Yesus e taki: „Wan man ben de di ben gudu èn a ben e weri soso diri redi-paars krosi nanga diri linnen krosi. Ibri dei a ben e meki prisiri èn a ben libi bigi. Ma wan man Lasarus ben de tu di ben e begi sma sani. Den ben gwenti poti en na a portu fu a gudu man. En heri skin ben lai soro. A ben winsi taki a ben kan furu en bere nanga den sani di ben fadon komoto fu a tafra fu a gudu man. Srefi den dagu ben kon fu leki den soro fu en.”​—Lukas 16:19-21.

Fa den gudu, heimemre fesiman disi e si den pôtiwan nanga den mofinawan? Fu di den e wisiwasi den sma disi, meki den e si den leki amharets, noso sma fu a gron (noso a doti). Den Fariseiman disi feni taki den sma disi no sabi a Wet èn den no warti fu kon sabi a Wet (Yohanes 7:49). Na dati ben de a situwâsi fu a ’man Lasarus di ben e begi sma sani’. A man disi ben winsi taki a ben kan furu en bere nanga „den sani di ben fadon komoto fu a tafra fu a gudu man”. Den mofinasma de leki Lasarus di abi soro na en heri skin. Den kerki fesiman e wisiwasi den sma disi fu di den e si den leki sma di Gado no feni bun.