Joe abi na denki foe Kristus?
„Meki now na Gado di e gi horidoro nanga trowstoe, gi dati oenoe a mindri makandra abi na srefi jejefasi di Kristus ben abi.” — ROMEINI 15:5.
1. Efoe wan sma taki dati a de wan kristen, sortoe aksi moe kisi wan piki dan?
MORO LEKI wan miljard sma na a heri grontapoe den e kari kristen. San wi kan ferstan foe disi? Dati a wans fa a no fa den abi na nen taki den e bribi na ini Jezus Kristus èn dati den e taki dati den de en bakaman, ofoe discipel (Mattéus 10:24, 25). San de fanowdoe foe waka baka na eksempre, ofoe model foe libi foe Kristus? A de krin dati joe moesoe sabi en. Joe de wan sma di sabi Jezus foe Nazareth troetroe? Joe abi wan krin ferstan foe sortoe sma a ben de di a ben de dja na grontapoe? Èn fa a ben doe na ondro difrenti omstandigheden te a ben de nanga sma? Joe abi „na denki foe Kristus”? — 1 Korinte 2:16; Efese 4:13.
2, 3. Fa wi kan leri sabi na denki foe Kristus?
2 Fa wi kan leri sabi wan sma di pikinmoro toe doesoen jari pasa kaba ben libi èn foe soema na publiki libi foe en soso foe wan pisten foe sowan dri nanga afoe jari a teki? Foe a sé foe Jezus joe abi fo betrouwbaar historia di e go foe en libi sodati wi e kisi jepi foe kan si sortoe sma a ben de. Te wi lési den fo evangeliumtori disi, dan wi kan si ooktoe sortoe denki ben e de baka den doe foe en. San de foe dat’ede fanowdoe foe de wan troetroe kristen na presi foe de soso wan nen-kristen? Jezus ben tjari en kon na a fasi disi ondro wortoe: „Disi wani taki na libi foe tego dati den e teki doronomo sabi ini den foe joe, na wan enkri troe Gado, èn foe en di joe ben seni kon, Jezus Kristus.” — Johannes 17:3; 2 Petrus 3:18.
3 Foe dat’ede meki ibri kristen moe abi wan dipi sabi èn boen ferstan foe na Tata, Jehovah, èn na leri foe na Manpikin, Kristus Jezus. A no de nofo foe joe kari joesrefi wan kristen Kotoigi foe Jehovah. Foe kan abi na denki foe Kristus dan geregeld wi moe meki a libi nanga eksempre foe Jezus de wan tori di wi e go denki foe en. Disi wani taki dati geregeld wi moe meki wan finifini studie foe na bijbel nanga jepi foe bijbelstudie jepisani di e trowe leti na tapoe na verband foe bijbelpresi èn san den wani taki. A e aksi ooktoe wan joisti jejefasi, sodati wi kan ferstan èn teki na rol foe Kristus na ini na prakseri foe Gado. — Johannes 5:39-47.
Wan man nanga firi
4. Sortoe man Jezus ben de?
4 Jezus, wan gosontoe èn actief man ben de na ini en 30-jari di a ben doe en diniwroko (Lukas 3:23). Ma sortoe man a ben de? A ben de wan man sondro firi èn di e horl ensrefi farawe foe sma? Kontrari foe disi, leki wan djoe di ben gro na ini na Mindri-Oostoe a ben de expressief, a ben tjari en firi kon a doro. Sani no ben skotoe en èn a no ben de wan sma di en prakseri ben tjari go na inisé. Na publiki a ben sori wan lo foe libisma emotie, foe bigin nanga sari èn sari-ati te go miti regtvaardiki atibron èn faja-ati. — Markus 6:34; Mattéus 23:13-36.
5. Fa Jezus ben doe di a ben jere dati Lazarus ben dede?
5 Fa Jezus ben doe foe eksempre di a ben si taki Martha nanga Maria ben e kré foe a lasi foe a brada foe den, Lazarus. A tori na ini Johannes e taigi wi: „A sani ben boewégi en dipi èn a ben de foe si, èn a ben sari na ini jeje” èn a „bari kré” (Johannes 11:33-36, The New Testament, foe na anoe foe William Barcley). A ben meki den krosbé mati dati si den firi foe en. A no ben sjen foe kré makandra nanga den. Aladi a ben de na „Manpikin foe Gado”, tokoe na fesi foe ala sma a ben sori libisma firi srefsrefi (Johannes 1:34). Fa disi ben moesoe boewégi Martha nanga Maria! — Teki gersi nanga Lukas 19:41-44.
6. Foe san-ede a no ben de wan sori dati Jezus no ben de wan man di a ben kré?
6 Ma kande wantoe sma na ini a ten disi e kon na a bosroiti dati Jezus ben de wan swaki sma foedi na publiki a ben kré makandra nanga den oema dati. Na katholiek skrifiman Hilaire Belloc ben kari Jezus srefi wan „krélobi”. Dati de so? Jezus ben de na sortoe sma di no ben de leki wan man èn di nofotron de foe si na ini den skedré foe na kristenheid? Nono, watra-ai no de noodzakelijkerwijs wan marki foe swakifasi. Ini wan bepaalde datra tljdschrift den e taki disi foe en: „A no de logis èn a e doe ogri foe tapoe a sori foe safoe firi di fiti . . . A sori foe firi foe safoefasi, spesroetoe kré, de wan aparti marki di de na libisma.” — Teki gersi nanga 2 Samuël 13:36-38; Johannes 11:35.
7. Na sortoe fasi na eksempre foe Jezus fa a ben lobi sma kan de wan jepi gi wi na ini a ten disi?
7 Na fasi fa Jezus ben doe tapoe a si foe pina, ben de troetroe leki wan libisma èn a sori taki a lobi libisma. Den e jepi wi foe meki wisrefi kon de wan nanga en èn nanga en jejefasi. W no e waka na baka wan ofoe tra mythologis figuur, di de sondro firi, ma morofoeroe na baka na volmaakti libisma eksempre di Gado ben seni kon, „na Manpikin foe na libi Gado” (Mattéus 16:16; Johannes 3:16, 17; 6:68, 69). Fa disi de wan model gi ala kristen na ini a ten disi, spesroetoe gi kristen owroeman, di nofotron moe gi trowstoe èn foe sori empathie te sma foe asrefi bribi kisi wan hebi lasi ofoe kon de ondro druk! Ija, foe abi na den sortoe okasi dati na jejefasi èn na ati foe Kristus kan meki wan difrenti! — 1 Thessalonica 2:7, 8.
Wan dekati man foe doe
8. Fa Jezus ben sori dekati èn wan opo doe sani sondro frede?
8 Jezus ben sori ooktoe dati a ben de wan man nanga wan dekati overtoigi èn wan dinamis persoonlijkheid. Na toe okasi foe eksempre, a ben poeroe den bisnis man foe meti èn den sma di ben e kenki moni nanga tranga foe na tempel (Markus 11:15-17; Johannes 2:13-17). A no ben frede foe poeroe na publiki na hoigrifasi kon a doro foe den meester foe wet nanga Fariséman di ben feni densrefi regtvaardiki. Ini en dekati kroetoe na fesi foe ala sma a ben warskow: „Heloe foe oenoe, oen meester foe wet nanga Fariséman, hoigriman! Bika oen gersi den moi grebi di ferfi weti nanga karki, di na dorosé kande sori moi, ma na inisé den foeroe nanga dedebonjo èn nanga ala sortoe sani di no krin.” Seker no wan fasi foe swakifasi ben de foe wi djaso! — Mattéus 23:27, 28; Lukas 13:14-17.
9, 10. (a) Foe san-ede Jezus no ben sondoe di en ati ben bron? (b) Sortoe krakti na eksempre foe Kristus moe abi tapoe wan kristen owroeman?
9 Na atibron foe Jezus ben de wan boewijsi foe a mankeri foe dwengi ensrefi? Petrus, di na a ten foe a diniwroko foe Jezus ben de wan krosbé kompe foe en, ben taki foe en: „A no ben doe no wan sondoe” (1 Petrus 2:22). Na apostel Paulus ben skrifi: „Bika wi no abi leki hépriester wan sma di no kan firi gi den swakifasi foe wi, ma wan sma di netleki wi na alafasi den ben tesi, ma sondro sondoe” (Hebrewsma 4:15). Wan difrenti de foe regtvardiki atibron di joe e dwengi èn faja ati di joe no e dwengi. — Teki gersi Odo 14:17; Efese 4:26.
10 Foe dat’ede meki wan kristen owroeman foe eksempre aladi a no moe „mag foe kisi atibron”, ben sa moe abi na moreel krakti foe man „foe pir’ai gi den sma di e taki tege” èn efoe a de fanowdoe „pir’ai tranga gi den”. A moe de bekwaam foe ’gi pir’ai, foe warskow èn foe fermane’ (Titus 1:7-13; 2 Timóteus 4:1, 2). Bepaalde situatie ben sa kan wiki ooktoe en regtvaardiki atibron, spesroetoe te a si dati na wanfasi, jejefasi ofoe na moreel fasi foe na gemeente e kon ini gevaar srefsrefi. Soleki Paulus ben taki, a de sontron ’fanowdoe foe tapoe na mofo foe den soso takiman nanga bedrigiman foe na jeje’, foedi den „e drai heri oso famiri foe ondro kon a tapoe foe di den e leri sani di den no moe leri foe oneerlijk wini ede”. Foe abi na ini den sortoe geval disi na denki foe Kristus, sa jepi owroeman foe de nanga dekati, nanga balansfasi èn foe no draidrai nanga zaak. — Loekoe 1 Korinte 5:1-5; Openbaring 2:20-23; 3:19.
11. Sortoe aksi abi foe doe nanga na fasi tapoe san wi moe waka na baka Kristus?
11 Di a ben waka lontoe ini Galiléa, Samaria nanga Judéa Jezus ben kon ini kontakti nanga ala sortoe sma — man, oema, pikinnengre, den sikisma èn den sma di ben si den. Fa a ben doe nanga den? A ben sori ensrefi kefarlek prenspari èn a ben hori ensrefi aparti, ofoe joe ben man foe go taki nanga en? A ben man go ini na boeba foe den sma nanga den problema foe den èn den tesi di den ben tanapoe a fesi foe den? A ben de wan sma di no ben man foe gi pardon ofoe a ben abi sari-ati? Den piki tapoe den aksi disi abi foe doe nanga den fasi tapoe san wi moe waka na baka Kristus na ini wi aladé doe èn na ini na fasi fa wi e doe tapoe san tra sma e doe. — Romeini 15:5; Filippi 2:5.
Fa Jezus ben doe nanga pikinnengre?
12. Fa den discipel nanga Jezus ben doe na wan bepaalde okasi nanga pikin?
12 Na ini Markus kapitel 10 den vers 13-16 wi e feni tapoe wan moi fasi fa Jezus ben doe nanga pikinnengre. Drape tanapoe: „Now den sma ben kon foe tjari jongoe pikin kon na en, sodati a ben sa fasi den ma den discipel ben bari den.” Na tori no e ferteri oenoe foe san-ede den discipel ben doe so. A ben de na ini na jari 33 G.T. èn Jezus ben waka komoto foe Galiléa èn waka psa Beréa go na a presi pe a ben sa doe en laatsti publiki diniwroko ini èn lontoe Jeruzalem. Kande den ben prakseri taki Jezus ben de toemsi prenspari ofoe dati a ben abi en toemsi druk foe ben kan broko en ede nanga pikinnengre a pisten dati. Ma ensrefi ben sori taki a ben abi toemsi foeroe foe doe? „Di Jezus ben si disi, en ati ben kon bron èn a ben taigi den [den discipel]: ’Meki den jongoe pikin kon na mi; no proeberi foe tapoe den, bika na den sma di de leki den, na kownoekondre foe Gado de foe den’ . . . èn a ben teki den pikin na ini en anoe èn ben go blesi den, aladi a ben poti en anoe a den tapoe.”
13. Fa den sma ben doe nanga Jezus?
13 We, san wi e leri moro ete foe na denki foe Kristus? A e sori a trangafasi foe en gi den discipel di ben e lasi pasi èn na libismafasi foe en gi den mendriwan. A ben ferstan san ben boewégi den papa nanga mama foe tjari den pikin foe den kon na en. Den ben wani dati a ben sa fasi èn blesi den pikin foe den. Èn san disi e leri wi foe Jezus? Dati den sma no ben e frede en èn no ben de nanga bigi respeki foedi den ben si en so moro bigi leki den. A ben de na asrefi lin leki den, èn den sma ben wani sote foe de na ini a kompani foe en. Srefi den pikin ben firi densrefi fri na en — èn a ben firi ensrefi switi na ini a kompani foe pikinnengre. Sma, makandra nanga pikinnengre e firi densrefi switi na ini na kompani foe joe? — Markus 1:40-42; Mattéus 20:29-34.
14. Soema spesroetoe sma moesoe man go na den èn waka na ini a pistori disi na baka na eksempre foe Jezus?
14 Jezus ben sori waran lobifasi èn switifasi (Markus 9:36, 37). I ben kan go taki nanga en, a ben de opo gi sma. Joe leki wan bakaman foe Kristus abi na denki foe Kristus na ini a tori disi? Kristen opziener di e doe dienst na ini na distrikt-, kring- èn na ini den gemeente èn a tapoe den bijkantoro foe na Wachttoren Genootschap na a heri grontapoe e doe boen foe aksi densrefi: Mi de dogmatis èn no de foe sma drai mi? Ofoe mi e meki tra sma, srefi pikinnengre firi den srefi switi te den de na mi? Mi de wan sma di tra sma troetroe kan kon taki nanga mi? — Odo 12:18; Prékiman 7:8.
Na fasi fa Jezus ben e lolo nanga oemasma
15, 16. Na sortoe fasi Jezus ben de trafasi leki tra djoe ini a tori foe na fasi tapoe san a ben e handri nanga oemasma?
15 Wi leki owroeman, dinari nanga brada ini na kristen gemeente e sori dati wi abi na denki foe Kristus ini a demakandra nanga wi kristen sisa, èn nanga oemasma ini algemeen? Fa Jezus leki wan sma di ben de en wawan sondro foe trow ben doe ondro difrenti omstandigheid te a ben kon ini kontakti nanga den oemasma ini en ten?
16 Ini a gemeenschap dati di man ben de basi foe en dan Jezus ben de wan ongewoon leriman na ini a fasi, dati a ben de klari foe taki nanga oema, srefi nanga oemasma di no ben doedjoe (Johannes 4:7-30). Foe eksempre di a ben de ini wan oso ini na heiden kontren foe Tyrus nanga Sidon wan Griki oema ben aksi efi a ben wani jepi a oemapikin foe en di ogri-jeje ben de a en tapoe. Efoe joe loekoe en boen dan wan orthodox djoe no ben sa bemoei nanga en. Ma Jezus ben arki èn ben tesi na bribi foe en nanga den wortoe disi: „Meki den [djoe] pikin fosi njan den bere foeroe, bikasi a no de wan joisti sani foe teki a brede foe den pikin èn trowe en gi den [heiden] pikin dagoe.” Jezus ben taki na tapoe sowan fasi dati a tori ben kaba gi en? A ben meki ala tra takmakandra moro fara de wan sani di no kan foe na fasi foe en pe a ben hori soso na san a ben bribi? A de krin dati dati no ben de so, bika na oema ben piki nanga tact: „Ija masra, èn tokoe den dagoe e njan na ondro na tafra foe den bredesakasaka foe den pikinnengre”. Jezus ben kon na ondro na indruk èn a ben dresi na oemapikin. — Markus 7:24-30.
17. San wi kan leri foe na fasi tapoe san Jezus ben handri nanga wan bepaalde oema di ben de wan sondari?
17 Jezus ben tan gi na okasi na oemasma foe taki nanga en èn a no ben kroetoe sma na san a ben si na dorosé (Mattéus 22:16). Na wan tra okasi, di a ben e njan na ini na oso foe wan Fariséman, a ben gi pasi dati wan oema, di sma ben sabi leki wan sondari, a kan de dati a ben de wan hoeroe-oema, ben wasi en foetoe èn dan salfoe den nanga oli. Nanga san a oema ben doe, a ben sori dati a ben abi berow foe en sondoe libifasi (Lukas 7:36-50). Jezus no ben taki dati a no ben warti moro èn no ben seni en gwe foedi a ben kroetoe nomo taki a ben de wan hoeroe-oema. (Loekoe ooktoe Johannes 4:7-30.) A ben gi en pardon „bika a ben lobi foeroe”. San disi e sori foe na denki foe Kristus? A ben firi sari gi na oema èn ben sori taki a ben ferstan en problema. Wi no kan handri ooktoe so na ini na gemeente èn na ini wi diniwroko? — Lukas 19:1-10; Romeini 14:10-13; 1 Korinte 6:9-11.
Na fasi fa Jezus ben e handri nanga en discipel
18. (a) Fa son sma e handri nanga sma di e wroko na den ondro? (b) Fa Jezus ben behandel en discipel nanga tra sma? (Markus 6:54-56)
18 Sontron sma di abi wan bepaalde makti e firi leki den sma di de na den ondro de wan kefar gi den. Den e poti nanga tranga na den ondro san den e firi leki wan stré foe kisi a presi foe den. Bigimemre e kon a tapoe. Den e handri esesi foe feni fowtoe a den sma di e wroko a den ondro, èn a no e psa dati esesi wan wortoe foe prijse e kon a tapoe den mofoboeba. Ini den wortoe di e feragti den sma e kon a krin dati den no e respeki na wartifasi foe tra sma. Ma fa a de nanga Jezus — fa a ben handri nanga den sma di de na en ondro, en discipel? A ben gi den a firi dati den de mendri, onbekwaam ofoe don? Ofoe den ben e firi densrefi morofoeroe nanga switi skin ini a wroko makandra foe den nanga Jezus? — Teki gersi nanga Mattéus 11:28-30; 25:14-23.
19. San Johannes 13:1-17 e leri wi foe Jezus?
19 Wan foe den moro aparti leri di Jezus ben gi na tapoe na kontren disi na en discipel, wi e feni na ini Johannes kapitel 13. Wi e aksi joe foe lési vers 1 te go miti 17. Den pasi na ini a ten dati ben de nanga foegoefoegoe santi èn a ben de na gwenti dati wan dienstknegti wasi den foetoe foe den fisitiman. Jezus ben teki na wroko disi tapoe en. Sortoe égifasi a ben meki kon a fesi di a ben wasi den foetoe foe en discipel? A ben gi den wan praktis leri ini sakafasi. San wi e leri dja foe na denki foe Kristus? Den wortoe foe Jezus e gi na piki: „Wan srafoe no de moro bigi leki en meestri, èn ooktoe wan sma di den seni go, de moro bigi leki a sma di ben seni en. Efi oenoe sabi den sani disi, kolokoe oenoe de efi onoe e doe den.” — Johannes 13:16, 17.
20. Fa wi kan ondrosoekoe wisrefi foe si efoe wi abi a denki foe Kristus?
20 Wi abi na ini a pistori disi na denki foe Kristus? Wi de klari foe doe na oso èn ini na gemeente sakafasi èn lagi wroko? Ofoe wi wani doe soso den sani di e gersi „prenspari” ofoe di e meki oen gersi wan „spesroetoe” sma? Wi de klari foe abi wan prati na a wroko di e saka wan sma èn di de ini na préki foe na boen njoensoe oso foe oso? Ofoe wi wani soso prati na tapoe na podium foe na kownoekondrezaal? Ija, te wi abi na denki foe Kristus, dan wi sa de alaten nanga sakafasi èn sma sa kon na wi net soleki a ben de nanga Jezus. — Romeini 12:3.
21. Fa Jezus ben sori taki a e firi gi den apostel foe en? Èn gi na ipi sma?
21 Na wan seker okasi, baka wan spesroetoe prékiwroko-veldtocht, dan Jezus ben sori taki ai hori den apostel na ini prakseri. Aladi Jezus ben de volmaakti, tokoe a no ben e ferwakti volmaatktifasi foe tra sma. Di den ben klari wan bepaalde prékiwrokoveldtocht, a no ben tanapoe a tapoe dati den apostel wantewante baka ben sa go bigin nanga prékiwroko èn ben sa doe moro boen san den kan. A ben hori a fanowdoe foe rostoe foe den na prakseri èn a ben teki den go na wan tiri presi pe den ben sa de den wawan. Ma Jezus ben ferferi èn a ben lasi en pasensi di na ipi sma ben waka kon na en baka? Nono, bika „en ati ben go na den sma”, na so a tori e ferteri oenoe. — Markus 6:30-34, Bigi Njoensoe Bijbel.
22. San sa jepi wi morofara foe ferstan na denki foe Kristus?
22 A de wan ferwondroe sani dati moro foeroe foe den apostel, nanga sowan toemsi moi eksempre ben de den getrow bakaman foe Kristus? Petrus seker ben de ondro na indruk foe den sani di a ben leri foe na krosbé demakandra nanga Jezus. A ben de seker na fonten foe moro foeroe foe den bodoi di Markus ben gebroiki gi en evangeliumtori. Èn safrisafri, ma seker Petrus ben fiti ensrefi na den denki foe Kristus. Wan loekoe foe en fosi brifi sa jepi wi foe waka baka na eksempre foe Kristus moro soifri. — Mattéus 16:15-17, 21-23.
Joe memre den sani disi ete?
◻ Fa wi kan abi na denki foe Kristus?
◻ Sortoe man Jezus ben de?
◻ Fa Jezus ben doe nanga pikinnengre? Èn nanga oemasma?
◻ San wi e leri, foe na fasi tapoe san Jezus ben handri nanga en discipel?
[Prenki na tapoe bladzijde 1]
Jezus ben abi sari-ati èn no ben kibri en firi
[Prenki na tapoe bladzijde 3]
Jezus ben de wan dek’ati man di ben opo doe sani
[Prenki na tapoe bladzijde 5]
Jezus ben gi wan toemsi boen eksempre ini sakafasi