Kado di fiti fu gi wan kownu

SORTU kado yu ben o gi wan sma di prenspari gi yu? Na ini Bijbel ten son switismeri sani ben diri leki gowtu. Den ben warti so te, taki sma ben e si den leki kado di fiti fu gi wan kownu. Dati meki tu fu den kado di den lukuman ben gi a „kownu fu den Dyu”, ben de switismeri sani.​—Mateyus 2:1, 2, 11.

Bijbel e taki tu taki di na umakownu fu Skeba ben go luku Salomo, a gi en „fo dusun wán hondro nanga fo kilo gowtu, bun furu balsem-oli, nanga diriston. Noiti moro wan sma gi Kownu Salomo so furu balsem-oli leki san na umakownu fu Skeiba gi en” (2 Kroniki 9:9).a Tra kownu ben seni balsem-oli gi Salomo tu fu sori en taki den ben wani taki sani waka bun nanga en.​—2 Kroniki 9:23, 24.

Fu san ede switismeri sani ben diri so na ini Bijbel ten? Fu di sma ben e du difrenti sani nanga den. Den ben e gebroiki den gi den skin, na ini na anbegi èn te den ben e beri sma. (Luku a faki „A fasi fa sma ben e gebroiki switismeri sani na ini Bijbel ten”.) Boiti taki furu sma ben lobi gebroiki den sani disi, den ben diri tu fu di sma ben e meki furu kostu fu seni teki den.

SMA BEN MUSU ABRA NA ARABIA-SABANA

Na ini Bijbel ten son switismeri-wiwiri ben e gro na Yordan-lagipresi. Ma den wan di no ben e gro drape, sma ben e seni teki. Bijbel e taki fu difrenti switismeri sani. Wan tu fu den di kari furu na safraan, aluwe, balsem-oli, kaneri, wierook, nanga mirre. Boiti den sani disi, Bijbel e taki tu fu switismeri spesrei di sma ben e gebroiki na ini nyanyan. Dati na sani soleki dyira, menti-wiwiri, nanga dille-wiwiri.

Pe sma ben e feni den switismeri sani disi? Aluwe, kasia, nanga kaneri den ben e feni na ini kondre di sma sabi now leki China, India, nanga Sri Lanka. Switismeri sani soleki mirre nanga wierook sma ben e feni na ini bon nanga prani di ben e gro na den sabana fu Zuid Arabia te go miti Somalia na ini Afrika. Nardus-wiwiri nanga tra sortu switismeri-wiwiri sma ben e feni soso na ini India na den Himalaya-bergi.

Fu man tyari switismeri sani go na ini Israel, sma ben musu abra a kontren fu Arabia. Disi na wan fu den sani di meki taki na ini a pisi ten fu a yari 2000 te go miti 1000 Fosi Krestes, Arabia kon tron „a moro prenspari bisnis kondre di ben e tyari sani go seri na den owstusei kondre nanga den west-sei kondre”, na so wan buku e taki (The Book of Spices). Na a Negeb-sabana na a zuidsei fu Israel, sabiman feni owruten foto, fortresi, nanga presi pe bisnisman ben e stop so taki den kameili fu den ben kan dringi watra. Den sani disi e sori sortu pasi bisnisman ben e teki fu go seri switismeri sani. Den foto nanga den presi disi e sori tu taki „den bisnisman di ben e komoto fu Zuid Arabia go na a Mindrikondre Se . . . ben e meki furu moni”, na so wan raportu e taki (World Heritage Centre of UNESCO).

Nofo tron den bisnisman di ben e tyari den switismeri sani disi go seri ben musu teki waka sowan 1800 kilometer pasa Arabia (Yob 6:19). Bijbel e taki fu wan grupu Ismaelsma di ben komoto fu Gilead go na Egepte. Den ben lai den kameili fu den nanga „ladanum-tara, balsem-oli èn bonbuba di e puru tara” (Genesis 37:25). Den manpikin fu Yakob ben seri den brada Yosef leki srafu gi den bisnisman disi.