontu no ben kan lon gi na rampu fu gi tyuku di Gado ’kon krutu den’ leki sma di broko na ferbontu. Tapu densrefi sortu fasi na kristenheid no sa man fu hari ensrefi puru na a krutu fu Gado di o kon tapu en nanga fu gi tyuku na ini na ten te sani di ai si leki santa sa kon doti. A sa de tumsi lati dan fu arki ete na Yehovah „waktiman”. — Ezechiël 7:20-27.

Soktu fu tegu sani

15. San Ezechiël ben si na ini Yerusalem, èn san disi mu abi leki krakti tapu wi?

¹⁵ Di Ezechiël ben si tapu 5 Elul 612 bifo G.T. na ini wan visioen na glori fu Gado, ’dan wan sani di ben abi na vorm fu wan anu, ben teki en na wan flekti fu en wiwiri’ èn ben tyari en go na Yerusalem nanga yepi fu na yeye fu inspiratie. Ooktu na hemel wagi ben go drape. San Ezechiël ben si ben mu meki wi skreki na a prakseri wawan kaba taki wi ben sa arki na sma di fadon komoto na bribi (Odo 11:9). Na ini a tempel Israëlsma di ben fadon komoto na bribi ben e anbegi wan kruktu gado symbool (kande wan santa postu) di ben tigri Gado dyarusu (Exodus 20:2-6). Ezechiël ben waka go na ini na fes’seidyari èn fa a ben si wan lo tegu sani drape! (Leisi Ezechiël 8:10, 11.) Fa a ben de wan syen sani taki 70 owruman fu Israël ben e offer drape switismeri gi falsi gado di den feragti prenki fu den ben marki poti tapu na skotu! — Ezechiël 8:1-12.

16. San Ezechiël visioen e sori fu na krakti fu na fadon komoto fu bribi.

¹⁶ Na visioen fu Ezechiël e meki wi si fa a fadon komoto fu bribi di e tyari dede kon de gi na yeyefasi. Uma fu Israël ben tyari go so fara fu krei gi Tammuz, wan Babylon gado èn freiri fu na vruchtbaarheid uma-gado Isytar! Èn fa a de wan ogri sani fu si 25 Israël man na ini na inisei fesdyari fu na tempel e anbegi na son (Deuteronomium 4:15-19) Den ben sutu go na a noso fu Gado wan fisti taki, kande wan agersifasi fu na manpresi fu wan man. A no de wan wondru taki Yehovah no ben e arki na den begi fu den, net soleki na kristenheid sa suku te den weri na yepi fu en na ini a ten fu „na bigi benawtu”! — Ezechiël 8:13-18; Mattéus 24:21.

Kisi wan marki fu tan a libi

17. Sortu seibi man den ben si na ini wan visioen, èn fa den ben e du?

¹⁷ Dan wi e si seibi man — wan sekretarsi di weri linnen krosi èn seibi trawan nanga fetisani fu kiri sma. (Leisi Ezechiël 9:1-7.) Den „siksi man” ben agersi Yehovah hemel krutuman fu tyari strafu kon, aladi a e meki gebroiki fu grontapu wrokosani. Den sma di tapu a fes’ede fu den na „man ini linnen” ben poti wan marki, ben sa ondrofeni na sari-ati fu Gado fudi den no ben e agri nanga den tegusani di ben du na ini na tempel. A kiri fu sma fu a sei fu „siksi man” ben bigin drape nanga den seibi owruman di ben bribi kruktu gado, den uma di ben krei gi Tammuz èn den 25 anbegiman fu son. Den sma disi èn trawan di ben de ontrow den Babylonsma ben kiri na ini 607 bifo G.T.

18. (a) Suma na a disiten ’man na ini linnen’? (b) San na a „marki”, suma abi en now, èn san na abi fu na marki sa abi leki bakapisi?

¹⁸ Na agersi ’man na ini linnen’ de na klasse fu salfu kristen. Den e go oso-fu-oso fu poti wan agersi marki tapu den sma di e go tron wan pisi fu na „bigi ipi” fu Kristus „tra skapu”. Na „marki” de na buwijsi taki den sortu skapu disi de sma di gi densrefi abra èn teki dopu èn di abi wan kristen persoonlekheid. Den ’ben soktu èn geme fu den tegu sani’ di ben du na ini na kristenheid, èn den ben komoto fu Babylon na Bigiwan, na grontapu makti fu falsi fasi fu anbegi (Openbaring 18:4, 5). Na „marki” fu den sa sori den krutuman fu Gado di e tyari na strafu kon taki den mu tan na libi na ini a ten fu „na bigi benawtu”. Den tan hori na „marki” dati fudi makandra nanga den salfuwan den abi wan prati na ini fu poti wan marki baka tapu tra sma. Efu sobun yu ben kisi na „marki”, dan yu mu abi wan prati fayafaya na a markiwroko. — Ezechiël 9:8-11.

Wan faya pori di e kon!

19. San na disiten ’man na ini linnen’ e stroi na tapu na kristenheid?

¹⁹ Na man di ben weri linnen krosi e go a mindri den wiel fu na hemel wagi fu teki krofaya di abi faya. Te den disi ben iti a tapu Yerusalem, di nanga dati ben kon sabi a fesi taki a pori fu en ben sa de wan sori fu Yehovah faya atibron (Ezechiël 10:1-8; Kragisingi 2:2-4; 4:11). Na ini den dei fu Ezechiël Yehovah atibron ben kanti nanga yepi fu den Babylonsma (2 Kronieken 36:15-21; Yeremia 25:9-11). Ma san wi kan taki fu a ten fu wi? Na agersi ’man na ini linnen’ e stroi psa na heri kristenheid na faya boskopu fu Gado leki wan boskopu dati now heri esi Gado atibron sa kon kowru tapu en èn a tra pisi fu Babylon na bigiwan. A no de fu taki taki gi den di e weigri fu arki Yehovah „waktiman”, no abi nowan howpu fu tan a libi. — Yesaya 61:1, 2; Openbaring 18:8-10, 20.

20. (a) Sortu krakti a mu abi tapu wi efu wi e si o soifri den wiel fu na hemel wagi èn den cherubs e wroko nanga makandra? (b) Nanga san son granman ben de bezig èn nanga san den ben teki Yerusalem agersi na wan fasi di no de reti?

²⁰ Agen prakseri e poti na tapu na hemel wagi, Gado hemel organisatie. Efu wi e si o soifri den wiel fu na wagi èn den cherubs e wroko nanga makandra, dan disi mu tyari wi go so fara fu wroko dorodoro makandra nanga Gado grontapu organisâsi. Fu loyaliteit ede wi mu kibri en ooktu teige ferraderlek man (Ezechiël 10:9-22). Na ini Ezechiël ten der sortu man dati ben de bika a ben si 25 granman di ben e meki komplot fu meki opruru teige Gado krutuman di o tyari pori kon, wan sani pe den ben go suku a yepi fu Egypte. Den ben agersi Yerusalem nanga wan bigi patu èn densrefi nanga meti di ben de bun drape na inisei. Ma den ben kori den krabyasi! Na „feti-owru” fu Babylon „freemde sma” ben sa kiri son sma fu den sma di e meki ogri aladi den ben sa kisi trawan gwe. Disi ben sa psa fudi Gado ben hori den dyu frantwortu fu na broko fu en ferbontu (Ezechiël 11:1-13; Exodus 19:1-8; 24:1-7; Yeremia 52:24-27). Fudi na kristenheid ben taki taki den de ini wan ferbontu nanga Gado, ma e poti den fertrow na ini grontapu ferbontu, meki a sa wai puru na ini na aanval fu Yehovah krutuman di e tyari strafu kon.

21. San ben psa baka den seibitenti yari di Yuda ben de leigi èn sondro sma èn na na sortu sani di yu kan teki gersi na salfu fikapisi disi abi fu du?

²¹ Aladi dyu ben „panya abra den kondre”, soleki na ini 617 bifo G.T., toku Gado ben de „wan santa presi” ofu kibripresi, gi den katiboman di ben abi berow (Ezechiël 11:14-16). Ma san den ben kan fruwakti morofara? (Leisi Ezechiël 11:17-21.) Baka den seibitenti yari di Yuda ben pori èn de sondro sma dan wan fikapisi ben tyari kon baka na tapu na gron fu Israël di ben kon krin. Tapu sowan sortu fasi te wi teki sani gersi dan baka wan katibo a ini Babylon a salfu fikapisi ben kon fri na ini 1919, èn na ondro tiri fu Gado santa yeye na „gron fu na yeye Israël” di wan dei den ben gwe libi ben kon krin. Den sma di kisi wan „marki” fu tan a libi, e nyan bun fu dat’ede now fu a bun-ati fu Gado nanga na fikapisi fu na yeye Israël di kon bun baka. Efu yu e tan arki Gado „waktiman”, dan yu kan de a mindri den sma di e tan a libi te Yehovah e hari en fet’-owru puru.

[Futuwortu]

Yu kan memre disi ete?

◻ Fu san-ede yu mu arki te Yehovah „waktiman” e taki?

◻ San na hemel wagi fu Yehovah e agersi?

◻ Suma na ini a ten disi e dini leki Yehovah „waktiman”?

◻ Sortu du fu sma di fadon komoto fu na bribi Ezechiël ben si na ini Yerusalem, èn sortu krakti na visioen disi mu abi na tapu yu?

◻ Suma na a disiten ’man na ini linnen’, èn san na a „marki” di a e tyari kon na tapu fes’ede?