Di Yehovah ben leri tiriman wan les
’ALA en wroko na waarheid èn en pasi gereg tigheid èn a kan lagi den wan di e waka na ini heimemre.’ — DANIËL 4:37.
1. Tapu sortu eigifasi fu Yehovah poti Elihu e poti a prakseri?
„LUKU! Gado srefi e handri hei nanga en krakti; suma de wan leriman leki en?” Den wortu dati fu Elihu di a ben taigi Yob na a ten fu a pina di a ben ondrofeni, e poti prakseri tapu wan fu en aparti eigifasi fu na Mekiman, Yehovah Gado. Nowan sma yu kan teki gersi nanga en efu a e kon tapu na gi leri na tra sma. — Yob 36:22.
2, 3. (a) San na wan fu den les di Yehovah ben feni en fanowdu fu leri sma? (b) Suma ben de na ini a ten fu Mozes wan tiriman di Yehovah ben mu leri en wan les, èn nanga yepi fu san? (c) Ofurutron Yehovah e ferteri ini en Wortu en bedoeling fu leri sma a les disi?
2 Wan fu den sani di Gado ben mu leri libisma nanga nâsi, de na yoisti matifasi nanga en. Disi e kon bun krakti a fesi na ini den wortu fu na psalmsingiman David na ini Psalm 9:19, 20: „Opo tanapu tog o Yehovah! No meki na libisma di e dede sori taki a de tumsi hei na ini tranga. Meki den nâsi kisi krutu na yu fesi. Meki den kisi frede, o Yehovah, sodati den nâsi mag fu sabi taki den de soso libisma di e dede.”
3 Na Farao fu Mozes ten ben de wan fu den tiriman dati fu a grontapu di Yehovah ben mu leri na les disi. Gado ben du disi nanga yepi fu den plaag di a ben tyari kon tapu den Egyptesma. Boiti fu dati Yehovah ben gi na bigi memre Farao dati fu frustan: „Te nanga dya yoisti mi ben meki yu de fu sori yu mi krakti èn fu mi meki mi nen bekenti tapu na heri grontapu” (Exodus 9:16). Èn moroleki seibitenti tron fu Exodus 6:7 te Yoël 3:17, Yehovah e taki na ini en Wortu taki a sa du den sortu makti wroko disi sodati tiriman, folku nanga nâsi sa kon sabi taki en na Yehovah, na Moro Heiwan tapu na heri grontapu.
4. Sortu dri tiriman na ini a ten fu Daniël Yehovah ben gi leri, èn nanga yepi fu san?
4 Wantu tumsi moi eksempre fu na fasi fa ehovah gi leri na den tiriman skrifi na ini na buku Daniël, den tiriman disi ben de Nebukadnezar, Belsazar nanga Darius. Oten a bon gi den leri? A ben de seiker a mindri 617 bifo G.T. èn 535 bifo G.T. Èn fa? Nanga yepi fu dren nanga san den wani taki èn nanga yepi fu a sori fu en makti. Yehovah ben leri den libisma tiriman disi taki en de a Moro hei Soeverein fu na universum èn taki den ben de soso nyofi pikin libisma — les di disi ten grontapu tiriman ooktu sa mu leri.
5. Nanga na kotoig fu san wi kan piki den sma di e degedege na a tru fasi fu a buku Daniël?
5 Ma furu modern sma di e feni fowtu tapu sani no e feni taki na buku fu Daniël no de tru? Den sma disi di e feni fowtu tapu sani ben kisi wan piki fu wan bijbelleriman di ben ferklari: „Ini a tori fu den wondru den e erken sondro fu taki wan wortu ma ini a tori fu den profeititori den e taki nanga krakti taki Daniël ben skrifi den leki wan sma di ben e libi ini a ten dati. Wi abi sobun ofu tru wondru èn tru profeititori ofu wi no ben sa abi noti leki lei” (Daniël the Prophet, fu na mofo fu E.B. Pusey, blz. 75). Iya, alaten baka na skrifiman fu a buku e meki den kon sabi en, fu eksempre nanga den wortu „misrefi, Daniël”! (Daniël 8:15; 9:2; 10:2) Ala disi na wan falsi sani? Bifo den bigin yari fu na di fu tina-aiti yarhondro no den dyu èn no den kristensma ben degedege suma ben skrifi na buku Daniël. Ma san e poti moro krakti tapu a tori leki na meine fu sortu modern bijbelleriman ooktu, den kotoigi fu na bibel di e gi fu na buku Daniël. Na so wi e feni Daniël nen kari dri tron na ini a buku Ezechiël (Ezechiël 14:14, 20; 28:3). Den moro overtoigi wortu de fu Yesus na Manpikin fu Gado di skrifi na ini Mattéus 24:15, 16: „Te un si fu dat’ede na tegu sani di e tyari pori kon, èn di na profeiti Daniël ben taki fu en, e tanapu na ini wan santa presl, (na leisiman mu gebroiki koni fu si sani), meki den sma di de na ini Yudea, lon go na den bergi.”
Nebukadnezar e leri suma na a tru Gado
6. San kan ben gi tranga na a bigimemre fu a kownu fu Babylon èn san a ben taki fu ensrefi na ini den buku fu en?
6 Soleki na profeiti Yesaya e meki wi si, dan den kownu fu Babylon ben de tumsi bigi-memre man (Yesaya 14:4-23. Nebukadnezar ben de ooktu wan man di ben lobi dini gado sani. Na ini den buku a e ferteri fu „en bowproyekti èn na prakseri fu en gi den gado fu Babylonia”. A no de fu taki dati disi ben frei go na en ede taki a ben man fu wini Yerusalem nanga heri Yudea baka di Sanherib ben misi na ini en muiti sofasi taki a ben tyari rampu kon gi en.
7. Sortu ondrofeni, di skrifi na ini Daniël kapitel 1, mu ben gi Nebukadnezar respeki gi na Gado fu den Hebrewsma?
7 Bakadi Daniël nanga en dri Hebrew mati ben kon na fesi Nebukadnezar, dan disi ben abi reide fu respeki a Gado fu den, bika „fu taki fu ibri afersi fu koni èn fu frustan di a kownu ben aksi den fu dati, a ben kon si te fu kaba srefi taki den ben de tintron moro bun leki ala magi-priester nanga den towfruman di ben de na ini en heri kownu gebied”. Iya, den koniman di ben abi Yehovah leki den Gado, ben psa krinkrin ala den sma di ben anbegi tra gado. Nebukadnezar ben musu fu ben si a tori dati. — Daniël 1:20.
8. Nanga yepi fu san Yehovah ben puru a bere fu den koniman fu Babylon kon na doro leki man sondro wanenkri spesrutu sabi?
8 Yehovah ben musu meki Nebukadnezar kon frustan moro ete. Na tra leri ben skrifi na ini Daniël kapitel 2. Gado ben gi na kownu wan skreki dren èn a ben meki a fregiti dati. Na tiriman fu Babylon ben bruya srefsrefi fu na dren disi èn a ben seni kari ala en koniman fu ferteri dren. Dati den no ben man, lastan san a wani taki, èn nanga disi sondro fu taki wan wortu den ben piki taki den no ben abi na spesrutu sabi. Disi ben meki na kownu atibron sote dati a ben gi komando fu kiri den alamala. Di Daniël nanga en kompe ben kisi fu yere na bosroiti fu na kownu dan Daniël ben aksi pikinso ten, èn den ben agri nanga dati. En nanga en dri kompe ben meki a tori disi tron wan tori fu faya begi, nanga na bakapisi dati Yehovah ben tyari na dren èn san a wani taki kon krin gi Daniël. — Daniël 2:16-20.
9. (a) Suman wawan ben man fu tyari Nebukadnezar dren kon a krin èn san na Sma disi di e tyari sani kon a krin ben sori san a wani taki? (b) Na sortu bosroiti na kownu ben kon leki wan bakapisi fu dati?
9 Di den ben tyari Daniël go na fesi na kownu, Nebukadnezar ben aksi en: „Yu de koni nofo fu ferteri mi na dren di mi ben si èn san a wani taki?” Bakadi a ben memre na bigi-memre tiriman taki den koniman fu en no ben man fu tyari na kibritori fu en dren kon a krin, dan Daniël bel taki: „Ma ete wan Gado de na ini hemel di de wan sma di e tyari kibritori kon a krin, èn en ben meki bekenti na kownu Nebukadnezar san sa psa na ini na laste fu den dei.” Dan Daniël ben ferteri na kownu fu na kefarlek bigi popki di a ben dren fu en èn a ben ferteri en san a wani taki. Na kownu ben fruwondru sote, dati a ben ferklari: „Futru, na Gado fu unu na wan Gado fu den gado èn wan Masra fu den kownu èn wan Sma di e tyari kibritori kon a krin, bika yu ben man fu tyari na kibritori disi kon a krin.” Na so Yehovah ben leri kownu Nebukadnezar taki En de na wanenkri tru Gado. — Daniël 2:26, 28, 47.
10, 11. (a) San kownu Nebukadnezar ben meki na ini en bigi heimemre, èn sortu komando a ben gi baka dati? (b) Sortu strei den di Hebrewman ben meki kon di den ben weigri fu du a komando fu a kownu, èn nanga sortu bakapisi?
10 Aladi Nebukadnezar sondro degedege ben de na ondro na indruk fu na sabi èn koni fu na Gado fu den Hebrewsma, toku a ben mu leri furumoro ete. Na ini en heimemre a ben meki den meki wan bigi gowtu popki tapu na lagi presi fu Dura. Na popki ben hei siksitenti el èn siksi el bradi, san e meki wi denki na a nomru 666 di de na marki fu Satan „ogri meti” di Openbaring 13:18 e kari. (Fudi wan el de pikinmoro wan afu meter, dan na popk ben de so wan sani fu 2 meter hei èn sowan sani fu 2,7 meter bradi.) Na kownu ben gi ala hei lantiman fu en kownukondre komando „fu kon na a inwijding fu a popki” èn ben komanderi taki te wan orkest fu pokuman ben e go prei, dati ala sma ben mu fadon a gron èn ben mu anbegi na popki. Wantu dyarusu Chaldew lantiman di ben si taki den dri Hebrewsma ben de drape ma no ben abi wan prati na a ceremonie, ben go kragi den na a kownu. — Daniël 3:1, 2.
11 Disi ben de wan aparti seryusu afersi gi kownu Nebukadnezar, bika wan dei a ben meki bigi taki en „ben de a sma di ben poti na ini a mofo fu na pipel fu gi grani na den bigi gado”. Disi ben de wan hebi afrontu gi Nebukadnezar en kownu glorifasi èn ooktu gi en faya gi en fasi fu anbegi. Na ini atibron èn faya ati na heimemre tiriman ben gi den dri Hebrewman ete wan kans ma nanga na laste kondisi: „Efu unu no e anbegi, dan unu sa iti go tapu a srefi mnmenti dati go ini na faya onfu di hati. Èn suma de na gado dati di kan ferlusu unu puru fu mi anu?” We, Nebukadnezar ben mu kon sabi taki a Gado fu den futru ben man fu fri en dienstknegti komoto fu na anu fu wan nyofi pikin kownu èn taki nowan tra Gado de di kan ferlusu soleki na Gado fu Israël. — Daniël 3:15.
NA dren fu wan bon
12, 13. (a) San Daniël ben tyari kon a krin gi Nebukadnezar fu en dren fu wan bon? (b) Fa Nebukadnezar ben sori taki san a dren ben wani taki no ben abi wan krakti tapu en fu a kisi en frustan?
12 San na leri fu den les dati ben sa ben du gi yu? Leki fa a gersi dan den dri les disi no ben nofo fu meki Nebukadnezar kon sabi en presi. Yehovah sobun ben musu leri en ete wan les. Agen wan dren ben de baka ini a tori èn agen nowan fu den koniman fu Babylon ben man fu puru en. Te fu kaba den ben seni kari Daniël èn en ben man fu ferteri a kownu san a dren ben wani taki, dati wani taki taki a ben sa libi seibi yari lei „den meti fu busi” èn dan ben sa kisi en gesontu frustan baka. — Daniël 4:1-37.
13 Ini fa sani waka morofara kon a krin taki na dren no ben abi na krakti di a ben mu abi tapu Nebukadnezar fu kisi ensrefi. So wan yari a baka a kownu ben gafa di a ben e waka lontu psa ini en kownu paleisi: „A no disi na a Bigi Babylon di mi ben bow gi na kownu oso, nanga na tranga fu mi makti èn gi na wartifasi fu mi glori?” Fa disi ben de wan bigifasi. Èn na so tapu a srefi momenti dati wan sten ben de fu yere fu hemel di ben taigi na heimemre tiriman taki en kownukondre ben sa teki puru fu en èn taki a ben sa tan fu wan pisten fu seibi ten a mindri den meti fu busi, „teleki yu sabi taki a Moro heiwan de na tiriman na ini na kownukondre fu libisma”. — Daniël 4:30-32.
14. Fa na dren fu a bon ben kontru, èn nanga sortu krakti tapu Nebukadnezar?
14 Bakadi Nebukadnezar ben libi den seibi ten, ofu yari dati leki wan meti, dan Yehovah ben gi en en gesontu frustan baka èn a ben mu erken ’taki nowan sma kan tapu na anu fu na Moro heiwan ofu kan taigi en: „San yu ben du?”’ Ma moro ete, na tiriman fu Babylon ben sori taki a ben leri a les fu en now, fudi a ben taki: „Now mi, Nebukadnezar e gafa èn e opo èn e prijse na kownu fu hemel, fudi ala en wroko na waarheid èn en pasi na geregtigheid, èn fudi a kan lagi den wan di e waka na ini bigi memre” — soleki na kownu ben du. Ala den sortu kotoigi disi di e go fu na fasi fa Yehovah furutron ben koti den trobi fu na afersi fu soevereiniteit no de tapu densrefi wan tranga indirekt bewijsi taki den tori disi no komoto fu wan sma denki ma de a wroko fu wan skrifiman di ben kisi a yeye fu Gado fu skrifi trutru historia? — Daniël 4:35, 37.
Belsazar e si na anu skrifi tapu na Skotu
15. Fa Belsazar ben feragti na tru Gado, Yehovah?
15 Wan tra tiriman di Yehovah ben feni en fanowdu fu leri en wan les ben de Belsazar. A ben de na man pikin ofu kompe tiriman fu kownu Nabonidus di ensrefi ben de wan sma di ben teki a presi abra fu Nebukadnezar. Na wan bigi fesanyanyan, Belsazar ben abi na bigi memre fu tyari den gowtu patu nanga kan kon na ini di en granpapa ben teki puru na ini Yehovah tempel na ini Yerusalem sodati en, en bigiman fu a kondre, en uma nanga en bij-uma ben kan dringi ini dati. Na so „den ben dringi win, èn den ben gafa den gado fu gowtu, èn fu solfru kopro, isri, udu nanga ston.” — Daniël 5:3, 4.
16, 17. (a) Nanga yepi fu san Yehovah ben tyari frede kon tapu Belsazar? (b) San Daniël ben ferteri taki na anuskrifi tapu na skotu ben wani taki, èn fa a ben kontru?
16 A ten fu Gado ben kon fu tyari wan kaba kon na a tiri makti fu Babylon. Fu dat’ede meki a ben meki wan freemde anuskrifi kon sori ensrefi tapu a skotu. A wondru disi ben bruya na kownu so kefarlek taki wantewante a ben seni kari den koniman fu en fu tyari a tori kon a krin. Nowan fu den ben kan du disi. Ne en mama ben memre en taki Daniël di ben tyari den dren fu Nebukadnezar kon na krin, ben sa man fu tyari na anuskrifi kon na krin (Daniël 5:10-12). Di den ben seni kari Daniël èn den ben aksi en ofu a ben kan du disi, a ben memre na tiriman fa Gado ben lagi en bigi memre granpapa sodati a ben sa sabi taki a Moro hei Tiriman de ini na kownukondre fu libisma. — Daniël 5:20, 21.
17 Daniël ben ferteri Belsazar morofara: „Na Gado di yu bro de na ini en anu èn di ala yu pasi de na en, yu no ben gi glori” (Daniël 5:23). Èn na so na tiriman fu Babylon e kisi fu yere nanga yepi fu na anuskrifi taki den dei fu en kownuwroko ben kon na wan kaba, taki den ben wegi en èn ben feni en lekti; èn dati en kownukondre ben sa gi na den Mediasma èn den Persisma. Èn na ini na srefi neti dati, bakadi Yehovah ben leri na heimemre tiriman disi na fanowdu les disi, den ben kiri Belsasar, na Chaldew kownu. — Daniël 5:30.
18. Nnaga yepi fu san Yehovah sa leri den disi ten grontapu tiriman na srefi sortu les disi ini a tori fu en Soevereiniteit èn makti fu ferlusu sma?
18 Net soleki Yehovah ben leri den bigimemre tiriman Nebukadnezar nanga Belsazar a les fu den fu en soevereiniteit èn makti fu ferlusu sma, so a sa sorgu na ini Armageddon taki ala grontapu tiriman sabi taki en de na Moro hei Tiriman, na Almakti Universele Soeverein. A sa abi krakti tapu yu libi. Fa? Fudi Yehovah ooktu na ini a ten dati sa fri en getrow dienstknegti, net soleki a ben fri den dri Hebrewman komoto fu na faya onfu. — Daniël 3:26-30.
Darius e leri sabi Yehovah makti fu ferlusu sma
19, 20. Sortu sani di ben psa ini a libi fu Daniël ben gi Darius leri fu Yehovah makti fu ferlusu sma?
19 Daniël kapitel 6 e ferteri fu wan tra tori taki Yehovah ben leri wan tiriman, Darius wan les — wan les di e go fu Gado makti fu ferlusu sma. Wan komplot ben meki a psa taki a kownu ben meki den trowe Daniël go na ini wan lewolo, wan sani san na tiriman dati no ben wani kwetkweti. A no ben de wan sma di ben opo ensrefi nanga heimemre teige na tru Gado. A de wan moi sani fu si taki aladi Darius ben dyaranti Daniël taki en Gado ben sa fri en, taki ensrefi te yu luku en bun no ben e bribi dati krinkrin. Noso fu san-ede a no ben man fu sribi a neti dati èn ben broko en ede te leki deibroko, di a ben lon go na a lew olo? Di a ben bari taki: „O Daniël, dinari fu na libi Gado, na Gado fu yu di yu e dini nanga stanfaste fasi, ben kan ferlusu yu fu den lew?” — Daniël 6:8-20.
20 Ija, Gado ben man fu kibri Daniël. Kownu Darius ben prisiri sote taki a ben gi na komando: „Ini ibri kontren fu mi kownukondre den sma [mu] beifi èn frede gi na Gado fu Daniël . . . bika en na a libi Gado èn a Sma di e tan te ten di no abi marki, èn en kownukondre na wan di no sa brokosaka . . . En e ferlusu èn e fri sma èn e du marki èn wondru na ini hemel èn na grontapu, bika a ben ferlusu Daniël komoto fu den anu fu den lew.” — Daniël 6:26, 27.
21. (a) Den fosi siksi kapitel fu a buku Daniël e gi tumsi moi eksempre fu sortu sani? (b) Sortu krakti na bericht fu den sani disi musu abi tapu wi?
21 Den fosi siksi kapitel fu na buku fu Daniël e gi wi trutru moi eksempre fu fa Yehovah na ini en faya — iya, ini dyarusu — gi en nen ben leri makti tiriman fu na grontapu disi na les taki en futru de na Almaktiwan, na Universele Soeverein, di man fu lagi heimemre tiriman aladi a e fri en loyaal dienstknegti. Den tori disi mu furu wi nanga wan gesontu frede gi Gado èn respeki gi Yehovah Almakti nanga en Soevereiniteit. Na asrefi ten na bericht disi ondro na krakti fu santa yeye de wan di e tranga wi bribi fudi a e gi tumsi moi eksempre fu dienstknegti fu Yehovah Gado di ben sori wan bigi bribi èn bigi dek’ati, soleki na tra artikel sa meki wi si.
San yu ben sa piki?
◻ Sortu leri Yehovah ben mu leri grontapu tiriman?
◻ San wi kan taki fu na tru fasi fu na buku Daniël?
◻ San ben de a les di ben lagi morofara kownu Nebukadnezar?
◻ Sortu krakti a mu abi tapu wi taki Yehovah ben leri tiriman wan les?