Fa Yehovah Sa Memre Yu?

„MEMRE mi, o mi Gado.” Furu leisi Nehemia ben begi Gado nanga den wortu disi (Nehemia 5:19; 13:14, 31). A de wan gewoon sani te sma di de na ini banawtu e begi fu suku yepi na Gado nanga den wortu dati.

Ma san sma abi na prakseri te den e aksi Gado fu memre den? A de krin taki den e howpu taki Gado sa du moro leki nomo fu memre a nen fu den nomo. Den e howpu na a srefi fasi leki wan fu den ogriman di sma ben kiri na sei Yesus. Tra fasi leki a trawan, a man disi ben begi Yesus: „Memre mi te yu kon na ini yu kownukondre.” A no ben wani wawan taki Yesus ben musu memre suma a ben de, ma so srefi fu du wan sani gi en — fu opo en baka.—Lukas 23:42.

Doronomo Bijbel e sori taki te Gado „e memre”, dan dati wani taki dati a e du bun sani. Fu eksempre, baka di a frudu ben tapu grontapu gi 150 dei, „Gado ben memre Noa . . . , èn Gado ben meki wan winti pasa na tapu grontapu, èn a watra ben bigin saka” (Genesis 8:1). Furu yarihondro na baka, Samson, di sma ben breni èn di den Filistijnsma ben tai nanga keti, ben begi: „Yehovah, memre mi grantangi, èn tranga mi grantangi, disi leisi wawan.” Yehovah ben memre Samson di a ben gi Samson krakti moro di fu libisma, so taki a ben kan teki refensi gi ensrefi teige den feanti fu Gado (Krutubakra 16:28-30). Èn na ini a kefal fu Nehemia, Yehovah ben blesi a tranga wroko fu en, èn a tru anbegi ben kon bun baka na ini Yerusalem.

„Ala sani di ben skrifi fositen ben skrifi fu gi wi leri, taki nanga a hori di wi e horidoro èn nanga a trowstu fu den Buku fu Bijbel, wi ben sa abi howpu”, na apostel Paulus ben skrifi (Romesma 15:4). Te wi e memre Yehovah fu di wi e du muiti fu du a wani fu en, soleki fa den getrow futuboi fu en ben du na ini a ten di pasa, dan wi kan abi a frutrow taki Yehovah sa memre wi fu di a e yepi wi fu kisi den sani di wi abi ala dei fanowdu, fu di a e horibaka gi wi na ini den tesi fu wi, èn fu di a e frulusu wi te a e strafu den godelowsuwan.—Mateus 6:33; 2 Petrus 2:9.