7. Sortu dyaranti den bon na sei a liba ben gi den Dyu di ben komoto na ini katibo?

⁷ Bon di e gi froktu èn di e meki sma kon betre. Fa a de nanga den bon di de na a syoro fu a liba? Den bon disi ben meki a presi moro moi. Ma den e prenki wan sani tu. Esekièl nanga den tra Dyu ben musu fu prakseri o switi a ben o de fu nyan den froktu di den bon dati ben o gi ala mun. Den bon ben gi den Dyu a dyaranti taki Yehovah ben o gi den leri di de leki nyanyan. Sortu tra dyaranti den bon ben gi den? Luku taki den wiwiri fu den bon ’ben o meki sma kon betre’ (Esek. 47:12). Yehovah ben sabi taki den Dyu di ben o drai kon baka ben o abi yepi fanowdu fu kon abi wan bun matifasi baka nanga en èn a pramisi den taki a ben o yepi den. Tra profeititori e sori fa a du dati, soleki fa wi si na ini kapitel 9 fu a buku disi.

Bon di e gi froktu èn di abi wiwiri di e meki sma kon betre

NA INI OWRUTEN: Di a pipel fu Yehovah drai go baka na den kondre, a gi den leri èn a yepi den fu anbegi en na a fasi di a feni bun. Na wan agersi fasi a dresi den tu fu di a yepi den fu tapu nanga falsi anbegi

NA INI A TEN FU WI: Wi e kisi furu leri di e yepi wi fu tan gi yesi na Yehovah, fu no du seryusu sondu èn fu no tyari wisrefi leki den sma fu a grontapu disi

NA INI A TEN DI E KON: Krestes nanga den 144.000 sma di o tiri makandra nanga en o yepi libisma fu no abi sondu moro, fu kon gosontu baka èn fu libi fu têgo!