• „Mi o poti wán skapuman”
    Yehovah seti a tru anbegi baka

    • 5. Sortu agersitori Esekièl fruteri?

      5 Leisi Esekièl 17:3-10. Disi na a agersitori: Wan „bigi aka” e broko na ede fu wan sedrebon, dan a e tyari en go prani „na ini wan foto pe bisnisman de”. Na aka e teki „siri fu a kondre”, dan a e sai den na wan gron di bun fu sai siri. A sai den na sei „wan bigi liba”. A siri bigin gro èn a e kon tron „wan moi fatu droifibon”. Baka dati wan tra „bigi aka” e frei kon. A droifibon e „langa den rutu fu en go” na a di fu tu aka fu di a wani taki a tyari en go prani na wan tra presi di lai watra. Yehovah no lobi a sani disi di a droifibon du èn dati meki a e taki dati sma o rutu en puru èn taki a o „drei gowe krinkrin”.

      Wan aka nanga wan pisi fu na ede fu wan sedrebon.

      A fosi bigi aka ben de Kownu Nebukadnesar fu Babilon (Luku paragraaf 6)

      6. Fruteri san na agersitori wani taki.

      6 San na agersitori wani taki? (Leisi Esekièl 17:11-15.) Na ini 617 Fosi Krestes, Kownu Nebukadnesar (a fosi „bigi aka”) kon feti nanga Yerusalem. A puru Yoyakin („na ede fu a sedrebon”) leki kownu fu Yuda èn a tyari en go na Babilon („wan foto pe bisnisman de”). Nebukadnesar poti Sedekia (wan fu den „siri fu a kondre”) leki kownu na Yerusalem. A nyun Kownu disi fu Yuda ben musu sweri na ini Gado nen taki a ben o du ala san a kownu fu Babilon ben o taigi en (2 Kron. 36:13). Ma Sedekia no hori ensrefi na a sweri di a meki. A opo ensrefi teige Babilon èn a go suku yepi na a kownu fu Egepte (a di fu tu „bigi aka”) nanga a legre fu en. Ma dati no tyari wini kon gi en. Yehovah no ben breiti nanga a sani di Sedekia du (Esek. 17:16-21). Bakaten den puru Sedekia leki kownu èn a dede na ini strafu-oso na Babilon.​—Yer. 52:6-11.