MWBR18 05 Verwijzing gi Kresten libi nanga preikiwroko Studie-buku

7-13 MEI

GUDU NA INI GADO WORTU | MARKUS 7, 8

„Teki yu pinapostu èn tan waka na mi baka”

(Markus 8:34) Dan a kari den sma nanga den disipel fu en kon na en èn a taigi den: „Efu wan sma wani kon na mi baka, dan a no musu teri ensrefi moro, ma a musu teki en pinapostu èn a musu tan waka na mi baka.

nwtsty ete wan tu sani na Mr 8:34

a no musu teri ensrefi moro: Den wortu disi e sori taki wan sma no wani libi gi ensrefi moro, noso a wani taki Gado musu sori en fa a musu libi. Na ini Grikitongo den wortu disi wani taki tu dati wan sma no e du san en srefi wani, san a lobi, noso san makriki gi en (2Kor 5:14, 15). Markus e gebroiki a srefi Griki wortu te a e fruteri fa Petrus ben taki dati a no sabi Yesus.​—Mr 14:30, 31, 72.

14-20 MEI

GUDU NA INI GADO WORTU | MARKUS 9, 10

„Wan fisyun di e tranga a bribi fu wi”

(Markus 9:7) Ne wan wolku kon èn a tapu den. Dan wan sten ben de fu yere na ini a wolku. A ben taki: „Disi na mi Manpikin, a lobiwan. Un arki en.”

nwtsty ete wan tu sani na Mr 9:7

wan sten: Disi na a di fu tu fu den dri leisi pe den Evangelietori e sori taki Yehovah e taki langalanga nanga libisma.​—Yoh 12:28; Luku ete wan tu sani na Mr 1:11, mwbr18.04 3.

Diki moro dipi

(Markus 10:17, 18) Di a ben de na pasi e gowe, wan man lon kon na en. A saka kindi na fesi Yesus èn a aksi en: „Bun Leriman, san mi musu du fu kisi têgo libi?” ¹⁸ Yesus taigi a man: „Fu san ede yu e taki dati mi bun? Nowan sma bun. A wan-enkri sma di bun, na Gado.

nwtsty ete wan tu sani na Mr 10:17, 18

Bun Leriman: Soleki fa a sori dan a man ben gebroiki den wortu „Bun Leriman” leki wan titel èn fu meki Yesus firi bun, fu di na so den kerki fesiman ben wani taki sma du nanga den. Aladi Yesus ben feni en bun taki sma ben e kari en „Leriman” nanga „Masra” (Yoh 13:13), toku a ben gi ala grani na en Papa.

Nowan sma bun. A wan-enkri sma di bun, na Gado: Dyaso Yesus e sori taki Yehovah na a wan-enkri sma di bun. Dati meki na en wawan abi a reti fu taki san bun èn san no bun. Di Adam nanga Eva opo densrefi teige Gado èn nyan fu a bon fu ’Sabi san bun èn san ogri’, dan den sori taki den ben wani bosroiti gi densrefi san bun èn san no bun. Ma tra fasi leki den, Yesus abi sakafasi èn a e meki en Papa bosroiti san bun èn san ogri. Gado e gebroiki den wet nanga gronprakseri di de na ini en Wortu fu leri wi san bun.​—Mr 10:19.

WI KRESTEN LIBI

„San Gado tyari kon na wan . . .”

(Markus 10:4) Den taki: „Moses gi primisi fu skrifi wan papira di e sori taki a masra seni en wefi gowe èn taki a broko trow nanga en.”

(Markus 10:11) A taigi den: „Efu wan man broko trow nanga en wefi èn a trow nanga wan tra uma, dan a du sutadu èn a sondu teige a wefi.

nwtsty ete wan tu sani na Mr 10:4, 11

wan papira di e sori taki a masra seni en wefi gowe: noso „wan brokotrow papira”. A wet ben e taki dati wan man di ben wan brokotrow nanga a wefi fu en ben musu seti wan lantipapira di ben e horibaka gi en, èn soleki fa a sori a ben musu go taki fu a tori nanga den owruman fu a ten dati. A sani disi ben e gi a man na okasi fu prakseri efu a ben wani broko a trow trutru. Soleki fa a sori dan a wet disi ben musu sorgu taki sma no ben o bosroiti fu brokotrow lawlaw èn na a fasi disi a wet ben e kibri den reti fu umasma (De 24:1). Ma na ini a ten fu Yesus den kerki fesiman ben meki en makriki gi sma fu brokotrow. A historia skrifiman Josephus fu a fosi yarihondro, ben de wan Fariseiman tu di ben broko trow. En ben feni taki a no ben fowtu fu brokotrow „fu ala sortu sani ede (èn den man-nengre ben abi ala sortu sani fu san ede den ben e brokotrow)”.​—Luku ete wan tu sani na Mt 5:31.

man broko trow nanga en wefi: noso „seni en wefi gowe”. Te wi e leisi den wortu fu Yesus soleki fa Markus skrifi den, dan wi musu hori na prakseri tu san skrifi na Mt 19:9, pe wi kan leisi moro fu a tori. Drape yu e leisi den wortu „ma a wefi no du hurudu”. (Luku ete wan tu sani na Mt 5:32.) Te wan sma ben wani brokotrow soleki fa Markus skrifi, dan dati ben kan pasa soso efu a sma ben „du hurudu” (Grikitongo, porneya), dati na te a wán trowpatna waka gi a trawan.

dan a du sutadu: Yesus e sori dyaso taki a no ben e agri kwetikweti nanga a denki fu den leriman fu a ten dati di ben feni taki wan man ben kan broko a trow nanga en wefi „fu ala sortu sani ede” (Mt 19:3, 9). Furu fu den Dyu no ben gwenti si a sani disi leki sutadu teige na uma. Den leriman ben e prakseri taki wan mansma noiti no ben kan du sutadu teige a wefi fu en. Gi den, sutadu ben de soso te wan frow ben waka gi en masra. Ma di Yesus sori den taki wan masra ben abi a srefi frantwortu na ini a trowlibi leki a wefi fu en, dan a sori nanga dati taki sma musu abi lespeki gi umasma èn taki den no ben musu si den leki soso sani.

(Mateyus 5:31) Den taki tu: ’A sma di broko trow nanga en wefi, musu gi a wefi wan papira pe skrifi taki a broko a trow nanga en.’

(Mateyus 5:32) Ma mi e taigi unu taki efu wan man broko trow nanga en wefi, ma a no fu hurudu ede, dan a e gi en wefi na okasi fu go du sutadu. Sosrefi, efu wan man trow nanga so wan uma, dan a e du sutadu.

nwtsty ete wan tu sani na Mt 5:31, 32

wan papira pe skrifi taki a broko a trow: A wet di Gado ben gi Moses no ben e gi sma deki-ati fu brokotrow. A papira pe skrifi taki a sma broko a trow ben de fu no meki den broko trow tumusi gaw èn fu kibri den umasma (De 24:1). Soleki fa a sori dan wan masra di ben wani meki sowan papira ben musu go taki fosi nanga den man di ben abi a frantwortu. Den man disi ben kan taki nanga a man nanga en uma fu den meki en bun baka.

hurudu: A Griki wortu porneya abi fu du nanga sma di abi seks na wan fasi di no e kruderi nanga san Bijbel e taki. A abi fu du nanga sutadu, sma di e seri den skin fu meki trawan abi seks nanga den, sma di abi seks aladi den no trow, homo sekslibi, nanga sma di abi seks nanga meti.​—Luku „Moro sani” 12.

21-27 MEI

GUDU NA INI GADO WORTU | MARKUS 11, 12

„A poti moro leki ala den sma”

(Markus 12:41, 42) Dan a go sidon pe a ben kan si den monikisi èn a ben luku fa den sma ben e poti moni na ini den monikisi. Wan lo gudu sma ben e poti furu moni na ini. ⁴² Ma wan pôti uma di en masra ben dede kaba, kon drape èn a poti tu sensi di no ben warti furu.

nwtsty ete wan tu sani na Mr 12:41, 42

monikisi: Soleki fa den owruten buku fu den Dyu e taki, den monikisi disi ben bradi na ondrosei èn den ben smara na loktusei neleki trompeti noso tutu. Yu ben abi difrenti kisi pe sma ben kan poti moni na ini di den ben e gebroiki gi difrenti sani. A Griki wortu di gebroiki dyaso de tu na Yoh 8:20, pe a vertaal nanga „a presi pe den ben e kibri a moni”. Soleki fa a sori, den wortu disi abi fu du nanga wan pisi fu a tempel dyari di den ben kari ’A Dyari fu den umasma’. (Luku sgd Pisi 15.) Soleki fa den buku fu den Dyu leriman e sori, 13 monikisi ben de na difrenti presi na sei a skotu fu a dyari. Wan moro bigi kamra ben de tu na ini a tempel pe sma ben e poti a moni di den ben puru na ini den monikisi.

tu sensi: Na ini Grikitongo disi wan taki „tu lepta”. A Griki wortu „lepta” wani taki moro leki wán lepton. Lepton wani taki wan sani di pikin èn di plata. Soleki fa a sori, wán lepton ben de a moro pikin kopro moni di sma ben gebroiki na ini Israel èn 128 lepton ben abi a srefi waarde leki wán denari.​—Luku sgd Pisi 18.

di no ben warti furu: Noso „wan kwadrans”. Na ini Grikitongo kodrantes (fu a Latijn wortu kwadrans) na wan kopro moni fu Rome èn 64 kwadrans ben de a srefi leki wán denari. Dyaso Markus e gebroiki a moni fu den Romesma fu fruklari san ben de a waarde fu a moni di den Dyu ben gwenti gebroiki.​—Luku sgd Pisi 18.

Diki moro dipi

(Markus 11:17) A ben e leri sma: „A no de so, taki Gado Buku taki: ’Sma o kari mi oso, wan oso pe sma fu ala kondre e kon begi’? Ma unu meki a kon tron wan presi pe fufuruman e tan.”

nwtsty ete wan tu sani na Mr 11:17

wan oso pe sma fu ala kondre e kon begi: Fu den dri Evangelie skrifiman di e gebroiki den wortu fu Yes 56:7, Markus wawan e gebroiki den wortu „sma fu ala kondre [pipel]” (Mt 21:13; Lu 19:46). A tempel na ini Yerusalem ben de wan presi pe Israelsma nanga trakondre sma di ben lespeki Gado ben kan dini Yehovah èn begi en (1Kw 8:41-43). Yesus ben abi leti fu krutu den Dyu di ben e gebroiki a tempel fu du bisnis. Den ben meki a tron wan presi pe fufuruman e tan. Disi ben meki taki sma fu ala kondre no ben wani kon na a tempel fu begi Yehovah, so taki den no ben man kon sabi en.

28 MEI–3 YUNI

GUDU NA INI GADO WORTU | MARKUS 13, 14

„No frede libisma”

(Markus 14:47) Ma wan fu den sma di ben e tanapu drape hari en feti-owru, dan a koti a yesi fu a srafu fu a granpriester puru.

(Markus 14:54) Petrus ben waka na en baka te na a dyari fu a granpriester, ma a ben tan bun fara. Dan a go sidon nanga den futuboi fu na oso fu waran en skin na wan bigi faya.

(Markus 14:66-72) Disiten, Petrus ben de na ini a dyari di wan fu den umasrafu fu a granpriester kon. ⁶⁷ Di a si Petrus e waran en skin, a luku en langalanga èn a taki: „Yu ben de tu nanga a Yesus disi fu Nasaret.” ⁶⁸ Ma Petrus taki dati a no tru. A taki: „Mi no sabi en èn mi no sabi san yu e taki.” Dan a go na dorosei na ini a birti fu a portu. ⁶⁹ Di na umasrafu si en drape, a bigin taigi den sma baka di ben e tanapu drape: „En na wan fu den.” ⁷⁰ Agen Petrus taki dati a no tru. Baka wan pisi ten den sma di ben e tanapu drape, taigi Petrus ete wan leisi: „A tru taki yu na wan fu den, bika yu na wan Galileasma.” ⁷¹ Ma Petrus bigin fluku èn a sweri: „Mi no sabi a man disi di unu e taki fu en!” ⁷² Wantewante wan kakafowru bari a di fu tu tron, dan Petrus memre san Yesus ben taigi en: „Bifo wan kakafowru bari tu tron, yu o taki dri leisi taki yu no sabi mi.” Ne a bari krei.

it-2-O 601 ¶4

Petrus

Wan tra disipel yepi Petrus. Kande a waka na en baka noso kande a waka makandra nanga en di Petrus ben e go na a oso fu a granpriester. Ne Petrus waka langalanga go na ini a fesidyari (Yoh 18:15, 16). A no tan pî na wan dungru uku fu a dyari, ma a waka go waran en skin na a faya di ben drape. A leti fu a faya disi ben meki taki sma ben man si en fesi. Na so den si taki en ben de wan fu den mati fu Yesus èn fu di a ben e taki leki den Galileasma meki den ben bribi moro taki a ben de wan fu den mati fu Yesus trutru. Di den taki dati, dan Petrus piki den dri leisi taki a no sabi Yesus. Te fu kaba a bigin kosi den sma taki san den ben e taki no tru. Ne wan kakafowru na ini a foto bari wan di fu tu leisi, dan Yesus „drai luku Petrus”. Ne Petrus go na dorosei, a ben brokosaka srefisrefi, èn a krei nanga bigi sari (Mt 26:69-75; Mr 14:66-72; Lu 22:54-62; Yoh 18:17, 18). Ma Gado arki Yesus di a ben begi taki Petrus no lasi a bribi fu en krinkrin.​—Lu 22:31, 32.